Rumbani Yehova Cifukwa ca Milimo Yake Yikuru!
Rumbani Yehova Cifukwa ca Milimo Yake Yikuru!
‘Mtima wane ukutuntumuska Fumu, . . . pakuti Iyo njankongono yandicitira vikuru.’—LUKA 1:46-49.
1. Ni milimo wuli yikuru iyo ise tikurumbira Yehova?
YEHOVA wakwenera kurumbika cifukwa ca milimo yake yikuru. Peneapo ncimi Moses yikakonkoskanga za ciponosko ca Ŵaisrayeli kufuma ku Egupto, iyo yikati: “Maso ghinu ghakalaŵiska milimo yose yikuru ya Yehova.” (Duteronome 11:1-7) Mwakuyana waka, peneapo mungelo Gabrieli wakaphalira mwali wakulangwa Mariya kuti wababenge Yesu, Mariya wakati: ‘Mtima wane ukutuntumuska Fumu, . . . pakuti Iyo njankongono yandicitira vikuru.’ (Luka 1:46-49) Ise nga Mbakaboni ŵa Yehova, tikumurumba iye cifukwa ca milimo yikuru ya nga ni kufwatura Ŵaisrayeli ku wuzga wa ku Egupto na kubabika kwakuziziswa kwa Mwana wake wakutemweka.
2. (a) Kasi ‘cilato camuyirayira’ ca Ciuta cikung’anamuraci kwa ŵantu ŵakugomezgeka? (b) Kasi Yohane wakawona vici pa cirwa ca Patmo?
2 Milimo yikuru yinandi ya Yehova yikukhwaskana na ‘cilato camuyirayira’ ca kutumbika ŵantu ŵakugomezgeka kwizira mwa Mesiya na Ufumu wake. (Ŵaefeso 3:8-13) Cilato ici cikaŵa kuti cikuruta pantazi peneapo mpostole mucekuru, Yohane, wakapika mwaŵi wa kuwona muryango wakujurika kucanya mu mboniwoni. Iye wakapulika lizgu la mbata leneilo likayowoya naye kuti: “Kwerera kuno, ndipo nditi ndikurongorenge vyeneivyo vikwenera kucitika kuntazi.” (Civumbuzi 4:1) Panyengo iyo, boma la Ŵaroma likamucimbizgira ku “cirwa ico ndi Patmo, cifukwa ca mazgu gha Ciuta na cisimikizgo ca Yesu” ndipo Yohane wakapika “civumbuzi ca Yesu Kristu.” Ivyo mpostole uyu wakawona na kupulika vikuvumbura vinandi pakuyowoya za cilato camuyirayira ca Ciuta, anteura vikupereka ungweru wauzimu na cikhuŵirizgo ca panyengo yake kwa Ŵakristu ŵaunenesko.—Civumbuzi 1:1, 9, 10.
3. Kasi ŵarara 24 awo Yohane wakawona mu mboniwoni ŵakwimira njani?
3 Kwizira pa muryango wakujurika wa kucanya, Yohane wakawona ŵarara 24 ŵakukhala pa vizumbe ŵakuvwarikika mpumpu nga mbakaronga. Iwo ŵakawa pasi pantazi pa Ciuta na kuyowoya kuti: “Ŵakwenerera ndimwe, Fumu yitu na Ciuta witu, kupokera ncindi na thumbiko na nkongono: pakuti Imwe mukalenga vyose, ndipo cifukwa ca khumbo linu vikaŵako, ndipo vikalengeka.” (Civumbuzi 4:11) Ŵarara aŵa ŵakwimira Ŵakristu ŵakuphakazgika wose awo ŵalikuwuka ndipo ŵali mu malo ghaucindami gheneagho Ciuta wakaŵalayizga. Iwo ŵakunweka kurumba Yehova cifukwa ca milimo yake yikuru iyo walikulenga. Ise nase tikuzizwa na ukaboni uwo tikuwona wa ‘nkongono za Yehova za muyaya na Uciuta wake.’ (Ŵaroma 1:20) Penepapo tikusambira vinandi vyakukhwaskana na Yehova, tikuŵa na vifukwa vinandi vya kumurumbira cifukwa ca milimo yake yikuru.
