Nyengo Zose Iŵani na Cimwemwe mu Uteŵeti wa Yehova
Nyengo Zose Iŵani na Cimwemwe mu Uteŵeti wa Yehova
“Kondwerani mu Fumu nyengo zose: ndiwerezgeso, kondwani!”—ŴAFILIPI 4:4.
1, 2. Kasi mbali munyake na mbumba yake ŵakaŵa wuli na cimwemwe nangauli katundu wawo yose wakasakazika?
JAMES, Mkristu wa ku Sierra Leone wa virimika 70, nyengo zose waŵa wakugwira ncito mwakulimbikira comene. Pamanyuma pake, aghanaghanani waka za umo wakakondwera apo wakasunga ndarama zakukwanira zakuti wagure nyumba ya vipinda vinayi! Apo James na mbumba yake ŵakamba kukhalamo mu nyumba iyo, nkondo ya ŵene na ŵene yikamba mu caru ico, ndipo nyumba yawo yose yikabwangandurika te-te-te. Nangauli nyumba yawo yikabwanganduka kweni ŵakaŵa na cimwemwe nipera. Cifukwa wuli?
2 James na mbumba yake ŵakaleka kuŵika maghanoghano pa vintu ivyo vikasakazika, kweni pa vintu ivyo vikakhalapo. James wakulongosora kuti: “Nanga mungaŵa mu nyengo yakofya, kweni tikacitanga maungano, tikaŵazganga Baibolo, tikapemperanga pamoza, ndipo tikagaŵirangako ŵanyithu tuntu tucoko uto tikaŵa nato. Nyengo zose tikaŵanga na cimwemwe cifukwa tikapwereranga ubwezi withu wakuzirwa uwo tili nawo na Yehova.” Cifukwa ca kuranguruka pa vitumbiko ivyo ŵakaŵa navyo, comene-comene ubwezi uwo ŵakaŵa nawo na Yehova, Ŵakristu ŵakugomezgeka aŵa ŵakarutilira kuŵa ‘ŵakukondwa.’ (2 Ŵakorinte 13:11) Kuyowoya unenesko, cikaŵa cakusuzga kuti ŵazizipizge masuzgo agho. Kweni ŵakaleka cara kukondwera mwa Yehova.
3. Ni mwauli umo Ŵakristu ŵakale ŵakaŵira ŵakukondwa?
3 Ŵakristu ŵakale nawo ŵakasuzgika mwakuyana waka na umo James na mbumba yake ŵakasuzgikira. Ndico cifukwa cake Paulos wakalembera kalata Ŵakristu Ŵacihebere kuti: “Mukakuntirapo mu kukondwa kuskogha kwa mpango zinu.” Paulos wakalongosora za cifukwa ico ŵakakondwera, wakati: “Mukumanya kuti mwaŵene muli na mpango ziweme zakuruska na zakukhalirira.” (Ŵahebere 10:34) Enya, Ŵakristu ŵa mu virimika vya mu handiredi lakwamba ŵakaŵa na cilindizga cakukhora. Na cisimikizgo cose, ŵakalaŵiskanga kuntazi kuti ŵapokere cintu cinyake ico muntu wangaŵapoka cara—“mpumpu ya umoyo” mu Ufumu wakucanya wa Ciuta. (Civumbuzi 2:10) Lero, cilindizga cithu ca Cikristu, kwali nca kukakhala kucanya panji pano pasi, cingatovwira kuti tikondwenge nyengo zose nanga tingakumana na masuzgo.
“Mu Cigomezgo Mukondwenge”
4, 5. (a) Ncifukwa wuli mazgu gha Paulos ghakuti “mu cigomezgo mukondwenge” ghakaŵa ghapanyengo yake kwa Ŵaroma? (b) Ni vici vingapangiska Mkristu kuruwa cigomezgo cake?
