Rutilirani Kuteŵetera Yehova na Mtima Wakukhora
Rutilirani Kuteŵetera Yehova na Mtima Wakukhora
“Mtima wane wakhozgeka, A Ciuta, mtima wane wakhozgeka!”—SALMO 57:7.
1. Ncifukwa wuli tingaŵa na cisimikizgo nga ni ico Davide wakaŵa naco?
YEHOVA wangakhozga cipulikano cithu ca Cikristu, mwanteura tingaskepelera ku cisopo caunenesko nga mbateŵeti ŵake ŵakujipatulira. (Ŵaroma 14:4) Mwanteura, tingaŵa na cisimikizgo nga ni ico wakaŵa naco Davide, mweneuyo wakimba kuti: “A Ciuta, mtima wane wakhozgeka.” (Salmo 108:1) Usange mtima withu ngwakukhora, ticiskikenge kuti tikwaniriske uteŵeti withu kwa Ciuta. Mwa kuthemba nkongono na urongozgi wake, tingaŵa ŵakukhora, ŵambura kusunkhunyika mu cipulikano, ŵakugomezgeka, “ŵakufwirira mazuŵa ghose mu mulimo wa Fumu.”—1 Ŵakorinte 15:58.
2, 3. Kasi urongozgi uwo wuli pa 1 Ŵakorinte 16:13 ngwakuzirwa wuli?
2 Apo wakaciskanga ŵarondezgi ŵa Yesu mu Korinte wakale, Paulos wakayowoya mazgu agho ghangawovwiraso Ŵakristu lero, wakati: “Ŵani maso, cintani mu cipulikano, citani nga mbanarumi, khomani.” (1 Ŵakorinte 16:13) Mu Cigiriki mazgu agha ghakurongora kuti ukhaliro ukucitika, kurongora kacitiro kakurutilira. Kasi urongozgi uwu ngwakuzirwa wuli?
3 ‘Tingaŵa maso’ mwauzimu mwa kwimikana na Satana na kusenderera kwa Ciuta. (Yakobe 4:7, 8) Kugomezga mwa Yehova kukupangiska kuti tikoleranenge na kuŵa ‘ŵambura kusunkunyika mu Cipulikano ca Cikristu.’ Tose, kusazgapo ŵadumbu, tikwenera ‘kucita vintu nga mbanarumi,’ kuteŵetera Yehova na mtima wose nga mbapharazgi ŵa Ufumu. (Salmo 68:11) ‘Tikukhoma’ para nyengo na nyengo tikugomezga Ŵadada ŵithu ŵa kucanya kuti ŵatipe nkongono zakucitira ivyo ŵakukhumba.—Ŵafilipi 4:13.
4.Ncivici ico cikatipangiska kuti tibapatizike nga Mbakristu?
4 Tikarongora kuti tazomerezga unenesko apo tikajipatulira kwa Yehova mwa kubapatizika. Kweni, kasi ncici ico cikatipangiska kuti tibapatizike? Cakudanga tikasambira unenesko weneco wa Mazgu gha Ciuta. (Yohane 17:3) Ici cikatipa cipulikano ico cikapangiska kuti ting’anamuke, kurongora kuti talekerathu milimo yiheni. (Milimo 3:19; Ŵahebere 11:6) Cakurondezgapo cake tikapanga cakusanka, cifukwa tikalekerathu milimo yiheni iyo tikacitanga kuti ticitenge vintu mwakukolerana na khumbo la Ciuta. (Ŵaroma 12:2; Ŵaefeso 4:23, 24) Panyuma pake tikajipereka kwa Yehova na mtima wose mu pempero. (Mateyu 16:24; 1 Petros 2:21) Tikamupempa Ciuta kuti tiŵe na njuŵi yiweme ndipo tikabapatizika kurongora kuti tajipereka kwa iye. (1 Petros 3:21) Kughanaghanira masitepu agha kutovwirenge kuti ticite vintu mwakukolerana na kujipereka kwithu na kurutilira kuteŵetera Yehova na mtima wakukhora.
