Mafumbo Ghakufumira ku Ŵaŵazgi

Kasi cingaŵa ca mahara kuti Ŵakristu ŵaunenesko ŵakasangike mu tcharitchi cifukwa ca cakucitika ca nyifwa panji ukwati?

Tikwenera cara kutoramo cigaŵa cilicose mu cisopo cautesi cifukwa ici cikumukondweska cara Yehova ndipo tikwenera kutceŵa kucita nteura. (2 Ŵakorinte 6:14-17; Civumbuzi 18:4) Kendeskero ka nyifwa ako kakucitikira mu tcharitchi ncakucitika ca cisopo, ceneico mwambura kukayika cikunjizgamo visambizgo vyambura kukolerana na malemba nga ni umoyo wambura kufwa na njombe iyo ŵantu ŵawemi ŵakupokera ya kuya kucanya. Maluso ghanyake ghakunjizgikamo nga ni kupanga cimanyikwiro ca mpinjika na kupempelera lumoza na muliska panji muteŵeti. Mapempero na vyakucitika vyinyake vyambura kukolerana na visambizgo vya mu Baibolo vingacitika pa ukwati uwo ukucitikira mu tcharitchi panji ku malo ghali ghose. Cingaŵa cakusuzga usange Mkristu wakukhala ku malo uko waliyose wakutoramo cigaŵa mu vyakucitika vya cisopo cautesi. Mwee, cingaŵa nadi cambura mahara kunjizgikamo mu vyakucitika ivi!

Wuli usange Mkristu wakukhumba kuti wakasangikepo pa nyifwa panji ukwati uwo ukucitikira mu tcharitchi? Mwaciyerezgero, mufumu wambura kugomezga, wangaciska muwoli wake kuti ŵarute lumoza ku cakucitika ca nga ni ici. Kasi iye wangaruta nayo nangauli wamuwonelera waka? Cifukwa ca kucindika kwake mufumu wake, muwoli wangaruta, kweni wakwenera kuŵa na cikanga kuti wakaleke kutoramo cigaŵa cilicose mu cakucitika ico. Kulwande linyake, iye wangakana, cifukwa ca kughanaghanira ukhaliro wa ku malo uko uwo ungakamupangiska kuswa marango gha Ciuta. Cakusanka ncake. Mwambura kukayika iye wakukhumba kuti waŵe wakufwasa mu mtima, ndiposo wa njuŵi yiweme.—1 Timote 1:19.

Mu ntowa yiliyose, ungaŵa mwaŵi wake kumurongosorera mufumu wake kuti iye wangatoramo yayi cigaŵa mu vyakucitika vilivyose vya cisopo panji kwimba sumu na kuzgolika pasi mutu penepapo pempero likuperekeka. Cifukwa cakurongosora kwake, iye wangawona kuti usange muwoli wake wangakaŵapo pa cakucitika ici mbwenu iye wamufwatuka cara. Mwanteura iye wangaghanaghana za kuruta yekha cifukwa ca citemwa cake pa muwoli wake, kucindika vigomezgo vyake, panji cifukwa ca kutceŵa kukhuŵazgana. Kweni usange mufumu wakoserezga kuti muwoli wake warute nipera, iye wangaruta kweni wamuwonelera waka.

Tikweneraso kughanaghanirapo comene kuti usange ŵasopi ŵanyithu ŵamanya kuti tikasangikamo mu tcharitchi pangaŵa vyakufumapo wuli. Kasi njuŵi ya ŵanji yingapwetekeka cara? Panji mungapangiska yayi kuti ŵanji ŵaleke kutceŵa kusopa vikozgo? Paulos wakaciska kuti mukwenera kupwererera vintu ivyo “nvyakuzirwa” “mwakuti muŵenge ŵakunyoroka na ŵambura kafukwa kufikira ku zuŵa la Kristu.”—Ŵafilipi 1:10.

Usange cakucitika ico nca mbali winu wakuthupi, pangaŵa masuzgo ghanandi ghakufumira ku mbumba. Mu ntowa yiliyose Mkristu wakwenera kupwererera na kuwona vintu ivyo vikunjizgikamo. Cifukwa ca mikhaliro yinyake, iye wangaghanaghana kuti kwamuŵavya masuzgo ghalighose usange wangasangikapo pa cakucitika ca nyifwa panji ukwati nga ni wakuwonelera waka. Ndipouli, nyengo zinyake ukhaliro ukuwonekerathu kuti usange mungaruta mungapweteka njuŵi yinu na ya ŵanji mwanteura mukwenera kupenda vyandulo vyakusangikapo. Mulimose umo vingaŵira Mkristu wakwenera kuwoneseska kuti vintu ivyo wakucita vikwenera kususkana cara na njuŵi yake yiweme pamaso pa Ciuta na ŵantu.