Rondezgani Musambizgi Mukuru

“Rutaninge mukasambizge mitundu yose, . . . muŵasambizge kukoreska vyose ivyo ndamulangulirani.”—MATEYU 28:19, 20.

1, 2. (a) Ni mwauli umo tose tiliri ŵasambizgi? (b) Kuyana na usambizgi, ni mulimo wuli wapacanya uwo Ŵakristu ŵaunenesko ŵali nawo?

 KASI ndimwe musambizgi? Tose tiri ŵasambizgi mu ntowa zakupambana-pambana. Palipose apo mukurongozga muntu uyo wasoŵa ntowa, kurongora munyinu umo wangagwirira ncito, panji kuphalira mwana umo wangakakira nthambo za skapato, ndikuti mukusambizga. Kovwira ŵanyithu mu ntowa izi kukupereka cimwemwe nadi, ni ntena yayi?

² Kuyana na usambizgi, Ŵakristu ŵaunenesko ŵali na mulimo wapacanya nkanira. Tili kupika mulimo wa ‘kupanga ŵasambiri . . . na kuŵasambizga.’ (Mateyu 28:19, 20) Mu mpingo namo tikuŵaso na nyengo ya kusambizga. Ŵanarumi ŵakukhwima ŵakuŵikika kuŵa “ŵaliska na ŵasambizgi,” mwakuti ŵazenge mpingo. (Ŵaefeso 4:11-13) Mu milimo yawo ya Cikristu, ŵakazi-ŵakuru ŵakwenera kuŵa “ŵasambizgi ŵa ivyo nviweme” ku ŵasungwana. (Tito 2:3-5) Ise tose tikuphalirika kuti ticiskenge ŵasopi ŵanyithu, ndipo tingacita ici mwa kugwiriskira ncito Baibolo kukhozgera ŵanyithu. (1 Ŵatesalonika 5:11) Mwee, nawo ni mwaŵi kuŵa musambizgi wa Mazgu gha Ciuta na kupokera vitumbiko vyauzimu ivyo nvyambura kumara!

3. Pakuŵa ŵasambizgi, kasi tingaŵa wuli na luso lwakuthwa?

³ Pakuŵa ŵasambizgi, kasi tingaŵa wuli pera na luso lwakuthwa? Cikuru comene ndico kurondezga Yesu, Musambizgi Mukuru. Munyake wangayowoya kuti, ‘Kasi tingarondezga wuli Yesu? Iyo wakaŵa muntu murunji.’ Mbunenesko kuti tingasambizga ndendende nga ndiyo cara. Ndipouli, mwakuyana na nkongono zithu, tingacita umo tingakwaniskira kurondezga umo Yesu wakasambizgiranga. Tiyeni sono tiwone umo tingagwiriskira ncito ntowa zake zinayi—kuyowoya mwaupusu, kugwiriskira ncito mafumbo, kuyowoya mwakukhorweska, na ntharika zakwenelera.

Kuyowoya Mwaupusu

4, 5. (a) Cifukwa wuli kuyowoya mwaupusu ndiko nkhwakukhumbika para tikusambizga unenesko wa Baibolo? (b) Kuti tisambizge mwaupusu, cifukwa wuli ncakuzirwa kupwererera mazgu ghithu usange nganonono panji ngateci?

⁴ Unenesko wa Mazgu gha Ciuta ngunonono yayi. Apo Yesu wakarombanga, wakati: “Nkumuwongani imwe, Ŵadada, . . . kuti mukabisa vyeneivi ku ŵa mahara na ŵakumanya, ndipo mukavivumbulira ŵabonda.” (Mateyu 11:25) Yehova wavumbura khumbo lake kwa awo mba  mitima yakujiyuyura. (1 Ŵakorinte 1:26-28) Pa cifukwa ici, kuyowoya mwaupusu ndiko kukukhumbika para tikusambizga unenesko wa Baibolo.

