Kuzizipizga ‘Munga mu Thupi’

“Ucizi wane ukukwanira iwe.”—2 ŴAKORINTE 12:9.

1, 2. (a) Ncifukwa wuli tikwenera cara kuzizwa para viyezgo na masuzgo vikutiwira? (b) Kasi tili na cigomezgo wuli pakuyowoya za viyezgo ivyo vikutiwira?

 “WOSE awo ŵakukhumba kuŵa ŵasopi-Ciuta mwa Kristu Yesu ŵati ŵazikizgikenge.” (2 Timote 3:12) Cifukwa wuli vili ntena? Cifukwa ncakuti Satana wakuyowoya utesi kuti muntu wangarutilira kuteŵetera Ciuta kwekha usange wakusangapo njombe, ndipo wali maso comene kukhozgera fundo yake iyi. Zuŵa linyake, Yesu wakacenjezga ŵapostole ŵake ŵakugomezgeka kuti: ‘Satana [“wakumukhumbani,” NW] imwe, mwakuti wamupetani nga ndi trigu.’ (Luka 22:31) Yesu wakamanya makora kuti Ciuta wakuzomerezga Satana kutiyezga kwizira mu masuzgo. Ndipouli, ici kuti cikung’anamura kuti vyakumara-mahara vyose ivyo vikutiwira vikufuma kwa Satana panji viŵanda vyake yayi. (Mupharazgi 9:11) Ndipouli, Satana wakukondwa kugwiriskira ncito ntowa yiliyose mwakuti wazimwe cipulikano cithu.

² Baibolo likutiphalira kuti tileke kuzizwa para tikuyezgeka. Cilicose ico cingatiwira, kuti ncacilendo cara. (1 Petros 4:12) Awonani kuti ‘vipyo vyakuyana pera vikuŵawira ŵabali [ŵithu] awo ŵali mu caru.’ (1 Petros 5:9) Lero, Satana wakuŵika viyezgo vikuru pa muteŵeti waliyose wa Ciuta. Diabolosi wakukondwa para wakuwona ise tikusuzgika na masuzgo gha nga ni minga pa thupi lithu. Kuti wacite ici, wakugwiriskira ncito caru ici mwakuti wasazgireko ‘munga mu thupi’ lithu. (2 Ŵakorinte 12:7) Nanga viŵe ntena, viyezgo vya Satana vikwenera cara kuzimwa cipulikano cithu. Pakuti Yehova waperekenge “ntowa yakufumiramo” mu ciyezgo, ndimo wacitirengeso para masuzgo gha nga ni minga ghatiwira.—1 Ŵakorinte 10:13.

Umo Tingazizipizgira Munga

3. Kasi Yehova wakazgora wuli apo Paulos wakaromba kuti munga ufumemo mu thupi lake?

³ Mpostole Paulos wakaromba Ciuta kuti wawuskemo munga mu thupi lake. Wakati: ‘Nkaŵeyerera Fumu katatu, kuti [munga] wuwukeko kwa ine.’ Kasi Yehova wakazgora wuli kuyana na umo Paulos wakarombera? Yehova wakati: ‘Ucizi wane ukukwanire iwe: cifukwa nkongono zane zikufiskika mu kutomboroka.’  (2 Ŵakorinte 12:8, 9) Tiyeni tisande zgoro la Yehova ndipo tiwone umo lingatovwilira kuzizipizga suzgo yiliyose ya nga ni minga iyo yingatiwira.

