‘Mabamba gha Mubwezi’

Mpostole Paulos wakawona kukhumbikwa kwa kupereka urongozgi wa kunyolorera Ŵakristu ŵa ku Galatiya ŵa mu virimika vya mu handiredi lakwamba. Kuti watceŵe kuŵakwiyiska, iye wakaŵafumba kuti: “Kasi ndazgoka mulwani winu cifukwa nkumuphalirani unenesko?”—Ŵagalatiya 4:16.

Mwa ‘kuŵaphalira unenesko’ Paulos wakazgoka murwani wawo cara. Kuyowoya unenesko, Iye, wakacitanga mwakukolerana na fundo yakulembeka mu Baibolo yakuti: ‘Mabamba gha mubwezi ngamagomezgeko.’ (Zintharika 27:6) Paulos wakamanya kuti urongozgi uwo wakapereka ungaŵa wakuŵaŵa ku ŵantu awo ŵakucita viheni. Ndipouli, wakamanyaso kuti usange waleka kupereka urongozgi wakukhumbikwira ku muntu wakwananga, mbwenu Yehova Ciuta warongorenge cara citemwa cake pa muntu uyo. (Ŵahebere 12:5-7) Mwanteura, nga ni mubwezi mweneco uyo wakatemwanga mpingo kufumira pasi pa mtima, Paulos wakawerera nyuma cara pa kupereka urongozgi wakukhumbikwira.

Lero, Ŵakaboni ŵa Yehova ŵakukwaniska mulimo wawo wa ‘kupanga ŵasambiri pacaru cose capasi, . . . kuŵasambizga kukoreska vyose ivyo Yesu Kristu ŵali kuŵalangulira.’ Mwakucita nteura, Ŵakristu ŵaunenesko aŵa, ŵakudinginyika cara na unenesko wa mu Baibolo uwo wukususka visambizgo vyautesi na mikhaliro yambura kwenerera Ŵakristu. (Mateyu 15:19; 23:9; 28:19, 20; 1 Ŵakorinte 6:9, 10) Mumalo mwa kuŵa ŵarwani, iwo ni mabwezi gheneco gha ŵantu.

Na cimanyisko ca kufunyilirika na Ciuta, Wamasalmo wakalemba kuti: “Usange murunji wanditimba, nditenge ndusungu, ndipo para wandicenya, nditenge ndi mafuta ku mutu; pakuti lurombo lwane mazuŵa yose lukususka ncito ziheni.”—Masalmo 141:5.