Pharazgani Milimo Yiweme ya Yehova!
4, 5. Perekani viyerezgero vya umo Davide wakarumbira Yehova.
4 Wamasalmo Davide wakarumba Ciuta cifukwa ca milimo Yake yikuru. Mwaciyerezgero, Davide wakimba kuti: “Yimbani zincindi kwa Yehova uyo wakukhala mu Zion! Pharazgani milimo yake mkati mwa ŵantu. Mundicitire lusungu, A Yehova! Wonani umo ŵakundisuzgira awo ŵanditinka, mwaŵene imwe mukundiwuskamo mu vipata vya nyifwa, mwakuti ndivumbule marumbo ghinu ghose . . . mu vipata vya mwanamwanakazi wa Zion.” (Salmo 9:11, 13, 14) Panyuma pa kupereka pulani ya tempele kwa mwana wake Solomoni, Davide wakatumbika na kurumba Ciuta, wakati: ‘Winu Yehova, ndi ukuru, na nkongono, na ucindami, na kuvivya, na ufumunkuru; . . . winu mbufumu, A Yehova, ndipo mwakwezgeka nga ndi mutu pacanya pa vyose . . . . Nteura sono, Ciuta withu, tikumuwongani na kucindika zina linu la ucindami.’—1 Midauko 29:10-13.
5 Mwakanandi, Malemba ghakuticiska, inya, kutipempa kurumba Ciuta nga ni umo Davide wakacitira. Buku la Masalmo liri na mazgu ghanandi comene ghakurumba Ciuta, ndipo pafupifupi hafu ya sumu za marumbo izi zikimbika na Davide. Iye wakaleka cara kurumba na kuwonga Yehova nyengo zose. (Salmo 69:30) Kusazgirapo apo, kufumira mu nyengo zakale, sumu zakufunyilirika na Ciuta za Davide na za ŵanyake zaŵa zikugwiriskirika ncito kurumbira Yehova.
6. Ni mwauli umo Masalmo ghakufunyilirika ghaliri ghakuzirwa kwa ise?
6 Mwee, nako nkuzirwa kwa Masalmo ku ŵasopi ŵa Yehova! Para tikukhumba kuwonga Ciuta cifukwa ca milimo yake yikuru iyo wakuticitira, tingacita makora kughanaghanira mazgu ghaweme agho ghali mu Masalmo. Mwaciyerezgero, para tawuka namulenji, tingakhuŵirizgika kuyowoya mazgu gha nga ni agha: ‘Nkuweme kumuwonga Yehova, kuyimbira zina linu marumbo, Imwe Wapacanyapose; kupharazga cifundu cinu namacerocero, na magomezgeko ghinu usiku wose, . . . Pakuti imwe, A Yehova, mwandikondweska na milimo yinu; cifukwa ca milimo ya mawoko ghinu nkuzaya ine na kukondwa.’ (Salmo 92:1-4) Para tatonda ico cikatijandizganga kuruta pantazi mwauzimu, tingakhuŵirizgika kurongora kukondwa na kuwongera mu pempero, nga ni umo wamasalmo wakacitira peneapo wakimba kuti: “Tiyeni, timwimbire Yehova; tizayire jarawe la ciponosko na kukondwa! Tifike na kukondwa pamaso pake, kumuzayira na sumu za kurumba.”—Salmo 95:1, 2.
7. (a) Kasi cakukondweska ncivici pakuyowoya za sumu zinandi izo zikwimbika na Ŵakristu? (b) Kasi cifukwa cimoza ca kufikira mwaluŵiro pa maungano na kukhalirira mupaka kuumaliro ncivici?
