Mafumbo Ghakufumira ku Ŵaŵazgi

Kasi Dango la Moses lakukanizga muntu kutora mbali wake licali kugwira ncito kwa Ŵakristu mazuŵa ghano?

Dango ilo Yehova wakapereka ku Ŵaisrayeli likuyowoya vinandi yayi vyakukhwaskana na ukwati na kendeskero kake. Kweni likuzomerezga cara ntengwa zinyake. Mwaciyerezgero, pa Leviticus 18:6-20, pali ndondomeko ya kugonana kwakukanizgika kwakukhwaskana na [ŵantu awo mpa ubali]. Mavesi agha ghakukonkoska makoraghene kuti ŵantu awo mpa ubali ŵakwenera cara kugonana. Enya nadi, Ŵakristu ŵali pasi pa Dango la Moses cara. (Ŵaefeso 2:15; Ŵakolose 2:14) Nangauli viri ntena, ici cikung’anamura kuti Ŵakristu wayuyurenge nkani iyi penepapo ŵakusanka munyawo wa mu ntengwa cara. Pali fundo zinandi zeneizo zikurongora kuti kutorana kwa pa ubali nkuheni.

Cakudanga pali marango gha boma agho ghakukanizga ŵantu kutorana pa ubali, ndipo Ŵakristu ŵakwenera nadi kupulikira marango gha mu caru ico ŵakukhala. (Mateyu 22:21; Ŵaroma 13:1) Marango gha nga ni agha ghakupambana caru na caru. Marango ghanandi ghasono agho ghakukhwaskana na nkani iyi ghakuŵa ghakughanaghanira za mwana uyo wazamubabika. Nyengo zinandi usange ŵantu ŵatorana pa ubali, ŵakuzakababa ŵana ŵa virema panji ŵa matenda agho ghakwamba cifukwa ca majini. Pacifukwa ici ndiposo cifukwa ca ‘kujilambika kwawo ku ŵa mazaza ŵarara,’ Ŵakristu ŵakutorana mwakuyana na marango gha ntengwa gha mu caru ico ŵakukhala.

Pali vintu vinyake ivyo nvyakuzomerezgeka ndiposo ivyo nvyambura kuzomerezgeka mu cikaya. Pafupifupi mtundu wuliwose wuli na marango ghake agho ghakurongosora za ntengwa za ŵantu awo mpa ubali kuŵa mziro, ndipo palije uyo wakukondwa nazo. Nangauli ubali uwo ŵantu wakwenera cara kutorana ungaŵa wakupambana mu mitheto yakupambana-pambana, kweni “kuyowoya unenesko, ncakuzomerezgeka cara kuti ŵantu ŵagonane pa ubali, uwu ni mziro, ŵakwenera cara kugonana,” likuyowoya nteura The Encyclopædia Britannica. Mwanteura, nanga kungaŵa ku malo uko vintu vya nga ni ivi vikucitika cara, Ŵakristu ŵakukhumba cara kuyuyura mitheto panji marango agho ghali kukhazikiskika mu cikaya cawo, mwakuti ŵaleke kunyozeska mpingo Wacikristu panji zina la Yehova.—2 Ŵakorinte 6:3.

Tikwenera kupwererera njuŵi yithu yakusambizgika na Ciuta. Ŵantu wose ŵali kubabika na mahara gha kumanya ico nciweme na ico nciheni. (Ŵaroma 2:15) Njuŵi yawo yikuŵaphalira ico ncakwenelera, na ico ncambura kwenelera ndiposo ico cingaŵanjizga mu suzgo, pekha usange njuŵi yawo yatimbanizgika panji usange njakufwa cifukwa ca kuzilara na vintu viheni. Yehova wakayowoya fundo iyi penepapo wakapereka dango leneilo likukanizga kutorana pa ubali ku ŵina Israyeli. Tikuŵazga kuti: ‘Mungacitanga kwakulingana na milimo ya caru ca Egupto, mwenemumo mukakhalanga; mungacitanga kwakulingana na milimo ya caru ca Kenan uko nkuruta namwe. Nesi kwenda kwakulingana na maluso ghaŵo.’ (Leviticus 18:3) Ŵakristu ŵakupwererera comene njuŵi yawo yakuzikika pa Baibolo ndipo ŵakuzomerezga cara kuti ŵatimbanizgike na vintu viheni ivyo ŵamitundu wakucita.—Ŵaefeso 4:17-19.

Kasi tingayowoyaci? Nangauli Ŵakristu ŵakurongozgeka na Dango la Moses cara, kweni njuŵi yawo yikuŵaphalira makoraghene kuti kutorana pa ubali nga ni dada na mwana wake msungwana, mama na mwana wake msepuka, kutorana pa udumbu, vyose ivi nvyakukanizgika comene kwa Ŵakristu. a Penepapo ubali ukukura, Ŵakristu ŵakumanya kuti pali marango agho ghakuzomerezga usange ŵantu ŵangatorana panji cara, ndipo pali vipimo vyeneivyo vikuzomerezgeka na mitheto ya kumalo uko. Vintu ivi tikwenera kuvipwererera makora comene mwakuti ticitenge vintu mwakuyana na umo Malemba ghakuyowoyera, kuti: ‘Nthengwa yiŵenge ya ncindi ku ŵantu ŵose.’—Ŵahebere 13:4.

[Mazgu ghamusi]