4. Kasi Paulos wakasanga candulo wuli na ucizi wa Yehova?

⁴ Wonani kuti Ciuta wakaciska Paulos kuti wawonge ucizi uwo wakamupa kwizira mwa Kristu. Inya, Paulos wakatumbikika comene mu ntowa zinandi. Nangauli pakwamba wakasuzganga ŵarondezgi ŵa Yesu, kweni mwacitemwa, Yehova wakamupa mwaŵi wa kuŵa musambiri wa Yesu. (Milimo 7:58; 8:3; 9:1-4) Pamanyuma pake, Yehova wakamupa Paulos ncito yakukondweska. Apa tikusambirapo kantu. Nanga tingaŵa mu nyengo zakusuzga, kweni, tikuŵa na vitumbiko ndipera ivyo tingakondwa navyo. Viyezgo ivyo vikutiwira vileke kutiruwiska uwemi unandi uwo Yehova wakuticitira.—Salmo 31:19.

5, 6. (a) Kasi Yehova wakamovwira wuli Paulos kumanya kuti nkongono ya Ciuta ‘yikufiskika mu kutomboroka’? (b) Kasi ciyerezgero ca Paulos cikarongora wuli kuti Satana ni mutesi?

⁵ Yehova wakurongora lusungu lwake mu ntowa yinyake. Nkongono ya Ciuta njikuru comene kwakuti yingatovwira para tili mu viyezgo. (Ŵaefeso 3:20) Yehova wakaphalira Paulos kuti nkongono Yake ‘yikufiskika mu kutomboroka.’ Mwauli? Ciuta wakamupa Paulos nkongono iyo wakakhumbanga mwakuti watonde ciyezgo ico cikamuwira. Umo Paulos wakazizipizgira na kuŵika cigomezgo cake cose mwa Yehova, kukarongora pakweru kuti nkongono ya Ciuta ndiyo yikawovwiranga muntu wakutomboroka na wakwananga uyu. Aghanaghanani umo soni zikamukolera Satana, mweneuyo wakuti ŵantu ŵakuteŵetera Ciuta kwekha usange ŵali pa mtende. Wonani kuti kugomezgeka kwa Paulos kukaŵa nga ni mpama kuŵapula Satana!

⁶ Pakwambilira, Paulos wakakolerananga na Satana pakulimbana na Ciuta ndiposo pakusuzga Ŵakristu, iye wakaŵa Mufarisi wakulimbikira, mweneuyo wakakhalanga na umoyo uwemi cifukwa wakababikira mu mbumba yisambazi. Paulos wakamba kuteŵetera Yehova na Kristu nga ni “mucoko comene wa ŵapostole.” (1 Ŵakorinte 15:9) Wakajilambikanga na mtima wose ku wupu wakurongozga wa Ŵakristu ŵakwambilira. Nangauli munga ukamuŵinyanga mu thupi, kweni wakazizipizganga. Satana cikamuŵinya nkanira mu mtima kuwona kuti viyezgo ivyo vikawira Paulos vikazimwa cara mwampu wake. Paulos wakaleka cara kuŵika maghanoghano ghake pa cilindizga ca kuwusa pamoza na Kristu mu Ufumu wa kucanya. (2 Timote 2:12; 4:18) Pakaŵavya munga uwo ukatenge ucepeskenge mwampu wake nanga ungaŵa kuti ukaŵinyanga comene. Mphanyi nase tarutilira kuŵa ŵamwampu na ŵakukhora! Yehova wakutipa mwaŵi wapadera wa kurongora kuti Satana ni mutesi mwa kutivikilira mu viyezgo vithu.—Zintharika 27:11.

Ivyo Yehova Wakupereka Nvyakuzirwa

7, 8. (a) Ni ntowa wuli izo Yehova wakuperekera nkongono kwa ŵateŵeti ŵake lero? (b) Cifukwa wuli ncakuzirwa kusambira Baibolo nyengo zose kuti tizizipizge munga mu thupi?

⁷ Lero, Yehova wakukhozga Ŵakristu ŵakugomezgeka kwizira mu mzimu wake utuŵa, Mazgu ghake, na ubali Wacikristu. Nga ni umo Paulos wakacitira, ise nase kwizira mu pempero, timuthulire Yehova masuzgo ghithu. (Salmo 55:22) Nangauli Ciuta wangawuskapo cara viyezgo, kweni wangatipa ntowa ya kuzizipizgira viyezgo, nanga vingaŵa vinonono wuli. Yehova wangatipaso ‘nkongono zakuruska,’ mwakuti titonde.—2 Ŵakorinte 4:7.

