Rutilirani Kugwira Ncito ya Vuna!

“Uyo sono waseŵa [mbuto] na masozi tiwavunenge na cimwemwe.”—SALMO 126:5.

1. Ncifukwa wuli mazuŵa ghano tikwenera ‘kuŵeyerera Mweneco wa vuna kuti wakancizire ŵancito’ ŵaye ku vuna?

 PANYUMA pa ulendo wacitatu wa Yesu Kristu wakupharazga mu Galileya, iye wakaphalira ŵasambiri ŵake kuti: “Vuna ndiyo njikuru, kweni ŵancito mbacoko.” (Mateyu 9:37) Ku Yudeya nako kukaŵa suzgo la nga ni ili. (Luka 10:2) Umu ndimo ukhaliro ukaŵira virimika 2,000 kunyuma uku, kasi lero vili wuli? Cirimika camara, Ŵakaboni ŵa Yehova ŵakujumpa 6,000,000 ŵakagwira ncito ya vuna yakuyerezgera pakati pa ŵantu 6,000,000,000 pacaru cose capasi ŵeneawo ŵanandi wa iwo ‘ŵakukweŵeka na kuparanyika nga ndi mberere zambura mliska.’ Ndico cifukwa cake Yesu wakuticiska kuti ‘tiŵeyerere Mweneco wa vuna kuti wakancizire ŵancito ŵaye ku vuna yake,’ inya, ici ncakukhumbikwa nadi sono nga ni umo kukaŵira mu nyengo zakale.—Mateyu 9:36, 38.

2. Ncivici ico cikupangiska kuti ŵantu ŵatimanye?

² Yehova Ciuta, Mweneco wa vuna ŵazgora pempo lithu lakuti watume ŵancito ŵanandi. Mwee, naco ncimwemwe ico tili naco kugwira ncito iyi yakurongozgeka na Ciuta! Nangauli tili ŵacoko kuyerezgera na ŵantu ŵa mitundu, kweni uteŵeti withu na mwampu mu ncito yakupharazga za Ufumu na kupanga ŵasambiri kukupangiska ŵantu kuti ŵatimanye. Mu vyaru vinandi nyengo zinandi tikulembeka mu nyuzipepala panji kuyowoyeka pa wayilesi. Mu seŵero linyake la pa wayilesi ya sinema, peneapo mweneko nyumba wakapulika muntu wakuwodira,  iye wakaghanaghana kuti Ŵakaboni ŵa Yehova ŵafika. Enya, ncito yithu ya Cikristu nga mbancito ŵa vuna yakuyerezgera yikumanyikwa comene mu virimika ivi vya mu handiredi la 21.

3. (a) Kasi tikumanya wuli kuti ŵapharazgi ŵa Ufumu ŵa mu handiredi lakudanga ŵakamanyikwa na ŵantu? (b) Ncifukwa wuli tikuyowoya kuti ŵangelo ŵakovwira uteŵeti withu?

³ Ŵantu ŵakawonanga ncito yakupharazga za Ufumu iyo yikacitikanga mu virimika vya mu handiredi lakudanga ndipo ŵakasuzganga ŵantu awo ŵakapharazganga makani ghaweme. Lekani mpostole Paulos wakalemba kuti: ‘Nkughanaghana kuti ise ta ŵapostole Ciuta watirongora ku umariro wa ŵose, nga mbakukombolekera ku nyifwa: pakuti tiri kuzgoreka ciyerezgero ku caru, na ku ŵangelo, na ku ŵantu.’ (1 Ŵakorinte 4:9) Mwakuyana waka, kuzizipizga kwithu nga ŵapharazgi ŵa Ufumu kwambura kupwererako suzgo yiliyose, kukupangiska kuti timanyikwe ku ŵantu ndipo ici ncakuzirwa comene ku ŵangelo. Pa Civumbuzi 14:6 pakuyowoya nteura: “Ndipo [ine mpostole Yohane] nkawona mungelo munyake wakuwuruka mucanya mukatikati, wakuŵa na ivangeli landanda kupharazga kwa awo ŵakukhala pa caru ca pasi, na ku mtundu wose na fuko na lulimi na ŵantu.” Enya, ŵangelo ŵakutovwira mu uteŵeti withu—mu ncito yithu ya vuna!—Ŵahebere 1:13, 14.

