Sangani Cimwemwe mwa Kupereka Vintu ku Ŵanyinu!
Sangani Cimwemwe mwa Kupereka Vintu ku Ŵanyinu!
“Muli cimwemwe cikuru mukupereka kuruska kupokera.”—MILIMO 20:35, NW.
1. Ni mwauli umo Yehova wakurongolera cimwemwe pa nkani ya kupereka vyawanangwa?
CIMWEMWE ico tili naco cifukwa ca kumanya unenesko ncawanangwa ca mtengo wapatali comene cakufuma kwa Ciuta. Awo ŵamumanya Yehova ŵali na vifukwa vinandi vyakuŵira na cimwemwe. Pakuti tikuŵa na cimwemwe para tikupokera cawanangwa, tikuŵaso na cimwemwe para tikupereka vintu ku ŵanyithu. Yehova ndiyo wakupereka “vyawanangwa viweme vyose, na vyawanangwa vyakufiskika vyose,” ndipo iye ni ‘Ciuta wacimwemwe.’ (Yakobe 1:17; 1 Timote 1:11, NW) Iye wakupereka visambizgo viweme kwa wose awo ŵakupulikira. Ndipo nga ni umo ŵapapi ŵakukondwera para ŵakuwona ŵana ŵawo ŵakurondezga urongozgi wawo wacitemwa, iye naye wakukondwa para wakuwona awo wakuŵasambizga ŵakupulikira.—Zintharika 27:11.
2. (a) Kasi Yesu wakayowoyaci pa nkani ya kupereka? (b) Ncimwemwe wuli ico tikuŵa naco para tikusambizga ŵanyithu unenesko wa mu Baibolo?
2 Mwakuyana waka, penepapo Yesu wakaŵa pano pacaru capasi wakakondwa apo wakawonanga ŵantu ŵakutegherezga ku ivyo wakasambizganga. Mpostole Paulos wakawerezga mazgu agho Yesu wakayowoya, wakati: “Muli cimwemwe cikuru mukupereka kuruska kupokera.” (Milimo 20:35, NW) Cimwemwe ico tikuŵa naco para tikusambizga ŵanyithu unenesko wa mu Baibolo kuti cikuŵa ca kuwona waka muntu uyo tikumusambizga wakukolerana na vigomezgo vithu cara. Kweni, kuruska apo, ise tikuŵa na cimwemwe pakumanya kuti tikupereka cintu cinyake ca mtengo wapatali ico nca candulo cambura kumara. Para tikupereka ku ŵanji cintu cauzimu, tikovwira ŵantu kuti ŵandule mu nyengo yasono na muntazi wuwo.—1 Timote 4:8.
Kupereka Kukwiziska Cimwemwe
3. (a) Kasi mpostole Paulos na Yohane ŵakarongora wuli cimwemwe cawo apo ŵakawovwira ŵanji mwauzimu? (b) Cifukwa wuli kusambizga ŵana ŵithu unenesko wa mu Baibolo kukurongora citemwa?
3 Nga ni umo Yehova na Yesu ŵakukondwera pakupereka vyawanangwa vyauzimu, Ŵakristu nawo ndimo ŵakukondwera. Mpostole Paulos wakaŵa na cimwemwe cifukwa cakuti wakawovwira ŵantu ŵanyake kusambira unenesko wa Mazgu gha Ciuta. Ku mpingo wa Tesalonika, Paulos wakalemba kuti: ‘Cifukwa cigomezgo cithu ncici, na cimwemwe cithu, na mpumpu ya kuthumbwa? Asi ndimwe pantazi pa Fumu yithu Yesu pa kwiza kwake? Cifukwa imwe ndimwe ucindami withu na cimwemwe cithu.’ (1 Ŵatesalonika 2:19, 20) Mwakuyana waka, mpostole Yohane, pakuyowoya za ŵana ŵake ŵauzimu, wakalemba kuti: “Ndilive cimwemwe cakuruska ici, cakuti nkupulika kuti ŵana ŵane ŵakwenda mu unenesko.” (3 Yohane 4) Aghanaghanani waka za cimwemwe ico cikuŵapo para tasambizga ŵana ŵithu kuti ŵaŵe ŵana ŵakutemwa vintu vyauzimu! Kulera ŵana mu “kulanga na mu kucenjezga kwa Fumu,” kukurongora kuti ŵapapi ŵakutemwa ŵana ŵawo. (Ŵaefeso 6:4) Usange ŵapapi ŵakucita ici, ŵakurongora kuti ŵakukhumba kuti ŵana ŵawo ŵazakaŵe na umoyo wamuyirayira. Para ŵana ŵakuŵapulikira, ŵapapi ŵakuŵa na cimwemwe cikuru.
