“Ndiwe Mwanakazi wa Nkaro Yiweme”

Mazgu agha ghakaŵa gha kurumba mwanakazi wa ku Moab. Zina lake likaŵa Ruth, uyo wakaŵa cokoro ndiposo mkamwana wa Naomi, nchembere ya Ciisrayeli. Ruth wakakhalanga mu Israyeli virimika 3000 ivyo vyajumpa apo ŵeruzgi ŵakawusanga, ndipo wakaŵa na lumbiri luweme. (Ruth 3:11) Kasi wakafika wuli pakuŵa na lumbiri luwemi? Mbanjani lero ŵangasanga candulo na nkaro yake?

Pakuti wakaŵa mwanakazi “wakurya vyakurya vya ukata” cara, Ruth wakaŵa wakulimbikira ncito, wakagwiranga kwa maora ghanandi kuvulura vyakurya mu minda, lekani ŵantu ŵakamurumbanga. Nanga ni apo wakaphalirika kuti wacepeskeko ncito, iyo wakarutilira kufukafuka, kugwira ncito zakujumpa msinku wake. Iyo wakuyana nadi na ivyo Baibolo likurongosora za mwanakazi wakurumbika, wakulimbikira, na wakutokatoka.—Zintharika 31:10-31; Ruth 2:7, 15-17.

Yikaŵa mikhaliro yake yauzimu—kujiyuyura, kujipereka na citemwa cake ceneko—iyo yikapangiska ŵantu ŵanandi kumurumba. Uku wali na cigomezgo cicoko cakuti wasangenge civikiliro ca mu nthengwa, wakasida ŵapapi ŵake na caru cakwawo na kudemelera kwa Naomi. Panyengo yeneyiyo pera, Ruth wakarongora kuti wali na khumbo la kuteŵetera Yehova, Ciuta wa ŵanyina-vyara. Pakuyowoya za uweme wake, nkani ya mu Malemba yikuti Ruth ‘wakaruska ŵana ŵanarumi [ŵa Naomi] ŵankonde na ŵaŵiri.’—Ruth 1:16, 17; 2:11, 12; 4:15.

Inya nadi, lumbiri lwa Ruth lukaŵa luweme pamaso pa ŵabwezi ŵake, kweni kwakuruska lukaŵa lwakuzirwa comene pamaso pa Ciuta, ndipo cifukwa ca mikhaliro yake yiweme, wakatumbikika mwakuti wakazakaŵa mzere weneuwo Yesu Kristu wakababikiramo. (Mateyu 1:5; 1 Petros 3:4) Mwee, nawo mbuweme wa ciyerezgero ico Ruth wali kupereka, ku Ŵakristu pera yayi, kweniso kwa wose awo mbasopi ŵa Yehova!