Rutilirani Kupenja Cimanyisko Cakufikapo
5. Ncifukwa wuli tikwenera kurutilira kusambira Mazgu gha Ciuta?
5 Kuti ticite vintu mwakukolerana na kujipatulira kwithu kwa Ciuta, tikwenera kurutizga kukhozga cipulikano cithu na Mazgu gha Ciuta. Mwee, cikaŵa cakukondweska kurya cakurya cauzimu penepapo tikati tapanikizga waka unenesko wa mazgu gha Ciuta! (Mateyu 24:45-47) “Cakurya” ici cikaŵa cakunowa comene, ndipo cikatovwira nadi mwauzimu. Sono ncakuzirwa kurutilira kurya cakurya ciwemi cauzimu mwakuti tisungilire mtima wakukhora nga mbateŵeti ŵa Yehova ŵakujipatulira.
6. Kasi mukawovwirika wuli kuti namwe mutemwe unenesko wa mu Baibolo?
6 Tikwenera kuyezgayezga kuti tiŵe na cimanyisko cakusazgikira ca mu Malemba. Ici cikuyana na kupenja usambazi wakubisika—weneuwo tikwenera kuwulimbikira comene. Mwee, nako nkuzirwa kusanga “mahara ghakumanyira Ciuta”! (Zintharika 2:1-6) Penepapo mupharazgi wa Ufumu wakasambiranga namwe Baibolo kwa nyengo yakwamba, iye panyake wakagwiriskira ncito buku la Cimanyisko Ceneico Cikurongozgera ku Umoyo Wamuyirayira. Enya, iye wakamalira nyengo yinandi kuti musambire cipaturo cilicose, mutepanji mukasambiranga kaŵiri panji katatu cipaturo cimoza. Mukawovwirika comene penepapo Malemba ghakurongoreka mu cipaturo ico mukasambiranga ghakaŵazgikanga na kurongosoreka. Usange fundo yikaŵa yakusuzga kuyipulikiska, wakayirongosoranga. Uyo wakasambiranga namwe Baibolo wakanozgekeranga makora, kupempa mzimu wa Ciuta, na kumovwirani kuti namwe mutemwe unenesko.
7. Ncici ico cikumwenereska muntu kuti wasambizge ŵanyake unenesko wa Mazgu gha Ciuta?
7 Kuyezgayezga uku kukaŵa kwakwenelera, lekani Paulos wakalemba kuti: “Uyo wakusambizgika mazgu wasanganirenge viweme vyose na uyo wakusambizga.” (Ŵagalatiya 6:6) Pano mazgu gha Cigiriki ghakurongora kuti visambizgo vya Mazgu gha Ciuta vikasambizgika mwakuwerezga-werezga kuti vikhazikike mu maghanoghano ndiposo mu mtima wa muntu uyo “wakusambizgika.” Kusambizgika kwanteura uku kukumupangiskani kuti namwe musambizgeso ŵanyinu. (Milimo 18:25) Kuti mucite vintu mwakuyana na kujipatulira kwinu, mukwenera kurutilira kupwererera umoyo winu wauzimu, na kuŵa ŵakukhoma mwa kusambira Mazgu gha Ciuta nyengo na nyengo.—1 Timote 4:13; Tito 1:13; 2:2.
Kumbukirani Kurapa na Kung’anamuka Kwinu
8. Kasi tingasungilira wuli mikhaliro iyo Ciuta wakukondwa nayo?
8 Kasi mukukumbuka umo mukajipulikira apo mukasambira unenesko, kung’anamuka, na kumanya kuti Ciuta wamugowokerani zakwananga zinu kwizira mu sembe ya ciwombolero ya Yesu? (Salmo 32:1-5; Ŵaroma 5:8; 1 Petros 3:18) Mwanadi, mungatemwa cara kuti muwerereso ku mikhaliro yiheni. (2 Petros 2:20-22) Kupempera nyengo zose kwa Yehova kungamovwirani kuti musungilire mikhaliro iyo Ciuta wakukondwa nayo, kuŵa na umoyo wakukolerana na kujipatulira kwinu, na kurutilira kuteŵetera Yehova mwakugomezgeka.—2 Petros 3:11, 12.
