Kasi ‘Mukujiwombolera Nyengo’?

MPOSTOLE Paulos wakapereka urongozgi kwa Ŵakristu ŵa ku Efeso ŵa mu virimika vya mu handiredi lakwamba kuti: ‘Ŵacenjere comene umo ŵakwendera, nga mbambura mahara cara, kweni nga mba mahara; ŵakujiwombolera nyengo, pakuti mazuŵa ghano ngaheni.’ (Ŵaefeso 5:15, 16) Cifukwa wuli urongozgi uwu ukaŵa wakukhumbikwa? Zgoro la fumbo ili likukhumbikwira kuti timanye danka mikhaliro iyo Ŵakristu ŵa ku Efeso ŵakakumananga nayo mu msumba wakale uwu.

Msumba wa Efeso ukamanyikwanga cifukwa ca usambazi, kuzara kwa mikhaliro yiheni, kuswa-marango kwambura mayowoyeko na uciŵanda. Kusazgapo apa, Ŵakristu ŵa ku Efeso ŵakenera kulimbana na vigomezgo vya filosofi vyakukhwaskana na za nyengo. Ŵantu ŵa Cigiriki wa ku Efeso awo ŵakaŵa Ŵakristu cara, ŵakagomezganga cara kuti nyengo yikuya kuntazi kwambura kuwelera nyuma. Filosofi yacigiriki yikaŵasambizga kuti umoyo ukubabikaso ku malo ghanyake usange muntu wafwa. Ndipo filosofi iyo yikayowoyangaso kuti muntu para wasakaza nyengo yake pawaka mu umoyo wake, wakuzakayisangaso nyengo yose iyo mu umoyo wakurondezgapo. Kaghanaghaniro ka mtundu uwu kakenera kuti kakaŵapangiska Ŵakristu ŵa ku Efeso kuŵa na maghanoghano ghakutayirira pakuyowoya za nyengo ya Yehova yakucitira vintu, kusazgapo nyengo yakuŵikika ya ceruzgo ca Ciuta. Ndipouli, urongozgi wa Paulos wakuti ‘ŵajiwombolere nyengo’ ukaŵa wakukhumbikwa.

Paulos wakayowoyanga za nyengo nga ni umo waliyose wakuyimanyira cara. Lizgu la Cigiriki ilo wakagwiriskira ncito likang’anamuranga nyengo yakuŵikika, nyengo yakwenelera yakucitira cintu cinyake. Paulos wakarongozga Ŵakristu ŵa mu virimika vya mu handiredi lakwamba kuti ŵakwenera kugwiriskira ncito makora nyengo, panji nyengo yiweme, iyo ŵakasangwanga nayo, pambere nyengo iyo yindamare kweniso pambere lusungu lwa Ciuta na ciponosko cake vindafumeko kwa iwo.—Ŵaroma 13:11-13; 1 Ŵatesalonika 5:6-11.

Tikukhala mu nyengo yakuyana waka iyo kujiwombolera nyengo nkhwakukhumbikwa. Mu malo mwa kutaya nyengo yiweme iyo ŵazamuyisangaso cara mwa kurondezga vyakusekereska vya kanyengo kacoko waka ivyo caru cikupereka, Ŵakristu ŵangacita makora usange ŵangagwiriskira ncito makora kanyengo aka kakharako kucitira “makhaliro ghose ghatuŵa na kusopa-Ciuta” uko kukukhozga ubwezi wawo na mlengi, Yehova Ciuta.—2 Petros 3:11; Masalmo 73:28; Ŵafilipi 1:10.