Iŵani na Cimwemwe mu Ncito ya Vuna!
Iŵani na Cimwemwe mu Ncito ya Vuna!
“Vuna ndiyo njikuru, kweni ŵancito mbacoko. Nteura ŵeyererani Mweneco wa vuna kuti wakancizgire ŵancito ŵaye ku vuna yake.”—MATEYU 9:37, 38.
1. Ncivici ico cikutovwira kuti tirutirizge kucita khumbo la Ciuta?
PARA tikukumbukira zuŵa ilo tikabapatizikira kuŵa yumoza wa ŵateŵeti ŵa Yehova, nanga kungaŵa kuti tikabapatizika kale comene panji mwasono-sono, kungawoneka nga kuti tabapatizika waka mayiro. Kurumba Yehova kukazgoka cigaŵa cikuru ca kujipatulira kwithu kwa iye. Peneapo tikajiwomboleranga nyengo kovwira ŵanji kuti ŵapulike na kuzomerezga uthenga wa Ufumu, cilato cithu cikaŵa kuteŵetera Yehova na cimwemwe. (Ŵaefeso 5:15, 16) Lero tikuwona kuti mazuŵa ghakwenda luŵiro para tili ŵakutangwanika, “ŵakufurwira mazuŵa ghose mu mulimo wa Fumu.” (1 Ŵakorinte 15:58) Nangauli tikukumana na masuzgo, cimwemwe cithu cikuticiska kuti tirutirizge kucita khumbo la Yehova.—Nehemiya 8:10.
2. Kasi ni vici ivyo vikupangiska kuti tiŵe na cimwemwe mu ncito ya vuna yakuyerezgera?
2 Ise nga Mbakristu, tikugwira ncito ya vuna yakuyerezgera. Yesu Kristu wakayerezgera kuwunganya ŵantu kuti ŵasange umoyo wamuyirayira na ncito ya vuna. (Yohane 4:35-38) Cingaŵa cakukondweska kusanda cimwemwe ico Ŵakristu ŵakudanga ŵakaŵa naco mu ncito ya vuna cifukwa nase tikugwira ncito yakuyana waka. Sono tiwonenge vintu vitatu ivyo vingatovwira kuti tiŵe na cimwemwe mu ncito ya vuna mazuŵa ghano. Vintu vyake ni ivi (1) uthenga withu wa cilindizga, (2) kuya pantazi pakupenja awo mbakwenelera, na (3) kuŵa na mtende nga mbancito ya vuna.
Ŵakatumika nga Mbancito ya Vuna
3. Ni mwauli umo ŵarondezgi ŵakudanga ŵa Yesu ŵakasangira cimwemwe?
3 Mwee, nako nkusinta kwa umoyo wa ŵancito ŵakwambilira—comene-comene ŵapostole 11 ŵa Yesu pa zuŵa la 33 C.E. peneapo ŵakaruta ku lupiri lwa Galileya kuti ŵakakumane na Kristu uyo wakawuskika! (Mateyu 28:16) “Ŵabali ŵakujumpa makumi pera makumi ghankonde” ŵakwenera kuti ŵakaŵapo pa cakucitika ici. (1 Ŵakorinte 15:6) Iwo nyengo zose ŵakakumbukiranga ncito iyo ŵakapika na Yesu. Iye wakaŵaphalira kuti: ‘Rutaninge mukasambizge ŵantu ŵa mitundu yose, mukaŵabapatize mu zina la Ŵawiske na la Mwana na la mzimu mutuŵa: muŵasambizge kukoreska vyose ivyo ndamulangulirani.’ (Mateyu 28:19, 20) Mwambura kupwererako za ntambuzgo, iwo ŵakaŵa na cimwemwe cikuru mu ncito ya vuna peneapo ŵakawonanga kuti mipingo ya ŵarondezgi ŵa Kristu yikakhazikiskikanga mu malo ghanandi. Mukuruta kwa nyengo, ‘makani ghawemi ghakapharazgika mu cakwatika cose kusi ku mtambo.’—Ŵakolose 1:23; Milimo 1:8; 16:5.