4. Ncakucitika wuli ico muntu munyake wakasanganaco cimwemwe cifukwa ca kupereka cawanangwa cauzimu?
4 Dell, ni mupayiniya wanyengo zose ndipo wali na ŵana ŵankondi. Iye wakuyowoya kuti: “Nga ni umo mpostole Yohane wakasekelera, ine nane nkuwonga comene cifukwa cakuti ŵana ŵane ŵanayi ‘ŵakwenda mu unenesko.’ Nkumanya kuti kacitiro aka kakupereka ncindi na marumbo kwa Yehova para mbumba zikukolerana pakusopa kwaunenesko, pa cifukwa ici nili wacimwemwe kuwona kuti iye wanitumbika pakulera ŵana ŵane mu unenesko. Cilindizga ca kuzakakhala na umoyo wambura kumara mu Paradiso na mbumba yane cikunikhozga kuti nizizipizge nanga ningakumana na masuzgo wuli.” Ncacitima kupulika kuti mwana msungwana yumoza wa Dell walikusezgeka mu mpingo cifukwa ca kurondezga makhumbiro ghacaru. Nanga vili ntena, kweni Dell wacali na mtima wacimwemwe. “Nkugomezga kuti zuŵa limoza mwana wane wajilambikenge na kuwelera kwa Yehova,” ndimo wakuyowoyera ntena. “Kweni nkuwonga Ciuta cifukwa ŵana ŵane ŵanyake ŵacali kuteŵetera Ciuta mwakugomezgeka. Cimwemwe ico nili naco canipa nkongono nadi.”—Nehemiya 8:10.
Kupanga Mabwezi Ghambura Kumara
5. Para tikujipereka kucita ncito ya kupanga ŵasambiri, kasi tikuŵa na cimwemwe cifukwa ca kumanya vici?
5 Yesu wakaphalira ŵarondezgi ŵake kuti ŵapange ŵasambiri Ŵacikristu na kuŵasambizga kuti ŵamanye Yehova na ivyo wakukhumba. (Mateyu 28:19, 20) Yehova na Yesu ŵajipereka na mtima wose kovwira ŵantu kuti ŵasambire unenesko. Usange tijiperekenge mu ncito iyi ya kupanga ŵasambiri, tiŵenge na cimwemwe kumanya kuti tikurondezga Yehova na Yesu, nga ni umo ŵakacitira Ŵakristu ŵakwambilira. (1 Ŵakorinte 11:1) Para tikukorerana na Ciuta Wankongono-zose na Mwana wake wakutemweka, umoyo withu uŵenge wacandulo. Mwee, naco ncifukwa cakuŵira ŵakukondwa, kumanyikwa na Ciuta kuti tili “ŵalimi ŵamoza” naye! (1 Ŵakorinte 3:9) Kasi ncakukondweska yayi kumanya kuti ŵangelo nawo ŵakucita mulimo uwu wa kupharazga makani ghaweme?—Civumbuzi 14:6, 7.
6. Mbanjani ŵakuŵa ŵabwezi ŵithu para tikujipereka mu ncito ya kupereka vintu vyauzimu?
6 Kuyowoya unenesko, para tijiperekenge mu ncito iyi ya kupereka vintu vyauzimu, mbwenu tiŵenge pa ubwezi wamuyirayira na Ciuta—kuruska kuŵa waka ŵalimi ŵamoza naye. Cifukwa ca cipulikano cake, Abrahamu wakacemeka bwezi la Yehova. (Yakobe 2:23) Para tifwilirengepo kucita khumbo la Ciuta, ise nase tingaŵa mabwezi ghake. Usange ndimo ticitirenge, tiŵengeso mabwezi gha Yesu. Iye wakaphalira ŵasambiri ŵake kuti: “Ndamucemani [mabwezi, NW]; pakuti ndamumanyiskani vyose ivyo nkapulika ku Ŵadada.” (Yohane 15:15) Ŵanandi ŵakukondwa kukorana ubwezi na muntu wamazaza panji na nduna yikuru, kweni ise tingakorana ubwezi na ŵantu ŵaŵiri ŵamazaza comene pacaru cose.