⁵ Para mukucita sambiro la Baibolo la panyumba panji kuwelerako kwa awo mbakunweka na uthenga withu, kasi mungasambizga wuli mwaupusu? Kasi mukukumbuka ivyo tikasambira za Musambizgi Mukuru? Kuti wawoneseske kuti ŵapulikizgi ŵake ŵakutorapo kantu, ŵeneawo ŵanandi ŵa iwo ŵakaŵa “ŵambura kusambira na ŵalemwa,” Yesu wakayowoyanga mazgu ghapusu. (Milimo 4:13) Kuti tisambizge mwaupusu, ipo cakuzirwa ndico kujisanda usange tikuyowoya mazgu ghanonono panji ghateci. Kuti tikwenera kuyowoya masentensi ghatali-ghatali cara kuti tikhorweske ŵantu na unenesko wa Mazgu gha Ciuta. ‘Kuyowoya mwakujiwoneska’ kwa nga ni uku kungagongoweska awo ŵandasambire comene sukulu. (1 Ŵakorinte 2:1, 2, NW) Ciyerezgero ca Yesu cikurongora kuti mazgu ghapusu na ghakusankika makora ghangaŵa na nkongono pakusambizga unenesko.

6. Kasi tingacita wuli kuti tileke kumugongoweska uyo tikucita nayo sambiro la Baibolo?

⁶ Kuti tisambizge mwaupusu, tikwenera kupwererera kuti tileke kumuphalira vinandi uyo tikusambira nayo Baibolo. Yesu wakaghanaghaniranga ŵasambiri ŵake pakuŵaphalira vintu. (Yohane 16:12) Ise nase tikwenera kumughanaghanira uyo tikucita nayo sambiro. Mwaciyerezgero, para tikucitiska sambiro mu buku la Cimanyisko Ceneico Cikurongozgera ku Umoyo Wamuyirayira, kuti tikwenera kurongosora cintu cilicose yayi. a Ndiposo tikwenera kucimbilira yayi pakucita sambiro, nga kuti kumalizga cipaturo ndico ncakuzirwa. M’malo mwake, nciweme kumanya umo musambiri waliri. Cakuzirwa ndico kovwira uyo tikucita nayo sambiro kuti waŵe musambiri wa Kristu na musopi wa Yehova. Tikwenera kuŵa na nyengo iyo yingaŵa yiweme kuti timovwire wapulikiske ivyo wakusambira. Apo ndipo unenesko umunjirenge na kumuciska kuti wasinte.—Ŵaroma 12:2.

7. Ni masacizgo wuli agho ghangatovwira kuti tisambizge mwaupusu para tikuyowoya nkani mu mpingo?

⁷ Para tikuyowoya nkani mu mpingo, comene-comene usange pali awo ŵiza sono mu mpingo, kasi tingafumiska wuli “mazgu ghapusu”? (1 Ŵakorinte 14:9) Tiyeni tiwone masacizgo ghatatu agho ghangatovwira. Cakwamba, tirongosore mazgu agho ŵantu ŵakuleka kughamanyisiska agho mughazunurenge mu nkani yinu. Tili na mazgu ghapadera nkanira cifukwa cakuti tamanya Mazgu gha Ciuta. Usange tiyowoyenge mazgu gha nga ni “muzga wa magomezgeko na wa vinjeru,” “mberere zinyake,” na “Babulone Mukuru,” tikwenera kurongosora mu masentensi ghapusu na ghakupulikikwa makora. Caciŵiri, tileke kuŵikamo mazgu ghanandi mu nkani. Ŵapulikizgi ŵangaleka kutegherezga para tarongosora mwakujumpizga. Kuti fundo yipulikikwe makora, nciweme kuwuskako mazgu ghanyake ghambura kwenelera. Cacitatu, lekani kuyowoya vinandi pa kanyengo kacoko ako mwapika. Kucita kafukufuku kungatipa fundo zinandi zakukondweska. Kweni nciweme kusoramo mu nkani yinu fundo zikuru-zikuru zicoko waka, zeneizo zingayowoyeka mu nyengo iyo mwapika.

