Jilambikani Mwakugomezgeka ku Muwuso wa Ciuta
Jilambikani Mwakugomezgeka ku Muwuso wa Ciuta
‘Yehova ndiye mweruzgi withu, ndiye wakutiŵusa, Yehova ndiye themba lithu.’ —YESAYA 33:22.
1. Ni vintu wuli ivyo vikapangiska Israyeli wamwaka kuŵa mtundu wapadera?
MTUNDU wa Israyeli ukababika mu 1513 B.C.E. Panyengo iyo, ukaŵavya msumba ukuru, caru, ndiposo themba la kuwoneka na maso. Ŵantu ŵake ŵakaŵa kuti ŵafuma waka ku uzga. Ndipouli, mtundu wupya uwu ukaŵaso wapadera mu ntowa yinyake. Yehova Ciuta ndiye wakaŵa Mweruzgi wake, Muwusi, ndiposo Themba. (Exodus 19:5, 6; Yesaya 33:22) Pakaŵavya mtundu unyake uwo ukatenge uyowoyenge mazgu agha!
2. Ni fumbo wuli ilo likufumbika lakukhwaskana na umo mtundu wa Israyeli ukarongozgekeranga, ndipo ncifukwa wuli zgoro lake ndakuzirwa kwa ise?
2 Cifukwa cakuti Yehova ni Ciuta uyo wakwendeska vintu mu ndondomeko yiweme, ndiposo wamtende, tingaŵa ŵakusimikizga kuti mtundu wuliwose uwo wangawusa ungaŵa wakulinganizgika makora. (1 Ŵakorinte 14:33) Ndimoso vikaŵira na Israyeli. Kweni kasi ni mwauli umo gulu la kuwoneka na maso la pa caru capasi likarongozgekera na Ciuta wambura kuwoneka na maso? Tingacita makora kughanaghanira umo Yehova wakarongozgera mtundu wamwaka uwu, cifukwa umo iye wakacitira na Israyeli kukurongora kukhumbikwa kwa kujilambika mwakugomezgeka ku muwuso wake.
Umo Mtundu Wamwaka wa Israyeli Ukarongozgekeranga
3. Kasi ni manozgero wuli agho Yehova wakapanga kuti warongozge ŵantu ŵake?
3 Nangauli Yehova ndiye wakaŵa Themba lambura kuwoneka la Israyeli, kweni wakasanka ŵanarumi ŵakugomezgeka kuŵa ŵimiliri ŵake. Pakaŵa ŵakaronga na ŵanarumi ŵarara awo ŵakateŵeteranga ŵantu nga ni ŵarongozgi na ŵeruzgi. (Exodus 18:25, 26; Duteronome 1:15) Kweni, tikwenera cara kughanaghana kuti kwambura urongozgi wa Ciuta ŵanarumi aŵa ŵakatenge ŵeruzgenge mwamahara kwambura kubudiska. Ŵakaŵa ŵarunji cara, ndipo ŵakamanyanga yayi ivyo vikaŵa mu mitima ya ŵasopi ŵanyawo. Ndipouli, ŵeruzgi ŵakopa Ciuta ŵakaperekanga urongozgi wakovwira ku ŵasopi ŵanyawo cifukwa ukaŵa wakuzikika pa Dango la Yehova.—Duteronome 19:15; Salmo 119:97-100.
4. Kasi ni vizgoŵi wuli ivyo ŵeruzgi ŵakugomezgeka ŵa Israyeli ŵakeneranga kutceŵa, ndipo cifukwa wuli?
4 Ndipouli, ni vinandi ivyo vikakhumbikwanga kuti muntu waŵe mweruzgi kuruska waka kumanya Dango. Cifukwa cakuti ŵakaŵa ŵambura urunji, ŵanarumi ŵarara aŵa ŵakeneranga kuŵa maso kumazga vizgoŵi viheni—nga ni uryezi, kurumba cisko, na uzukusi—ivyo vikatenge vipangiskenge kubendezga ceruzgo cawo. Moses wakaŵaphalira kuti: “Mungalaŵiskanga muntu pa cisko pa kweruzga; mupulike mucoko kwakulingana na mukuru; mungofiwanga na cisko ca muntu, cifukwa kweruzga nkwa Ciuta.” Enya, ŵeruzgi ŵa Israyeli ŵakeruzganga mu malo gha Ciuta. Mwee, uwu ukaŵa mwaŵi wapacanya nadi!—Duteronome 1:16, 17.
