Mafumbo Ghakufumira ku Ŵaŵazgi

• Kasi kungaŵa kunjilirana kwa cipulikano kugura nyumba ya cisopo cinyake na kuyizgora kuŵa Nyumba ya Ufumu?

Kanandi, Ŵakaboni ŵa Yehova ŵakutceŵa kucita nteura na visopo vinyake. Ndipouli, kugura nyumba ya cisopo cinyake kuti kukung’anamura kunjilirana kwa cipulikano yayi. Iko kungawoneka nga ni malonda waka. Mpingo wa Ŵakaboni ŵa Yehova wungacita yayi kupangana na cisopo cinyake kuzenga malo ghamoza ghakusoperapo kuti magulu ghose ghaŵiri ghakumanengemo.

Kasi Yehova wakuyiwona wuli nkani ya kunjilirana kwa cipulikano? Ghanaghanirani urongozgi wa mpostole Paulos: “Mungakakikanga goriwori lakupambana-pambana pamoza na ŵambura kupulikana: cifukwa kunyoroka kuli na wenenawene uli na ucikana-marango? Pakunji kungweruka kukusangana uli na cisi? Kristu wali na kuyana uli na Beliali? Pakunji wakupulikana wali na cigaŵa uli na wambura kupulikana? Tempele la Ciuta liri na kuzomerezgana uli na vikozgo? . . . Nteura, Fumanimo mwa iŵo, ndipo patukani, ndimo wanenera Fumu [Yehova], Ndipo mungakwaskanga kantu ka ukazuzi; Ndipo Ine nditi ndimupokereraninge.” (2 Ŵakorinte 6:14-17) Kasi Paulos wakang’anamurangaci mu mazgu ghakuti “wenenawene” na “kusangana”?

Ncakuwonekerathu kuti wenenawene uwo Paulos wakuzunura apa wukusazgapo kusopa na kutoramo cigaŵa mu vyakucitika vya awo ŵakusopa vikozgo na ŵambura cipulikano. Wakacenjezga Ŵakorinte kuleka kuŵa “ŵakusangana na mizimu yiheni.” (1 Ŵakorinte 10:20, 21) Nteura kunjilirana kwa cipulikano kukung’anamura kutoramo cigaŵa mu kusopa panji kucitira vintu vyauzimu pamoza na visopo vyautesi. (Exodus 20:5; 23:13; 34:12) Usange nyumba iyo kale yikaŵa ya cisopo cinyake yagurika, cilato cake cikuŵa waka cakuti yigwiriskirike ncito nga ni Nyumba ya Ufumu. Pambere yindayambe kugwira ncito nga ni Nyumba ya Ufumu, virongolero vyose vya kusopa kwautesi vikupyereka. Pakuti yikunozgekaso, yikupaturikira kwa Yehova kuti yigwire ncito ya kusoperamo pera. Pakuŵavya kusanganamo panji wenenawene pakati pa cisopo caunenesko na cautesi.

Pakuguriskana nyumba ya cisopo, kudumbirana na ŵeneko kukwenera kuŵa kwakudumura ndipo cikwenera kuŵa cidumbirano ca maronda, mbwenu. Awo ŵali cigaŵa ca mpingo Wacikristu ŵakwenera kukumbukira cenjezgo la Paulos la ‘kuleka kukakika mu goriwori na ŵambura cipulikano.’ Nangauli tikujiwona kuti ndise ŵapacanya yayi kwa ŵa vipulikano vinyake, tikutceŵa kucitira vintu pamoza nawo, panji kunjizgika mu kasopero kawo. *

Wuli usange mpingo wungacita renti mu nyumba ya cisopo cinyake? Kucita renti, kukukhumbikwira kukumana na ŵeneko nyumba nyengo zose, uko kukwenera kutceŵeka. Nanga kungaŵa kucita renti pa cakucitika cimoza pera, wupu wa ŵarara wukwenera kughanaghanira vyakurondezgapo ivi: Kasi kwamuŵa vikozgo na virongolero vya cisopo mukati panji kuwaro kwa nyumba iyo? Kasi ŵantu mu cikaya ico ŵangatiwona wuli usange tingagwiriskira ncito nyumba iyo? Kasi munyake mu mpingo wakhuŵarenge cifukwa ca kugwiriskira ncito nyumba iyo? (Mateyu 18:6; 1 Ŵakorinte 8:7-13) Ŵarara ŵakwenera kusanda fundo izi ndipo pamanyuma pake ŵangapanga makora cakusanka. Ŵakweneraso kughanaghanira umo njuŵi yawo na ya mpingo wose yikuŵakhwaskira para ŵakukhumba kugura na kunozga nyumba ya cisopo cinyake kuŵa Nyumba ya Ufumu.

[Mazgu ghamusi]

[Cithuzithuzi pa peji 30]

Nyumba iyi, iyo yikaŵa sunagoge yiri kugurika na kunozgeka kuŵa Nyumba ya Ufumu.