Kugwiriskira Ncito Mafumbo

8, 9. Kasi tingasanka wuli fumbo lakuyana na mweneko-nyumba? Yowoyanipo viyerezgero.

⁸ Kumbukani kuti Yesu wakaŵa muntu waluso pakufumba mafumbo kuti ŵasambiri ŵake ŵayowoye ivyo vikaŵa mu maghanoghano ghawo na kuŵasambizga kuti ŵaghanaghanenge. Kwizira mu mafumbo, Yesu wakacontanga mitima ya ŵasambiri ŵake. (Mateyu 16:13, 15; Yohane 11:26) Mwakuyana na Yesu, kasi ise tingagwiriskira wuli ncito mafumbo?

 ⁹ Para tikupharazga kunyumba na nyumba, tingafumba mafumbo kuti muntu wambe kunweka, kuti tijure ntowa yakuti tidumbe nayo za Ufumu wa Ciuta. Kasi tingasanka wuli fumbo lakuti liyane na mweneko-nyumba? Tiwoneseskenge ivyo vili panyumba. Para tafika pa nyumba, tilaŵiske pa luŵaza. Kasi pa luŵaza pali vidoli, kurongora kuti pali ŵana panyumba? Usange ni ntena, ipo tingafumba kuti, ‘Kasi muli kughanaghanapo umo caru cizamuŵira para ŵana ŵinu ŵakura?’ (Salmo 37:10, 11) Kasi pa cijaro pali maloko, panji pa nyumba apo pali belu la magesi ilo likulira para kwiza ŵankungu? Tingafumba kuti: ‘Kasi mukughanaghana kuti yizamuŵapo nyengo iyo ŵantu, imwe na ine wuwo tizamukhala kwambura kopa kantu pa nyumba na mu msewu?’ (Mika 4:3, 4) Kasi pa nyumba apo pali ndodo za muntu wakulemara? Tingafumba kuti: ‘Kasi yizamuŵapo nyengo iyo muntu waliyose wazamurwaranga yayi?’ (Yesaya 33:24) Masacizgo ghanyake ghanandi tingaghasanga mu buku la Kukambitsirana za m’Malemba. b

10. Kasi tingagwiriskira wuli ncito mafumbo kuti ‘tineghe’ maghanoghano gha musambiri withu, kweni tikwenera kukumbuka vici?

¹⁰ Ni mwauli umo mafumbo ghangaŵira ghakovwira para tikucitiska masambiro gha Baibolo? Nga ni umo Yesu wakacitiranga ise tingamanya yayi mitima ya ŵantu. Ndipouli, kufumba mafumbo mwamahara kungatovwira kuti ‘tineghe’ maghanoghano gha uyo tikusambira nayo. (Zintharika 20:5) Mwaciyerezgero, mutepanji tikucitiska sambiro pa cipaturo cakuti “Cifukwa Ico Kukhala na Umoyo wa Uciuta Kukwiziskira Kukondwa,” mu buku la Cimanyisko. Cipaturo ici cikuyowoya za umo Ciuta wakuwonera mukhaliro wa kugomezgeka, uzaghali, na vinyake. Uyo tikucita nayo sambiro wangazgora makora mafumbo gha mu ndime iyo, kweni kasi wakukolerana navyo ivyo wakusambira? Tingamufumba kuti: ‘Kasi ncakwenelera kwa imwe kuti Yehova wawonenge ntena vintu ivi?’ ‘Kasi mungagwiriskira wuli ncito marango gha kakhaliro gha mu Baibolo agha mu umoyo winu?’ Kweniso, tikumbuke kuti tikwenera kumupa ncindi musambiri withu. Tingafumbanga yayi mafumbo agho ghangakwiyiska panji kuyuyura uyo tikusambira nayo.—Zintharika 12:18.