⁸ Kasi tikupokera wuli covwiro ici? Nyengo na nyengo tifwilirengepo kusambira Mazgu gha Ciuta, cifukwa ndimo muli visangulusko vyake. (Salmo 94:19) Mu Baibolo tikusambiramo mazgu ghakukondweska gha ŵateŵeti ŵa Ciuta panyengo iyo ŵakarombanga covwiro cake. Tingacita makora kughanaghanira pa ivyo Yehova wakazgora cifukwa kanandi vikusazgapo mazgu gha cisangulusko. Kusambira Mazgu ghake kutikhozgenge mwakuti ‘nkongono zakuruska ziŵe za Ciuta, za ise tekha  cara.’ Nga ni umo nyengo zose tikuryera cakurya cakulera thupi, ndimo tikweneraso kuryera mazgu gha Ciuta nyengo na nyengo. Kasi tikucita ici? Usange tikucita, mbwenu ‘nkongono zakuruska’ izo tikupokera zitovwirenge kuzizipizga minga izo zingatilasa.

9. Kasi ŵabali ŵarara ŵangawovwira wuli awo ŵakulimbana na vyakumara-mahara?

⁹ Ŵabali ŵarara Ŵacikristu awo ŵakopa Ciuta ŵangaŵa “malo ghakubisamamo mpepo” panji malo ‘ghakudinganyamo cimpupulu,’ gheneagho ncivikiliro ku viyezgo na masuzgo. Ŵabali ŵarara awo ŵakukhumba kukolerana na mazgu agha, mwakujiyuyura ndiposo na mtima wose ŵakupempa Yehova kuti waŵape “lulimi lwa ŵakusambira” mwakuti ŵayowoye mazgu ghakwenelera kwa ŵakusuzgika. Mazgu gha ŵabali ŵarara ghangaŵa nga ni manthonyezi gha vula agho ghakuzizimiska umoyo withu mu nyengo ya cithukivu. Ŵabali ŵarara ŵangawovwira ŵabali na ŵadumbu ŵawo mwa kuyowoya ‘mwacisangulusko kwa ŵakusuzgika mitima’ (NW) awo ŵasweka mitima cifukwa ca minga mu thupi lawo.—Yesaya 32:2; 50:4; 1 Ŵatesalonika 5:14.

10, 11. Kasi ŵateŵeti ŵa Ciuta ŵangakhwimiska wuli ŵanyawo awo ŵali mu viyezgo vinonono?

¹⁰ Ŵateŵeti wose ŵa Yehova ni viŵaro vya mbumba yake yakukolerana ya Cikristu. Enya, tili “viŵaro uyu ca munyake uyu ca munyake,” ndipo “ise nase tikwenera kutemwana.” (Ŵaroma 12:5; 1 Yohane 4:11) Kasi tikufiska wuli mulimo uwu? Kuyana na 1 Petros 3:8, tikufiska mulimo uwu para ‘tikulengerana lusungu, kutemwa ŵabali, na kupwererera’ wose awo tili nawo mu cipulikano cimoza. Kuyana na awo ŵakusuzgika na munga mu thupi, kwali mbana panji ŵarara, tose tingaŵapwererera. Mwauli?

¹¹ Tikwenera kuŵa maso na kumanya ivyo ŵakusuzgika. Usange tili ŵanonono mtima, ŵambura lusungu, panji ŵambura citemwa, mbwenu tipangiskenge suzgo yawo kuya pantazi. Para tamanya viyezgo vyawo, ipo tikwenera kucenjera na ivyo tikuyowoya, umo tikuyowoyera ndiposo umo tikucitira. Tingacepeskako kuŵinya kwa minga izo zikuŵalasa mwa kuŵapembuzga na kuŵakhwimiska. Usange ndimo ticitirenge mbwenu ndikuti tiŵenge cisangulusko kwa iwo.—Ŵakolose 4:11.