4. Ncivici cikapangiska ŵasambiri ŵa Kristu kuti ŵarute ŵakapharazge?
4 Ku uyambiliro wa uteŵeti ŵake mu Galileya, Yesu ŵakacema ŵarondezgi ŵake 12 na kuŵatuma kuti ŵakapharazge kuti: “Ufumu wa kucanya waneng’enera.” (Mateyu 10:1-7) Yesu iye mwene ŵakaŵa kuti ‘wendera kale misumba yose na mu vikaya [vya mu Galileya] wakasambizganga mu masunagoge ghaŵo na kupharazga makani ghawemi gha Ufumu, na kucizga matenda ghose na maurwari ghose.’ Peneapo Yesu wakati wawona mizinda, iye wakayilengera citima “cifukwa ŵakakweŵeka na kuparanyika nga ndi mberere zambura mliska.” (Mateyu 9:35, 36) Wati wayilengera citima mzinda, iye wakaphalira ŵasambiri ŵake kuti: “Vuna ndiyo njikuru, kweni ŵancito mbacoko. Nteura ŵeyererani Mweneco wa Vuna [Yehova Ciuta] kuti wakancizgire ŵancito ŵaye ku vuna yake.” (Mateyu 9:37, 38) Apo kukakhala myezi yinkondi na umoza kuti uteŵeti wake pano pasi umare, Yesu wakamanyaso kuti ku Yudeya nako kukakhumbikwanga kuti kurute ŵantu ŵakagwire ncito iyi ya vuna. (Luka 10:2) Ku malo ghose ghaŵiri, iye wakatumizga ŵarondezgi ŵake kuti ŵakagwire ncito ya vuna.—Mateyu 10:5; Luka 10:3.
Uthenga Withu wa Cilindizga
5. Ni uthenga wa mtundu wuli uwo tikupharazga?
5 Nga mbasopi ŵa Yehova ŵa mazuŵa ghano, na cimwemwe cose tikuzomerezga ncemo yakuti tigwire ncito ya vuna. Cintu cimoza ico tikukondwa naco comene ncakuti tikupereka uthenga wa cilindizga ku ŵantu awo mbakusuzgika maghanoghano ndiposo awo mbakudindiŵara. Nga ni umo ŵakacitira ŵasambiri ŵa Yesu ŵa mu virimika vya mu handiredi lakudanga, ise nase tili na mwaŵi ukuru wa kupharazga makani ghawemi, uthenga wa cilindizga ku ŵantu awo ‘mbakuparanyika nga ndi mberere zambura mliska.’
6. Kasi ŵapostole ŵakacitanga ncito wuli mu virimika vya mu handiredi lakudanga?
6 Mukatikati mwa virimika vya mu handiredi lakudanga, mpostole Paulos wakaŵa wakutangwanika kupharazga makani ghawemi. Ndipo ncito yake ya vuna yikaŵa na vyakufumapo viwemi comene, lekani iye wakalembera Ŵakristu ŵa ku Korinte mu 55 C.E kuti: “Mwa ŵabali, nkumumanyiskani ivangeli ilo nkamupharazgirani, iloso mukapokera, mwa leneiloso mukwimamo.” (1 Ŵakorinte 15:1) Ŵakristu ŵakudanga na ŵapostole ŵakagwiranga ncito ya vuna mwakujipereka comene. Nangauli Baibolo likuyowoya cara za ciŵerengero ca ŵapostole awo ŵakapona apo Yerusalemu waparanyika mu 70 C.E., kweni tikumanya kuti mpostole Yohane wakaŵa kuti wacali kupharazga kwa virimika 25 pamanyuma pake.—Civumbuzi 1:9.
7, 8. Ni uthenga wuli wa cilindizga uwo ŵateŵeti ŵa Yehova ŵaŵa ŵakupharazga mwa mwampu kuruska kale?
7 Pamanyuma pake visopo vya Cikristu vikanjilirapo, ŵacigaruka, enya, ‘ŵantu ŵakwananga.’ (2 Ŵatesalonika 2:3) Ku umaliro wa virimika vya mu handiredi la 19, ŵantu awo ŵakayezgayezga kurondezga cisambizgo ca Cikristu caunenesko ŵakamba kupharazga uthenga wa cilindizga wa Ufumu. Ndiposo, kwambira apo magazini iyi yikamba kupharazgika mu (July 1879), mupaka sono, mutu wake wasazgapo mazgu ghakuti “Kupharazga za Kuŵapo kwa Kristu,” “Kupharazga Ufumu wa Kristu,” panji kuti “Kupharazga Ufumu wa Yehova.”