11. Kasi awo ŵakuyowoya nkani pawumba ŵangagwiriskira wuli ncito mafumbo?

¹¹ Awo ŵakuyowoya nkani pawumba nawoso ŵangagwiriskira ncito mafumbo. Mafumbo agho tikulindizga ŵapulikizgi kuleka kuzgora mwakukwezga, ghangawovwira ŵapulikizgi kughanaghanirapo pa ico cayowoyeka. Yesu kanandi wakafumbanga mafumbo gha mtundu uwu. (Mateyu 11:7-9) Nyengo zinyake, para muyowoyi wayowoya mazgu ghakwamba gha nkani, wangafumba mafumbo kurongora fundo zikuru izo ziyowoyekenge. Wangayowoya kuti: “Mu nkani iyi, tiwonenge mazgoro gha mafumbo agha . . . ” Paumaliro wa nkani, wangafumbaso mafumbo ghara kuti waweleremo fundo zikuru.

12. Yowoyanipo ciyerezgero ca umo ŵarara ŵa mpingo ŵangagwiriskira ncito mafumbo kovwira Mkristu munyawo kuti wasange cisangulusko mu Mazgu gha Ciuta.

¹² Pa ulendo wa kukhozga ŵabali, ŵarara ŵa mpingo ŵangagwiriskira ncito mafumbo kovwira muntu ‘wakudonda mtima’ kuti wasange cisangulusko mu Mazgu gha Yehova. (1 Ŵatesalonika 5:14) Mwaciyerezgero, mbali murara wangamovwira muntu uyo wakujiwona wambura kwenelera mwa kumuŵazgira lemba la Salmo 34:18. Ilo likuti: “Yehova wali pafupi na aŵo mbakupyoka mu mtima, ndipo wakuponoska aŵo mbamzimu wakupeta.” Kuti wawoneseske kuti muntu uyo ngwakupyoka mu mtima wawovwirika na mazgu agha, mbali murara wangafumba kuti: ‘Yehova wali pafupi na ŵanjani? Kasi nyengo zinyake mukujipulika kuti ‘mwapyoka mu mtima’? Nga ni umo Baibolo  likuyowoyera, usange Yehova wali pafupi na ŵantu ŵa nga ni aŵa, kasi ici cikung’anamura kuti wali pafupi na imwe yayi?’ Kuyowoya kwa nga ni uku kwacitemwa kungamukhozga muntu uyo ngwakupyoka mu mtima.—Yesaya 57:15.

Kuyowoya Mwakukhorweska

13, 14. (a) Kasi tingati wuli para tikudumbiskana na muntu uyo wakugomezga cara Ciuta uyo wakuleka kumuwona? (b) Ncifukwa wuli tingalindizga yayi kuti waliyose wakhorwenge na ivyo tikuyowoya?

¹³ Para tili mu uteŵeti, tikwenera kukhorweska mitima ya ŵapulikizgi na mazgu ghakwenelera, na ghakukopa. (Milimo 19:8; 28:23, 24) Kasi ici cikung’anamura kuti tisambire njomba za kayowoyero mwakuti tikhorweske ŵantu na unenesko wa Mazgu gha Ciuta? Yayi. Kuyowoya mwakukhorweska kuti ndimo kuliri yayi. Fundo zakukhorweska izo zayowoyeka mwaupusu ndizo kanandi zikuŵa na vyakufumapo viweme. Awonani ciyerezgero ici.

¹⁴ Kasi tingamuzgora wuli muntu uyo wakuyowoya kuti wakugomezga cara Ciuta uyo wakuleka kumuwona? Tingadumba nayo za vintu ivyo vili kulengeka. Para tikuwona cakulengeka, tikumanya kuti pakwenera kuŵa cintu cinyake cili kucitiska cintu ico kuŵako. Tingayowoya kuti: ‘Usange mwaruta kuthondo, ndipo mwawona nyumba yakuzengeka makora iyo mu vipinda vyake muli mathumba gha ngoma (cakucitika), nkumanya kuti mungazomera kuti muntu munyake (cakucitiska) wali kuzenga nyumba iyo na kuŵikamo mathumba gha ngoma. Mwakuyana waka, para tikuwona vintu ivyo vili kulengeka mu caru na cakurya cinandi ico cilimo, kasi ncakupulikikwa yayi kuti Muntu munyake (mwambiski) wali kuvilenga?’ Baibolo likuyowoya makora pa nkani iyi, likuti: “Nyumba yose yikuzengeka na muntu; kweni uyo wakazenga vyose ndi Ciuta.” (Ŵahebere 3:4) Ndipouli, kwali tingayowoya mwakukhorweska wuli, ni wose yayi ŵangapulikiska. Baibolo likuti ŵantu ŵekha awo ‘mbakutemweseska’ ndiwo ŵangagomezga.—Milimo 13:48, NW; 2 Ŵatesalonika 3:2.