‘Kutinkika na Ŵantu’

4, 5. (a) Kasi Yesu wakaŵacenjezgaci ŵasambiri ŵake? (b) Ncifukwa wuli ŵateŵeti ŵa Yehova ŵa mazuŵa ghano ‘ŵakutinkika’?

⁴ Peneapo ŵapostole ŵa Yesu wakatumika kuti ŵakagwire ncito ya vuna, iwo ŵakapulikira ivyo Yesu wakaŵaphalira kuti ŵaŵe “ŵakucenjera nga ndi zinjoka, na ŵakuzika nga ndi zinkhunda.” Yesu wakayowoyaso kuti: “Cenjerani na ŵantu: cifukwa ŵamkumuperekani ku zimphara, ndipo mu masunagoge ghaŵo ŵamkumutyapulani; inya ŵamkumuperekani ku ŵeruzgi na ŵakaronga, cifukwa ca ine, mwakuti muŵenge cipanikizgo kwa iŵo na ku Ŵamitundu. . . . Ndipo mwamkutinkika na ŵantu wose cifukwa ca zina lane; kweni mweneuyo wakuzizipizga mpaka ku umariro, ndiyo wamkuponoskeka.”—Mateyu 10:16-22.

⁵ ‘Tikutinkika’ cifukwa “caru cose cikugona mu nkongono za muheni,” Satana Diabolosi, uyo ni murwani mukuru wa Ciuta na ŵantu Ŵake. (1 Yohane 5:19) Ŵarwani ŵithu ŵakuwona umo tikurutira pantazi mwauzimu kweni ŵakukanira dara kuzomerezga kuti ici cikucitika cifukwa ca Yehova. Ŵantu awo ŵakususka ŵakuwona kuti tili ŵakukondwa, tikugwira ncito ya vuna mwacimwemwe. Iwo ŵakuzizwa cifukwa ca cikolerano cithu! Nyengo zinyake ŵangazomerezga mwakudonda para ŵaruta ku caru cinyake na kusanga kuti Ŵakaboni ŵa Yehova ŵakucita ncito yakuyana waka na iyo yikucitika mu caru cawo. Kweni tikumanya kuti muvikiliri withu Yehova mweneuyo ncitopoko ca mtende withu, munyengo yake yakuŵikika, wazamumanyikwa nanga kungaŵa ku ŵarwani ŵithu.—Ezekiel 38:10-12, 23.

6. Kasi ncivici ico cikutikhozga para tikugwira ncito ya vuna, ndipo ni fumbo wuli ilo tingajifumba?

⁶ Mweneco vuna wapereka kwa Mwana wake, Yesu Kristu, “mazaza ghose . . . kucanya na pasi.” (Mateyu 28:18) Yehova wakugwiriskira ncito Yesu kurongozga ncito ya vuna kwizira mwa ŵangelo ŵakucanya ndiposo na “muzga wa magomezgeko na wa vinjeru” pano pacaru capasi. (Mateyu 24:45-47; Civumbuzi 14:6, 7) Kweni kasi ni mwauli umo tingatondera ŵarwani ŵithu awo ŵakutisuska na kurutirira kuŵa na cimwemwe peneapo tikugwira ncito ya vuna?

