‘Sungirirani Kakhaliro Kinu Kakutowa mu Ŵamitundu’
‘Sungirirani Kakhaliro Kinu Kakutowa mu Ŵamitundu’
“Tumbikani ŵantu ŵose. Temwani ŵabali.”—1 PETROS 2:17.
1, 2. (a) Kasi mutolamakani wa nyuzipepala yinyake wakayowoyaci za Ŵakaboni ŵa Yehova? (b) Ncifukwa wuli Ŵakaboni ŵa Yehova ŵakuyezgayezga kusungirira mikhaliro yiweme?
VIRIMIKA ivyo vyajumpa, mutolamakani wa nyuzipepala yinyake ku Amarillo, Texas, U.S.A. wakawungananga mu matcharitchi ghakupambana-pambana mu cigaŵa ico ndipo wakayowoya ivyo wakasanga. Iye wakasanga kuti gulu limoza likaŵa lakupambana comene na ghanyake. Ndipo wakati: “Kwa virimika vitatu, naŵa wakusangikapo pa maungano gha Ŵakaboni ŵa Yehova ku Amarillo Civic Center. Penepapo nkacezganga nawo, nkawonapo na yumo cara wakukhweŵa hona, wakumwa phere, panji kutuka. Iwo ŵakaŵa ŵantu ŵakutowa, ŵankaro yiweme, ŵakavwara mwa kujicindika, ŵantu ŵacimwemwe ŵa nga ni aŵa nindaŵawonepo na kale.” Fundo ziweme zakuyana na iyi zakukhwaskana na Ŵakaboni ŵa Yehova kanandi zikulembeka. Cifukwa wuli Ŵakaboni ŵakutumbikika na ŵantu ŵa visopo vinyake?
2 Nyengo zose ŵantu ŵa Ciuta ŵakutumbikika cifukwa ca kakhaliro kawo kaweme. Penepapo mikhaliro yiweme yikumara, Ŵakaboni ŵa Yehova ŵakuwona mikhaliro yiweme kuŵa yakukhumbika comene ndipo ncigaŵa ca kusopa kwawo. Ŵakumanya kuti ivyo ŵakucita vikumanyikwa na Yehova ndiposo ŵabali ŵawo, nakuti mikhaliro yawo yiweme yikukolerana na unenesko uwo ŵakupharazga. (Yohane 15:8; Tito 2:7, 8) Sono, tiyeni tiwone umo tingasungirira kakhaliro kaweme mwakuti lumbiri luweme lwa Yehova na Ŵakaboni ŵake lirutilire ndiposo umo tingasangira candulo usange tikucita nteura.
Mbumba ya Cikristu
3. Kasi mbumba za Cikristu zikwenera kuvikilirika ku vici?
3 Aghanaghanirani za kakhaliro kithu mu mbumba. Buku la kuyowoya za wanangwa wa cisopo (Die Neuen Inquisitoren: Religionsfreiheit und Glaubensneid) lakulembeka na Gerhard Besier na Erwin K. Scheuch, likuyowoya kuti: “Ku [Ŵakaboni ŵa Yehova] mbumba ni cintu ico ŵakucivikirira comene.” Mazgu agha ngaunenesko nadi, cifukwa tikwenera kuvikirira mbumba zithu ku maurwani ghanandi agho ghalipo mazuŵa ghano. Pali ŵana “ŵambura kupulikira ŵapapi” ndiposo ŵarara “ŵambura citemwa” panji “ŵambura kujikora.” (2 Timote 3:2, 3) Ŵantu ŵakutorana ŵakusuzgana, ŵapapi ŵakupwererera cara ŵana ŵawo, ndipo ŵana ŵakugarukira ŵapapi, ŵakucita uzaghali na kumwa minkhwara yakutimbanizga wongo, panji ŵakucimbira panyumba. Vyose ivi vikucitika cifukwa ca nkongono yiheni ya ‘mzimu wa caru’. (Ŵaefeso 2:1, 2) Tikwenera kuvikirira mbumba zithu ku mzimu uwu. Mwauli? Mwakurondezga urongozgi uwo Yehova wakupereka ku viŵaro vya mbumba.