15. Ni mazgu wuli ghakukhorweska agho tingayowoya kuti tiwoneske mikhaliro na ntowa za Yehova, ndipo ni viyerezgero viŵiri vini ivyo vikurongora umo tingacitira?

¹⁵ Para tikusambizga, kwali tili mu uteŵeti wa m’munda panji mu mpingo, tingagwiriskiraso ncito mazgu ghakukhorweska kuti tiwoneske mikhaliro na ntowa za Yehova. Nga ni umo Yesu nyengo zinyake wakayowoyeranga, nase tingadumbiskana nawo ŵanyithu mwakugwiriskira ncito mazgu ghakuti ‘asi comene kwakuruska.’ (Luka 11:13; 12:24) Malinga na mpambano iyo yilipo, kuyowoya kwa nga ni uku kungaruwika bweka yayi. Pakususka cisambizgo cakuti ŵantu ŵakulangika mu moto, tingayowoya kuti: ‘Palije dada wacitemwa uyo wangalanga mwana wake mwa kukolera woko la mwana kuti waphye pa moto. Asi kwakuruska Dada wakucanya uyo ngwacitemwa wakunyanyara na cisambizgo cakuti wakulanga ŵantu?’ (Yeremiya 7:31) Pakusambizga kuti Yehova wakupwererera ŵateŵeti ŵake waliyose payekha, tingayowoya kuti: ‘Usange Yehova wakumanya zina la nyenyezi yiliyose, asi kwakuruska wakupwererera ŵantu awo ŵakumutemwa, ŵeneawo wakaŵagura na ndopa za Mwana wake?’ (Yesaya 40:26; Milimo 20:28) Kudumbiskana kwa nga ni uku kungatovwira kuti tikhorweske mitima ya ŵapulikizgi.

Ntharika Zakwenelera

16. Cifukwa wuli ntharika ni ziweme pakusambizga?

¹⁶ Ntharika zakwenelera ni nthendero izo zikupanga kasambizgiro kithu kuŵa kakunozga para ŵanji ŵakupulika. Cifukwa wuli ntharika nzakuzirwa pakusambizga? Musambizgi munyake wakati: “Kughanaghana kwambura cithuzithuzi mu mutu ncintu cakusuzga comene ku ŵantu.” Ntharika zikupereka cithuzithuzi ciweme mu maghanoghano ghithu, kutovwira kuti tipulikiske makora fundo zipya. Yesu wakaŵa waluso pakuyowoya ntharika. (Marko 4:33, 34) Tiyeni tiwone umo tingagwiriskira ncito ntowa iyi ya kasambizgiro.

17. Ni ntowa zinayi zini izo zingapangiska ntharika kuŵa yakukhorweska?

¹⁷ Ncivici cingapangiska ntharika kuŵa yakukhorweska? Cakwamba, yikwenera kuyana na ŵapulikizgi, yiŵe na vintu ivyo ŵapulikizgi ŵithu ŵangavimanya. Tingakumbuka kuti Yesu wakasankanga ntharika zake kufuma mu vyakucitika vya zuŵa na zuŵa vya ŵapulikizgi ŵake. Caciŵiri, ntharika yikwenera kuyana ndendende na fundo iyo yikuyowoyeka. Usange ntharika yikuyana yayi na fundo yake, mbwenu ŵapulikizgi ŵithu ŵawerengepo waka. Cacitatu, ntharika yikwenera kuŵa na vyakurongosora vinandi-nandi yayi. Kumbukani kuti Yesu wakayowoyanga vyekha ivyo  vikakhumbikanga na kuleka vinyake vyambura kwenelera. Cacinayi, para tikuyowoya ntharika, tikwenera kuwoneseska kuti ng’anamuro lake lapulikikwa. Usange ndimo vingaŵira yayi mbwenu ŵantu ŵatorengepo kantu yayi.