Umo Ŵanyake Ŵazizipizgira

12-14. (a) Kasi mudumbu munyake Wacikristu wakacita wuli kuti wazizipizge ntenda ya kansa? (b) Kasi ŵabali na ŵadumbu ŵauzimu ŵakakhwimiska wuli mudumbu uyu?

¹² Penepapo tikusendelera ku umaliro wa mazuŵa agha, ‘vyakuŵinya’ (NW) vikusazgikira zuŵa lirilose. (Mateyu 24:8) Ndico cifukwa cake viyezgo vikuwira waliyose pa caru capasi, comene-comene ŵateŵeti ŵakugomezgeka ŵa Yehova, ŵeneawo ŵakucita khumbo lake.  Mwaciyerezgero, wonani mudumbu munyake uyo wakaŵa muteŵeti wanyengo zose. Iye wakaŵa na ntenda ya kansa ndipo wakenera kupangika opareshoni mwakuti ŵawuskemo kabulunga ako kakupanga mata. Apo mudumbu uyu na mufumu wake ŵakamanya kuti iye wali na ntenda iyi, wose ŵaŵiri ŵakaromba Ciuta kwa nyengo yitali. Pamanyuma pa kuromba, ŵakayowoya kuti maghanoghano ghawo ghapepuka. Ndipouli, wakapulikanga vyakuŵinya ndipera.

¹³ Kuti wazizipizge suzgo iyi, mudumbu uyu wakayezga kusambira vinandi vyakukhwaskana na ntenda ya kansa. Wakarutangaso kwa ŵadokotara ŵake. Ndipo, mu Gongwe la Mulinda, Galamukani!, na mabuku ghanyake gha Cikristu, wakasangamo nkani ziwemi izo zikurongora umo ŵantu ŵanyake ŵacitira na ntenda iyi. Wakaŵazgaso nkani zinyake za mu Baibolo izo zikurongora umo nkongono ya Yehova yikovwilira ŵantu ŵake mu nyengo ya suzgo.

¹⁴ Nkani yinyake yakukhwaskana na citima yikaŵa na mazgu ghakupereka mahara agha: ‘Uyo wakujipatula wakupenja khumbo la yekha.’ (Zintharika 18:1) Nkani iyo yikapereka urongozgi uwu: “Lekani kujipatura.” a Mudumbu uyu wakati: “Ŵanandi ŵakaniphalira kuti ŵakanipempereranga; ndipo ŵanyake ŵakayowoyanga nane pa telefoni. Ŵabali ŵarara ŵaŵiri nawo ŵakacitanga nteura kaŵiri-kaŵiri kuti ŵamanye za umoyo. Nkapokeranga maluŵa na makalata ghanandi agho ŵabali ŵakalembanga kunikhumbira viwemi. Ŵanyake ŵakaniphikiranga cakurya. Ŵanyakeso ŵakajiperekanga kuruta nane ku cipatala.”

15-17. (a) Kasi mudumbu munyake wakazizipizga wuli suzgo iyo yikacitika cifukwa ca ngozi ya galimoto? (b) Ncovwiro wuli ico ŵabali na ŵadumbu mu mpingo ŵakapereka?