5. Kusazgirapo pa kwimika ŵeruzgi, ni manozgero wuli ghanyake agho Yehova wakapanga kuti wapwererere ŵantu ŵake?
5 Yehova wakapangaso manozgero ghanyake kuti wapwererere vyakusoŵa vyauzimu vya ŵantu ŵake. Nanga ni apo ŵakaŵa kuti ŵandanjire mu Caru ca Layizgano, wakaŵalangura kuti ŵazenge cihema, malo gha kusopa kwaunenesko. Wakapangaso manozgero ghakuti ŵasofi ŵasambizgenge Dango, kupereka sembe za nyama, ndiposo kotca vyakununkira mulenji na mise yiliyose. Ciuta wakasanka mukuru wa Moses, Aron, kuŵa musofi mukuru na kwimika ŵana ŵa Aron kuti wovwirenge wiskewo.—Exodus 28:1; Maŵazgo 3:10; 2 Midauko 13:10, 11.
6, 7. (a) Kasi nkukolerana wuli uko kukaŵapo pakati pa ŵasofi na Ŵalevi awo ŵakaŵa ŵasofi cara? (b) Kasi ni sambiro wuli ilo tingatorapo pa fundo yakuti Ŵalevi ŵakacitanga milimo yakupambana-pambana? (Ŵakolose 3:23)
6 Kupwererera vyakusoŵa vyauzimu vya ŵantu mamiliyoni ghanandi yikaŵa ncito yikuru, ndipo ŵasofi ŵakaŵa ŵacoko comene. Mwanteura manozgero ghakapangika ghakuti viŵaro vinyake vya fuko la Levi viŵawovwirenge. Yehova wakaphalira Moses kuti: ‘Ŵalevi uŵapereke kwa Aron na ŵana ŵake ŵanarumi; mbakuperekekera nkanira kwa iye kufumira kwa ŵantu Ŵaisrayeli.’—Maŵazgo 3:9, 39.
7 Ŵalevi ŵakaŵa ŵakulinganizgika makora. Ŵakagaŵika mu magulu ghatatu mwakuyana na mbumba zawo—Ŵagershon, Ŵakohati, na Ŵamerari—gulu lirilose likaŵa na uteŵeti wakucita. (Maŵazgo 3:14-17, 23-37) Mauteŵeti ghanyake ghakawonekanga nga ngakuzirwa comene kuruska ghanyake, kweni ghose ghakaŵa ghakukhumbikwa. Uteŵeti wa Ŵakohati ukaŵapangiskanga kuti ŵaŵenge pafupi na Likasa la pangano na cihema. Ndipouli, Mulevi waliyose, kwali waŵe mu Kohati panji cara, wakacitanga mauteŵeti ghakuzirwa comene. (Maŵazgo 1:51, 53) Ncacitima kuti ŵanyake ŵakazirwiskanga cara mauteŵeti ghawo. M’malo mwa kujilambika mwakugomezgeka ku muwuso wa Ciuta, ŵakaŵa ŵambura kukhorwa ndipo ŵakamba kujikuzga, kukhumba maudindo, na kucita sanji. Kora wakaŵa yumoza wa iwo.
‘Kasi Mukupenjaso na Usofi Wuwo?’
8. (a) Kasi Kora wakaŵa njani? (b) Ncivici ico cikapangiska Kora kwamba kuwona ŵasofi na maghanoghano gha wuntu?