7 Nyengo zinandi tikwimbira Yehova sumu za marumbo pa maungano gha mpingo, gha dera, na gha cigaŵa. Cakukondweska ncakuti zinandi mwa sumu izi zikufumira mu buku la Masalmo. Mwee, naco ncimwemwe ico tili naco pakuŵa na sumu zakukondweska za panyengo yake zakurumba Yehova! Ncakuzirwa comene kufika mwakutendekera pa maungano kuti timbire lumoza na ŵasopi ŵanyithu sumu zakurumba Yehova na kukhalirira penepapo mupaka pa pempero lakujalira.
“Tamikani Yehova”
8. Kasi lizgu lakuti “Aleluya” likung’anamuraci, ndipo mwakanandi likung’anamurika wuli?
8 Lizgu lakuti “Aleluya,” likung’anamura mazgu ghakuti rumbani Yehova. Lizgu ili likufumira ku lizgu la Cihebere ilo mwakanandi likung’anamurika kuti “Tamikani Yehova.” Mwaciyerezgero, pa Salmo 135:1-3, pali languro la nga ni ili panji pempo liweme kweni lakudidimizga. Ipo pakuti: ‘Tamikani Yehova. Tamikani zina la Yehova na kupereka marumbo, imwe mwa ŵateŵeti ŵa Yehova, mwaŵeneimwe mukwimirira mu nyumba ya Yehova, na mu mabwalo gha nyumba ya Ciuta withu! Rumbani Yehova, pakuti Yehova ndi muweme; yimbirani zina lake marumbo, cifukwa Iye ngwalusungu!’
9. Ncivici ico cikuticiska kuti tirumbe Yehova?
9 Peneapo tikughanaghanira za milimo ya Ciuta yakuziziswa ya cilengiwa, pamoza na vintu vyose ivyo iye wakucita, tikuciskika kuti timuwonge iye na mtima withu wose. Peneapo tikulanguruka pa vintu vyakuziziswa ivyo Yehova wakacitira ŵantu ŵake mu nyengo zakale, mitima yithu yikutikhuŵirizga kumurumba iye. Ndiposo penepapo tikulanguruka pa vilayizgo vyakuziziswa ivyo Yehova wazamucita, tipenjerezgeso ntowa za kumurumbira na kumuwonga.
10, 11. Ni mwauli umo kalengekero kithu kakutipangiska kurumba Ciuta?
10 Kuŵako kwithu kukutipa cifukwa ciweme ca kurumbira Yehova. Davide wakimba kuti: ‘Nkumurumbani [Yehova] cifukwa mukandipanga muntowa yakofya na yakuzizwiska. Milimo yinu njakuzizwiska, umoyo wane ukumanya makora za ici.’ (Salmo 139:14) Inya, tili ‘kupangika mwakuziziswa’ ndipo tili na vyawanangwa vyakuzirwa vya nga ni kulaŵiska, kupulika, na nkongono za kaghanaghaniro. Mwanteura, kasi tikwenera cara kupereka umoyo withu kurumbira Mlengi withu? Mpostole Paulos nayo wakayowoya fundo yakuyana waka peneapo wakalemba kuti: “Manyi mukurya, manyi mukumwa, manyi mukucita kantu uli, citirani vyose ku ucindami wa Ciuta.”—1 Ŵakorinte 10:31.
11 Usange tikumutemwa nadi Yehova, mbwenu ticitenge vyose ku ucindami wake. Yesu wakayowoya kuti dango lakudanga ndakuti: ‘Utemwenge Yehova Ciuta wako na mtima wako wose, na umoyo wako wose, na vinjeru vyako vyose, na nkongono zako zose.’ (Marko 12:30; Duteronome 6:5) Tikwenera nadi kutemwa Yehova na kumurumba nga Mlengi withu na Mupi wa “vyawanangwa viweme vyose.” (Yakobe 1:17; Yesaya 51:13; Milimo 17:28) Nakwenenako, mahara ghithu, maghanoghano na nkongono za kaghanaghaniro, pamoza na nkongono zithu za thupi, na maluso vyose vikufuma kwa Yehova. Nga ni Mlengi withu, iye ngwakwenelera kuti timutemwe na kumurumba.
