Mafumbo Ghakufumira ku Ŵaŵazgi
Mafumbo Ghakufumira ku Ŵaŵazgi
Kasi nciheni kubeca ndarama zicoko waka?
Mazgu gha Ciuta ghakurongosora vyose yayi vyakukhwaskana na kutcaya njuga, kweni ivyo ghakuyowoya vikurongora makora kuti kutcaya njuga kukususkana na vipimo vya Baibolo. * Mwaciyerezgero, mbunenesko nadi kuti kutcaya njuga kukwambiska uzukusi. Fundo iyi pa iyo yekha njakuzirwa kuti Ŵakristu ŵayighanaghanire, cifukwa Baibolo likuti ‘ŵakudokera’ ŵazamuhara cara Ufumu wa Ciuta ndipo kudokera kuli mu gulu la kusopa vikozgo.—1 Ŵakorinte 6:9, 10; Ŵakolose 3:5.
Kutcaya njuga kukwambiska kujikuzga na mzimu wa cipharizgano ndiposo mtima wa kukhumba kuruska. Mpostole Paulos wakacenjezga za mikhaliro iyi apo wakalemba kuti: “Tirekenge kujikuzga, kukalifyana, panji kucitirana sanji.” (Ŵagalatiya 5:26) Kusazgaso apo, kutcaya njuga kukucitiska ŵanyake kwamba kugomezga mizimu na mwaŵi. Awo ŵakutcaya njuga ŵakwamba kugomezga mizimu kwa mitundu-mitundu, na cigomezgo cakuti kuŵapenge mwaŵi. Ŵakutikumbuska waka Ŵaisrayeli ŵambura kugomezgeka awo ‘ŵakanozgeranga gome ŵaciuta ŵanyake [ŵakucitiska mwaŵi] na kuŵacitira sembe za kumwa.’—Yesaya 65:11.
Ŵanji ŵangaghanaghana kuti kubeca ndarama zicoko waka pa kuseŵera makadi panji ntchuŵa kwambura kupharizgana na ŵabali ŵawo panji ŵabwezi, ni maseŵera ghaweme waka. Mbunenesko kuti uyo wabeca ndarama zicoko waka wangawona nga ni uzukusi, kujikuzga, kupharizgana panji kugomezga mizimu cara. Kweni kasi kacitiro ako kangakhwaska wuli awo wakuseŵera nawo? Awo ŵali kunjira mu wuzga wa kutcaya njuga ŵakayamba mwa kuyezgerera nga ni ‘maseŵero waka.’ (Luka 16:10) Uko ŵakatenge nkuyezgelera waka kwaŵarongozgera ku cizgoŵi ciheni.
Vikuŵa nteura comene usange pali ŵana. Ŵana ŵanandi ŵakukopeka usange ŵasanga ndarama pakubeca ndipo ŵakukhumba kuti nga ŵangasanga zinyake zinandi. (1 Timote 6:10) Kafukufuku uyo wakacitika mu United States na Arizona Council on Compulsive Gambling (Wupu Wakuwona vya Cizgoŵi ca Kutcaya Njuga), wakukhozgera kuti ŵanandi awo ŵali na cizgoŵi ca kutcaya njuga ŵakayamba apo ŵakaŵa ŵana, “mwa kubeca ndarama zicoko waka pa nyengo za maseŵero panji kuseŵera makadi na ŵabwezi panji ŵabali.” Lipoti linyake likuti “ŵana ŵakwamba kutcaya njuga panyumba, kanandi para ŵakuseŵera makadi lumoza nga ni mbumba na ŵabwezi.” Likusazgirapo kuti “ŵana 30 pa 100 yiliyose ŵakayamba kutcaya njuga ŵacali ŵandakwaniske virimika khumi na cimoza.” Buku la mutu wakuti Why Do People Gamble Too Much—Pathological and Problem Gambling likurongora kuti ŵaukirano ŵanandi ŵakusanga ndarama za kutcayira njuga mwa kwiba panji mikhaliro yinyake yiheni. Mwee, navyo ni vyakufumapo viheni vya kacitiro ako pakwamba kakawonekanga kuŵa kambura urwani!
Pakuti tikukhala mu caru ico cili kale na vipingo ndiposo viyezgo vinandi, kwaŵiraci kujiperekera dala ku cipingo cinyake? (Zintharika 27:12) Kutcaya njuga na ŵana panji kwambura ŵana, na ndarama zicoko panji zinandi, kukuŵika pangozi moyo wauzimu ndipo kukwenera kutceŵeka. Ŵakristu awo ŵakutcaya ntchuŵa panji makadi nga nvyakusanguruska, ŵangacita makora kulemba malekesi, panji kucita waka nga ni maseŵero kwambura kulemba. Ŵakristu ŵavinjeru awo ŵakufipira mtima moyo wawo wauzimu ndiposo wa ŵanyawo na mbumba zawo ŵakutceŵa kutcaya njuga nanga kungaŵa kwa ndarama zicoko.
[Mazgu ghamusi]
^ ndime 3 World Book Encyclopedia yikurongosora kuti kutcaya njuga “nkubeca pa ciphalizgano, maseŵero, cakucitika cinyake, panji mwaŵi.” Likurutilira kurongosora kuti awo “ŵakutcaya njuga kanandi ŵakubeca ndarama . . . para ŵakucita maseŵero gha mwaŵi nga ni malotale, na makadi.”