18. Kasi ntharika zakwenelera tingazisanga wuli?

¹⁸ Kasi ntharika zakwenelera tingazisanga wuli? Kuti tikwenera kughanaghana nkani yitali yayi. Ntharika yifupi waka yingaŵa yakwenelera. Yezgani kughanaghana za viyerezgero pa fundo iyo yikudumbika. Mwaciyerezgero, usange tikuyowoya nkani yakuti Ciuta wakugowokera, ndipo tikukhumba kurongora ciyerezgero ca fundo iyo yili pa Milimo 3:19, apo pakuti Yehova ‘wakusisita,’ panji kupuputa zakwananga zithu. Lizgu lekha ili lakuti kusisita likupereka cithuzithuzi, kweni kasi nciyerezgero wuli ico tingayowoya kuti fundo yipulikikwe? dasitara? salu yakusisitira? Tingayowoya kuti: ‘Para Yehova wakutigowokera zakwananga zithu, wakusisita, wakuŵa nga wakutora salu yakusisitira (panji dasitara).’ Muntu wangapulikiska makora fundo mwakugwiriskira ncito ciyerezgero cipusu nga ni ici.

19, 20. (a) Kasi viyerezgero viweme tingavisanga nku? (b) Ni viyerezgero wuli vinyake vyakukhorweska ivyo vyalembeka mu mabuku ghithu? (Wonaniso bokosi)

¹⁹ Kasi viyerezgero vyakwenelera mungavisanga nku? Mungavisanga mu vintu ivyo vyamucitikirani mu umoyo winu panji ivyo vyacitikira Ŵakristu ŵanyinu. Viyerezgero vingafuma mu vintu vinandi, kusazgapo vyakuthuta na vyambura kuthuta, vya panyumba, panji cakucitika cakumanyikwa ico cacitika mwasono-sono mu cikaya. Ico cingatovwira kusanga viyerezgero viweme ndico kuŵa maso, ‘kutataŵiska’ ivyo vikucitika ku malo agho tikukhala. (Milimo 17:22, 23) Kuyana na kuyowoya pa wumba, buku linyake likuti: “Muyowoyi uyo wakusanda umoyo wa ŵantu, wakudumbiskana na ŵantu ŵa mitundu yose, wakudodoliska vintu na kufumba mafumbo mupaka wamanyisiske, muntu wa nga ni uyu wakuŵa na viyerezgero vinandi comene vyeneivyo vikumovwira para wakuyowoya nkani.”

²⁰ Paliso ntowa yinyake iyo mungasangira viyerezgero vyakwenelera. Ntowa iyi ndiyo kuwona mu Gongwe la Mulinda, Galamukani!, na mabuku ghanyake ghakupharazgika na Ŵakaboni ŵa Yehova. Mungasambira vinandi mwa kuwona umo mabuku agha ghakugwiriskira ncito viyerezgero. c Awonani ciyerezgero ico cili mu buku la Cimanyisko cipaturo 17 ndime 11. Ciyerezgero ici cikuyaniska mikhaliro yakupambana-pambana mu mpingo na galimoto zakupambana-pambana izo zikwenda pamoza na galimoto yinu mu msewu. Ncivici cikupangiska ciyerezgero ici kuŵa cakwenelera? Wonani kuti cili na vyakucitika vyakumanyikwa, cikuyana na fundo, nakutiso ng’anamuro lake likupulikikwa. Tingayowoya viyerezgero ivyo vili mu mabuku para tikusambizga, panji kusintako pacoko kuti viyane na uyo tikusambira nayo Baibolo, panji para tikudumba nkani.

