Cifukwa Wuli Ncakusuzga Kuphepiska?

MU July 2000, Wupu wakukhazikiska marango ku California mu United States wukapereka fundo yakuyowoya za kufwatura ŵantu ku mrandu usange ŵarongora lusungu kwa muntu uyo ŵamupwetekeska pa ngozi. Cifukwa wuli wukakhazikiskika? Cifukwa ca kopa mrandu, kukawoneka kuti ŵantu ŵakukhumba yayi kuphepiska usange ŵacitiska ngozi panyake vintu vinyake vyanangika. Kulwande linyake, awo ŵakukhumba kuphepiskika mwaluŵiro ŵangakhuŵara mwakuti ngozi yicoko waka yingazgoka nkani yikuru.

Inya nadi, ncakwenelera yayi kuphepiska cifukwa ca ngozi iyo yacitika cifukwa ca imwe cara. Nyengo zinyake cikuŵa ciweme kupwererera ivyo muyowoyenge. Ntharika yakale yikuti: “Mu unandi wa mazgu muli kwananga, kweni uyo wakukora milomo yake ngwa vinjeru.” (Zintharika 10:19; 27:12) Ndipouli, mungaŵa ŵakughanaghanira ŵanji ndiposo ŵacovwiro.

Kweni, kasi mbunenesko yayi kuti ŵanandi ŵali kuleka kuphepiska nangauli kungaŵanjizga mu mrandu yayi? Panyumba, mwanakazi wangadinginyika kuti, ‘Afumu ŵane ŵakuphepiska yayi napacoko.’ Pa ncito, mulaŵiliri wangadandaula  kuti, ‘Ŵancito ŵane ŵakuzomerezga cara para ŵapuvya, ndipo nkanandi yayi ŵakuzomera kuti ŵabuda.’ Pa sukulu, musambizgi wangayowoya kuti ‘Ŵana ŵakusambizgika yayi kuyowoya kuti phepani.

Cifukwa cinyake ico cingacitiska muntu kuleka kuphepiska ni kopa kusulika na uyo wamukhuŵazga. Cifukwa ca kusuzgika maghanoghano na kopa kusulika, muntu wangatondeka kurongora umo wakujipulikira pa ivyo vyacitika. Mutepanji uyo wakhuŵazgika wangatceŵerathu uyo wabuda, mwakuti kuphemana kungaŵa kwakusuzga.

Kuleka kughanaghanira umo ŵanji wakujipulikira pa ivyo vyacitika nako kungapangiska ŵantu kucedwa kuphepiska. Iwo wangaghanaghana kuti, ‘Kuphepiska kumazgenge yayi ubudi uwo nacita kale.’ Ŵanyake ŵangaziulika kuzomera kuti ŵabuda cifukwa ca ivyo vingaŵa vyakurondezgapo. Ŵangajifumba kuti, ‘Kasi ninjirenge mu mrandu uwo nizamukhumbikwira kulipira?’ Ndipouli, cifukwa cikuru ico ŵanandi ŵakulekera kuzomera ubudi wawo nkujikuzga. Muntu uyo ngwakujikuzga mwakuti wakutondeka kuyowoya kuti “Nabuda,” ndikuti wakung’anamura kuti, ‘nkukhumba yayi kukhozgeka soni mwa kuzomera ubudi wane. Ici cingakhizga kuzirwa kwane.’

Kwali mpa cifukwa wuli, ŵanandi ŵakuwona kuphepiska kuŵa kwakusuzga. Kweni kasi nkhwakwenelera nadi kuphepiska? Ni vyandulo wuli ivyo kuphepiska kuli navyo?

[Cithuzithuzi pa peji 3]

“Ŵana ŵakusambizgika yayi kuyowoya kuti phepani”

[Cithuzithuzi pa peji 3]

“Afumu ŵane ŵakuphepiska yayi napacoko”

[Cithuzithuzi pa peji 3]

“Ŵancito ŵane ŵakuzomerezga cara para ŵapuvya”