12. Ni mwauli umo mukujipulikira pakuyowoya za milimo yikuru ya Yehova na mazgu agho ghali pa Salmo 40:5?
12 Milimo yikuru ya Yehova yikutipa vifukwa vyambura mapendeko vyakuti timutemwe na kumurumba. Davide wakimba kuti: ‘A Yehova, Ciuta wane, milimo yinu njakuzizwiska iyo mwayandaniska; maghanoghano naghoso agho ghakutipwerera; palije yumoza wakukozgana na Imwe! Ndiyipharazgenge na kuyowoya nayo mphanyi yawoneka yambura mapendeko.’ (Salmo 40:5) Davide wakatondeka kupenda milimo yose yakuzizwiska ya Yehova, nanga tingaŵa ise tingakumbukira yose cara. Kweni nyengo zose tiyeni tirumbe Yehova penepapo tikuwona milimo yake yikuru.
Milimo Yakukolerana na Cilato Camuyirayira ca Ciuta
13. Kasi cilindizga cithu cikukolerana wuli na milimo yikuru ya Ciuta?
13 Cilindizga cithu camuntazi ncimoza ca milimo yikuru iyo yikukolerana na cilato camuyirayira ca Ciuta. Panyuma pa cigaruka mu Edeni, Yehova wakapereka cilindizga kwizira mu ucimi wakudanga. Pakweruzga njoka, Ciuta wakati: “Tindiŵike cimpindikwa pakati pa iwe na mwanakazi, na pakati pa mpapu yako na mpapu yake; tiyibwanyenge mutu wako, iwe tiurumenge citende cake.” (Genesis 3:15) Cilindizga ca mpapu ya layizgano caŵa mu maghanoghano gha ŵantu ŵakugomezgeka kufuma apo Yehova wakacita mulimo ukuru mwa kuponoska Nowa na mbumba yake ku ciwowota ico cikakoma ŵantu ŵaheni. (2 Petros 2:5) Vilayizgo vya ucimi vya ŵanarumi ŵakugomezgeka ŵa nga ni Abrahamu na Davide vikapereka cimanyisko cakusazgikira ca ivyo Yehova wazamucita kwizira mu Mpapu iyo.—Genesis 22:15-18; 2 Samuel 7:12.
14. Ncivici ico cili cakuwonerapo cikuru cakuti Yehova wakucitira ŵantu milimo yikuru?
14 Cakuwonerapo cikuru cakuti Yehova wakucitira ŵantu milimo yikuru cikacitika peneapo iye wakapereka Kananda wake, mpapu ya layizgano, Yesu Kristu kuŵa sembe yakuwombola. (Yohane 3:16; Milimo 2:29-36) Sembe yakuwombora yikupereka mwaŵi wakuti ŵantu ŵasenderere kwa Ciuta. (Mateyu 20:28; Ŵaroma 5:11) Yehova wakawunganya pamoza ŵantu mu mpingo Wacikristu, uwo ukamba pa Pentekoste wa 33 C.E. Na covwiro ca mzimu utuŵa, iwo ŵakapharazga makani ghaweme kulikose, kuphalira ŵantu mweneumo nyifwa ya Yesu yikujulira ntowa ku ŵantu ŵakugomezgeka kuti ŵasange vitumbiko vyambura kumara pasi pa Ufumu wakucanya wa Ciuta.
15. Ni mwauli umo Yehova wacitira vintu mwakuziziswa mu nyengo yithu?
15 Mu nyengo yithu yino, Yehova wacitapo kantu mwakuziziswa kuwunganya Ŵakristu ŵakuphakazgika ŵakukhalira. Mpepo yakuparanya yakoreka kuti yireke kunanga caru mupaka ŵakukhalira ŵa 144,000, awo ŵazamuwusa pamoza na Kristu kucanya ŵadidimizgike. (Civumbuzi 7:1-4; 20:6) Ciuta wakasimikizga kuti Ŵakristu ŵakuphakazgika ŵafwaturike ku wuzga wauzimu wa “Babulone Mukuru,” muwuso wa caru cose wa cisopo cautesi. (Civumbuzi 17:1-5) Kasi kufwaturika uko kukacitika mu 1919 na civikiliro ico Ciuta wakapereka kwambira mu cirimika ico, kwapereka mwaŵi wakuti ŵakuphakazgika ŵakukhalira ŵacite vici? Kwaŵapa mwaŵi wakuti ŵapereke ukaboni waumaliro pambere Yehova wandaparanye kaŵiro ka Satana pa “suzgo yikuru” iyo yikwiza mwaluŵiro.—Mateyu 24:21; Daniel 12:3; Civumbuzi 7:14.