4. Kasi viŵaro vya mbumba ya Cikristu vikwenera kucitirana mulimo wuli?
4 Ŵakristu ŵakutorana ŵakumanya kuti ŵali na mulimo wa kupwerererana mwauzimu ndiposo mwakuthupi. (1 Ŵakorinte 7:3-5; Ŵaefeso 5:21-23; 1 Petros 3:7) Ŵapapi Ŵacikristu wali na milimo yakukhumbikwa comene ya kupwererera ŵana ŵawo. (Zintharika 22:6; 2 Ŵakorinte 12:14; Ŵaefeso 6:4) Ndipo penepapo ŵana ŵakukura, nawo ŵali na milimo yinyake yakuti ŵacite panyumba. (Zintharika 1:8, 9; 23:22; Ŵaefeso 6:1; 1 Timote 5:3, 4, 8) Kufiska milimo ya mbumba kukukhumbikira kuyezgayezga, kujipereka na mzimu wacitemwa. Ndipouli, para viŵaro vya mbumba vikukwaniska milimo yawo yakuperekeka na Ciuta, vikugomezgana ndiposo vikuŵa vyakugomezgeka mu mpingo. Kweni, kuruska vyose viŵaro vya mbumba vikutumbika Muyambiski wa mbumba, Yehova Ciuta.—Genesis 1:27, 28; Ŵaefeso 3:15.
Ubali Wacikristu
5. Kasi tikusanga vyandulo wuli para tikwendezgana na ŵasopi ŵanyithu?
5 Nga Mbakristu, tiri na milimo iyo tikwenera kucitira ŵasopi ŵanyithu mu mpingo, ŵeneawo ‘mbabali ŵithu pa caru cose capasi.’ (1 Petros 5:9) Kuti tiŵe na umoyo uweme wauzimu tikwenera kuŵa paubwezi uweme na mpingo. Para tikucezga na ŵasopi ŵanyithu tikukhozgana, ndipo tikukondwa na cakurya ciweme cauzimu ico cikuperekeka na “muzga wa magomezgeko na wavinjeru.” (Mateyu 24:45-47) Usange tiri na suzgo, tingaromba covwiro ku ŵabali ŵithu kuti ŵatipe urongozgi uweme wakuzikika mu Malemba. (Zintharika 17:17; Mupharazgi 4:9; Yakobe 5:13-18) Para tikusuzgika na vintu vinyake, ŵabali ŵithu ŵakutizerezga yayi. Mwee, naco ncakuzirwa kuŵa cigaŵa ca gulu la Ciuta ili!
6. Kasi Paulos wakarongora wuli kuti tikwenera kupwererera Ŵakristu ŵanyithu?
6 Ndipouli, kuti tiri mu mpingo na cilato ca kupokera waka cara; kweniso kupereka. Yesu wakayowoya kuti: “Muli cimwemwe cikuru mukupereka kuruska kupokera.” (Milimo 20:35, NW) Mpostole Paulos wakadidimizgapo za mzimu wakupereka apo wakalemba kuti: ‘Tikoreske cigomezgo cithu kwambura kupungwa: pakuti ngwa magomezgeko uyo wakalayizgana nase. Ndipo tighanaghanirane na kukhuŵirizgana ku kutemwa na ku milimo yiweme; kureka kongana cara, nga ndi umo kariri kaluso ka ŵanji, kweni kuciskana; ndipo comene-comene apo mukuwona zuŵa likuneng’enera.’—Ŵahebere 10:23-25.
7, 8. Kasi tikurongora wuli kuti tiri na mtima wakupereka mu mpingo withu ndiposo ku Ŵakristu mu vigaŵa vinyake?
7 Mu mpingo, tikurongora ‘cigomezgo cithu’ para tikuyowoyapo fundo pa ungano panji kutoramo cigaŵa mu ntowa zakupambana-pambana mu maprogramu. Kucita nteura, mwambura kukayikira kukukhozga ŵabali ŵithu. Tikuŵaciskaso mwakucezga nawo pambere maungano ghandambe na panyuma pake. Iyi ni nyengo iyo tingakhozga ŵantu awo mbateciteci, ŵakudonda mtima, ndiposo ŵarwari. (1 Ŵatesalonika 5:14) Cifukwa cakuti Ŵakristu mbanangwa pa kupereka kwa nga ni uku, ŵantu awo ŵakwiza pa maungano ghithu kwa nyengo yakwamba ŵakutoreka mtima na citemwa capadera ico cili pakati pithu.—Salmo 37:21; Yohane 15:12; 1 Ŵakorinte 14:25.
