Ŵawukirano Awo Ŵakutemwa Unenesko
Ŵawukirano Awo Ŵakutemwa Unenesko
“KASI pungwe watozgenge uli mendero ghake?” ndimo wakafumbira wamasalmo Wacihebere virimika vikwi vinandi ivyo vyarutapo. (Salmo 119:9) Ili licali fumbo lakuzirwa comene mupaka mwahuno cifukwa ŵawukirano ŵakukumana na masuzgo ghanandi mu caru. Uzaghali wacitiska ŵanandi kutora matenda gha AIDS, pafupifupi hafu ya ŵantu aŵa mbawukirano ŵa virimika vya pakati pa 15 na 24. Kugwiriskira ncito uheni munkwara nako kukupangiska masuzgo ghanandi na kudumulizga umoyo wa ŵawukirano. Sumu zakukhuŵirizga maghanaghano na kacitiro kaheni, mafilimu gha zawe na maunyankasi, wayilesi ya sinema, na mavidiyo; na vithuzithuzi vyankuli pa kompyuta vili na vyakufumapo vya ngozi pa ŵawukirano. Nteura, fumbo la wamasalmo ndilo ŵapapi na ŵawukirano ŵanandi ŵali nalo mu maghanoghano lero.
Wamasalmo wakapereka zgoro ili ku fumbo lake: “Wakwenera kughapwerera kwakuyana na mazgu ghinu.” Mwambura kukayika, Mazgu gha Ciuta, Baibolo, liri na urongozgi uweme kwa ŵawukirano ndipo mwa kuwurondezga, ŵawukirano ŵanandi ŵasanga candulo mu umoyo wawo. (Salmo 119:105) Tiyeni tiwone viyerezgero vinyake vya ŵawukirano awo ŵakutemwa Ciuta ndiposo kukhumbisiska kukhalirira ŵakukhora mwauzimu mu caru ici ca kutemwa vyakusanguruska na cuma.
Ŵakuwongera Urongozgi wa Ŵapapi Ŵawo
Jacob Emmanuel wakaŵa mupayiniya wakukhazikika kwa virimika vinandiko pambere wandayambe kuteŵetera pa muntavi wa Ŵakaboni ŵa Yehova ku Mexico. Wakukumbukira makora ndiposo wali na viwongo cifukwa ca umo kutemwa kwake kuteŵetera Ciuta kukayambira: “Ŵapapi ŵane ndiwo ŵakanikhozga comene, nangauli ŵabali ŵanji ŵauzimu awo tikatemwananga, nawo ŵakaŵa ŵakovwira. Ŵakacitiska kuti nitemwe comene mulimo wa kupharazga. Pacoko-na-pacoko ŵakanirongozgera mu ntowa yiweme; Nindajipulikepo kuti ŵakanicicizganga.”
David, uyo wacita uteŵeti wanyengo zose kwa nyengo yitali, wakukumbukira umo kukamukhuŵirizgira kuwona kuti ŵapapi ŵake ŵakayamba kuteŵetera nga mbapayiniya ŵapadera apo iye na munung’una wake ŵakaŵa ŵanici. Ŵawiske ŵakati ŵafwa, ŵanyina ŵakarutilira kucita upayiniya wapadera. Ŵakarutilira kupwererera iye na munung’una wake padera pa kupharazga makani ghaweme. Iye wakuti: “Iwo ŵakacita kunituma cara kuti niŵe mupayiniya, kweni tikatemwa comene upayiniya nga ni mbumba, mwakuti citemwa ici cikanikhozga kuti nicite mwakuyana waka.” Pakuyowoya za kukhumbikwa kwa urongozgi uweme na pwererero lakufuma ku ŵapapi, David wakuti: “Mise yiliyose, ŵamama ŵakatiŵazgiranga nkani za mu buku la Kufuma ku Paradiso Wakutayika Kuya ku Paradiso Wakusangikaso. a Ntowa iyo iwo ŵakarongosoreranga nkani izi yikatiwovwira kutemwa kurya cakurya cauzimu.”