7. (a) Ni mwauli umo mudumbu munyake wakasangira bwezi la pamtima? (b) Kasi namwe muli kucitapo nga ni mudumbu uyu?
7 Mwakusazgirapo, para tikovwira ŵantu kuti ŵamanye Ciuta, iwo nawo ŵakuŵa ŵabwezi ŵithu, ici cikutipa cimwemwe cikuru. Joan, mudumbu uyo wakukhala ku United States, wakamba kusambira Baibolo na mwanakazi munyake zina lake Thelma. Nangauli mbumba ya Thelma yikamukanizganga kusambira Baibolo, kweni wakalimbikira mupaka wakabapatizika mu cirimika cakurondezgapo. Joan wakalemba kuti: “Ubwezi withu ukamalira penepara pera cara; kweni warutilira mupaka kufikira sono apo pajumpa virimika 35. Nyengo na nyengo tarutanga lumoza mu uteŵeti na ku maungano gha cigaŵa. Nyengo yikati yarutapo, nkasamira ku nyumba yipya iyo pakaŵa makiromita 800 kufuma pa nyuma yake. Kweni ndipouli, Thelma wacali kunitumira makalata gha kunikhumbira viweme, wakuniphalira kuti wakunitemwa comene ndipo wakuniwonga cifukwa nili bwezi lake, nili ciyerezgero ciwemi kwa iye, ndiposo kuti nili kumusambizga unenesko wa mu Baibolo. Kuŵa na bwezi la nga ni ili ni malipiro ghawemi comene pa ivyo nili kucita kumusambizga kuti wamanye Yehova.”
8. Nkaghanaghaniro wuli ako kangatovwira mu uteŵeti?
8 Kuŵa na cilindizga cakuti tisangenge muntu uyo wangatemwa kusambira unenesko, kungatovwira kuti tirutilire kupharazga nangauli ŵantu ŵanandi awo tikukumana nawo ŵakukhumba cara kutegherezga Mazgu gha Yehova. Ŵantu ŵa nga ni aŵa ŵangayezga cipulikano cithu na cizizipizgo cithu. Kweni ndipouli, kuŵa na mtima wacimwemwe kungatovwira. Fausto, uyo wakukhala ku Guatemala, wakayowoya kuti: “Para nkupharazgira ŵanji, nkughanaghana umo ningakondwera kuwona kuti muntu uyo nkuyowoya nayo wazakaŵe mbali panji mudumbu wauzimu. Nkuyowoya mu mtima pera kuti muntu yumoza uyo nikumanenge nayo mpanyi wazomera unenesko wa Mazgu gha Ciuta. Kaghanaghaniro aka kakunipangiska kuti nirutilire kupharazga ndipo kakunipa cimwemwe cikuru.”
Kuŵika Usambazi Kucanya
9. Kasi Yesu wakayowoyaci pa nkani ya usambazi, ndipo ise tingasambirapo vici?
9 Ncito ya kupanga ŵasambiri nyengo zose njinonono, kwali tikusambizga ŵana ŵithu panji ŵantu ŵanyake. Tikwenera kufwilirapo, kuzizipizga ndiposo kuŵa na nyengo. Kumbukani kuti ŵanandi ŵakulimbikira comene kuti ŵaŵe na usambazi unandi, kweni usambazi uwu kanandi ukuŵapa cimwemwe cara ndiposo ukukhalirira yayi. Yesu wakaphalira ŵapulikizgi ŵake kuti cikaŵa ciweme kuti ŵaŵe na usambazi wauzimu. Iye wakati: “Mungajiŵikiranga usambazi pano pasi, penepapo cipupuruzu na mrosko vikunanga, ndipo penepapo ŵankhungu ŵakugumula na kwiba; kweni mujiŵikire usambazi kucanya, kwenekuko nanga ndi cipupuruzu panji mrosko kuti vikunanga cara, nanga mbankhungu kuti ŵakugumula na kwiba cara.” (Mateyu 6:19, 20) Para tikuŵika maghanoghano ghithu pa milimo yauzimu—yeneiyo yikusazgapo ncito yakuzirwa ya kupanga ŵasambiri—tiŵenge na cimwemwe kumanya kuti tikucita khumbo la Ciuta ndipo kuti iye wazamutipa njombe. Mpostole Paulos wakalemba kuti: “Ciuta kuti ngwambura urunji cara, kuti waruwe mulimo winu na kutemwa uko mukarongora ku zina lake.”—Ŵahebere 6:10.