8 Kweni kuti tikurongora citemwa ku awo tiri nawo mu mpingo umoza pera cara. Tikutemwa ŵabali ŵithu wose pa caru capasi. Mwaciyerezgero, mu Nyumba za Ufumu zinandi muli bokosi lakuŵikamo vyakupereka vyawanangwa vyakovwira kuzenga Nyumba za Ufumu. Nangauli Nyumba yithu ya Ufumu yingaŵa yiweme, kweni tikumanya kuti Ŵakristu ŵanyithu mu vigaŵa vinyake ŵalije malo ghaweme ghakusoperamo. Para tikupereka vyawanangwa ku Thumba la Ndarama Zakuzengera Nyumba za Ufumu, tikurongora kuti tikuŵatemwa ŵabali ŵithu nangauli tikuŵamanya yayi.
9. Ncifukwa wuli Ŵakaboni ŵa Yehova ŵakutemwana?
9 Ncifukwa wuli Ŵakaboni ŵa Yehova ŵakutemwana? Ncifukwa cakuti Yesu wakaŵarangura kuti ndimo ŵacitirenge. (Yohane 15:17) Ndipo citemwa ico ŵalinaco pakati pawo ni ukaboni wakuti mzimu wa Ciuta ukugwira ncito pa iwo nga ni gulu ndiposo waliyose pa yekha. Citemwa ncimoza mwa “vipambi vya mzimu.” (Ŵagalatiya 5:22, 23) Penepapo Ŵakaboni ŵa Yehova ŵakusambira Baibolo, kusangikapo pa maungano gha mpingo, kuromba kwa Ciuta nyengo zose, cikuŵa cambura kusuzga kwa iwo kurongora citemwa nangauli ŵakukhala mu caru ico ‘citemwa ca ŵanandi cazizima.’—Mateyu 24:12.
Umo Tikucitira na Ŵantu mu Caru
10. Kasi ni mulimo wuli uwo tiri nawo mu caru?
10 Apo Paulos wakayowoya za kupharazga ‘cigomezgo cithu,’ ici cikutikumbuska mulimo unyake wa kupharazga makani ghaweme ku ŵantu awo Mbakaboni ŵa Yehova cara. (Mateyu 24:14; 28:19, 20; Ŵaroma 10:9, 10, 13-15) Kupharazga uku nako ncigaŵa ca kupereka. Kuti tinjizgikemo mu mulimo uwu tikukhumbikira nyengo, nkongono, kunozgekera, kusambira, na kugwiriskira ncito vintu vinyake vya ise taŵene. Ndico cifukwa cake Paulos wakalemba kuti: ‘Ndiri wa mateu ku Ŵagiriki na ku Ŵaherehere wuwo, ku ŵamahara na ku ŵakupusa wuwo. Nteura, umo ziriri nkongono zane, ndiri mcanya kale kupharazga ivangeli na kwa imwe wuwo mwa wa mu Roma.’ (Ŵaroma 1:14, 15) Nga ni Paulos, tiyeni nase tipereke “mateu” na mtima wose.
11. Ni urongozgi wuli wa mu Malemba wa kakhaliro uwo ungatovwira umo tingacitira vintu mu caru, ndipo tikwenera kumanyaci?
11 Kasi tiriso na milimo yinyake iyo tikwenera kucitira ŵantu awo mbasopi ŵanyithu yayi? Yiripo nadi. Tikumanya kuti, “caru cose cikugona mu nkongono za muheni.” (1 Yohane 5:19) Tikumanyaso kuti Yesu wakaphalira ŵasambiri ŵake kuti: ‘Mba caru cara, nga ndi umo iye wakaŵira wa caru cara.’ Kweni, tikukhala mu caru, kugwira ncito mwenemumo ndiposo tikovwirika na milimo yinyake. (Yohane 17:11, 15, 16) Mwanteura tiri na milimo iyo tikwenera kucita mu caru. Kasi ni milimo wuli? Mpostole Petros wakazgora fumbo ili. Penepapo Yerusalemu wakakhala pacoko waka kuti waparanyike, iye wakalembera karata Ŵakristu ŵa ku Asiya, ndipo ndime yimoza mu karata iyo yikutovwira umo tingacitira mwamahara vintu mu caru.