7. Kasi tikwenera kuyezgayezga kucitaci para tikususkika panji kutambuzika?

⁷ Para tikususkika panji kutambuzgika, tikwenera kupempa covwiro kwa Ciuta kuti tirutirizge kuŵa ŵakukhora nga ni umo wakacitira Paulos mweneuyo wakalemba kuti: “Para tikutukika, tikutumbika; para tikuzikizgika, tikuzizipizga; para tikunyozeka, tikuŵeya.” (1 Ŵakorinte 4:12, 13) Kacitiro aka ndiposo na kasambizgiro kithu kaluso mu uteŵeti wa m’munda, nyengo zinyake kakusinta kaghanaghaniro kaheni ka ŵantu awo ŵakususka.

8. Kasi mazgu agho Yesu wakayowoya agho ghali kulembeka pa Mateyu 10:28 ghakumovwirani wuli?

⁸ Nanga ŵangatofya kuti ŵatikomenge ise tikuleka cara kugwira ncito ya vuna mwamwampu. Tikupharazga pakweru uthenga wa Ufumu mwamwampu ndiposo mwambura wofi. Ndipo tikukhozgeka na ivyo Yesu wakayowoya peneapo wakati: “Ndipo mungopanga aŵo ŵakukoma thupi, kweni ŵalive kumanya kukoma mzimu: kweni uyo wakumanya kukoma mzimu na thupi mu Gehena, ndiyo mumopenge.” (Mateyu 10:28) Tikumanya kuti Dada withu wakucanya ni Mupi wa  umoyo. Iye wakutumbika awo ŵakurutirizga kuŵa ŵakugomezgeka kwa iye nyengo zose na kugwira ncito ya vuna na mtima wose.

Uthenga Wakuponoska Umoyo

9. Ni mwauli umo ŵanji ŵakacitira na uthenga wa Ezekiel, ndipo ni mwauli umo vintu vyakuyana waka vikucitikira mazuŵa ghano?

⁹ Peneapo ncimi Ezekiel yikapharazga mwacikanga uthenga wa Yehova ku “mtundu wa ŵakugaruka”—ufumu wa Israyeli na Yuda—ŵantu ŵanji ŵakakondwera kupulika ivyo iye wakayowoyanga. (Ezekiel 2:3) ‘Ehe!, iwe uli kwa iŵo nga ndi uyo wakwimba sumu za kutemwa na mazgu ghakukondwereska, na kulizga makora karimba’ Wakayowoya nteura Yehova. (Ezekiel 33:32) Nangauli iwo ŵakakondwa na ivyo Ezekiel wakayowoyanga, kweni ŵakatondeka kumurondezga. Kasi ncici ico cikucitika mazuŵa ghano? Peneapo ŵakukhalira ŵakuphakazgika na ŵanyawo ŵa mberere zinyake ŵakupharazga uthenga wa Yehova mwacikanga, ŵanji ŵakutemwa kuti ŵapulikizge za vitumbiko vya Ufumu, kweni ŵakukhumba cara kuti ŵaŵe ŵasambiri na kunjizgikamo mu ncito ya vuna.

10, 11. Ku uyambiliro wa virimika vya mu handiredi la 20, kasi uthenga wakuponoska umoyo wukapharazgikanga wuli, ndipo pakaŵa vyakufumapo wuli?

¹⁰ Kulwande linyake, ŵantu ŵanandi ŵazomera kugwira ncito ya vuna na kunjizgikamo mu ncito ya kupharazga uthenga wa Ciuta. Mwaciyerezgero, pa maungano gha cigaŵa gha Cikristu ghakupambana-pambana kwambira mu 1922 mupaka 1928, uthenga wa ceruzgo pa kaŵiro kaheni ka Satana ukapharazgika mwakupulikikwa makora comene. Nkani za kuphara za ceruzgo izo zikayowoyeka pa maungano agha zikapharazgikaso pa wayilesi. Panyuma pake ŵantu ŵa Ciuta ŵakagaŵira makope ghakusindikizgika ghanandi comene.