4 Mpostole Paulos wakaciska Ŵakristu ŵa mu Roma kuti ‘ŵakondwenge mu cigomezgo’ ca umoyo wamuyirayira. (Ŵaroma 12:12) Mazgu agha ghakaŵa ghapanyengo yake kwa Ŵaroma. Virimika vicoko vikati vyajumpa kufuma apo Paulos wakaŵalembera kalata iyi, iwo ŵakazikizgika kwazanimuwone, Fumu Nero yikazomerezga kuti ŵanyake ŵanyongeke na kukomeka. Kwambura kukayika, cipulikano cawo cakuti Ciuta wazamuŵapa mpumpu ya umoyo cikaŵapa nkongono mu nyengo yavisuzgo yira. Wuli pakuyowoya za mukhaliro withu lero?
5 Ise Ŵakristu, nase tikumanya kuti tisuzgikenge. (2 Timote 3:12) Mwakusazgirapo, tikumanya kuti ‘nyengo na vintu vyakucitika mwamabuci’ vikuwira tose. (Mupharazgi 9:11) Munyithu uyo tikumutemwa wangafwa mwangozi. Mupapi withu panji mubwezi withu wakutemweka wangafwa na urwari. Usange tikuleka kupwererera cigomezgo cithu ca Ufumu, masuzgo agha para ghafika, mbwenu ghapangiskenge umoyo withu wauzimu kuŵa pangozi. Ipo cingaŵa ciweme kujifumba kuti: ‘Kasi ine “nkukondwa mu cigomezgo”? Kasi nkuranguruka kalinga pa cigomezgo ici? Kasi Paradiso uyo wakwiza ngwanadi kwa ine? Kasi nkuŵa na cithuzithuzi cakuti nga nili mu Paradiso? Nga ni umo nkaŵira pakwamba apo nkambira unenesko, kasi nili wakunweka mupaka kufikira ku umaliro wa kaŵiro aka ka vintu?’ Tiyeni tighanaghanirepo mwakupwererera fumbo laumaliro ili. Cifukwa wuli? Cifukwa ncakuti ise taŵantu, para tili makora, tikukhala uko kulije nkondo, kulije njala, na masoka, nyengo zinyake tingaruwa za kukhumbikwa kwakuti caru cipya ca Ciuta cize.
6. (a) Apo Paulos na Sila ŵakaŵa mu suzgo, kasi mtima wawo ukaŵa pa vici? (b) Kasi ciyerezgero ca Paulos na Sila cikutikhuŵirizga wuli ise lero?
6 Paulos wakaphaliraso Ŵaroma kuti ‘mu suzgo ŵazizipinge.’ (Ŵaroma 12:12) Paulos wakamanya makora za suzgo yawo. Nyengo yinyake, wakawona mwanarumi mu mboniwoni uyo wakamuŵeya kuti ‘wambukire ku Makedoniya’ kukawovwira ŵantu kuti ŵamanye za Yehova. (Milimo 16:9) Panyengo yeneyiyo, Paulos, pamoza na Luka, Sila na Timote ŵakanyamuka na kuruta ku Europe. Ncivici cikaŵalindiriranga ŵamishonale ŵamwampu aŵa? Suzgo! Ŵakati ŵapharazga mu Filipi, uwo ni msumba wa Makedoniya, Paulos na Sila ŵakatimbika na kuŵikika mu jere. Ncakuwonekerathu kuti ŵantu ŵa mu Filipi ŵakakanirangathu kutegherezga ndiposo ŵakasuskanga comene uthenga wa Ufumu. Umo vintu vikaŵira panyengo yira, kasi ŵamishonale ŵamwampu ŵakaleka kuŵa na cimwemwe? Yayi. Pamanyuma pa kutimbika na kuŵikika mu jere, “na usiku pakati Paulos na Sila ŵakarombanga na kwimbira malusumu kwa Ciuta.” (Milimo 16:25, 26) Kuyowoya unenesko, Paulos na Sila ŵakakondwera cara kuti ŵatimbikenge, kweni ndipouli, ŵamishonale ŵaŵiri aŵa ŵakasurako za ici. Mtima wawo ukaŵa pa Yehova na ntowa zake izo wakaŵatumbikiranga. Cifukwa cakuti ‘ŵakazizipizga suzgo’ mwacimwemwe, Paulos na Sila ŵakarongora ciyerezgero ciweme ku ŵabali ŵawo ŵa mu Filipi na kunyake kulikose.