8 Kora wakaŵa murara wa nyumba ya Levi yayi, nesi murara wa mbumba za Ŵakohati. (Maŵazgo 3:30, 32) Ndipouli, wakaŵa karonga wakucindikika mu Israyeli. Milimo iyo Kora wakacitanga yikwenera kuti yikamupangiskanga kuŵa pafupi na Aron na ŵana ŵake ŵanarumi. (Maŵazgo 4:18, 19) Cifukwa ca kuwona na maso kuwura urunji kwa ŵanarumi aŵa, Kora wakenera kuti wakaŵa na maghanaghano agha: ‘Ŵasofi aŵa mbambura urunji, kweni nkukhumbikwira kujilambika kwa iwo! Sono-sono apa Aron wakapanga mwana wa ng’ombe wa golide. Kujikamira mwana wa ng’ombe yura kukapangiska ŵantu kuti ŵayambe kusopa vikozgo. Sono Aron, mukuru wa Moses, wakuteŵetera nga ni musofi murara! Mwee, nako nkutemwera! Wuli pakuyowoya za ŵana ŵa Aron, Nadab na Abihu? Iwo ŵakacindika cara uteŵeti wawo ico cikapangiska kuti Yehova waŵakome!’ a (Exodus 32:1-5; Leviticus 10:1, 2) Mulimose umo Kora wakaghanaghanira, ncakuwonekerathu kuti wakamba kuwona usofi na maghanoghano gha wuntu. Ici cikapangiska kuti wagarukire Moses na Aron, ndipo paumaliro pake kugarukira Yehova.—1 Samuel 15:23; Yakobe 1:14, 15.
9, 10. Kasi Kora na ŵanyake ŵakamuzenga murandu wuli Moses, kweni ncifukwa wuli ŵakeneranga kumanya makora urwani wakucita nteura?
9 Cifukwa ca kuŵa muntu wa mazaza, cikaŵa cakusuzga cara kwa Kora kuwunganiska pamoza ŵantu awo ŵakaŵa na maghanoghano ghakuyana na ghake. Iye, pamoza na Datan na Abiram, ŵakasanga ŵanarumi 250 awo ŵakakoleranako nayo mu kaghanaghaniro—ŵakaronga wose ŵa wumba. Wose pamoza ŵakaruta kwa Moses na Aron ndipo ŵakati: ‘Wumba wose ngutuŵa, ndipo Yehova wali mukati mwaŵo; ncifukwa uli imwe mukujikwezga mwekha pacanya pa wumba wa Yehova?’—Maŵazgo 16:1-3.
10 Ŵacigaruka aŵa ŵakeneranga kumanya makora urwani wa kususka muwuso wa Moses. Ni kale viŵi yayi apo Aron na Miriyamu ŵakacita mwakuyana waka. Ŵakaŵa na kaghanaghaniro kakuyana na ka Kora! Mwakuyana na Maŵazgo 12:1, 2, iwo ŵakafumba kuti: “Kasi Yehova wakayowoya na Moses pera? Kasi walije kuyowoyaso mwa ise?” Yehova wakacipulika. Wakalangura Moses, Aron, na Miriyamu kuti ŵawungane pa muryango wa cihema cakukumanamo mwakuti warongore uyo ni murongozgi. Ndipo kwambura kubisa Yehova wakati: “Usange yirimo ncimi mukati mwinu Ine Yehova nkujimanyiska ndeka kwa iye mu ciwonesko, na kuyowoya naye mu loto. Muteŵeti wane Moses kuti wali nteura cara; ngwamagomezgeka mu nyumba yane yose.” Pamanyuma pake, Yehova wakatimba Miriyamu na vyoni.—Maŵazgo 12:4-7, 10.