¹¹ Ku umaliro wa 1930, ntowa yinyake yakupharazgira yikambika. Pakudanga, ŵantu ŵa Yehova wakavwara viphambano vyakuphara za nkani ya Baibolo yacisanisani. Panyuma pake wakanyamuranga viphambano vyakulembeka kuti “Cisopo Ncipingo ndipo Ncakupusika” kweni “Teŵeterani Ciuta na Kristu Fumu.” Peneapo ŵakendanga mu misewu, ŵantu awo ŵakaŵawonanga ŵakatorekanga mtima. ‘Ici cikawovwira nadi Ŵakaboni ŵa Yehova kuti ŵamanyikwe na kuŵapa cikanga,’ wakayowoya nteura mbali munyake mweneuyo nyengo zose wakapharazgiranga ŵantu mu misewu ya mu London ku England.

12. Kusazgirapo pa kupharazga uthenga wa Ciuta wa ceruzgo, kasi tikuyowoyaso nkani wuli mu uteŵeti, ndipo mbanjani awo ŵakukolerana pakupharazga makani ghaweme?

¹² Peneapo tikupharazga uthenga wa Ciuta wa ceruzgo, tikuyowoyaso za vitumbiko ivyo walayizga vyeneivyo ncigaŵa ca uthenga wa Ufumu. Kupharazga mwacikanga kukutovwira kusanga ŵantu awo mbakwenerera. (Mateyu 10:11) Viŵaro vya ŵakuphakazgika ŵakukhalira vyazomerezga ncemo ya kucita ncito ya vuna kuyambira mu virimika vya mu ma 1920 mupaka 1930. Ndipo pa ungano uwo ukacitika mu 1935, pakayowoyeka nkani yakukondweska comene yakuphara za muntazi mwakukondweska mwa “mzinda ukuru” wa “mberere zinyake”—mu paradiso pacaru capasi. (Civumbuzi 7:9; Yohane 10:16) Iwo ŵacitapo kantu pa uthenga wa Ciuta wa ceruzgo ndipo ŵakakolerana na ŵakuphakazgika pakupharazga makani ghaweme ghakuponoska umoyo.

13, 14. (a) Kasi tikusanga cisangulusko wuli mu lemba la Salmo 126:5, 6? (b) Ncivici ico cizamucitika usange tikurutirizga kuseŵa na kuthilira maji?

¹³ Mazgu agho ghali pa Salmo 126:5, 6, ngakusanguluska nadi kwa ŵantu awo ŵakugwira ncito ya vuna ya Ciuta comene-comene awo ŵakutambuzgika, igho ghakuti: “Uyo sono waseŵa [mbuto] na masozi tiwavunenge na cimwemwe. Mweneuyo wafuma na kulira, na kuyegha ciseru ca mbuto, wamkuwera na cimwemwe, kwiza na ncinda zake.” Mazgu gha wamasalmo ghakuti kuseŵa na kuvuna ghakurongora za civikiliro ca Yehova na vitumbiko ku ŵantu awo ŵakawerako ku wuzga wa Babulone wakale. Iwo ŵakaŵa ŵakukondwa peneapo ŵakafumiskika, kweni ŵakenera kuti ŵakaliranga peneapo ŵakaseŵanga mbuto mu caru ico cikaleka kupwerereka kwa virimika 70 apo ŵakaŵa ku wuzga. Ndipouli, awo ŵakarutirizga kuseŵa na kugwira ncito yakuzengaso ŵakasangwa na vipambi ndipo ŵakakhorwa na ncito yawo.

¹⁴ Tingaŵa na citima para takumana na ciyezgo panji para musopi munyithu wakusuzgika cifukwa ca kucita khumbo la Ciuta. (1 Petros 3:14) Mu ncito yithu ya vuna, panyake tingakondwa cara cifukwa palije ukaboni wakuti tikuya pantazi mu uteŵeti withu. Kweni para tikurutirizga kuseŵa na kuthilira maji, Ciuta wazamukuliska kuruska umo ise tikaghanaghaniranga.  (1 Ŵakorinte 3:6) Ici cikuwoneka makora na vyakufumapo vya kugaŵira Mabaibolo na vyakupharazga vyakuzikika mu Malemba.