7. Ncifukwa wuli mapempero ghithu ghakwenera kusazgapo kuwonga?
7 Paulos wakalemba kuti: “Mufwirirenge mu kuromba.” (Ŵaroma 12:12) Kasi mukuromba para mwenjerwa? Kasi ni vici ivyo mukupempa para mukuromba? Kwambura kukayika mukuzunura suzgo yinu na kumuromba Yehova kuti wamupani covwiro. Kweniso mungawonga Yehova cifukwa ca vitumbiko ivyo muli navyo. Kuranguruka pa vintu viweme ivyo Yehova wakuticitira, kutovwirenge kuti ‘mu cigomezgo tikondwenge’ para tili mu suzgo. Davide, muntu uyo umoyo wake ukazura na masuzgo wakalemba kuti: ‘A Yehova, Ciuta wane, milimo yinu njakuzizwiska iyo mwayandaniska; maghanoghano naghoso agho ghakutipwerera; palije yumoza wakukozgana na imwe! Ndiyipharazgenge [milimo yinu] na kuyowoya nayo mphanyi yawoneka yambura mapendeka.’ (Salmo 40:5) Usange ticitenge nga ni umo wakacitira Davide, nyengo zose kuranguruka pa vitumbiko ivyo Yehova wakutipa, mbwenu tiŵenge nadi ŵakukondwa.
Iŵani na Mtima Wakukondwa
8. Ncivici cikovwira Mkristu kukhalirira wakukondwa para wakusuzgika cifukwa ca unenesko?
8 Yesu wakupempa ŵalondezgi ŵake kuti ŵaŵe na mtima wakukondwa para ŵali mu viyezgo vyakupambana-pambana. Iye wakuti: “Ŵa mwaŵi ndimwe para ŵati ŵamutombozganinge na kumuzikizgani, na kumuteterani uheni wose, cifukwa ca ine.” (Mateyu 5:11) Kasi tili na vifukwa wuli vyakuŵira ŵakukondwa mu nyengo ya suzgo iyi? Nkongono iyo tikuŵa nayo para tikwimikana na ŵantu awo ŵakutisuska mbukaboni wakuti mzimu wa Yehova wuli nase. Mpostole Petros wakaphalira Ŵakristu ŵanyake mu nyengo yake kuti: ‘Usange mukutombozgekera zina la Kristu muli ŵa mwaŵi; pakuti mzimu wa ucindami na mzimu wa Ciuta ukukhala pa imwe.’ (1 Petros 4:13, 14) Kwizira mu mzimu wake, Yehova watovwirengeso kuti tizizipizge, ndipo cakufumapo cake ciŵenge cakuti tikhalirirenge ŵakukondwa.