16. Ncivici ico cikucitika cifukwa ca ncito yakupharazga pacaru cose iyo yikucitika mazuŵa ghano?
16 Ŵakaboni ŵakuphakazgika ŵa Yehova mwaphampu ŵarutiska pantazi ncito yakupharazga makani gha Ufumu pacaru cose. Cifukwa ca ici, ŵantu ŵanandi ŵa “mberere zinyake” ŵakuŵa ŵasopi ŵa Yehova. (Yohane 10:16) Tikukondwa kuti mwaŵi ucali kwa ŵakuzika ŵa caru capasi kuti ŵakolerane nase pa kurumba Yehova. Wose awo ŵakuzomerezga ncemo yakuti ‘ŵize’ na kukolerana pakwimba sumu zakurumba Yehova ŵali pa mzere wa ciponosko ca kuporota suzgo yikuru, na cilindizga ca kupereka viwongo kwa Yehova kwamuyirayira.—Civumbuzi 22:17.
Ŵantu Ŵanandi Ŵakukolerana na Cisopo Caunenesko
17. (a) Ni mwauli umo Yehova wakucitira milimo yikuru yakukhwaskana na ncito yithu yakupharazga? (b) Kasi Zekariya 8:23 wakukwaniriskika wuli?
17 Panyengo yasono Yehova wakucita milimo yikuru yakukhwaskana na ncito yithu yakupharazga. (Marko 13:10) Mu virimika vyasono-sono apa, iye ‘wajura muryango ukuru wa milimo.’ (1 Ŵakorinte 16:9) Ici capangiska kuŵa camacitiko kuti makani ghaweme ghapharazgike mu vyaru ivyo kale kukaŵa ŵarwani ŵa unenesko. Ŵanandi awo kale ŵakaŵa mu mdima wauzimu sono ŵakuzomera ncemo ya kusopa Yehova. Iwo ŵakukwaniriska mazgu ghaucimi agha: “Nteura wakuti Yehova wa mipingo: ‘Mu mazuŵa agho ŵantu khumi ŵa mafuko gha kayowoyero kose ŵati ŵakore saru ya uyo ndi Muyuda na kuti, “Mutizomerezge tirute tose, cifukwa tapulika kuti Ciuta wali na imwe.”’” (Zekariya 8:23) ‘Muyuda’ uyo ŵantu khumi ŵakumukora saru Mbayuda ŵauzimu, Ŵakristu ŵakuphakazgika ŵakukhalira ŵa mazuŵa ghano. Cifukwa cakuti ciŵerengero ca khumi cikwimira kukwanira kwa vintu, “ŵantu kumi” aŵa, ŵakwimira “mzinda ukuru” uwo ukukolerana na “Ŵaisrayeli ŵa Ciuta,” na kupanga “mskambo umoza.” (Civumbuzi 7:9, 10; Ŵagalatiya 6:16) Mwee, nako nkhwakukondweska kuwona ŵantu ŵanandi awo ŵakucitira pamoza uteŵeti wakupatulika nga mbasopi ŵa Yehova Ciuta panyengo yasono!
18, 19. Mbukaboni wuli uwo wulipo wakuti Yehova wakutumbika mulimo wakupharazga?
18 Tikukondwa comene kuwona ŵantu vikwi vinandi ŵakukolerana na kusopa kwaunenesko mu vyaru ivyo kale mukaŵa visopo vyautesi kweneuko kukawonekanga kuti ŵantu ŵangapulikizga cara makani ghaweme. Awonani waka mu Yearbook of Jehovah’s Witnesses, na kupenda vyaru ivyo sono vili kufika ciŵerengero ca ŵapharazgi 100,000 mupaka pafupifupi 1,000,000 ŵeneawo ŵakunjizgikamo mu ncito yakupharazga makani gha Ufumu. Ici ncisimikizgo ciweme comene cakuti Yehova wakutumbika mulimo wakupharazga Ufumu.—Zintharika 10:22.