12. Ni mwauli umo Ŵakristu ŵaliri ‘ŵalendo pa caru,’ ndipo ŵakutceŵaci?
12 Cakudanga, Paulos wakayowoya kuti: “Mwa ŵakutemweka, nkumuŵeyani nga mbakutandara waka na ŵalendo, kuti muziŵizge makhumbiro gha thupi, agho ghakurwa na mzimu.” (1 Petros 2:11) Ŵakristu ŵaunenesko ‘mbalendo pa caru’ mwauzimu, cifukwa umoyo wawo ngwakuzikika pa cilindizga ca umoyo wamuyirayira. Ŵakristu ŵakuphakazgika na mzimu wa Ciuta ŵali na cilindizga ca kuzakaŵa na umoyo kucanya ndipo “mberere zinyake” zizamukhala mu paradiso pa caru capasi. (Yohane 3:20, 21; Ŵafilipi 3:20, 21; Ŵahebere 11:13; Civumbuzi 7:9, 14-17) Sono, kasi makhumbiro gha thupi nivici? Makhumbiro gha thupi ghakusazgapo khumbiro lakuŵa musambazi, kumanyikwa, kucita uzaghali, “bina” na “kudokera.”—Ŵakolose 3:5; 1 Timote 6:4, 9; 1 Yohane 2:15, 16.
13. Kasi makhumbiro gha thupi ‘ghakurwa wuli na umoyo withu’?
13 Makhumbiro agha ‘ghakurwa nadi na umoyo withu.’ Igho ghakutimbanizga ubwezi withu na Yehova na cilindizga cithu ca Cikristu, mwanteura umoyo withu ukuŵa pangozi. Mwaciyerezgero, usange tikutemwa vintu viheni, kasi tingapereka wuli “sembe yamoyo yituŵa na yakukondweska Ciuta”? Usange tikutemweseska cuma cakuthupi, kasi ni mwauli umo ‘tingapenjera ufumu cakudanga?’ (Ŵaroma 12:1, 2; Mateyu 6:33; 1 Timote 6:17-19) Ncakuzirwa comene kurondezga ciyerezgero ciweme ico Moses wakarongora, mwakutceŵa vintu vyakunyenga vya caru, ndipo kuteŵetera Yehova cikwenera kuŵa cintu cakwamba mu umoyo withu. (Mateyu 6:19, 20; Ŵahebere 11:24-26) Ncakuzirwa comene kuti ticitenge vintu mwamahara mu caru ici.
‘Sungirirani Kakhaliro Kakutowa’
14. Ncifukwa wuli ise Ŵakristu tikuyezgayezga kusungirira kakhaliro kaweme?
14 Paulos wakayowoya urongozgi unyakeso wakovwira comene, wakati: “[Sungirirani, NW] kakhaliro kinu kakutowa mu Ŵamitundu; mwakuti ŵamucindike Ciuta mu zuŵa la kuyezgekera, cifukwa ca milimo yinu yiweme iyo ŵakuyiwona, nanga ŵakumunenani kuti muli ŵakucita uheni.” (1 Petros 2:12) Nga Mbakristu, tikuyezgayezga kurongora ciyerezgero ciweme. Tikulimbikira comene masambiro ku sukulu. Tikugwira ncito mwakulimbikira ndiposo mwakugomezgeka nangauli awo ŵakatilemba ncito ŵangaŵa ŵambura kugomezgeka. Mu mbumba zakugaŵikana, uyo ni Kaboni, mwanarumi panji mwanakazi, wakuyezgayezga kurondezga nkaro ya Cikristu. Ici ncipusu cara, kweni tikumanya kuti ciyerezgero cithu ciweme cikukondweska Yehova ndipo nkaro iyi yikuŵa na vyakufumapo viweme pa awo Mbakaboni cara.—1 Petros 2:18-20; 3:1.
