Ucekuru Ungatondeska Yayi Kusambira

KSENIYA wakababika mu 1897. Wali na mwana yumoza mwanarume, ŵana-ŵanakazi ŵatatu, ŵazukuru 15 na ŵazukuru-civu 25. Mu umoyo wake wose wakacitanga vintu ivyo ŵapapi ŵake ŵakamusambizga. Wakacimbira nkondo kufuma ku Abkhaz Republic—caru ca pakati pa Black Sea (Nyanja Yifipa) na Caucasus, na kukakhala ku Moscow. Iye wakakhorwa na cisopo cake ico wakati nciharo cakufuma ku ŵapapi ŵake.

Mu 1993, Meri, mwana wake mwanakazi wakamba kuwungana na Ŵakaboni ŵa Yehova. Meri wakamba kuphalira Kseniya za Yehova Ciuta na Baibolo, kweni wakakhumbanga cara kupulikizga. Nyengo na nyengo, Kseniya wakaphaliranga mwana ŵake mwanakazi kuti, “Nacekura kale ine, ningasambiraso cintu cacilendo sono yayi.”

Ndipouli, Meri; Londa, uyo ni mwanakazi wa muzukuru wake; na ŵazukuru-civu ŵanakazi Nana na Zaza, awo ŵakaŵa Ŵakaboni ŵa Yehova, ŵakarutilira kuyowoya nayo vya mu Baibolo. Mu 1999, zuŵa linyake namise, mwana wake na ŵazukuru ŵake ŵakaŵazgira Kseniya lemba linyake ilo likamutora mtima. Lemba ili likalongosora za ivyo Yesu wakaphalira ŵapostole ŵake ŵakugomezgeka apo wakambiska Mugonero wa Fumu. (Luka 22:19, 20) Pa virimika 102, Kseniya wakasinta maghanoghano ghake zuŵa lenelira namise na kwamba kusambira Baibolo.

Kseniya wakuti: “Pamanyuma pa virimika 102, sono namanya nadi ng’anamuro la umoyo. Nawona kuti palije cilicose ciwemi kuruska kuteŵetera Yehova, Ciuta withu muwemi na wakutemwa. Nicali na nkongono na thupi liwemi. Nkuŵazga kwambura magilasi ndipo nkulimbikira kusambira pamoza na mbumba yane.”

Kseniya wakabapatizika pa November 5, 2000. Iye wakuti: “Sono nkupereka umoyo wane kwa Yehova kumuteŵetera na citemwa cose. Nkugaŵira magazini na matrakiti uku nakhala pasi pa siteji ya basi pafupi na nyumba yane. Nkusangirapo mwaŵi wa kuyowoya za Yehova kwa ŵabali ŵane ŵakuthupi awo ŵakwiza kaŵiri-kaŵiri kuzakaniwona.”

Kseniya wakulindirira nyengo apo ‘mnofu wake uzamuŵa nga ngwa mwana, na kuwerera ku mazuŵa gha upya wake.’ (Job 33:25) Usange gogo uyu wa virimika 102 wakuwona kuti ucekuru ungatondeska muntu cara kusambira Baibolo, imwe ke?