19 Nga mbantu ŵa Yehova, tikurumba na kuwonga Ŵadada ŵithu ŵakucanya cifukwa ca kutipa umoyo wakuŵa na cilato ndiposo na cilindizga ciweme ca muntazi. Tikulindizga mwakukhumbisiska kuzakawona kufiskika kwa vilayizgo vya Ciuta ndipo tili ŵakusimikizga ‘kujisungirira mu citemwa ca Ciuta, kufikira ku umoyo wa muyirayira.’ (Yuda 20, 21) Mwee, naco ncimwemwe ico tili naco kuwona mzinda ukuru uwo ukurumba Yehova weneuwo sono ukukwana pafupifupi 6,000,000! Cifukwa ca covwiro ca Yehova, ŵakukhalira ŵakuphakazgika pamoza na mzinda ukuru ŵakuwungana mu mipingo 91,000 mu vyaru 235. Ise tose tikupwerereka makora mwauzimu kwizira mu kuyezgayezga kwambura kuvuka kwa “muzga wa magomezgeko na wa vinjeru.” (Mateyu 24:45) Gulu la teokrase ilo likuya pantazi, likupereka urongozgi wacitemwa, kulaŵilira uteŵeti wa Ufumu mu mintavi 110 ya Ŵakaboni ŵa Yehova. Tili ŵakuwongera comene kuti Yehova wakukhuŵirizga mitima ya ŵantu kuti ‘ŵamucindike na mpango zawo.’ (Zintharika 3:9, 10) Mwakusazgirapo, mulimo withu wakupharazga ukulutilira ndipo nyumba za makina ghakusindikizgira, nyumba za Beteli na nyumba za ŵamishonale, mintavi, Nyumba za Ufumu, ndiposo Nyumba Zakucitiramo Maungano zikuzengeka.
20. Kasi kughanaghanira milimo yikuru ndiposo yakurumbika ya Yehova kukwenera kutikhwaska wuli?
20 Tingafiska cara kupenda milimo yose yikuru ya Ŵadada ŵithu ŵakucanya. Kweni kasi walipo muntu wakunyoroka mtima mweneuyo wangaleka kukolerana na awo ŵakurumba Yehova? Cara nadi! Mwanteura, Tiyeni tose ise tikutemwa Ciuta ticemerezge mwacimwemwe kuti: “Rumbani Yehova! Rumbani Yehova ku mitambo; rumbani mu macanya! Rumbani, mose mwa ŵangelo ŵake, . . . ŵapungwe naŵo na ŵamwali ŵose pamoza, ŵarara na ŵana! Ŵarumbenge zina la Yehova, cifukwa zina la iye pera likwenera kukuzgika; ucindami wake uli pacanya pa caru na pa mitambo.” (Salmo 148:1, 2, 12, 13) Inya, tiyeni tose tirumbe Yehova cifukwa ca vintu vikuru ivyo wakucita, sono na muyirayira swii.
Kasi Mungazgora Wuli?
• Kasi yinyake mwa milimo yiweme ya Yehova ni njini?
• Ncivici ico cikumuciskani kuti murumbe Yehova?
• Ni mwauli umo cilindizga cithu ciliri cakukolerana na milimo yikuru ya Ciuta?
• Ni mwauli umo Yehova wakucitira milimo yikuru yakukhwaskana na ncito yakupharazga Ufumu?
[Mafumbo]
[Cithuzithuzi pa peji 8]
Kasi mukwimba nawo na mtima wose sumu zakurumba Yehova?
[Vithuzithuzi pa peji 11]
Tikukondwa kuti mwaŵi ucali kwa ŵakuzika ŵa caru capasi kuti ŵakolerane nase pakurumba Yehova