Ŵakutemwa Maungano
Ŵawukirano ŵanji ŵakuciwona kuŵa cakusuzga kutemwa maungano. Ŵakuruta ku maungano cifukwa ca
ŵapapi ŵawo. Ndipouli, usange ŵarutilira kuruta ku maungano, mukuruta kwa nyengo ŵangafika pa kutemwa maungano. Wonani Alfredo, uyo wakayamba uteŵeti wanyengo zose apo wakaŵa na virimika 11. Iye wakuzomerezga kuti apo wakaŵa na virimika vinkondi, wakayezganga kukhala ku maungano cifukwa cakuti wakasiwanga, kweni ŵapapi ŵake ŵakamuzomerezganga yayi kugona nyengo ya maungano. Wakukumbukira kuti: “Apo nkakuranga, pacoko-na-pacoko nkayamba kutemwa maungano, comene-comene apo nkayamba kuŵazga na kulemba cifukwa nkayamba kuzgora mu mazgu ghane na ghane.”Cintia, msungwana wa virimika 17 uyo ni mupayiniya wakukhazikika, wakuyowoya umo mendezgano ghaweme ghakawovwirira kuti wakuzge kutemwa kuteŵetera Ciuta. Wakuti: “Wene-na-wene na ŵabali ndiposo kufika pa maungano mwakukhazikika kukaniruwiska ŵabwezi ŵane ŵa kuwaro na vyakucitika ivyo ŵawukirano ŵakutemwa, nga ni kuruta ku dansi. Kupulikizga mazgoro na vyakukumana navyo pa maungano kukababa khumbo lakuti nimupe Yehova vyose ivyo nili navyo ndipo nkuwona kuti cintu ciweme comene ico nili naco ni uwukirano. Nteura nkaghanaghana kuwugwiriskira ncito mu uteŵeti wake.”
Ndipouli, iye wakurutilizga: “Pakaŵa nyengo, pambere nindabapatizike, peneapo cikaŵanga cipusu kukhala ku maungano mwa kupusikizgira homuweki panji vyakucitika vinyake ku sukulu. Nkakhalanga ku maungano ghanandi, ndipo ici cikakhwaska umoyo wane wauzimu. Nkayamba kwendezgana na munyamata uyo wakasambiranga Baibolo cara. Nkuwonga Yehova kuti nkanyolorera luŵiro suzgo iyi.”
Cakusanka ca Mwaŵene
Pablo ni muwukirano uyo wakucita uteŵeti wanyengo zose. Usange wafumbika ivyo wakuwona kuti vikamovwira kuyamba kutemwa Mazgu ghaunenesko gha Ciuta, iye wakuti: “Nkughanaghana kuti pali vintu viŵiri: sambiro la ndamwene lakukhazikika na mwampu pa ncito ya kupharazga. Nili wakukondwa kuti ŵapapi ŵane ŵakanisambizga unenesko wa Yehova, ndipo nkuwona kuti ncintu ciweme kuruska cilicose ico mpanyi ŵakanipa. Ndipouli, pa ine ndekha nkweneraso kukhorwa na cifukwa ico nkutemwera Yehova. Ndico cifukwa nkhwakukhumbikwa kumanya ‘usani na kuzontoka’ kwa unenesko wa Baibolo. Kwekha mwakucita nteura ndipo tingapulika njara ya Mazgu gha Yehova, agho ghakupemba ‘moto wakunyeka’ mukati mwithu kuti tiphalireko ŵanji. Mwampu uwu pa ncito ya kupharazga wukuzgenge kuwongera kwithu unenesko.”—Ŵaefeso 3:18; Yeremiya 20:9.
Jacob Emmanuel uyo wazunurika pakwambilira, nayo wakukumbukira kukhumbikwa kwa kujisankira wamwene kuteŵetera Yehova. Iye wakuti ŵapapi ŵake ŵakamucicizganga yayi kuti wabapatizike. “Nkugomezga kuti cikaŵa ciweme nkanira kucita nteura cifukwa nkuwona uweme wake. Mwaciyerezgero, ŵawukirano ŵanji awo tikatemwananga ŵakasanka kuti ŵabapatizikire pamoza. Nangauli ici cikaŵa ciweme, kweni nkuwona kuti ŵanji ŵakacita nteura cifukwa waka ca kutoreka mtima ndipo nyengo yicoko panyuma
pake mwampu wawo pa vintu vya Ufumu ukazilara. Kweni ine, ŵapapi ŵane ŵakacita kunicicizga cara kujipatulira kwa Yehova. Kukaŵa kusanka kwane.”Covwiro ca Mpingo
Ŵawukirano ŵanji ŵasambira unenesko wa Mazgu gha Ciuta pa iwo ŵekha kwambura kuwovwirika na ŵapapi ŵawo. Usange vyaŵa nteura ncipusu yayi kusambira kucita uweme na kurutilira kuwucita.