15. Perekani ciyerezgero ca umo vyakupharazga vya Cikristu vikugwilira mulimo uwemi mu ncito ya vuna.

¹⁵ Aghanaghanirani za mwanarumi wakucemeka Jim. Peneapo ŵamama ŵake ŵakafwa, iye wakasanga buku la mutu wakuti Life—How Did it Get Here? By Evolution or by Creation? mu katundu wawo.   a Iye wakaliŵazga. Peneapo wakadumbiskana na Kaboni munyake uyo wakakumana nayo pa msewu, Jim wakamuzomerezga Kaboni uyo kuti wazakizeso kuzakacezga nayo, ndipo ici cikapangiska kuti sambiro la Baibolo lambike. Mwaluŵiro Jim wakaruta pantazi mwauzimu ndipo wakajipereka kwa Yehova na kubapatizika. Iye wakaphalira viŵaro vinyake vya mbumba yake ivyo wakasambiranga. Nga ncakufumapo cake, mudumbu wake na mukuru wake ŵakazgoka ŵamoza ŵa Ŵakaboni ŵa Yehova, ndipo Jim wakucita uteŵeti wanyengo zose pa Beteli ya ku London.

Tili Ŵacimwemwe Nangauli Tikuzikizgika

16. (a) Ncifukwa wuli ncito yithu ya vuna yikuya pantazi? (b) Kasi ni ncenjezgo wuli iyo Yesu wakapareka ghakukhwaskana na makani ghawemi, ndipo tikwenera kuŵafikira ŵantu na kaghanaghaniro wuli?

¹⁶ Ncifukwa wuli ncito ya vuna yikuya pantazi? Ncifukwa cakuti Ŵakristu ŵakuphakazgika na ŵanyawo ŵakupulikira urongozgi uwo Yesu wakaŵaphalira, wakati: “Ico nkumuphalirani mu cisi muyowoye mu kungweruka; ndipo ico mukupulika mu vipwepwerezgo, mupharazge pa nyumba pacanya.” (Mateyu 10:27) Ndipouli, tikumanya kuti tikumanenge na masuzgo, nga ni umo Yesu wakacenjezgera kuti: “Mbali wamkupereka mbali ku nyifwa, na wiske mwana wake: ndipo ŵana ŵamkuwukira ŵapapi, mwakuti ŵakomeke.” Yesu wakarutirizga kuyowoya kuti: “Mungaghanaghananga kuti nkiza kuŵika cimango mu caru: kuti nkiza kuŵika cimango cara, kweni lupanga.” (Mateyu 10:21, 34) Yesu kuti wakaŵa na cilato ca kupatula mbumba cara. Nyengo zinyake cifukwa ca nkongono ya makani ghawemi ici cikacitikanga. Umu ndimo viliriso na ŵateŵeti ŵa Ciuta mazuŵa ghano. Peneapo tikucezgera vikaya, cilato cithu ncakuti titimbanizge mtende wa mbumba cara. Kweni tikukhumba kuti waliyose wamanye makani ghaweme. Mwanteura, tikuyezgayezga kufikira viŵaro vyose vya mbumba mwaubwezi, mu ntowa  yacitemwa yeneiyo yikupangiska uthenga withu kuŵa wakukondweska ku ŵantu awo ‘ŵimikikira umoyo wa muyirayira.’—Milimo 13:48.

17. Ni mwauli umo awo ŵakutumbika muwuso wa Ciuta ŵakupambanirana na ŵanyawo, ndipo pali ciyerezgero wuli pakuyowoya za ici?

