Kasi Cipulikano Cikwenera Kuzikika pa Kughanaghanira Danka?

Murara wa seminare ya ŵaliska ku United States wakalemba kuti: “Pali ŵantu ŵanandi awo ŵakunjira ‘cisopo’ comene-comene cifukwa cakuti ŵakukhumba yayi kughanaghana comene.” Wakasazgirapo kuti, “Iwo ŵakuzomerezga vyose ivyo ŵapulika ‘kwambura ukaboni.’”

FUNDO njakuti ŵantu ŵanandi awo ŵakuyowoya kuti ŵali na cipulikano ŵakughanaghanira cara za vifukwa ivyo ŵakugomezgera usange cipulikano cawo ncakuzikika nadi mu Baibolo. Kwali cipulikano cawo ciri na lufura panji yayi, iwo ŵalije navyo ncito. Ncakuzizwiska cara kuti ŵantu ŵanandi ŵakukhumba cara kudumbiskana za cisopo.

Maluso gha nga ni kugwiriskira ncito vikozgo pakusopa na kusunga pa mtima mapempero navyoso vikupangiska kuti ŵantu ŵareke kughanaghana na kupereka vifukwa vya ivyo ŵakugomezga. Maluso agha, pamoza na nyumba zakutowa zakusoperamo, mawindo gha magalasi gha kugadima, na sumu zakukondweska ndivyo vyekha visopo vinandi vikuŵa navyo. Nangauli visopo vinandi vikuyowoya kuti cipulikano cawo ncakuzikika pa Baibolo, kweni uthenga wawo wakuti ‘gomezga mwa Yesu ndipo uponoskekenge’ ukupepura kukhumbikwa kwa kusambira Baibolo mwakupwererera. Ŵantu ŵanyake ŵakupharazga ndyari. Kasi cakufumapo ca vintu vyose ivi ncivici?

Pakuyowoya za mukhaliro uwo wuli ku North America, mwanarumi munyake uyo wakulemba nkani zakukhwaskana na cisopo wakati: “Cikristu . . . cili pacanya-canya, ndipo awo ŵakucirondezga ŵakusambizgika mwakukwanira yayi.” Mwanarumi munyake mpaka wakafika pakuyowoya kuti United States ni “caru cambura kumanya Baibolo.” Kuyowoya unenesko, vintu ivi vikucitikaso mu vyaru vinyake uko kuli Cikristu. Visopo vinandi ivyo nvya Cikristu cara navyo vikukhuŵirizga kuti ŵantu ŵareke kughanaghanira za vifukwa vyakupulikikwa vya ivyo ŵakugomezga. M’malo mwake, visopo ivi vikurutiska pantazi kwimba, mapempero gha kusunga pa mtima, na vigomezgo vyakupambana-pambana vyakuzikika pa vifukwa vyambura kupulikikwa.

Ndipouli, ŵantu ŵeneawo ŵakureka kupwerererako kuti kwali vigomezgo vyawo nvyaunenesko panji cara nyengo zinandi ŵakughanaghana mwakupwererera comene pa nkani zinyake. Kasi imwe mukuwona kuti ncintu cakuzizwiska cara kuti muntu mweneuyo wakupanga danka kafukufuku kuti wagure galimoto yeneiyo zuŵa linyake yizamunangika na kuponyeka ku cizara, kweni pakuyowoya za cisopo wakuti, ‘Usange nciweme ku ŵapapi ŵane kwa ineso nciweme’?

Usange tikukhumba nadi kukondweska Ciuta, kasi tikwenera cara kughanaghanira mwakupwererera comene usange ivyo tikugomezga pakuyowoya za iye nvyaunenesko nadi? Mpostole Paulos wakayowoya za ŵantu ŵanyake ŵacisopo mu nyengo yake ŵeneawo ŵakaŵa “na mwampu kwa Ciuta, kweni kwakulingana na kumanya cara.” (Ŵaroma 10:2) Ŵantu ŵa nga ni aŵa ŵangalingana waka na muntu uyo wakufwilirapo comene pa ncito yake ya  kupenta nyumba kweni wakugwiriskira ncito mtundu wambura kwenelera wa penti cifukwa wakupulikira cara urongozgi wa mweneco wa nyumba. Iye wangakondwa na ncito yake, kweni kasi ncito yake yiŵenge yakuzomerezgeka na mweneco wa nyumba?

Kasi ncici ico Ciuta wakuzomerezga pakuyowoya za kusopa kwaunenesko? Baibolo likuzgora kuti: “Ceneici nciweme na ca mapokerereko pa maso pa Ciuta Mponoski witu; mweneuyo wakukhumba kuti ŵantu ŵose ŵaponoskeke, na kufikapo pa kumanya unenesko.” (1 Timote 2:3, 4) Ŵanyake ŵangaghanaghana kuti ncamacitiko cara kusanga cimanyisko ca nga ni ici pakati pa visopo vinandi vya mazuŵa ghano. Kweni aghanaghanirani—Usange ni khumbo la Ciuta kuti ŵantu wose ŵamanye unenesko, kasi iye wangabisa unenesko uwu kwa iwo? Cara nadi, cifukwa Baibolo likuyowoya kuti: “Usange ukumupenja [Ciuta], tiwasangike na iwe.”—1 Midauko 28:9.

Kasi Ciuta wakujimanyikwiska wuli kwa awo ŵakumupenja na mtima wose? Nkani yakurondezgapo yizamuzgora fumbo ili.