15. Tikumanya wuli kuti mikhaliro yiweme ya Ŵakaboni ŵa Yehova yikumanyikwa na ŵantu?
15 Cintu cinyake ico cikurongora kuti Ŵakaboni ŵa Yehova ŵakusungirira nadi mikhaliro yiweme ni fundo izo zaŵa zikuyowoyeka ndiposo kulembeka kwa virimika vinandi. Mwaciyerezgero, nyuzipepala ya Il Tempo ya ku Italy yikalemba kuti: “Ŵantu awo ŵakugwira ncito na Ŵakaboni ŵa Yehova ŵakuŵayowoya kuti mbantu ŵakugomezgeka, ŵakukhorwa na cisopo cawo ndipo ŵakuskepelera ku ico; nadi pano, Ŵakaboni ŵakwenera kupika ncindi cifukwa ca mikhaliro yawo yiweme.” Nyuzipepala ya Herald ya ku Buenos Aires, Argentina, yikayowoya kuti: “Kwa virimika vinandi Ŵakaboni ŵa Yehova ŵarongora kuti mbantu ŵakulimbikira ncito, ŵakupwererera vintu ndiposo ŵakopa Ciuta.” Musambiri wa ku Russia, Sergei Ivanenko, nayo wakayowoya kuti: “Ŵakaboni ŵa Yehova ŵakumanyikwa pa caru cose kuti mbantu ŵakupwererera marango, comene-comene pa cigaŵa ca kulipira msonko.” Murara wa malo agho Ŵakaboni ŵa Yehova ŵakucitirapo ungano wa cigaŵa ku Zimbabwe wakayowoya kuti: “Nkuwona Ŵakaboni ŵakutora viswaswa na kutozga vimbuzi. Ŵaleka malo agha ghakutowa kuruska umo ghakaŵira. Ŵana ŵawo mbankaro. Mpanyi caru cose cikazura na Ŵakaboni ŵa Yehova pera.”
Kujilambika kwa Cikristu
16. Kasi tikwenera kucita uli na ŵamazaza ŵa boma, ndipo cifukwa wuli?
16 Petros wakayowoyaso za kacitiro kithu ka vintu na ŵamazaza ŵa boma. Iye wakati: ‘Mujilambike ku vyakwimikika vyose vya ŵantu cifukwa ca Fumu: manyi nku karonga nga ncikurukuru; manyi nku ŵeruzgi, nga mbakutumika na iyo kwiza kalanga aŵo ŵakucita uheni, na kuŵarumba aŵo ŵakucita uweme. Pakuti nteura ndimo liriri khumbo la Ciuta, lakuti na kucita uweme imwe mucetamiske ulemwa wa ŵantu ŵakupusa.’ (1 Petros 2:13-15) Tikuwonga vintu viweme ivyo maboma ghakucita ivyo tikwandula navyo, ndipo mwakurongozgeka na mazgu gha Petros, tikupulikira marango na kulipira msonko. Tikumanya kuti Ciuta wali kupereka ku maboma nkongono za kupereka cilango kwa ŵantu awo ŵakuswa marango, kweni ise tikujilambika ku ŵamazaza “cifukwa ca Fumu.” Ni khumbo la Ciuta. Kusazgirapo apa, tikukhumba cara kukhozga soni zina la Yehova mwakulangika cifukwa ca kucita vintu viheni.—Ŵaroma 13:1, 4-7; Tito 3:1; 1 Petros 3:17.
17. Para “ŵantu ŵakupusa” ŵakwimikana nase, kasi tingasimikizga za vici?
17 Kweni, ‘ŵantu ŵamazaza ŵanyake’ ŵakutisuzga panji kwimikana nase mu ntowa zakupambana-pambana nga nkutuma ŵantu kutiyowoyera utesi. Ndipouli, Yehova wakuvumbura mautesi ghawo mu nyengo yakuŵikika, ndipo wazamumazga kuyowoya kwawo ‘kwakupusa.’ Lumbiri lwithu luweme lwa Cikristu ndilo lukuyowoya lwekha. Ndico cifukwa cake ŵarara ŵaboma ŵanenesko mtima ŵakutirumba kuti tiri ŵantu ŵakucita uweme.—Ŵaroma 13:3; Tito 2:7, 8.