11. Kasi ni mwauli umo Moses wakacitira na nkani yakukhwaskana na Kora?
11 Kora na wose awo ŵakakolerana naye ŵakwenera kuti ŵakamanya za cakucitika ici. Kugarukira kwawo kukaŵavya pakugwenthera. Nangauli vikaŵa nteura, Moses wakayezgayezga kudumbiskana nawo mwacitemwa. Wakaŵaromba kuti ŵaŵe ŵakuwongera mauteŵeti agho ŵakacitanga, wakati: “Kasi mukuti ndi kantu kacoko waka kuti Ciuta wa Ŵaisrayeli walikumupatulani ku wumba wa Israyeli, kumunderezgani pafupi pa iye yeka?” Yayi, kakaŵa “kantu kacoko” cara! Ŵalevi ŵakaŵa kale na mauteŵeti ghanandi comene. Kasi ni viciso vinyake ivyo ŵakakhumbanga? Mazgu ghakurondezgapo gha Moses ghakurongora ivyo vikaŵa mu mtima wawo: “Kasi mukupenjaso na upristi wuwo?” b (Maŵazgo 12:3; 16:9, 10) Kweni kasi ni mwauli umo Yehova wakacitira na kugarukira muwuso wake uku?
Mweruzgi wa Israyeli Wakanjilirapo
12. Kasi kuti Israyeli waŵe pa ubwezi uweme na Ciuta cikathemba pa vici?
12 Peneapo Yehova wakapereka Dango ku Ŵaisrayeli, wakaŵaphalira kuti usange ŵapulikirenge, ŵakatenge ŵaŵenge “mtundu wakupatulika” ndipo ŵazomerenge manozgero gha Yehova, mtundu uwu ukatenge urutilirenge kuŵa wakupatulika. (Exodus 19:5, 6) Sono, cifukwa ca cigaruka ico cikaŵapo, yikaŵa nyengo yakuti Mweruzgi na Muwusi wa Israyeli wanjilirepo! Moses wakaphalira Kora kuti: “Iwe na wumba wako wose muŵe pamaso pa Yehova namacero, iwe na iŵo na Aron, namacero; ndipo yose watore mbali yakusunkizgamo, muŵikemo vyakusunkizga, mwize nazo, yose mbali yake yakusunkizgiramo, mbali zakusunkizgiramo makumi-kumi ghaŵiri pacanya makumi ghankonde, iweso na Aron, uyu mbali yake uyu yake yakusunkizgiramo.”—Maŵazgo 16:16, 17.
13. (a) Ncifukwa wuli kukaŵa kujikuzga kuti ŵacigaruka ŵara ŵapereke sembe za kusunkizga pamaso pa Yehova? (b) Kasi Yehova wakacita nawo wuli ŵacigaruka ŵara?
13 Mwakuyana na Dango la Ciuta, ŵasofi ŵekha ndiwo ŵakeneranga kupereka sembe za kusunkizga. Ghanoghano lakuti Mulevi uyo wakaŵa musofi cara wapereke sembe za kusunkizga pamaso pa Yehova mphanyi langupangiska ŵacigaruka ŵara kuzizwapo kantu. (Exodus 30:7; Maŵazgo 4:16) Kweni ndimo vikaŵira cara na Kora na wumba wake! Zuŵa lakurondezgapo “wakawunjika wumba wose kwimikana na [Moses na Aron] pa muryango wa cihema cakukumanamo.” Malemba ghakutiphalira kuti: “Yehova wakayowoya na Moses na Aron, kuti, ‘Jipatuleni, mufumemo mukati mwa wumba uwu, mwakuti ndiŵamare petu mu kanyengo.’” Kweni Moses na Aron ŵakaŵeyelera kuti ŵantu ŵaleke kukomeka. Yehova wakapulikira maŵeyelero ghawo. Kweni kuyowoya za Kora na wumba wake, “Moto wakufumira kwa Yehova ukaŵamyanga petu ŵanarumi ŵara makumi-kumi ghaŵiri pacanya makumi ghankonde, aŵo ŵakaperekanga vyakusunkizga.”—Maŵazgo 16:19-22, 35. c
