Cipembuzgo mu Nyengo za Masuzgo

MAKANI mazuŵa ghano ghakuŵapo gha kupembuzga cara na pacoko pose. Muntu munyake wakalemba kuti: “Vyakucitika mazuŵa ghano nvyakuthiska lusoko, mwakuti kanandi cikuŵa cakusuzga kusanka kupulikizga panji kuleka kupulikizga nkani za 6 koloko.” Caru ncakuzura na nkondo, ucigeŵenga, kusuzgika, kuswa-marango na matenda—masuzgo gheneagho nase ghangatikhwaska, mutepanji ghakutikhwaska kale.

Baibolo likayowoyerathu za kaŵiro aka ka vintu. Pakukonkoska za nyengo iyo tilimo, Yesu wakayowoya kuti kuzamuŵa nkondo, videro, kupereŵera kwa cakurya, na vindindindi. (Luka 21:10, 11) Mwakuyana waka, mpostole Paulos wakalemba za “nyengo zinonono,” apo ŵantu ŵaŵenge ŵakari, ŵakutemwa ndarama na ŵambura kutemwa uweme. Nyengo iyi wakayithya “mazuŵa gha ku umariro.”—2 Timote 3:1-5.

Ndico cifukwa cake makani agho tikupulika ghakukoleranako na ivyo Baibolo likayowoyerathu pakukonkoska vyakucitika vya caru lero. Ndipouli, Baibolo ndakupambanako. Ilo likutipa cilindizga ico makani ghanyake ghose ghakutipa cara. Kwizira mu Mazgu ghake ghakufunyilirika, tingapulikiska cifukwa ico paliri masuzgo  pera cara, kweniso na umo muntazi mwithu muzamuŵira.

Umo Ciuta Wakuwonera Uheni

Baibolo likurongosora umo Ciuta wakuwonera mukhaliro wa masuzgo wa mazuŵa ghano. Nangauli wakawonerathu za mukhaliro uwu, kuti wakuwuzomerezga, nesi kuwulekelera kwa muyirayira cara. Mpostole Yohane wakalemba kuti, “Ciuta nkutemwa.” (1 Yohane 4:8) Yehova wakupwererera comene ŵantu ŵake ndipo wakutinka uheni wose. Ipo ncakwenerera nkanira kulaŵiska kwa Ciuta kuti watipembuzge, pakuti ni muweme, walusungu na wankongono ndiposo wazamuwuskapo uheni wose pa caru. Wamasalmo wakalemba kuti: ‘[Themba lakusoreka na Yehova kucanya] likutaska musauci para wacema, na mukavu, na uyo walije movwiri. Likufwira lusungu ŵakutempenta na ŵakavu, na kuponoska mizimu ya ŵasauci. Likuwombola mizimu yawo ku kuyuzga na ukari; ndopa zawo nzakuzirwa comene mu maso ghake.’—Salmo 72:12-14.

Kasi mukuŵacitira citima awo ŵali mu suzgo? Ncakumanyikwirathu. Uwu ni mukhaliro uwo Yehova wakatilenga nawo, pakuti tili kulengeka mu cikozgo cake. (Genesis 1: 26, 27) Ipo tingagomezga kuti Yehova wakukhwaskika na masuzgo gha ŵantu. Yesu, mweneuyo wakamanya Yehova nkanira fikepo kuruska waliyose, wakasambizga kuti Yehova wakutiwona kuŵa ŵakuzirwa kwa Iye ndipo ngwakuzura na lusungu.—Mateyu 10:29, 31.

Cilengiwa cikupereka ukaboni wakuti Ciuta wakupwererera ŵantu. Yesu wakayowoya kuti Ŵawiske “ŵakukwezgera dazi laŵo pa ŵaheni na ŵaweme, ndipo ŵakurokweska vura pa ŵarunji na pa ŵakubendera.” (Mateyu 5:45) Paulos wakati kwa ŵantu ŵa mu msumba wa Lustra: “[Ciuta] kuti wali kujisida wambura ukaboni cara, uku wakucita uweme na kumupani vura ya kucanya, na nyengo za vipambi, wakuzuzga mitima yinu na vyakurya na cimwemwe.”—Milimo 14:17.

Ncifukwa ca Njani?

Ncakuzirwa kumanya kuti Paulos wakayowoyaso kwa ŵantu ŵa mu Lustra kuti: ‘[Ciuta] mweneuyo mu nyengo zajumpa wakazomerezga mitundu yose kwenda mu ntowa zaŵo.’ Nteura, mitundu—panji ŵantu iwoŵene ndiwo ŵali na murandu ukuru wa kucitiska masuzgo agho ghakuŵasanga. Kuti ncifukwa ca Ciuta cara.—Milimo 14:16.

Ncifukwa wuli Yehova wazomerezga uheni kucitika? Kasi wacitengepo kantu wuli? Zgoro la mafumbo agha lingasangika mu Mazgu gha Ciuta pera. Cifukwa cake ncakuti zgoro ili likukhwaskaso muntu munyake wauzimu ndiposo nkani iyo iye wali kuwuska.

[Vithuzithuzi pa peji 4]

Ŵantu ŵakulengera lusungu ŵanyawo. Ipo kasi Ciuta wangasurako masuzgo gha ŵantu?

 [Kulongosora Vithuzithuzi pa peji 2]

PEJI LAKWAMBA: Kasinja: CITHUZI CA UN 158181/J. Isaac; cindindindi: San Hong R-C Picture Company

[Kulongosora Vithuzithuzi pa peji 3]

Pacanya kumazere, Croatia: UN 159208/S. Whitehouse; mwana wa njara: CITHUZI CA UN 146150 CAKUTOREKA NA O. MONSEN