8 Ufumu wa Ciuta wa kucanya wukakhazikiskika mu 1914 peneapo Yesu Kristu wakamba kuwusa, ndipo sono nte tikupharazga uthenga wa cilindizga na mwampu kuruska kale. Cifukwa wuli? Cifukwa cakuti mwa vintu vinyake viwemi ivyo Ufumu wa Ciuta uzamucita nkuparanya kaŵiro kaheni aka ka vintu. (Daniel 2:44) Kasi uwu ni uthenga uwemi yayi? Kasi tingaŵaso na cimwemwe cinyake cikuru kuruska ico tili naco ca kupharazga Ufumu pambere “suzgo yikuru” yindafike?—Mateyu 24:21; Marko 13:10.
Kuya Pantazi Pakupenja Awo Mbakwenelera
9. Ni urongozgi wuli uwo Yesu wakapereka ku ŵasambiri ŵake, ndipo ni mwauli umo ŵantu wakacitira na uthenga wa Ufumu?
9 Cintu cinyake ico cikutipa cimwemwe mu ncito ya vuna ni vyakufumapo viwemi ivyo tikuŵa navyo para tasanga ŵantu awo ŵasambirenge unenesko ndipo mukuruta kwa nyengo nawo ŵazamunjizgikamo mu ncito ya vuna. Kunyuma uku kwambira mu 31 mupaka mu 32 C.E., Yesu wakaphalira ŵasambiri ŵake kuti: ‘Mu msumba wose panji cikaya ico mwamkunjiramo, mukapenjemo mweneuyo ngwakwenerera.’ (Mateyu 10:11) Kuti ni ŵantu ŵose cara ŵakaŵa ŵakwenerera, ici cikamanyikwa kwizira mu kacitiro kawo kurazga ku uthenga wa Ufumu. Kweni ndipouli, ŵasambiri ŵa Yesu ŵakapharazganga mwa mwampu makani ghawemi kulikose uko ŵakasangako ŵantu.
10. Kasi Paulos wakacita wuli kuti wasange ŵantu awo mbakwenerera?
10 Panyuma pa nyifwa na ciwuka ca Yesu, kupenja ŵantu awo mbakwenerera kukarutilira na mwampu. Paulos wakadumbiskana na Ŵayuda mu sunagoge lawo ndiposo mu musika wa mu Athene. Peneapo ŵakapharazga ku Areopago mu msumba wa Ŵagiriki, “ŵantu ŵanji ŵakakwapirana nayo, ŵakapulikana: mwa iŵoso mukaŵa Diyonusiyo Muareopago, na mwanakazi zina lake Damarisi, na ŵanyake pamoza naŵo.” Kulikose uko Paulos wakarutanga, iye wakarongora ciyerezgero ciwemi ca kupharazga “pa kweru na mu nyumba na nyumba.”—Milimo 17:17, 34; 20:20.
11. Ni ntowa wuli izo zikagwiriskikanga ncito mu uteŵeti wa m’munda virimika vya kunyuma uku?
11 Ku umaliro wa virimika vya mu handiredi la 19, Ŵakristu ŵakuphakazgika mwacikanga ŵakanjizgika mu ncito ya kupenja ŵantu awo mbakwenerera. Nkani iyo yikafuma mu Zion’s Watch Tower ya July/August 1881 ya mutu wakuti “Ŵakuzomerezgeka Kuti Ŵapharazge” yikayowoya kuti: “Kupharazga makani ghawemi . . . kukuruta kwa ‘ŵantu ŵakuzika’ awo ŵakunweka ndiposo awo mbakukhumbisiska kutegherezga kuti ŵaŵe na thupi la Kristu, na kukolerana nayo mu Ufumu.” Ŵancito ŵa Ciuta kanandi ŵakakumananga na ŵantu awo ŵali mu visopo ndipo ŵakaŵapa matrakiti agho ghakaŵa na nkani zakuzikika mu Malemba zeneizo zili kunozgeka na cilato ca kupenja ŵantu awo mbakwenerera. Panyuma pakusanda vyakufumapo viwemi vya ntowa iyi ya kapharazgiro, Gongwe la Mulinda la May 15, 1903, likaciska ŵantu awo ŵakagwiranga ncito ya vuna kugaŵira matrakiti ‘kunyumba na nyumba, pa Sabata na mulenji.”