14. Ncifukwa wuli Yehova wakacitapo kantu kwimikana na wumba wa Israyeli?
14 Cakuzizwiska ncakuti, Ŵaisrayeli awo ŵakawona umo Yehova wakacitira na ŵacigaruka ŵakatorapo sambiro cara. “Namacero wumba wose wa Ŵaisrayeli ukaŵasinginikira kwimikana na Moses na Aron, kuti, ‘Mwakoma ŵantu ŵa Yehova.’” Ŵaisrayeli ŵakaŵa ku cigaŵa ca ŵaciŵembu! Paumaliro pake, kuzizipizga kwa Yehova kukafika pacigoti. Pakaŵavya muntu waliyose—nanga ni Moses na Aron—uyo wakatenge waromberenge ŵantu pa nyengo iyi. Yehova wakatimba ŵantu ŵambura kupulikira na ntenda ndipo ‘aŵo ŵakafwa . . . ŵakaŵa vikwi kumi na vinayi pacanya makumi-kumi ghankonde na ghaŵiri, kwambura kusazgako ŵarara awo ŵakafwa cifukwa ca mrandu wa Kora.’—Maŵazgo 16:41-49.
15. (a) Ncifukwa wuli Ŵaisrayeli ŵakeneranga kuzomerezga na mtima wose urongozgi wa Moses na Aron? (b) Kasi cakucitika ici camusambizgani vici pakuyowoya za Yehova?
15 Cikaŵa cintu cambura kwenelera comene kuti ŵantu ŵara ŵataye umoyo wawo. Ŵakatenge wafwenge yayi ŵaghanaghanenge mwamahara. Ŵakeneranga kujifumba mafumbo gha nga ni agha: ‘Mbanjani awo ŵakaruta kukawonekera pamaso pa Faro kuŵika umoyo wawo pangozi? Mbanjani awo ŵakakhumba kuti Ŵaisrayeli waŵe ŵanangwa? Ni njani uyo wakacemeka kukwera lupiri lwa Horeb kuti wakayowoye na mungelo wa Ciuta maso na maso? Mwambura kukayika lumbiri lwa Moses na Aron lukapereka ukaboni wakuti ŵakaŵa ŵakugomezgeka kwa Yehova ndiposo kuti ŵakatemwanga ŵantu. (Exodus 10:28; 19:24; 24:12-15) Yehova wakakondwa yayi kuti wakome ŵacigaruka ŵara. Kweni, wakati wawona kuti ŵantu ŵarutirirenge kugarukira, wakacitapo kantu. (Ezekiel 33:11) Vyose ivi ni vyakuzirwa comene kwa ise lero. Cifukwa wuli?
Kumanya Awo Ciuta Wakugwiriskira Ncito Lero
16. (a) Mbukaboni uli uwo ukeneranga kukhorweska Ŵayuda ŵamu virimika vya mu handiredi lakudanga kuti Yesu wakaŵa mwimiliri wa Yehova? (b) Kasi Yehova wakaŵika usofi wuli m’malo mwa usofi wa Cilevi ndipo cifukwa uli?
16 Lero, pali “mtundu” wupya uwo Yehova ndiye Mweruzgi, Muwusi, na Themba lake. (Mateyu 21:43) “Mtundu” uwu ukababika mu virimika vya mu handiredi lakudanga. Panyengo iyo, tempele lakutowa la mu Yerusalemu likanjira mu malo gha cihema cakusoperamo ca mu nyengo ya Moses. (Luka 1:5, 8, 9) Ndipouli, mu cirimika ca 29 C.E., tempele linyake, lauzimu, likayamba kugwira ncito, la kuŵa na Yesu Kristu nga ni Musofi Mukuru. (Ŵahebere 9:9, 11) Nkani yakukhwaskana na muwuso wa Ciuta yikawukaso. Kasi ni njani uyo Yehova wagwiriskirenge ncito kuti warongozge “mtundu” upya uwu? Yesu iye mwene wakarongora pakweru kuti ngwakugomezgeka kwa Ciuta. Wakatemwa ŵantu. Wakacitaso mintondwe yinandi. Kweni, mwakuyana na ŵasekuru ŵawo ŵanonono mtima, Ŵalevi ŵanandi ŵakamukana Yesu. (Mateyu 26:63-68; Milimo 4:5, 6, 18; 5:17) Paumaliro pake, m’malo mwa usofi wa Cilevi Yehova wakaŵika usofi wakupambana comene—usofi wa ufumu. Usofi wa ufumu uwu ucali kugwira ncito mupaka lero.