9. Ncivici cikawovwira ŵabali ŵanyake kuti ŵaŵe ŵakukondwa apo ŵakaŵa mu jere cifukwa ca cipulikano cawo?
9 Nanga tingaŵa mu mikhaliro yinonono wuli, kweni ndipouli, tingaŵa na cimwemwe. Mkristu munyake zina lake Adolf wakajiwonera yekha pa nkani iyi. Iye wakukhala mu caru ico ncito ya Ŵakaboni ŵa Yehova yili kukanizgika kwa virimika vinandi. Cifukwa cakuti ŵakakana kuleka vigomezgo vyawo vya mu Baibolo, Adolf na ŵabwezi ŵake ŵanandi ŵakakakika ndipo ŵakaphalirika kukhala mu jere virimika vinandi. Umoyo wa mu jere ukaŵa unonono, kweni nga ni umo wakacitira Paulos na Sila, Adolf na ŵanyake ŵakaperekanga marumbo kwa Ciuta. Umo iwo ŵakawonera, umoyo wa mu jere ukaŵawovwira kukhozga cipulikano cawo ndiposo ukaŵawovwira kuŵa na mikhaliro ya Cikristu, nga ni lusungu na citemwa. Mwaciyerezgero, apo munyake wa Adolf wakapokera cibwayira kufuma kukaya, iye wakagaŵirako ŵanyake vintu ivyo vikaŵa mukati, ndipo ŵakawona vyawanangwa ivi nga kuti vyafuma kwa Yehova, mweneuyo wakupereka “vyawanangwa viweme vyose, na vyawanangwa vyakufiskika vyose.” Mulimo walusungu uwu ukapereka cimwemwe kwa muntu uyo wakapereka ndiposo na kwa awo ŵakapokera vyawanangwa. Cilato ca awo ŵakasunganga jere cikaŵa ca kuzimwa cipulikano ca Ŵakristu aŵa, kweni ndipouli, ŵabali aŵa ŵakimilira nga-nga-nga!—Yakobe 1:17; Milimo 20:35.
10, 11. Kasi mudumbu munyake wakazgora wuli mafumbo ghanonono pamanyuma pa kuphalirika kuti wakhale mu jere virimika vinandi?
10 Ella, mweneuyo wakukhala mu caru ico ncito ya Ufumu yili kukanizgika, wakakakika cifukwa ca kupharazgira ŵantu za cigomezgo cake ca Cikristu. Kwa myezi yinkondi na yitatu wakafumbikanga mafumbo ghanonono comene. Apo zuŵa la kweruzgira mrandu likakwana, iye wakaphalirika kuti wakhale mu jere virimika khumi mwenemumo mukaŵavya ŵanyake awo ŵakasopanga Yehova. Panyengo iyo Ella wakaŵa na virimika 24.
11 Inya, Ella wakakhumbanga cara kuti wakhale mu jere virimika vyose vya usungwana wake. Pakuti cikaŵa cipusu yayi kuti wasinte suzgo iyo, kweni wakasinta kaghanaghaniro kake. Iye wakamba kuwona jere kuŵa malo ghakupharazgirako. “Nkaŵa na ncito yinandi ya kupharazga,” ndimo wakayowoyera ntena, “kwakuti nkawona kuti virimika vikendanga mwaluŵiro comene.” Virimika vyakuruska pa vinkondi vikati vyajumpa, Ella wakacemeka kuti wafumbikeso. Pakumanya kuti jere likalekeska cara cipulikano cake, awo ŵakamufumbanga ŵakati: “Tikufumiskenge yayi cifukwa undasinte.” Ella wakazgora mwakusimikizga kuti: “Nasinta!” “Sono nili na kaghanaghaniro kaweme kuruska apo nkizira mu jere, ndipo cipulikano cane ncakukhora comene kuruska pakwamba.” Ella wakasazgirapo kuti: “Usange mukuleka kunifumiska, mbwenu nikhalenge mwenemuno mupaka apo nyengo ya Yehova yikwanirenge yakuti wanifumiske.” Nangauli Ella wakakhala mu jere virimika vinkondi na nusu kweni wakaŵa na cimwemwe nipera. Iye wakasambira kuleka kudinginyika na mikhaliro yiliyose iyo wakakumananga nayo. Kasi mungasambirapo kantu kanyake pa ciyerezgero cake?—Ŵahebere 13:5.
