Nyengo Yakuvumbulira Cisisi

Kusunga cisisi pa nkani zinyake kungang’anamura mpambano pakati pa mtende na zawe. Kweni kasi pali nyengo yakuvumbulira cisisi? Awonani umo mprofeti Amosi wakuyowoyera za Ciuta wake: “Yehova kuti wakucita kantu cara, kwambura kuti wavumbulire cakuubende cake ku ŵateŵeti ŵake zincimi.” (Amosi 3:7) Mu mazgu agha, tingasambirapo kantu kanyake kakukhwaskana na cisisi. Yehova wangasunga cisisi pa nkani zinyake kwanyengo yitali, ndipo pamanyuma pake wakuzakavumbulira ŵantu ŵanyake. Kasi tingarondezga wuli Yehova pa nkani iyi?

Nyengo zinyake, ŵarara mu mpingo Wacikristu ŵangawona kuti ncakwenelera kusunga cisisi. (Milimo 20:28) Mwaciyerezgero, pakughanaghanira mpingo, nyengo zinyake ŵangawona kuti nciweme kusunga cisisi pa ivyo ŵanozga panji milimo yinyake iyo ŵasinta mu mpingo mupaka nyengo yizakafike.

Pa cakucitika ca nga ni ici, nciweme kuphalira makora awo vikuŵakhwaska, nyengo, ndiposo umo muzamuvumbulira cisisi. Kumanya nyengo iyo muzamuphalira wumba nkani iyo kungaŵawovwira kuti ŵasunge cisisi.—Zintharika 25:9.