17. (a) Kasi ni gulu uli ilo likupanga usofi wa ufumu lero? (b) Ni mwauli umo Yehova wakugwiriskira ncito usofi wa ufumu?
17 Kasi mbanjani awo ŵakupanga usofi wa ufumu uwu lero? Mpostole Petros wakuzgora fumbo ili mu karata yake yakwamba. Kwa Ŵakristu ŵakuphakazgika Petros wakalemba kuti: “Imwe muli fuko lakusoreka, usofi wa ufumu, mtundu utuŵa, ŵantu aŵo mba Ciuta ŵake na ŵake, mwakuti muthuwuskire mazirwiro gha mweneuyo wakamucemani mu cisi kwiza mu kungweruka kwake kwakuzukumiska.” (1 Petros 2:9) Na mazgu agha, ncakuwonekerathu kuti ŵarondezgi ŵakuphakazgika ŵa Yesu ndiwo ŵakupanga “usofi wa ufumu” awo Petros wakaŵacemaso kuti “mtundu utuŵa.” Iwo ndiwo Yehova wakuŵagwiriskira ncito kupereka urongozgi wauzimu ku ŵantu ŵake.—Mateyu 24:45-47.
18. Kasi nkukolerana uli uko kulipo pakati pa ŵarara ŵakwimikika na usofi wa ufumu?
18 Awo ŵakwimira usofi wa ufumu ni ŵarara wakwimikika, ŵeneawo ŵakuteŵetera mu mipingo ya ŵantu ŵa Yehova pa caru cose capasi. Ŵanarumi aŵa tikwenera kuŵacindika na kuŵawovwira na mtima wose, kwali ŵaŵe ŵakuphakazgika panji cara. Cifukwa uli? Cifukwa Yehova ndiyo wimika ŵarara aŵa na mzimu utuŵa. (Ŵahebere 13:7, 17) Kasi ici cingacitika uli?
19. Kasi ŵarara ŵakwimikika na mzimu utuŵa mu ntowa wuli?
19 Ŵarara ŵakufiska viyeneresko ivyo viri mu Mazgu gha Ciuta, agho ghakalembeka na covwiro ca mzimu utuŵa. (1 Timote 3:1-7; Tito 1:5-9) Mwanteura, tingayowoya kuti iwo ŵakwimikika na mzimu utuŵa. (Milimo 20:28) Ŵarara ŵakwenera kughamanya makora Mazgu gha Ciuta. Mwakuyana na Mweruzgi Murara uyo wakaŵayimika, ŵarara nawoso ŵakwenera kutinka kurumba cisko pa kweruzga nanga pangaŵa pa tuntu tucoko uli.—Duteronome 10:17, 18.
20. Pakuyowoya za ŵarara ŵamwampu, ncivici ico mukuwongera comene?
20 M’malo mwakususka muwuso wawo, tikuŵawonga na mtima wose ŵarara ŵithu ŵamwampu! Lumbiri lwawo lwa uteŵeti wakugomezgeka, uwo ŵanyake ŵacita kwa virimika vinandi, lukupangiska kuti tiŵagomezge. Ŵakunozgekera na kucitiska maungano gha mpingo mwakugomezgeka, ŵakupharazgira nase lumoza ‘makani ghaweme gha Ufumu,’ na kupereka urongozgi wa mu Malemba para tikuwukhumba. (Mateyu 24:14; Ŵahebere 10:23, 25; 1 Petros 5:2) Ŵakutiwona para tarwara na kutipembuzga para tiri mu suzgo. Ŵakovwira milimo ya Ufumu mwakugomezgeka ndiposo mwambura uryezi. Mzimu wa Yehova uli nawo, wakuŵatemwa.—Ŵagalatiya 5:22, 23.
21. Ŵarara ŵakwenera kumanya za vici, ndipo cifukwa uli?