12. Kasi tacita wuli kuti ncito yakupharazga yirute pantazi? Longosorani.
12 Mu virimika vyasono-sono apa, takuzgirako uteŵeti withu mwa kupharazgira ŵantu mu malo ghakupambana-pambana ndiposo na mu nyumba zawo. Kacitiro aka nkacandulo comene mu vyaru ivyo vintu vyakusanguluska na usambazi vikupangiska kuti ciŵe cakusuzga kuti ŵantu ŵasangikenge pa nyumba para tikuŵafikira. Peneapo Kaboni munyake wa ku England na ŵanyake ŵakawona kuti ŵalendo ŵanandi awo ŵakizanga nyengo na nyengo pa basi kuzakaseŵera mu mphepete mwa nyanja ŵakuwelera kukwawo, iwo mwacikanga ŵakanjiranga mu ma basi agho ghakiza na ŵalendo aŵa na kugaŵira magazini gha Gongwe la Mulinda na Galamukani! Mu mwezi umoza iŵo ŵakagaŵira magazini 229. Iwo ŵakayowoya kuti: “Tilije wofi pakupharazga mu mphepete mwa nyanja, mu musika, panji kopa cakumara mahara cilicose ico tingakumana naco cifukwa tikumanya kuti nyengo zose Yehova wali nase.” Iwo ŵakagaŵiranga magazini ghapya ghalighose, na kucitiska masambiro gha Baibolo ndipo wose ŵakamba kucita uteŵeti wa upayiniya wakovwira.
13. Ni masintiro wuli ghakukhwaskana na uteŵeti withu agho ghakucitika sono mu vigaŵa vinyake?
13 Penepapo ncito ya kupenja ŵantu awo mbakwenerera yikurutilira, masintiro ghakwenerera gha uteŵeti withu ghakucitika mu vigaŵa vinyake. Nangauli Ŵakaboni ŵanandi ŵaŵa ŵakucitira ukaboni wa kunyumba na nyumba pa Sabata mulenji, mu vigaŵa vinyake ŵasanga kuti kupharazga kumulenji kuli na candulo cicoko cifukwa ŵeneko nyumba ŵakuŵa ŵandauke. Mwakusinta ndondomeko yawo, Ŵakaboni ŵanandi sono ŵakupharazga panyuma pa maungano gha Cikristu nyengo ya muhanya. Ndipo kacitiro aka karongora nadi kuti nkhacandulo. Cirimika camara ciŵerengero ca ŵapharazgi ŵa Ufumu pacaru cose cikasazgikira na 2.3 peresenti. Ici cikutumbika Mweneco vuna ndipo ise nase tikuŵa na cimwemwe.
Sungilirani Mtende mu Ncito ya Vuna
14. Kasi tikupharazga uthenga withu mu ukhaliro wuli, ndipo ncifukwa wuli tikucita nteura?
14 Cifukwa cinyake cineico cikupangiska kuti tiŵe na cimwemwe ncakukhwaskana na mtende uwo tikurongora mu ncito ya vuna. ‘Para mukunjira mu nyumba, muŵatauzge ŵeneko nyumba. Ndipo usange nyumba njakwenerera, mtende winu wizengemo.’ (Mateyu 10:12, 13) Monile wa Cihebere ukuyana na monile wa Cigiriki cifukwa vyose vili na fundo yakuyana waka yakuti ‘muŵe na mtende.’ Kacitiro aka kakutirongozga kuti para tikukumana na ŵantu para tikupharazga makani ghawemi tikwenera kuŵatauzga. Ico tikukhumba ndico kuti ŵapokere uthenga wa Ufumu. Cifukwa awo ŵakupokelera unenesko, ŵangaŵa pa mtende na Ciuta para ŵarapa, na kung’anamuka ku zakwananga zawo na kucita khumbo la Ciuta. Mwanteura, mtende wa Ciuta uŵarongozgerenge ku umoyo wamuyirayira.—Yohane 17:3; Milimo 3:19; 13:38, 48; 2 Ŵakorinte 5:18-20.
15. Ni mwauli umo tingacitira vintu mwamtende para takumana na muntu wakususka mu ncito yithu yakupharazga?
15 Kasi tingasungilira wuli mtende withu usange tasangana na muntu uyo wakususka comene? Yesu wakalangura kuti: “Usange nyumba njambura kwenerera, mtende winu uwererenge ku mwaŵene.” (Mateyu 10:13) Luka nayo wakalemba mazgu agho Yesu wakayowoya ghakukhwaskana na kutumika kwa ŵasambiri 70, iye wakati: “Usange walimo mwana wa mtende, mtende winu wamkuŵa pa kwake; kweni usange mulive, uti uwererengeso ku mwaŵene.” (Luka 10:6) Peneapo tikupharazgira ŵantu makani ghawemi, tikucita nteura na cimwemwe ndiposo mu ukhaliro wa mtende. Para muntu wakukhumba cara kuti tidumbiskane nayo, wakudinginyika, panji wakuyowoya mwakuyuyura, ise ‘tikumupharazgira cara’ uthenga withu wa mtende. Kacitiro aka kakutipoka cara mtende withu, weneuwo ncipambi ca mzimu utuŵa wa Yehova.—Ŵagalatiya 5:22, 23.