¹⁷ Uthenga wa Ufumu ukupambaniska ŵantu wose awo ŵakucindika ufumu wa Ciuta. Mwaciyerezgero, aghanaghanirani za umo ŵasopi ŵanyithu ŵakaŵira ŵakupambana na ŵantu ŵanyake cifukwa ca ‘kupereka vya Kesare kwa Kesare, vya Ciuta kwa Ciuta’ ku Germany mu nyengo ya National Socialism. (Luka 20:25) Mwakupambana na ŵarongozgi ŵa visopo na ŵantu awo ŵakujithya kuti Mbakristu awo ŵakukolerana na visopo vya Cikristu, Ŵakaboni ŵa Yehova mwacikanga ŵakakana kunangira dala marango gha Baibolo. (Yesaya 2:4; Mateyu 4:10; Yohane 17:16) Pulofesa Christine King, mlembi wa buku lakuti The Nazi State and the New Religions, wakayowoya kuti: “Boma [la Nazi] likatondeka kulekeska Ŵakaboni, nangauli likakoma ŵakaboni ŵanandi kweni ncito yawo yikarutilira ndipo mu May 1945 Ŵakaboni ŵa Yehova ŵakagwiranga ncito yawo makoraghene peneapo awo ŵakarondezganga cipani ca National Socialism ŵakaŵavye nkongono.”

18. Kwambura kupwererako za ntambuzgo, kasi ŵantu ŵa Yehova ŵakurongora ukhaliro wuli?

¹⁸ Cintu cakuzirwa comene ni ukhaliro uwo ukurongoreka na ŵantu ŵa Yehova para ŵakukumana na ntambuzgo. Peneapo ŵarara wa boma ŵangatoreka mtima na cipulikano cithu, iwo ŵakuzizwa na citemwa ico cili pakati pithu. Mwaciyerezgero, Ŵakaboni awo ŵakapona ku nkaza za Ŵanazi nyengo zose ŵakaŵa ŵacimwemwe na ŵakukhorwa apo ŵakaghanaghananga za ivyo vikaŵacitikira. Iwo ŵakamanyanga kuti Yehova ŵakaŵapa ‘nkongono zakuruska.’ (2 Ŵakorinte 4:7) Ŵakristu ŵakuphakazgika awo ŵali pakati pithu ŵali na cisimikizgo cakuti ‘mazina ghawo ghali kulembeka kucanya.’ (Luka 10:20) Kuzizipizga kwawo kukupambika cigomezgo ceneico cingaŵakhuŵazga cara, ndipo ŵancito ŵa vuna ŵakugomezgeka awo ŵali na cilindizga ca kuzakakhala pacaru capasi nawo ŵali na cisimikizgo cakuyana waka.—Ŵaroma 5:4, 5.

Rutilirani Kugwira Ncito ya Vuna

19. Ni ntowa wuli zacandulo izo zikugwiriskirika ncito mu uteŵeti Wacikristu?

¹⁹ Tikumanya cara utali wa nyengo iyo Yehova wazomerezga kuti tigwire ncito iyi ya vuna. Panyengo yasono tikwenera kumanya kuti awo ŵakugwira ncito ya vuna ŵali na ntowa zinandi za umo ŵangagwilira ncito yawo. Mwakuyana waka, tisimikizge kuti kugwiriskira ncito ntowa izi mwakugomezgeka kungaŵa kwakovwira comene. Paulos wakaphalira Ŵakristu ŵanyake kuti: “Nteura nkumuŵeyani  muŵe ŵakuyezga ine.” (1 Ŵakorinte 4:16) Peneapo Paulos wakakumana na ŵarara ŵa mpingo wa ku Efeso ku Mileto, iye wakaŵakumbuska kuti wakaleka cara kuŵasambizga “pa kweru na mu nyumba na nyumba.” (Milimo 20:20, 21) Timote, munyake wa Paulos wakasambira ntowa izo ŵapostole ŵakacitiranga vintu, mwanteura iye wakaŵasambizgaso Ŵakorinte ntowa izi. (1 Ŵakorinte 4:17) Ciuta wakatumbika ntowa izo Paulos wakagwiriskiranga ncito pa kusambizga nga ni umo wazamutumbikiraso kuyezgayezga kwithu para tikupharazga pakweru makani ghaweme kunyumba na nyumba, kuwelerako kwa awo ŵanweka na mazgu gha Ciuta, kucitiska masambiro gha Baibolo gha pa nyumba, na kupharazga kulikose uko kuli ŵantu.—Milimo 17:17.