9. Cifukwa cakuti taleka mikhaliro yiheni, kasi tikwenera kuyezgayezga kucitaci?
9 Cifukwa cakuti muli kuleka mikhaliro yiheni, ipo rutilirani kupempa covwiro kwa Ciuta kuti muŵe na mtima wakukhora. Nyengo zinyake mungaŵa kuti mukwenda mu ntowa yambura kwenelera, kweni para mwawona pa mapu, mukumanya kuti mwapuruka, ndipo mukwamba kutora ntowa yakwenelera. Lekani kufumamo mu ntowa yakwenelera iyi. Rutilirani kugomezga urongozgi wa Ciuta, na kukhalirira mu ntowa yakuya ku umoyo.—Yesaya 30:20, 21; Mateyu 7:13, 14.
Mungaruwanga Cara Kujipatulira Kwinu na Ubapatizo
10. Kasi ni fundo wuli izo tikwenera kukumbukira zakukhwaskana na kujipatulira kwithu kwa Ciuta?
10 Kumbukirani kuti mukajipatulira kwa Yehova kwizira mu pempero na cilato ca kumuteŵetera iye mwakugomezgeka kwa muyirayira. (Yuda 20, 21) Kujipatulira cikung’anamura kujiŵika pampepete na cilato ca kucita uteŵeti wakupatulika. (Leviticus 15:31; 22:2) Kujipatulira kwinu kuti kukaŵa pangano lakuti muteŵetere kwa nyengo yicoko panji kuteŵetera ŵantu cara. Kukaŵa kujipereka kwa Muwusi wa Cilengiwa cose na kuŵa ŵakugomezgeka kwa iye mu umoyo withu wose. Enya, ‘tikukhalira wamoyo panji tikufwa, tikufwira Fumu Yehova.’ (Ŵaroma 14:7, 8) Cimwemwe cithu cikuthemba pa kujilambika ku khumbo lake na kurutilira kumuteŵetera na mtima wose.
11. Ncifukwa wuli mukwenera kukumbukira ubapatizo winu na kuzirwa kwake?
11 Nyengo zose kumbukirani ubapatizo winu nga ncimanyikwiro cinu ca kujipereka kwa Ciuta. Mukacicizgika cara kuti mubapatizike, kweni mukasanka mwekha kucita ici. Kasi mukuyezgayezga sono kuti mucite vintu mwakukolerana na khumbo la Ciuta mu umoyo winu wose? Mukapempa Ciuta kuti wamupeni njuŵi yiwemi ndipo mukabapatizika kurongora kuti mwajipereka kwa iye. Sungilirani makora njuŵi yinu yiwemi mwa kucita vintu mwakuyana na kujipatulira kwinu, ndipo Yehova wamutumbikaninge.—Zintharika 10:22.
Khumbo Linu Nalo Likovwira
12, 13. Kasi khumbo lithu likukolerana wuli na kujipatulira na kubapatizika?
12 Ŵantu ŵanandi pa caru cose capasi ŵasanga vitumbiko cifukwa ca kujipatulira na kubapatizika. Penepapo tikujipatulira kwa Ciuta mu ubapatizo, tikuleka mikhaliro yiheni iyo tikacitanga, kweni khumbo lithu lakucita vintu viwemi likusinta cara. Nga ni ŵasopi ŵakusambizgika makora, tikarongora khumbo lithu penepapo tikajipatulira kwa Ciuta mu pempero na kubapatizika. Kujipatulira kwa Ciuta na kubapatizika kukukhumbikwira kuti timanye ilo ni khumbo la Ciuta na kulicita. (Ŵaefeso 5:17) Para tikucita nteura ndikuti tikurondezga Yesu, mweneuyo wakarongora khumbo lake apo wakaleka mulimo wake wakupara mathabwa na kubapatizika, ndipo wakajipereka nkanira kucita khumbo la Ŵadada ŵake ŵakucanya.—Salmo 40:7, 8; Yohane 6:38-40.
13 Likaŵa khumbo la Yehova Ciuta kuti mwana wake ‘waŵe murunji kwizira mu masuzgo.’ Mwanteura, Yesu wakarongora khumbo lake mwa kuzizipizga masuzgo mwakugomezgeka. Kuti wazizipizge, iye wakapereka “malurombo na maŵeyerero na ncemerezgo na masozi . . . ndipo wakapulikikwa cifukwa ca kopa Ciuta.” (Ŵahebere 2:10, 18; 5:7, 8) Usange nase tikopa Ciuta, tingaŵa ŵakusimikizgira kuti ‘tikupulikikwa,’ ndipo tiŵenge na cisimikizgo cose kuti Yehova watikhozgenge nga Mbakaboni ŵake ŵakujipatulira.—Yesaya 43:10.