Cilato Ciweme ca Ŵancito ŵa Vuna
16, 17. (a) Kasi cilato cithu ncakuti wuli para tikuwelerako uko tikasanga ŵantu wakukondweskeka? (b) Ni mwauli umo tingawovwilira ŵantu awo ŵali na mafumbo ghakukhwaskana na Baibolo?
16 Ise nga ŵancito ya vuna tikukondwa cifukwa ca kunjizgikamo mu ncito ya kuwunganya ŵantu kuti ŵazakasange umoyo wamuyirayira. Mwee, naco cikuŵa cimwemwe para muntu uyo tikumupharazgira wazomera unenesko, ndipo wakukhumba kusambira vinandi, na kurongora kuti ni “mwana wa mtende”! Mutepanji wali na mafumbo ghanandi ghakukhwaskana na Baibolo gheneagho tingazgora ghose zuŵa limoza cara. Nyengo zinyake kudumbiskana nayo kwanyengo yitali zuŵa lakwamba cingaŵa camacitiko cara, mwanteura, kasi tingacitaci? Tingaŵa na cilato ca nga ni ico cikazomerezgeka virimika 60 ivyo vyajumpa.
17 “Ŵakaboni wose ŵa Yehova ŵakwenera kunozgeka kucitiska masambiro ya Baibolo.” Mazgu agha ghakalembeka mu buku lacitatu la urongozgi la Model Study lakusindikizgika mu 1937 mupaka 1941. Likayowoyaso kuti: “Ŵapharazgi wose [ŵa Ufumu] ŵakwenera kufwilirapo kovwira ŵantu ŵanenesko mtima awo ŵakukondwera na uthenga wa Ufumu. Mukwenera kuwererako ku ŵantu aŵa, kukazgora mafumbo ghakupambana-pambana . . . na kwamba kusambira nawo mwaluŵiro.” Enya, cilato cithu ca ulendo wakuwelerako ncakuti tambiske sambiro la Baibolo na kulicita nyengo zose. a Kuŵa na mtima wacitemwa kurazga ku muntu wakukondweskeka ndiko kukuticiska kuti tinozgekere makora na kucitiska sambiro mwakukora mtima.
18. Ni mwauli umo tingawovwilira ŵantu ŵakukondweska kuti ŵaŵe ŵasambiri ŵa Yesu Kristu?
18 Mwakovwirika na buku la Cimanyisko Ceneico Cikurongozgera ku Umoyo Wamuyirayira ndiposo brosha la Kasi Ncici Ico Ciuta Wakukhumba kwa Ise?, sono tingacitiska masambiro gha Baibolo gha panyumba kwambura suzgo ndipo ici cikovwira ŵakukondweskeka kuti ŵaŵe ŵasambiri. Peneapo tikurondezga ciyerezgero ca Musambizgi Mukuru, Yesu Kristu, mwanadi, musambiri wa Baibolo wazamusambiraso mikhaliro iyo ise tikurongora ya nga ni mtende, cimwemwe, unenesko mtima, na kucindika vipimo vya Yehova na urongozgi wake. Para tikovwira ŵasambiri kuzgora mafumbo agho ŵakufumba, tiyeni tiyezgeyezge umo tingafiskira kuŵasambizga umo ŵangazgolera ŵantu awo ŵakuŵafumba. (2 Timote 2:1, 2; 1 Petros 2:21) Nga mbancito ya vuna yakuyerezgera, mwaunenesko tingaŵa ŵacimwemwe kuti masambiro gha Baibolo gha panyumba ghakukwana 4,766,631 ghakacitiskika cirimika camara ca uteŵeti. Tili na cimwemwe comene cifukwa tili ŵamoza ŵa ŵancito ya vuna ŵeneawo ŵakucitiska masambiro gha Baibolo.
Iŵani na Cimwemwe Nyengo Zose mu Ncito ya Vuna
19. Ncifukwa wuli pakaŵa vifukwa viweme vyakuŵira ŵacimwemwe mu ncito ya vuna mu nyengo ya uteŵeti wa Yesu ndiposo panyuma pa nyifwa yake?