20. Ni mwauli umo Yesu wakayowoyera kurongora kuti pali vuna yinandi yauzimu, ndipo ici cawoneka wuli kuŵa caunenesko mu virimika vyasono-sono ivi?

²⁰ Panyuma pakupharazgira mwanakazi Musamariya mu msumba wa Sukare mu 30 C.E., Yesu wakayowoya za vuna yauzimu. Iye wakaphalira ŵasambiri ŵake kuti: “Inuskani maso ghinu, ndipo mulawiske ku minda, pakuti masika ghaca kale. Uyo wakuvuna wakupokera njombe, ndipo vipasi wakuviwunjikira umoyo wa muyirayira; mwakuti uyo wakumija na uyo wakuvuna ŵasekererenge pamoza.” (Yohane 4:34-36) Mutepanji Yesu wakamanya kale vyakufumapo vya kucezga na mwanakazi Musamariya, cifukwa ŵantu ŵanandi ŵakapulikana cifukwa ca mazgu gha mwanakazi. (Yohane 4:39) Mu virimika vyasono-sono apa, vyaru vinyake ivyo vikakanizganga Ŵakaboni ŵa Yehova kusopa, sono vikuŵazomerezga, kweneuko nkujura minda yipya ya vuna. Cakufumapo cake ncakuti vuna yinandi yauzimu yikurutilira kucitika. Ndiposo, pacaru cose, tikusanga vitumbiko vinandi peneapo tikunjizgikamo na mtima wose mu ncito ya vuna yauzimu.

21. Ncifukwa wuli tikwenera kurutilira kugwira ncito ya vuna mwacimwemwe?

²¹ Para mbuto zakhoma ndipo zikukhumbikwira kuvuna, ŵancito ŵakwenera kucita mwaluŵiro. Iwo ŵakwenera kugwira ncito mwamwampu comene. Lero, tikukhumbikwira kugwira ncito mwakulimbikira ndiposo mwaluŵiro cifukwa tikukhala mu “nyengo ya umaliro.” (Daniel 12:4) Enya, tikukumana na viyezgo, kweni ndipouli, ŵasopi ŵa Yehova ŵali na vuna yikuru kuruska kale. Ili ni zuŵa nadi lakuŵira na cimwemwe. (Yesaya 9:3) Nga mbancito ŵacimwemwe, tiyeni tirutilire kugwira ncito ya vuna!

[Mazgu ghamusi]

Kasi Mungazgora Wuli?

• Ni mwauli umo Mweneco vuna wazgolera pempo lakuti watume ŵancito ŵanandi?

• Nangauli ‘tikutinkika,’ kasi nyengo zose tikwenera kuŵa na kaghanaghaniro wuli?

• Ncifukwa wuli tikuŵa ŵakukondwa nangauli tikuzikizgika?

• Ncifukwa wuli tikwenera kurutilira kugwira ncito ya vuna na mwampu?

[Mafumbo]

[Cithuzithuzi pa peji 15]

Kupharazga uthenga wa Ufumu kwapangiska kuti ŵantu ŵanandi ŵamanye unenesko

[Cithuzithuzi pa peji 15]

Tikupanda na kuthilira maji, kweni Yehova ndiyo wakumezga

[Vithuzithuzi pa peji 16, 17]

Awo ŵakucita ncito ya vuna ŵakovwirika na ŵangelo