¹⁵ Mudumbu munyake wa ku New Mexico, U.S.A., uyo wateŵetera Yehova nyengo yitali, wakapwetekeka apo galimoto ziŵiri zikagandana. Singo na viŵeya vyake vikapwetekeka, wakapulikanga vyakuŵinya comene ndipo wakasuzgika kwa virimika vyakujumpa 25. Iye wakati: “Nkupulika kuŵinya para nkhwinuska mutu na para nayeya cilicose cizito cakujumpa makilogiramu ghaŵiri. Kweni kufwilirapo kuromba Yehova mu pempero kwanovwira comene. Nkani za mu Gongwe la Mulinda nazo zanovwiraso. Nkani yinyake yikayowoyapo pa lemba la Mika 6:8, kuti kwenda mwakujiyuyura na Ciuta kukung’anamura kujimanya ivyo ukutondeka kucita. Ici canovwira kumanya kuti nileke kugongowa mukati mu suzgo iyi, nangauli nkucita vicoko mu uteŵeti kuruska umo nkakhumbiranga. Kuteŵetera Ciuta na mtima wose ndico cintu cakukhumbikwa.”

¹⁶ Iye wakayowoyaso kuti: “Nyengo na nyengo ŵabali ŵarara ŵakaniwonganga cifukwa nkalimbikiranga kufika pa maungano gha mpingo na kuruta mu uteŵeti wa m’munda. Ŵana ŵacoko ŵakanisekeleranga na kunivumbatira. Para natondeka kuruta m’munda, ŵapayiniya ŵakapulikiskanga ndipo ŵakasintanga nyengo yawo. Usange kuli vula panji para kwazizima comene, iwo ŵakarutanga nane ku maulendo ghakuwelerako panji kunicema kuti nkaŵe nawo para ŵakucita sambiro la Baibolo. Pakuti nkaŵavya nkongono zakuyeyera cora ca mabuku, ŵapharazgi ŵanyane ŵakaŵikanga mabuku ghane mu cora cawo pakuruta m’munda.”

¹⁷ Wonani umo ŵabali ŵarara na ŵasopi ŵanyawo mu mpingo ŵakawovwilira ŵadumbu ŵaŵiri aŵa kuzizipizga minga mu thupi. Iwo ŵakapereka covwiro pa ivyo ŵadumbu aŵa ŵakakhumbanga, vyauzimu na vyakuthupi. Kasi ici cikumuciskani yayi kuti namwe movwire ŵabali na ŵadumbu ŵinu awo ŵali na masuzgo? Mwaŵana, namwe mungaŵawovwira ŵabali na ŵadumbu mu mpingo winu, awo ŵakulimbana na minga mu thupi lawo.—Zintharika 20:29.

18. Ncisangulusko wuli ico tingasanga mu nkani zinyake za mu Gongwe la Mulinda na Galamukani!?

¹⁸ Magazini gha Gongwe la Mulinda na Galamukani!  ghali na nkani zinandi izo zikuyowoya za Ŵakaboni awo ŵazizipizga ndipo ŵacali kuzizipizga masuzgo mu umoyo wawo. Usange nyengo na nyengo muŵazgenge nkani izi, muwonenge kuti ŵabali na ŵadumbu ŵinu ŵauzimu pa caru cose capasi ŵazizipizga ukavu, nyifwa, na nkondo. Ŵanyake ŵakusuzgika na matenda. Ŵanandi ŵakutondeka kucita vintu vinyake ivyo ŵantu awo ŵali makora ŵangawona nga ni vipusu comene. Urwari wawo nciyezgo cikuru, comene-comene usange ukuŵatondeska kucita milimo ya Cikristu umo ŵakukhumbira. Mwee, navyo ni viwongo ivyo ŵali navyo kupokera covwiro kufuma kwa ŵabali na ŵadumbu ŵawo, ŵarara na ŵana!