19 Pakaŵa vifukwa viwemi vyakuŵira na cimwemwe mu ncito ya vuna mu nyengo ya uteŵeti wa Yesu ndiposo panyuma pa nyifwa yake. Ŵantu ŵanandi ŵakakondwera na makani ghawemi. Cimwemwe cikakura comene pa Pentekoste wa 33 C,E., cifukwa ŵantu ŵakukwana 3,000 ŵakategherezga urongozgi wa Petros, ndipo ŵakapokera mzimu utuŵa na kuŵa cigaŵa ca mtundu wa Ciuta—Israyeli wauzimu. Enya, ciŵerengero cikarutilira kusazgikira ndipo cimwemwe cikaŵa cikuru comene peneapo “Fumu yikasazgangako kwa iŵo zuŵa na zuŵa ŵeneaŵo ŵakaponoskekanga.”—Milimo 2:37-41, 46, 47; Ŵagalatiya 6:16; 1 Petros 2:9.
20. Ncivici ico cikwiziska cimwemwe cikuru mu ncito ya vuna?
20 Panyengo iyo, ucimi wa Yesaya ukafiskika nadi: “Imwe [Yehova] mwandanya mtundu wa ŵantu, mwakuzgirako cimwemwe cake; ŵakukondwa pamaso pinu kwakuyana na cimwemwe mu kuvuna, umo ŵantu ŵakukondwera para ŵakugaŵana vyakusogha.” (Yesaya 9:3) Nangauli tikuwona ‘mtundu ukuru’ wa Ŵakristu ŵakuphakazgika weneuwo ciŵerengero caŵo cikukhilira-khilira, cimwemwe cithu ncakuzara peneapo tikuwona ciŵerengero ca ŵantu ŵanyake awo ŵakugwira ncito ya vuna yeneiyo yikuruta pantazi cirimika cilicose.—Salmo 4:7; Zekariya 8:23; Yohane 10:16.
21. Kasi tizamudumbiskana vici mu nkani yakurondezgapo?
21 Tili na vifukwa viwemi vyakuŵira na cimwemwe nyengo zose mu ncito ya vuna. Uthenga withu wa cilindizga, kupenja awo mbakwenerera, ndiposo ukhaliro withu wamtende, vyose ivi vikutipa cimwemwe nga mbancito ya vuna. Kweni ndipouli, ŵantu ŵanyake ŵakukondwa nase cara. Mpostole Yohane wakakumana na ukhaliro uwu. Iye wakaŵikika mu jere pa cirwa ca Patmo “cifukwa ca mazgu gha Ciuta na cisimikizgo ca Yesu.” (Civumbuzi 1:9) Kasi tingasungilira wuli cimwemwe cithu para takumana na ntambuzgo panji kususkika? Kasi ncivici ico cingatovwira kuzizipizga mikhaliro yiheni ya ŵantu awo tikuŵapharazgira mazuŵa ghano? Nkani yithu yakurondezgapo yili na mazgoro ghakuzikika mu Malemba gha mafumbo agha.
[Mazgu ghamusi]
a Pakwambilira masambiro ghakacitikanga pa malo ghamoza gheneagho ŵantu ŵakukondweskeka wose ŵakawungananga. Mukuruta kwa nyengo, masambiro ghakacitikanga na muntu waliyose payekha panji mbumba.—Wonani buku la Jehovah’s Witnesses—Proclaimers of God’s Kingdom, peji 574, lakupharazgika na Ŵakaboni ŵa Yehova.
Kasi Mungazgora Wuli?
• Kasi ncito yakuyerezgera ya vuna ni vici?
• Kasi tikupharazga uthenga wuli?
• Ncifukwa wuli ncito yithu ya kupenja ŵasambiri yikuya pantazi?
• Kasi tikusungilira wuli mtende mu ncito ya vuna?
• Ncifukwa wuli nyengo zose tikuŵa ŵacimwemwe mu ncito ya vuna?
[Mafumbo]
[Vithuzithuzi pa peji 10, 11]
Kupharazga mu virimika vya mu handiredi lakudanga ndiposo mu handiredi la 20
[Vithuzithuzi pa peji 11]
Nga ni umo Paulos wakacitira, ŵancito ŵa vuna ŵa mazuŵa ghano ŵakuyezgayezga kupharazgira ŵantu kulikose uko ŵangasangika
[Cithuzithuzi pa peji 11]
Kupharazga makani ghawemi na cimwemwe