Mungasungirira Mtima Wakukhora
14. Cifukwa wuli tikwenera kuŵazga Baibolo dazi lirilose?
14 Kasi ncivici ico cingamovwirani kuti musungirire mtima wakukhora na kucita vintu mwakuyana na kujipatulira kwinu kwa Ciuta? Kuti musange cimanyisko cakusazgikira ca Mazgu gha Ciuta mukwenera kuŵazga Baibolo dazi lirilose. “Muzga wa magomezgeko na vinjeru” nyengo zose wakuticiska kuti ticitenge nteura. Urongozgi uwu ukuperekeka cifukwa kukhara na umoyo wakukolerana na kujipatulira kwithu kukhumbikwira kuti tendenge mu unenesko wa Ciuta. Kuŵenge kuti gulu la Yehova likulemba visambizgo vyautesi, mphanyi urongozgi wa kuŵazga Baibolo ukuperekeka cara ku Ŵakaboni ŵa Yehova na ku ŵantu awo ŵakuŵapharazgira.
15. (a) Ncivici ico tikwenera kughanaghanira para tikukhumba kucita vintu? (b) Ncifukwa wuli tingayowoya kuti ncito ya kucaru yikovwira waka Ŵakristu kusanga vintu vyakukhumbikwa mu umoyo?
15 Nyengo zose para mukukhumba kucita vintu, ghanaghanirani umo cintu ico cingakhwaskira kujipatulira kwinu kwa Yehova. Ici cingayana waka na ncito ya kucaru iyo mukugwira. Kasi mukuyezgayezga kuti ncito iyo mukugwira yimovwireni kurutiska pantazi kusopa kwaunenesko? Nangauli ŵantu ŵanandi awo ŵakulemba ŵanyawo ncito ŵakumanya kuti Ŵakristu ŵakujipatulira mbakugomezgeka ndipo ŵakugwira makora ncito, ŵakumanyaso kuti Ŵakaboni ŵa Yehova ŵakucita vintu na cilato cakuti ŵamanyikwe ku caru panji kupharizgana na ŵanji kuti ŵasange udindo uweme cara. Ici cili nteura cifukwa cakuti khumbo la Ŵakaboni nkusambazga, kumanyikwa na ŵantu panji mazaza cara. Awo ŵakucita vintu mwakuyana na kujipatulira kwawo kwa Ciuta, cintu cakuzirwa comene kwa iwo nkucita khumbo lake. Ncito ya kucaru iyo ŵakugwira yikuŵawovwira kuti ŵasange vintu vyakukhumbikwa mu umoyo, yili pamalo ghaciŵiri. Nga ni mpostole Paulos, ncito yawo yikuru ni uteŵeti Wacikristu. (Milimo 18:3, 4; 2 Ŵatesalonika 3:7, 8; 1 Timote 5:8.) Kasi mukuŵika vintu vya Ufumu pakwamba mu umoyo winu?—Mateyu 6:25-33.
16. Kasi tingacitaci usange masuzgo ghakutitondeska kucita vintu mwakuyana na kujipatulira kwithu kwa Ciuta?
16 Ŵanji ŵangaŵa kuti ŵakaŵa ŵakwenjerwa comene na vyakucitika vinyake apo ŵakaŵa ŵandasambire unenesko. Kweni apo ŵakasambira za cilindizga ca Ufumu, mtima wawo ukazura na cimwemwe, kuwonga na kutemwa Ciuta! Kughanaghanira za vitumbiko ivyo ŵasanga kungawovwira kuti ŵacitenge vintu mwakuyana na kujipatulira kwawo kwa Yehova. Kulwande linyake, wuli usange kwenjerwa na masuzgo agho tikukumana nagho sono mu caru ici, ghakujandizga “Mazgu gha Ciuta,” nga ni umo minga zikujandizgira mbuto kuti zikure makora? (Luka 8:7, 11, 14; Mateyu 13:22; Marko 4:18, 19) Usange mwamanya kuti ici cayamba kumucitikirani panji mbumba yinu, muphalirani Yehova masuzgo ghinu na kuromba kuti wamovwireni. Usange mukumuyeghiska iye katundu winu, wamovwiraninge na kumupani nkongono kuti muteŵetere iye na cimwemwe ndiposo na mtima wakukhora.—Salmo 55:22; Ŵafilipi 4:6, 7; Civumbuzi 2:4.