12. Ninjani wangapereka mtende kwa Mkristu mu nyengo yakusuzga?
12 Lekani kughanaghana kuti Ella wakaŵa na kantu kanyake mu thupi ako kakamupangiska kukhwima mtima mu nyengo ya suzgo. Pakuyowoya za nyengo iyo wakafumbikanga pambere wanderuzgike, Ella wakuti: “Nkukumbuka umo mino yakabwanyirananga mu mulomo cifukwa ca wofi, ndipo nkaŵa nga ndine kayuni.” Nanga vikaŵa ntena, kweni Ella wakaŵa na cipulikano cakukhora mwa Yehova ndipo wakasambira kukhumbikwira kwa kugomezga mwa iye. (Zintharika 3:5-7) Cakufumapo cake caŵa cakuti Ciuta sono wakuwoneka mweneco kwa iye kuruska pakwamba. Iye wakulongosora kuti: “Nyengo yiliyose apo nkanjiranga mu cipinda zuŵa lakuti ŵanifumbe, nkawonanga kuti nili pa mtende. . . . Para suzgo yikamba kuŵa yinonono, ine nkawonanga kuti nili pa mtende comene.” Yehova ndiyo wakaŵa citopoko ca mtende uwu. Mpostole Paulos wakulongosora kuti: “Mungenjerwanga na kantu; kweni mu vintu vyose, mu kuromba na kuŵeya pamoza na kuwonga mafumbo ghinu ghamanyikwe kwa Ciuta. Ndipo mtende wa Ciuta, uwo ukuzungura kuwamo kose, uti usungirirenge mitima yinu na maghanoghano ghinu mwa Kristu Yesu.”—Ŵafilipi 4:6, 7.
13. Pali ukaboni wuli wakuti nanga tingaŵa mu suzgo kweni tiŵenge na nkongono za kuzizipizgira?
13 Nangauli Ella wakumana na masuzgo ghanonono, kweni kufuma apo wakafumiskika mu jere, iye nyengo zose waŵa na cimwemwe. Iye wakacita ici cifukwa ca nkongono za iye yekha cara, kweni cifukwa ca nkongono izo Yehova wakamupa. Umu ndimo vikaŵiraso na mpostole Paulos, mweneuyo wakalemba kuti: “Ndithumbwirenge mbweno nakukondwa kukuru mu mauntomboro ghane, kuti nkongono za Kristu zindibenekerere. . . . Cifukwa penepapo ndiri wakutomboroka, apo ndipo ndiri wa nkongono.”—2 Ŵakorinte 12:9, 10.
14. Longosorani umo Mkristu wakwenera kuŵira na kaghanaghaniro kaweme panyengo yamasuzgo ndiposo na ico cingaŵa cakufumapo cake.
14 Masuzgo agho mukukweŵeka nagho lero ghangapambana na agho taghawona pacanya apa. Ndipouli, mulimose umo ghangaŵira, ncakusuzga kuzizipizga. Mwaciyerezgero, bwana winu wa pa ncito nyengo zinyake wangakondwa yayi na ncito yinu, wangamutinkani comene kuruska ŵancito awo ŵali mu visopo vinyake. Cingaŵa cakusuzga kwa imwe kuti muleke ncito iyo na kwamba kupenja yinyake. Kasi mungacita wuli kuti muŵe ŵakukondwa nyengo zose? Kumbukani Adolf na ŵanyake, ŵeneawo apo ŵakaŵa mu jere ŵakasambira kuŵa na mikhaliro yinyake yakukhumbikwa. Usange muyezgengeyezgenge kuti mukondweske bwana winu—nanga ni bwana uyo ni ‘munonono mtima,’ mbwenu muŵenge na mikhaliro ya Cikristu umoza wake ndiwo kuzizipizga. (1 Petros 2:18) Mukuruta kwa nyengo, muŵenge wancito wakugomezgeka comene, ndipo kungamupangiskani kuti muzakasange ncito yiweme zuŵa linyake. Tiyeni sono tidumbiskane zinyake mwa ntowa izo nyengo zose tingaŵira ŵacimwemwe mu uteŵeti wa Yehova.
Kucepeska Vyakucita Vinyake Kukupereka Cimwemwe
15-17. Kasi mbumba yinyake yikasambira vici kuti yicepeske masuzgo nangauli ghangamalirathu cara?