Kuzizipizga Kukupereka Cimwemwe

19. Ncifukwa wuli Paulos wakasekelera nangauli viyezgo vya nga ni minga vikamuwira?

¹⁹ Paulos wakasekelera kuwona umo Ciuta wakamupira nkongono. Wakati: “Ndithumbwirenge mbweno na kukondwa kukuru mu mauntomboro ghane, kuti nkongono za Kristu zindibenekerere. Nteura nkukondwa mu vyakutomboroka, mu vyakusunjizga, mu vyakusokweska, mu vyakuzikizga, mu vyakufinyirizga, cifukwa ca Kristu: cifukwa penepapo ndiri wakutomboroka, apo ndipo ndiri wa nkongono.” (2 Ŵakorinte 12:9, 10) Cifukwa ca ivyo vikamucitikira, Paulos wakati: “Kuti nkuyowoya vya usauci cara: cifukwa ndasambira kukhorwa na ivyo ndiri navyo mumo viriri. Kuyuyuka nkumanya, kuzara nako nkumanya: kose-kose ndipo mu vyose ndiri kuzoŵezgeka kukhuta na kuŵa na njara wuwo, ndiposo na kuzara na kukavuka. Ndingamanya kucita vyose mwa mweneuyo wakundikhomeska.”—Ŵafilipi 4:11-13.

20, 21. (a) Ncifukwa wuli tingaŵa na cimwemwe para tikughanaghanira za vintu “vyambura kuwoneka”? (b) Ni vintu wuli vinyake “vyambura kuwoneka” ivyo mukulindirira kuzakawona mu Paradiso pa caru capasi?

²⁰ Inya, para tizizipizgenge minga yiliyose yakuyerezgera mu thupi lithu, tiŵenge na cimwemwe cikuru pakurongora waliyose kuti nkongono ya Yehova yikufiskika mu kutomboroka. Paulos wakalemba kuti: ‘Kuti tikuvuka cara . . . [cifukwa] wuntu withu wa mukati ukuzgokaso upya zuŵa na zuŵa. Cifukwa suzgo yithu yiyuyu, iyo nja kanyengo kacokovi, yikuticitira kwakuruska comene nkanira ucindami wandanda, uku tikulaŵiska . . . vyambura kuwoneka; cifukwa . . . vyambura kuwoneka nvya muyirayira.’—2 Ŵakorinte 4:16-18.

²¹ Lero, ŵantu ŵanandi ŵa Yehova ŵakulindirira kuzakaŵa na umoyo mu Paradiso pa caru capasi na kuzakakondwera na vitumbiko ivyo walayizga. Vitumbiko ivi vingawoneka nga ni vintu “vyambura kuwoneka” kwa ise lero. Ndipouli, nyengo yili pafupi comene penepapo tizamuwona na maso ghithu vitumbiko ivi, na kukondwera navyo muyirayira swii. Cimoza mwa vitumbiko ivi ni kufwatuka kwamuyirayira ku umoyo wa minga! Mwana wa Ciuta ‘wazamuparanya milimo ya Satana’ na ‘[“kuwuskapo,” NW] uyo wali na nkongono za nyifwa.’—1 Yohane 3:8; Ŵahebere 2:14.

22. Kasi tili na cigomezgo wuli, ndipo tili ŵakusimikizga kuzakacitaci?

²² Mwanteura, kwali ni minga wuli izo zikutilasa lero mu thupi lithu, tiyeni tirutilire kuzizipizga. Nga ni umo Paulos wakacitira, ise nase tiŵe na nkongono zakucitira nteura kwizira mu nkongono ya Yehova, mweneuyo wakutipa nkongono mwawanangwa. Panyengo iyo tizamukhala mu Paradiso pa caru capasi, tizamutumbika Yehova Ciuta withu zuŵa na zuŵa cifukwa ca milimo yake yakuzizwiska iyo wakuticitira.—Salmo 103:2.

[Mazgu ghamusi]

Kasi Mungazgora Wuli?

• Ni mwauli ndiposo ncifukwa wuli Satana wakukhumba kuzimwa cipulikano ca Ŵakristu ŵaunenesko?

• Kasi nkongono ya Yehova ‘yikufiskika wuli mu kutomboroka’?

• Kasi ŵabali ŵarara na ŵanyake mu mpingo ŵangasanguluska wuli awo ŵali na suzgo?

[Mafumbo]

[Cithuzithuzi pa peji 13]

Paulos wakapempera katatu kuti Ciuta wawuskemo munga mu thupi lake