17. Ni mwauli umo ciliri camacitiko kuzizipizga viyezgo ivyo nvyakusuzga comene?
17 Rutilirani kupempera kwa Yehova Ciuta nyengo zose, nga ni umo mukacitira penepapo mukasanka kujipatulira kwa iye. (Salmo 65:2) Para mwayezgeka kuti mucite uheni panji para mwakumana na viyezgo vinandi vyakusuzga, pempani urongozgi wa Ciuta na covwiro cake. Kumbukirani kukhumbikwa kwa cipulikano, cifukwa Yakobe, musambiri wa Yesu wakalemba kuti: “Usange yumoza wa imwe wakuperera vinjeru [vya kuzizipizgira ciyezgo], warombe Ciuta, mweneuyo wakupa ŵose kwawanangwa, ndipo kuti wakutombozga cara; ndipo viti vipike kwa iyo. Kweni warombe na cipulikano, kwambura kukanganya; cifukwa uyo wakukanganya wali nga ndi jigha la nyanja, ilo likuputa na mpepo, ndipo likusefukira uko na uko. Muntu wa nteura wareke kughanaghana kuti wati wapokere kantu ku Fumu, ndi muntu wa mitima yiŵiri, wakuzgoka-zgoka mu ntowa zake zose.” (Yakobe 1:5-8) Usange ciyezgo cikuwoneka kuŵa cakusuzga kuzizipizga, tingaŵa na cisimikizgo kuti: “Palive ciyezgo ico camukorani kweni ico nca muntu yose ndipera: kweni kwa Ciuta ngwa magomezgeko, mweneuyo kuti wati wazomere imwe cara kuti muyezgeke kwakujumpa nkongono zinu; kweni pamo na ciyezgo wati wacite ntowa yakufumiramo, kuti kuŵe na nkongono zakuzizipizgira.”—1 Ŵakorinte 10:13.
18. Kasi tingacita wuli usange kwananga kukuru uko tikacita kukutondeska kuti tifiske cakusanka cithu ca kucita vintu mwakuyana na kujipatulira kwithu kwa Yehova?
18 Kasi mungacita wuli usange kwananga kukuru uko mukacita kumanyuma uku kukumusuzgani na kumutondeskani kucita vintu mwakuyana na kujipatulira kwinu kwa Ciuta? Usange mwarapa, mungasanga cipembuzgo pakumanya kuti Yehova ‘watayenge cara ŵantu ŵakupyoka mtima na awo ŵapera.’ (Salmo 51:17) Phalirani ŵarara ŵa Cikristu kuti ŵamovwireni, pakuti iwo ŵakurondezga Yehova, ŵamovwiraninge kuti ubwezi winu na Ŵadada ŵakucanya uwererepo. (Salmo 103:10-14; Yakobe 5:13-15) Mwakuŵaso na nkongono zauzimu na mtima wakukhora, cizamuŵa camacitiko kunyoroska marundi ghinu ndipo muzamuwona kuŵa cipusu kuti mucite vintu mwakuyana na kujipatulira kwinu kwa Ciuta.—Ŵahebere 12:12, 13.
Rutilirani Kuteŵeta na Mtima Wakukhora
19, 20. Cifukwa wuli ncakuzirwa kuti tirutirire kucita vintu mwakuyana na kujipatulira kwithu?
19 Mu nyengo zakusuzga izi, tikwenera kuyezgayezga kuti ticite vintu mwakuyana na kujipatulira kwithu na kurutilira kuteŵetera Ciuta mwakugomezgeka. Yesu wakayowoya kuti: “Mweneuyo wakuzizipizga mpaka ku umariro, ndiyo wamkuponoskeka.” (Mateyu 24:13) Cifukwa cakuti tikukhala mu “mazuŵa gha umariro,” umariro ungiza nyengo yiliyose. (2 Timote 3:1) Mwakusazgirapo, palije yumo wa ise wakumanya kuti tiŵenge na umoyo na macero. (Yakobe 4:13, 14) Mwanteura, ncakuzirwa comene mazuŵa ghano kucita vintu mwakuyana na kujipatulira kwithu!