15 Nyengo zinyake cingaŵa cakusuzga kusanka ncito iyo mukukhumba kugwira, kweni ndipouli, pali vyakucitika vinyake mu umoyo winu ivyo mungarongolera mtima wa kujikora. Aghanaghanirani za cakukumana naco ici.
16 Mkristu wakutora wakacema mbali murara kuzakarya cakurya kunyumba yake. Panyengo yakucezga namise, ŵeneco nyumba ŵakaphalira mbali yura kuti ŵakenjerwa na masuzgo gha mu umoyo. Pakuti wose ŵaŵiri nyengo zose ŵakagwiranga ncito, iwo ŵakaŵavya maghanoghano ghakuti ŵapenjeso ncito yinyake. Iwo ŵakamanyanga yayi utali wa nyengo iyo suzgo yimalirenge.
17 Ŵeneco nyumba ŵakapempa urongozgi kwa mbali murara, ndipo mbali wakazgora kuti, “Cipeskani vyakucita vinyake.” Mwauli? Mwanarumi na muwoli wake zuŵa lirilose ŵakamaliranga maora ghatatu kuruta na kuwerako ku ncito. Mbali murara mweneuyo wakamanya makora mbumba iyi, wakasacizga kuti ŵasamire ku malo uko nkufupi na ncito yawo mwakuti ŵacepeske nyengo iyo ŵakumalira mu ntowa zuŵa lirilose. Nyengo iyo yikasakazikanga, mphanyi yikagwiriskirika ncito kucitira vintu vinyake vyakuzirwa, panji mphanyi yikaŵa nyengo yakupumulira. Usange masuzgo ghakumupokani cimwemwe, mwalekeraci kusanda kuti muwone usange mungaghamazga mwa kusinta milimo yinu yinyake?
18. Cifukwa wuli ncamahara kukhala danka pasi na kughanaghana pambere tindambe kucita cintu?
18 Ntowa yinyake ya kucepeskera masuzgo ghanyake ndiyo kughanaghanira mwakupwererera pambere mundambe kucita vintu. Mwaciyerezgero, Mkristu munyake wakaghanaghana za kuzenga nyumba. Nangauli wakaŵa kuti wandazengepo nakale, iye wakasanka pulani ya nyumba iyo yikakhumba vintu vyakuzengera vinandi. Sono wakughanaghana kuti mphanyi masuzgo ghanyake ghandamusange usange ‘wapwerererenge mendero ghake’ apo wakaŵa wandasanke pulani ya nyumba yake. (Zintharika 14:15) Mkristu munyakeso wakazomera kuti wakhalire ukaboni Mkristu munyake apo wakakongoranga ndarama. Kuyana na phangano ilo, usange muntu uyo wakakongora ndarama watondeka kuwezga ngongori, kaboni wake ndiyo wakenera kuwezga ndarama izo. Pakwambilira, vintu vyose vikenda makora, kweni nyengo yikati yajumpapo, muntu yura wakakongora ndarama wakamba kutondeka kufiska phangano. Muntu uyo wakabwerekeska ndarama wakamba kukaripa na kumuphalira yura wakaŵa kaboni wake kuti ndiyo wawezge ngongori yose. Yura wakamukhalira ukaboni wakasoŵa mtende. Kasi suzgo iyi yikatenge yiŵengepo usange kaboni yura waghanaghanirengepo mwakupwererera pambere wandazomere kukhala kaboni wa munyake?—Zintharika 17:18.