10. (a) Ncifukwa wuli Yesu wakaŵa na usambazi wauzimu? (b) Ni mwauli umo Yesu wakajiperekera, ndipo ncandulo wuli cikuru ico ŵantu ŵali naco?
10 Kuyana na umo Yesu wakayowoyera, usange tikufwilirapo comene kucita ncito ya kupanga ŵasambiri, ndikuti tikujiŵikira “usambazi kucanya.” Kacitiro aka kakutipa cimwemwe. Usange tikupereka na mtima withu wose, ise ndise tikusambazgika. Yesu iye mweneko wakateŵetera Yehova kwa virimika vyambura mapendeko. Aghanaghanani waka za usambazi uwo wakaŵa nawo kucanya! Kweni ndipouli, Yesu wakacita vintu mwakujikondweska yekha cara. Mpostole Paulos wakalemba kuti: ‘[Yesu] wakajipereka cifukwa ca zakwananga zithu, mwakuti watithaske mu nyengo yino yiheni, kwakuyana na khumbo la Ciuta withu na Ŵadada.’ (Ŵagalatiya 1:4) Yesu wakajipereka kucita uteŵeti pera cara, kweniso wakapereka umoyo wake kuwombora ŵantu kuti ŵaŵe na mwaŵi wa kuŵika usambazi wawo kucanya.
11. Ncifukwa wuli vyawanangwa vyauzimu nviweme comene kuruska vintu vyakuthupi?
11 Para tikusambizga ŵantu za Ciuta, tikuŵawovwira kuti ŵamanye umo iwo nawo ŵangasungira usambazi wauzimu wambura kumara. Kasi ncawanangwa wuli cikuru ico imwe mungapereka? Usange mubwezi winu mwamupa woci yapacanya, galimoto, panji nyumba, iye wawongenge nadi na kusekelera comene ndipo imwe namwe mukondwenge cifukwa ca kumupa cawanangwa. Kweni kasi cintu ico ciŵenge wuli usange pajumpa virimika 20? Virimika 200? Virimika 2,000? Kweni, usange mujiperekenge kovwira muntu kuti wateŵetere Yehova, iye waŵenge na candulo camuyirayira.
Kupenja Awo Ŵakukhumba Unenesko
12. Ni mwauli umo ŵanandi ŵajiperekera kuti wovwire ŵanyawo mwauzimu?
12 Kuti ŵasange cimwemwe pakupereka vyawanangwa vyauzimu, ŵantu ŵa Yehova ŵafika mupaka uko caru cikugota. Ŵantu ŵanandi ŵaleka nyumba zawo na mbumba zawo kuti ŵacite uteŵeti wa umishonale ku vyaru vinyake kwenekuko ŵakwenera kukasambira viyowoyero vinyake. Ŵanyake ŵasamira ku vigaŵa vinyake mu vyaru vyawo uko ŵapharazgi ŵa Ufumu mbacoko. Ŵanyakeso ŵasambira ciyowoyero cacilendo na cakulata cakuti ŵapharazgire ŵantu awo ŵakwiza mu cigaŵa cawo. Mwaciyerezgero, mbumba yinyake ya ku New Jersey U.S.A. yikati yalera ŵana ŵawo ŵaŵiri awo sono ŵakuteŵetera pa cinyina ca muntavi wa Ŵakaboni ŵa Yehova, mbumba iyo yikamba kucita upayiniya na kusambira ciyowoyero ca Citcaina. Virimika vitatu vikati vyarutapo, mbumba iyi yikacitiskanga masambiro gha Baibolo na ŵantu 74 awo ŵakayowoyanga Citcaina, ŵeneawo ŵakasambiranga pa koleji yapafupi. Kasi mungasazgirako uteŵeti winu mu ntowa zinyake mwakuti musange cimwemwe cikuru mu ncito ya kupanga ŵasambiri?
