Umo Ucokoro Ukakolera Ŵanakazi Ŵaŵiri
Umo Ucokoro Ukakolera Ŵanakazi Ŵaŵiri
SANDRA ni mwanakazi wa ku Australia mweneuyo mufumu wake walikufwa. Pa zuŵa ilo mufumu wake wakafwira, Sandra wakaŵa na citima cikuru comene. Iye wakuyowoya kuti: “Citima cikanikora apo nkawona kuti mubwezi wane wa mu ntengwa watayika. Nkumanya makora cara umo nkendera kufuma ku cipatala kuruta ku nyumba ndiposo nkukumbuka yayi ivyo nkacita pa zuŵa ilo. Masabata ghacoko waka kufuma apo munyane wakafwira, zuŵa na zuŵa nkaŵa wakudandaura pera.”
Sandra wali na mubwezi wake murara kuruska iye, Elaine, mweneuyo mufumu wake nayo walikufwa virimika vinkondi na cimoza ivyo vyajumpa. Elaine wakamupwererera David mufumu wake kwa myezi yinkondi na umoza pambere wandafwe na ntenda ya kansa. Zuŵa ilo mufumu wake wakafwira, iye wakaŵa na citima cikuru kwakuti wakaleka kulaŵiska makora pakanyengo kacoko. Virimika viŵiri kufuma apo mufumu wake wakafwira, zuŵa linyake wakazirika pamaso pa wumba. Dokotala wakamupima, kweni ntenda wakayisanga cara. Pamanyuma pake dokotala wakamanya kuti Elaine wakaŵa na citima cikuru mu mtima wake, mwanteura dokotala wakamuphalira kuti para wafika ku nyumba wakalire comene mwakuti citima cimare. Elaine wakuti: “Pakajumpa nyengo yitaliko kuti citima cimare, nyengo zinyake nkarutanga ku cipinda kukajikakilira mutu na malaya gha mufumu wane, David.”
Inya nadi, nyifwa ya wakutemweka wa mu ntengwa yingapangiska kughanaghana vintu ivi na ivi, ndipo pakuŵa vinandi vikukhumbikwa para wuli cokoro. Mwaciyerezgero, Sandra nyengo yinyake wakajighanaghaniranga kuti nga kuti wuntu wake wasinta. Nga mbanakazi awo ŵafumu ŵawo ŵafwa mwasonosono umo ŵakucitira, iye naye wakajiwona nga ni muntu wakuzgeŵa, wakusoŵa civikiliro. Sandra wakukumbuka umo vintu vikaŵira, wakuti: “Nkazgoŵera kuti mufumu wane wacitenge vintu, kweni sono nilipo ndekha. Nkatondekanga kugona nyengo ya usiku. Nkaŵa wakulopwa na wacitima. Ndipo nkasoŵerathu cakucita.”
Nyengo na nyengo, nkani zakuyana na za Sandra na Elaine, zikupulikikwa pacaru cose capasi. Urwari, ngozi, nkondo, ucigeŵenga, na ciwawa ndivyo vikucitiska kuti paŵe vyokoro vyanakazi. a Ŵanandi mwa ŵanakazi aŵa ŵali na citima kweni ŵakukhala waka cete, ŵakumanya cara ico ŵangacita. Kasi mabwezi na ŵabali ŵawo ŵangacitaci kuti ŵawovwirepo kucepeska ucokoro wawo? Nkani yakulondezgapo yili na masacizgo agho ghangawoneka kuŵa ghaweme.
[Mazgu ghamusi]
a Ŵanakazi ŵanyake ŵali na suzgo ya nga vyokoro vyanakazi ivi cifukwa cakuti ŵafumu ŵawo ŵalikuŵaleka. Nangauli kupatana na kulekana kuli na masuzgo ghake na ghake, kweni fundo zinandi izo zili mu nkani yakulondezgapo nazo zingawovwira ŵanakazi awo ŵali na suzgo ya nga ni iyi.