19. Ni ntowa wuli zinyake izo tingacepeskera kwenjerwa mu umoyo withu?
19 Usange tavuka, tileke kughanaghana kuti vyakuŵinya vingacepa na kusanga cimwemwe khwekha mwa kucepeska nyengo yakucitira sambiro la taŵene, uteŵeti wa m’munda, na kuleka kufika pa maungano gha mpingo. Tileke kucita ici, cifukwa izi ni ntowa zakuzirwa izo tikupokeramo mzimu utuŵa wa Yehova, weneuwo cipambi cake ncimwemwe. (Ŵagalatiya 5:22) Milimo ya Cikristu nyengo zose yikutipumuzga ndipo nyengo zose yikuŵa yakuvuska comene yayi. (Mateyu 11:28-30) Milimo iyi yikuruska nkanira milimo yakuthupi yeneiyo yikutivuska, milimo yauzimu njakupumuzga. Kugona nyengo yiweme kungacitiska nkongono zithu kuti ziweleremo. Kupumulapo pacoko nako kungaŵa kwacandulo. Mbali N.H. Knorr, uyo wakateŵeteranga mu Wupu Wakurongozga wa Ŵakaboni ŵa Yehova mupaka nyifwa yake, nyengo na nyengo wakaphaliranga ŵamishonale kuti: “Para mwawona kuti vintu vikumwenderani makora yayi, cintu cakwamba ndico kupumula. Para mwacita ici muwonenge kuti suzgo yiliyose kwa imwe yiwonekenge kuŵa yipusu kuyimazga pamanyuma pakuti mwagona tulo tuweme nausiku.”
20. (a) Longosorani mwakudumura ntowa zinyake izo tingaŵira ŵakukondwa. (b) Kasi pali vifukwa wuli ivyo mukughanaghana kuti tingaŵa na cimwemwe? (Wonani bokosi pa peji 27.)
20 Ŵakristu ŵali na mwaŵi wapadera comene wa kuteŵetera ‘Ciuta wacimwemwe.’ (1 Timote 1:11) Kuyana na umo tawonera, nyengo zose tingaŵa ŵakukondwa nanga tingazingirizgika na masuzgo ghakuru. Nyengo zose tiŵike cilindizga ca Ufumu pamalo ghakwamba, tisinte kaghanaghaniro kithu, ndipo ticepeske vyakucita vinyake. Usange ticitenge ntena, nanga tingaŵa mu suzgo wuli, mbwenu tikoleranenge nagho mazgu gha mpostole Paulos ghakuti: “Kondwerani mu Fumu nyengo zose: ndiwerezgeso, kondwani.”—Ŵafilipi 4:4.
Ghanaghaniranipo Mwakupwererera Mafumbo Agha:
• Ncifukwa wuli Ŵakristu ŵakwenera kuŵikapo mtima comene pa cilindizga ca Ufumu?
• Ncivici cingatovwira kuŵa na cimwemwe nyengo zose para tili mu nyengo yakusuzga?
• Ncifukwa wuli tikwenera kucepeska vyakucita vinyake?
• Ni vigaŵa wuli ivyo ŵanyake ŵayezga kucepeska vyakucita vinyake?
[Mafumbo]
[Bokosi/Vithuzithuzi pa peji 27]
Vifukwa Vyakusazgirapo Ivyo Tingaŵira na Cimwemwe
Ise Ŵakristu tili na vifukwa vinandi vyakuŵira na cimwemwe. Tiyeni tiwone vifukwa vinyake pasi apa:
1. Tikumumanya Yehova.
2. Tasambira unenesko wa Mazgu gha Ciuta.
3. Zakwananga zithu zingagowokereka para tili na cipulikano mu sembe ya Yesu.
4. Ufumu wa Ciuta ukuwusa—caru cipya sono-sono apa cizenge.
5. Yehova watiŵika mu paradiso wauzimu.
6. Tikukondwa para tikucezga na Ŵakristu ŵanyithu.
7. Tili na mwaŵi wa kugwira ncito ya kupharazgira ŵanji.
8. Tili ŵamoyo, ndipo tili na nkongono.
Kasi pali vifukwa vilinga vyakuŵira na cimwemwe ivyo mukuvimanya?
[Cithuzithuzi pa peji 24]
Paulos na Sila nangauli ŵakaŵikika mu jere kweni ŵakaŵa na cimwemwe
[Vithuzithuzi pa peji 26]
Kasi jiso linu liri pa cilindizga cakukondweska ca caru cipya ca Ciuta?