21 Mbunenesko nadi kuti ŵarara mbarunji cara. Cifukwa cakuti ŵakumanya kutondeka kwawo, iwo ŵakukhumba yayi kucita nga ni mafumu pa mskambo, “ciharo ca Ciuta.” M’malo mwake, ŵakujiwona nga ni ‘ŵancito ŵanyawo kuti ŵakondweske ŵabale ŵawo.’ (1 Petros 5:3; 2 Ŵakorinte 1:24, NW) Ŵarara ŵakujicepeska na ŵamwampu ŵakutemwa Yehova, ndipo ŵakumanya kuti para ŵakurondezga iye, mbwenu ŵacitenge viweme comene mu mpingo. Cifukwa ca ici, iwo nyengo zose ŵakuyezgayezga kurondezga Ciuta mwa kukuzga mikhaliro ya nga ni citemwa, lusungu, na kuzizipizga.
22. Kasi ni mwauli umo kuweleramo nkani ya Kora kwakhozgera cipulikano cinu mu gulu la Yehova?
22 Mwee, naco ni cimwemwe ico tiri naco cifukwa ca kuŵa na Yehova nga ni Muwusi withu wambura kuwoneka, Yesu Kristu nga ni Musofi Mukuru, Ŵakuphakazgika nga ni ŵasambizgi ŵithu, na ŵarara ŵakugomezgeka ŵa Cikristu nga ni ŵarongozgi ŵithu! Nangauli palije gulu la kurongozgeka na ŵantu ilo lingaŵa lambura ubudi wuliwose, kweni tiri ŵakukondwa kuteŵetera Ciuta pamoza na ŵasopi ŵanyithu ŵakugomezgeka, awo ŵakujilambika na mtima wose ku muwuso wa Ciuta!
[Mazgu ghamusi]
a Ŵana ŵanyake ŵaŵiri ŵa Aron, Eliezar na Itamar, ŵakaŵa na ciyerezgero ciweme pakucita uteŵeti wawo kwa Yehova.—Leviticus 10:6.
b Datan na Abiram, awo ŵakacitira lumoza ciŵembu na Kora, ŵakaŵa ŵa fuko la Ruben. Cifukwa ca ici, ncakuwonekerathu kuti ŵakadokeranga usofi cara. Iwo ŵakakwiya cifukwa ŵakadokeranga urongozgi wa Moses ndiposo cifukwa mupaka pa nyengo iyo, cilindizga cawo ca kunjira mu Caru ca Layizgano cikaŵa cicali cindafiskike.—Maŵazgo 16:12-14.
c Mu nyengo zakale pambere Dango lindaŵikike, mutu wa mbumba waliyose wakimiranga muwoli na ŵana ŵake pamaso pa Ciuta, nanga kungaŵa kuŵaperekera sembe. (Genesis 8:20; 46:1; Job 1:5) Ndipouli, Dango likati laŵikika, Yehova wakasanka ŵana ŵanarumi ŵa mbumba ya Aron kuŵa ŵasofi ŵeneawo ŵakeneranga kupereka sembe. Ncakuwonekerathu kuti ŵanarumi ŵakugaruka 250 ŵara ŵakakhumba yayi kukolerana na masintiro agha gha kendeskero ka vintu.
Kasi Mwasambirapo Vici?
• Ni manozgero wuli agho Yehova wakapanga kuti wapwererere Ŵaisrayeli?
• Ncifukwa wuli kugarukira Moses na Aron uko Kora wakacita kukaŵavya pakugwenthera?
• Kasi tikutorapo sambiro wuli pa umo Yehova wakacitira na ŵacigaruka?
• Ni mwauli umo tingarongolera kuti tikuwongera manozgero gha Yehova lero?
[Mafumbo]
[Cithuzithuzi pa peji 23]
Kasi mukuwona mulimo wuliwose uwo mwapika mu uteŵeti wa Yehova kuŵa wakuzirwa?
[Cithuzithuzi pa peji 24]
“Ncifukwa uli imwe mukujikwezga mweka pacanya pa wumba wa Yehova”
[Cithuzithuzi pa peji 26]
Ŵarara ŵakwimikika ŵakwimira usofi wa ufumu