Noé wakukumbukira umo wakasangira candulo na unenesko. Wakaŵa na suzgo la ukari ndiposo zawe kufuma pa wanici wake. Apo wakaŵa na virimika 14 wakayamba kusambira Baibolo, wakayamba kunyolorera suzgo ili ndipo ŵapapi ŵake ŵakakondwa na masintiro agha nangauli iwo ŵakaŵa ŵakunweka kusambira Baibolo cara nyengo iyo. Noé wakati waruta pantazi mwauzimu, wakakhumba kusazgirako uteŵeti wake kwa Ciuta mu umoyo wake. Sono wali mu uteŵeti wanyengo zose.
Mwakuyana waka, Alejandro wakayamba kutemwa unenesko apo wakaŵa mucoko, nangauli ŵapapi ŵake ŵakaŵa ŵakunweka cara na unenesko. Pakurongora kutemwa kwake unenesko, iye wakuti: “Nkakulira mu mbumba ya Katolika. Kweni nkarutilira kukayikira kuti Ciuta waliko, cifukwa mpingo wukatondekanga kuzgora mafumbo ghane agho ghakanisuzga kufumira pa wanici. Gulu la Yehova likaniwovwira kusanga cimanyisko ca Ciuta. Ilo lathaska umoyo wane, cifukwa nilekenge kusambira Baibolo mpanyi nkanjira mu mikhaliro yiheni, uroŵevu, panji minkwara yakuroŵezga. Mutepanyake mpanyi nkanjira mu gulu linyake lakuwukira, vyakufumapo mpanyi nvyacitima.”
Nimwauli umo muwukirano wangarutilira kupenja na kuskeperera ku unenesko kwambura covwiro ca ŵapapi? Ncakuwonekerathu kuti ŵarara na ŵanji mu mpingo ŵakucita cigaŵa cakuzirwa comene. Noé wakukumbukira kuti: “Nindacitepo phukwa, pakuti nyengo zose Yehova wakuŵa pafupi nane. Ndiposo ŵabali na ŵadumbu ŵacitemwa ŵaniwovwira comene, iwo ŵazgoka ŵadada, ŵamama na ŵabali ŵane ŵauzimu.” Iye sono wakuteŵetera pa Beteli, ndipo wakugwiriskira ncito nyengo yake mu uteŵeti wa Ciuta. Mwakuyana waka, Alejandro wakurongosora kuti: “Cintu cinyake ico niŵenge wakuwongera nyengo zose ni vitumbiko vya kuŵa mu mpingo uwo wupu wake wa ŵarara wukarongora citemwa na kunweka mwa ine. Nkuwongera mwapadera cifukwa apo nkayamba kusambira Baibolo pa msinku wa virimika 16, nane nkakhwaskikanga na kuleka kukhazikika maghanoghano uko nkhwakuzara pakati pa ŵawukirano. Mbumba za mu mpingo zikanitaya cara. Nyengo zose yumoza wa iwo wakanipokereranga mwacitemwa na kugaŵana nane nyumba na cakurya pera cara, kweniso mtima wake wose.” Alenjandro sono wacita uteŵeti wanyengo zose kwa virimika vyakujumpa 13.
Ŵanyake ŵakughanaghana kuti kusopa nkhwa ŵarara pera. Ndipouli, ŵawukirano ŵanandi ŵasambira unenesko wa Baibolo pa wanici ndipo ŵakutemwa Yehova na kurutilira kugomezgeka kwa iye. Ŵawukirano aŵa ŵacita ivyo wakayowoya Davide pa Salmo 110:3: “Ŵantu ŵako tiŵajiperekenge na mtima [wose] mu zuŵa ilo ukurongozga nkondo yako pa mapiri ghatuŵa ghakupatulika. Mu utozi wa cibabiro ca matandakuca upungwe wako utiuŵe nga ndi jumi.”
Ncipusu cara kuti ŵawukirano ŵasambire na kuskeperera ku unenesko. Mwee, nako nkunozga kuwona kuti ŵanandi ŵakukhalirira mu gulu la Yehova, kusangika pa maungano nyengo zose na kusambira Baibolo mwamwampu. Mwakucita nteura ŵatemwa comene Mazgu gha Ciuta na uteŵeti wake!—Salmo 119:15, 16.
[Mazgu ghamusi]
a Lakupharazgika na Ŵakaboni ŵa Yehova mu 1958; sono likusindikizgika yayi.