13. Kasi mungacita wuli usange mukukhumba kuŵa na vipambi vinandi mu uteŵeti winu?
13 Panyake mukunweka kuti muŵe na sambiro la Baibolo kweni mukulisanga cara. Mu vyaru vinyake cikuŵa cinonono kusanga ŵantu awo ŵakutemwa unenesko. Nyengo zinyake ŵantu awo mukukumana nawo ŵakukhumba cara kutegherezga cidumbirano ca Baibolo. Usange ndimo viliri, ipo nyengo na nyengo mu pempero linu sazganimo nkani iyi, cifukwa Yehova na Yesu Kristu mbakukondwa na ncito iyi ndipo ŵangamurongozgani kuti musange muntu wa nga ni mberere. Pempani ŵabali na ŵadumbu ŵacimanyisko mu mpingo winu panji awo ŵakucita makora mu uteŵeti kuti ŵamovwirani. Gwiriskirani ncito ivyo mukusambira na masacizgo agho ghakuyowoyeka pa maungano gha Cikristu. Citanipo kantu pa urongozgi wa ŵalaŵiliri ŵakwendakwenda na ŵawoli ŵawo. Cintu cikuru ndico kuŵa na citatata. Mwanarumi wavinjeru wakalemba kuti: “Seŵa mbuto yako namacerocero ndipo na mise ungapumuzganga woko lako; pakuti ulije kumanya izo zitisakatenge.” (Mupharazgi 11:6) Kumbukani za ŵanarumi ŵakugomezgeka ŵa nga ni Nowa na Yeremiya. Nangauli ŵantu ŵacoko comene ndiwo ŵakapulikira ivyo ŵakapharazganga, kweni uteŵeti wawo ukaŵa wacandulo. Kuruska vyose, uteŵeti wawo ukakondweska Yehova.
Kucita Ivyo Mungakwaniska
14. Kasi Yehova wakuŵawona wuli ŵantu awo ŵacekulira mu uteŵeti wake?
14 Panyengo iyi panyake mikhaliro yinu yikumuzomerezgani cara kuti mucite vinandi mu uteŵeti nga ni umo mukukhumbira. Mwaciyerezgero, ucekuru ungamutondeskani kucita vinandi mu uteŵeti wa Yehova. Nanga viŵe ntena, kweni kumbukani ivyo mwanarumi wavinjeru wakalemba: “Mbuha ndizo mphumpu ya ucindami, ziri nga ndi njombe ya umoyo wa urunji.” (Zintharika 16:31) Yehova wakukondwera na muntu uyo wacekulira mu uteŵeti Wake. Mwakusazgirapo, Malemba ghakuyowoya kuti: “Nanga mufike ku ucekuru, ndine [Yehova]; ndipo tindimuyegheni ku ucekuru wa mbuha. Ine nkacita, tindiyeghenge; enya, kumuyeghani na kumutaskani.” (Yesaya 46:4) Dada withu wakucanya wakulayizga kuti wavikilirenge na kuthaska ŵantu ŵake ŵakugomezgeka.
15. Kasi mukusimikizga kuti Yehova wakumanya mikhaliro iyo tilimo? Cifukwa wuli mwazgora ntena?
15 Panyake mukurwara, kusuzgika na munyinu wa mu ntengwa wambura cipulikano, panji mukupwererera mbumba yinu, panji muli na vyakumara-mahara vinyake. Yehova wakumanya kutondeka kwithu na mikhaliro iyo tilimo, ndipo wakutitemwa cifukwa tikuyezgayezga kumuteŵetera. Nanga tingaŵa kuti tikucita mulimo ucoko, kweni iye wakukondwa ndipera. (Ŵagalatiya 6:4) Yehova wakumanya kuti ndise ŵantu ŵakwananga, pa cifukwa ici iye wakukhumba cara vintu vinandi kwa ivyo tingatondeka kucita. (Salmo 147:11) Usange tikucita ivyo tingakwaniska, tisimikizgenge kuti tili ŵakuzirwa pa maso pa Ciuta ndipo iye waruwenge cara milimo yithu ya cipulikano.—Luka 21:1-4.