20 Mpostole Petros wakadidimizga ici mu kalata yake yaciŵiri. Iye wakayowoya kuti nga ni umo Ciwowota cikaparanyira ŵantu ŵambura kusopa Ciuta, ndimo viŵirengeso na caru ici, panji ŵantu ŵakwananga, ŵazamuparanyika pa “zuŵa la Yehova.” Petros wakayowoya kuti: “Mukwenera kuŵa ŵantu uli mu makhaliro ghose ghatuŵa na kusopa-Ciuta”! Wakaŵaciskaso kuti: ‘Mwa ŵakutemweka, apo mukumanya nkanira vyeneivi, mucenjere mzire muwe [na visambizgo vyautesi na ŵantu ŵambura kusopa Ciuta] ku kucinta kwinu para mwakhuŵirizgika na kusovya kwa ŵaciswa-marango.’ (2 Petros 3:5-17) Mwee, cikuŵa cacitima usange muntu wakubapatizika wapuruka na kutondeka kusungirira mtima wake wakukhora!
21, 22. Ni mwauli umo mazgu agho ghali pa Salmo 57:7 ghakaŵira ghaunenesko kwa Davide na kwa Ŵakristu ŵaunenesko?
21 Khumbo linu lakuti mucite vintu mwakuyana na kujipatulira kwinu kwa Ciuta lingakhozgeka usange mukumbukirenge zuŵa ilo mukabapatizikira na kupempa covwiro kwa Ciuta mwakuti ivyo mukuyowoya na kucita vikondweske mtima wake. (Zintharika 27:11) Yehova wakukhuŵazga ŵantu ŵake cara, mwanteura tikwenera kuŵa ŵakugomezgeka kwa iye. (Salmo 94:14) Iye wakarongora citima na lusungu kwa Davide penepapo wakamuthaska na kutimbanizga mapulani gha ŵarwani ŵake. Pakuwongera ici, Davide wakarongora citemwa cakukhora, cambura kusunkhunyika ico wakaŵa naco pa Mponoski wake. Na mtima wose wakimba kuti: “Mtima wane wakhozgeka, A Ciuta mtima wane wakhozgeka! Tindimbenge, na kulizgaso.”—Salmo 57:7.
22 Nga ni Davide, Ŵakristu ŵaunenesko ŵakusunkhunyika cara pa kujipereka kwawo kwa Ciuta. Mwakugomezgeka, ŵakumanya kuti Yehova ndiyo wakuŵaponoska na kuŵasungilira, mweneuyo ŵakumwimbira sumu za marumbo na cimwemwe cose. Usange mtima winu ngwakukhora, mbwenu ugomezgenge mwa Ciuta, ndipo na covwiro cake mufiskenge kujipatulira kwinu. Enya, mungaŵa nga ni “murunji” mweneuyo wamasalmo wakimba kuti: “Walije kopa makani ghaheni; mtima wake ngwakukhora nga-nga-nga kutamira Yehova.” (Salmo 112:6, 7) Mwakuŵa na cipulikano mwa Ciuta na kumugomezga, mungacita vintu mwakuyana na kujipatulira kwinu na kurutilira kuteŵetera Yehova na mtima wakukhora.
Kasi Mukukumbukira?
• Ncifukwa wuli tikwenera kurutilira kusambira cimanyisko cakufikapo ca Baibolo?
• Ncifukwa wuli tikwenera kurapa na kung’anamuka?
• Kasi tikwandula wuli para tikukumbukira kujipatulira kwithu na kubapatizika?
• Ncivici ico cingatovwira kuti tirutirire kuteŵetera Yehova na mtima wakukhora?
[Mafumbo]
[Cithuzithuzi pa peji 28]
Kuŵika uteŵeti Wacikristu pa malo ghakwamba kukutovwira kurutilira kuteŵetera Yehova na mtima wakukhora
[Cithuzithuzi pa peji 28]
Kasi mukusungirira umoyo winu wauzimu na kuŵa ŵakhukhora mwa kurutilira kusambira Mazgu gha Ciuta?