21. Kasi pali njombe wuli cifukwa ca kuŵa musambizgi waluso wa Mazgu gha Ciuta?

²¹ Kuŵa musambizgi waluso kuli na njombe zinandi. Para tikusambizga, tikupereka vintu viweme ku ŵanyithu; tikuŵawovwira na cuma cithu. Kupereka uku kukwiziska cimwemwe, cifukwa Baibolo likuti: ‘Muli cimwemwe cikuru mu kupereka kuruska kupokera.’ (Milimo 20:35, NW) Ŵasambizgi ŵa Mazgu gha Ciuta, ŵakuŵa na cimwemwe cifukwa ŵakumanya kuti ŵakupereka cintu ca mtengo wapatali nkanira—unenesko wa Yehova. Kweniso tingaŵa na cimwemwe pakumanya kuti tikurondezga Musambizgi Mukuru, Yesu Kristu.

[Mazgu ghamusi]

Kasi Mukukumbuka?

• Kasi tingasambizga wuli mwaupusu para tikucita sambiro la Baibolo? para tikuyowoya nkani mu mpingo?

• Kasi tingagwiriskira wuli ncito mafumbo para tikupharazga kunyumba na nyumba?

• Kasi tingayowoya wuli mwakukhorweska kuti tiwoneske mikhaliro na ntowa za Yehova?

• Ni nku uko tingasanga viyerezgero vyakwenelera?

[Mafumbo]

 [Bokosi/Cithuzithuzi pa peji 31]

Kasi Mukukumbuka Viyerezgero Ivi?

Pasi apa pali viyerezgero vicoko waka. Mwalekeraci kuwona mu mabuku ndipo muwone umo ciyerezgero cikovwilira kupulikiska makora fundo iyo yikuyowoyeka?

• Nga ni awo ŵakurizga ng’oma ŵakukolerana na awo ŵakwimba, panji awo ŵakukhizga makatoni mu galimoto ya lore. Nteura pera, nthengwa kuti yiŵe yakukondweska, kukuthemba comene pa kusanka munyithu wakwenelera.—Gongwe la Mulinda, June 1, 2001 peji 12.

• Kuyowoya ivyo vili ku mtima wako kukuyana na kuponya bola. Bola ungaliponya makora-makora panji ungaliponya na nkongono zose kwakuti lingamupweteka munyako.—Galamukani!, January 8, 2001, peji 10.

• Kusambira kucitirana citemwa kukuyana na kusambira ciyowoyero cipya.—Nsanja ya Olonda, February 15, 1999, mapeji 18, 22-3.

• Kugomezga mizimu ni nyambo ya viŵanda, kukuyana waka na umo ŵaciŵinda ŵakugwiriskira ncito nyambo pakukora nyama. Kugomezga mizimu kukukopa ŵantu.—Cimanyisko Ceneico Cikurongozgera ku Umoyo Wamuyirayira, peji 111.

• Umo Yesu wali kuwombolera mpapu ya Adamu, kungayerezgereka na muntu musambazi uyo walipira ngongoli iyo kampani yikaŵa nayo (iyo yikacitika na bwana uyo wakarya ndarama za kampani) na kujuraso kampani kuti yambe kwenda, mwakuti ŵancito ŵawovwirike.—Nsanja ya Olonda, February 15, 1991, mapeji 13.

• Awo ŵakutemwa vyakupanga-panga ŵakufwilirapo kuti ŵanozge apo pabudika, Yehova wakugowokera kwananga kwithu, wakuwona mikhaliro yiweme mwa ise, ndipo nyengo yakuntazi wazamutiwezgera ku urunji uwo Adamu wakataya.—Nsanja ya Olonda, February 15, 1990, peji 22.

[Vithuzithuzi pa peji 28]

Ŵakristu ŵaunenesko mbasambizgi ŵa Mazgu gha Ciuta

[Cithuzithuzi pa peji 29]

Ŵarara ŵa mpingo ŵangagwiriskira ncito mafumbo kuti ŵawovwire Mkristu munyawo kusanga cisangulusko mu Mazgu gha Ciuta