16. Kasi mpingo wose ukunjizgikamo wuli mu ncito ya kupanga ŵasambiri?
16 Kumbukaniso kuti kupanga ŵasambiri ni ncito iyo yikusazgapo ŵantu ŵanandi. Ici cingayerezgereka na manthonyezi ghanandi gha vula umo ghakuperekera maji ku cakumera. Inya, Kaboni munyake wangasanga muntu uyo watemwa unenesko na kwamba kusambira nayo Baibolo. Kweni usange muntu uyo wiza ku Nyumba ya Ufumu, mpingo wose ukumovwira kuti wamanye unenesko. Mtima wacisungusungu wa ŵabali ukurongora ivyo mzimu wa Ciuta ukucita. (1 Ŵakorinte 14:24, 25) Ŵana ŵacoko na ŵawukirano ŵakuyowoya fundo zakukondweska—kumulongora muntu uyo wiza sono kuti ŵana ŵithu ŵakupambana na ŵana ŵakucaru. Ŵabali awo mbarwali na ŵacekuru mu mpingo ŵakusambizga muntu uyo wiza sono kuzizipizga. Kwambura kupwererako za ucekuru panji za masuzgo agho tili nagho, ise tose tingacita ncito yakuzirwa—kovwira awo ŵiza sono mu gulu kukuliska citemwa cawo pa unenesko wa mu Baibolo mupaka ŵazakabapatizike. Ora lirilose ilo tikugwiriskira ncito mu uteŵeti, pa ulendo wakuwelerako, kucezga na muntu wacasono pa Nyumba ya Ufumu, lingawoneka nga kuti ndambura ncito, kweni ncigaŵa ca mulimo ukuru uwo ukucitika na nkongono ya Yehova.
17, 18. (a) Padera pa kucita ncito ya kupanga ŵasambiri, ni mwauli umo ise tingaŵira na cimwemwe pakupereka? (b) Ninjani uyo tikumurondezga usange tikuŵa na cimwemwe pakupereka?
17 Padera pa kucita ncito ya kupanga ŵasambiri, ise Ŵakristu tingasangaso cimwemwe pakupereka mu ntowa zinyake. Tingapereka ndarama kuti tirutiske pantazi kusopa kutuŵa ndiposo tingawovwiraso awo ŵakusuzgika. (Luka 16:9; 1 Ŵakorinte 16:1, 2) Tingalongora mtima wakupokelera ŵalendo. (Ŵaroma 12:13) Tingayezgayezga ‘kucitira ŵose uweme, comene-comene aŵo mba mbumba ya cipulikano.’ (Ŵagalatiya 6:10) Paliso ntowa yinyake yipusu kweni yakuzirwa iyo tingaperekera vintu ku ŵanyithu—kwizira mu kalata, telefoni, na mazgu ghakukhuŵirizga.
18 Usange tikupereka vyawanangwa tikurondezga Ŵadada ŵithu ŵakucanya. Tikulongoraso citemwa cithu ca ubali, ceneico ncimanyikwiro ca Ŵakristu ŵaunenesko. (Yohane 13:35) Usange ticitenge vintu ivi, tiŵenge na cimwemwe pakupereka.
Kasi Mungalongosora?
• Ni mwauli umo Yehova na Yesu ŵaliri ciyerezgero ciweme pa nkani ya kupereka vintu vyauzimu?
• Kasi tingapanga wuli mabwezi ghambura kumara?
• Kasi tingacita wuli kuti uteŵeti withu uŵe wakupambika vipambi?
• Ni mwauli umo wose awo ŵali mu mpingo ŵangaŵira na cimwemwe pakupereka?
[Mafumbo]
[Vithuzithuzi pa peji 27]
Usange ŵana ŵakurondezga urongozgi wa ŵapapi, ŵapapi ŵakuŵa na cimwemwe cikuru
[Cithuzithuzi pa peji 29]
Para tikupanga ŵasambiri, tikupanga mabwezi ghambura kumara
[Cithuzithuzi pa peji 30]
Yehova wakuvikilira ŵacekuru
[Vithuzithuzi pa peji 31]
Tikuŵa na cimwemwe pakupereka mu ntowa yipusu kweni yakuzirwa