Ŵazga ŵa Ciuta
18. Nga Mbakristu, tingapwererera wuli wanangwa withu?
18 Petros wakuticenjezga kuti: “Nga mbanangwa, kweni kuŵa nawo wanangwa winu nga ncidiko ca uheni cara, kweni nga mbazga ŵa Ciuta.” (1 Petros 2:15-17; Ŵagalatiya 5:12-14) Lero, unenesko uwo tikusambira mu Baibolo ukutisutura ku visambizgo vya cisopo cautesi. (Yohane 8:32) Tiriso na wanangwa wa kujisankira, ndipo tingasanka cilicose ico tikukhumba. Ndipouli tikugwiriskira ncito wanangwa mwambura kwenerera cara. Para tikusanka mabwezi, vyakuvwara, umo tingajitozgera, vyakusanguruska, nanga vingaŵa vyakurya na vyakumwa, tikukumbuka kuti Ŵakristu ŵaunenesko mbazga ŵa Ciuta, ŵakujikondweska ŵekha cara. Tikusanka kuteŵetera Yehova m’malo mwakuŵa ŵazga ŵa makhumbiro gha thupi na vintu vya mu caru.—Ŵagalatiya 5:24; 2 Timote 2:22; Tito 2:11, 12.
19-21. (a) Ni mwauli umo tikuwonera ŵamazaza ŵa boma. (b) Ni mwauli umo ŵanji ŵarongolera ‘citemwa pa ŵabali ŵose’? (c) Ni mulimo wuli uwo ngwakuzirwa comene kwa ise?
19 Petros wakarutirizga kuyowoya kuti: “Tumbikani ŵantu ŵose. Temwani ŵabali. Opani Ciuta. Tumbikaninge karonga.” (1 Petros 2:17) Cifukwa cakuti Yehova Ciuta wazomerezga ŵantu kuti ŵaŵe na maudindo ghakurongozga, ŵantu aŵa tikuŵacindika mwakwenerera. Tikuŵapemperera, mwakuti ticite uteŵeti withu mu mtende ndiposo kusopa-Ciuta. (1 Timote 2:1-4) Pa nyengo yeneiyo, ‘tikutemwa ŵabali ŵithu ŵose.’ Nyengo zose tikuŵacitira viweme ŵabali ŵithu Ŵacikristu.
20 Mwaciyerezgero, penepapo caru cinyake muno mu Africa cikagaŵikana na viwawa cifukwa ca kusankana mitundu, mikhaliro yiweme ya Ŵakaboni ŵa Yehova yikamanyikwa na ŵantu wose. Nyuzipepala yinyake ya Reformierte Presse, ya ku Switzerland yikalemba kuti: “Mu 1995, wupu wakuwona za wanangwa wa ŵantu muno mu Africa ukasanga kuti matcharitchi ghose ghakanjizgikamo [mu vivulupi], kweni Ŵakaboni ŵa Yehova pera ndiwo ŵakanjizgikamo cara.” Penepapo makani gha vyakucitika viheni ivi ghakapulikikwa ku vyaru vinyake, Ŵakaboni ŵa Yehova ŵa ku vyaru vya ŵazungu mwaluŵiro ŵakatuma vyakurya na munkhwara kovwira ŵabali ŵawo na ŵanji mu caru ico. (Ŵagalatiya 6:10) Iwo ŵakagwiriskira ncito mazgu agho ghakusangika pa Zintharika 3:27, agho ghakuti: “Ungaŵakaniranga uweme aŵo ŵakwenera kupokera para kuli mu nkongono zako kuti uwucite.”
21 Tiri na mulimo wakuzirwa comene kuruska ncindi izo tikupereka ku wamazaza wa boma waliyose na citemwa ico tikurongora ku ŵabali ŵithu. Kasi ni mulimo wuli? Petros wakayowoya kuti: “Wopani Ciuta.” Tikucindika Yehova kuruska muntu waliyose. Kasi ici cikucitika wuli? Ndipo, ni mwauli umo tingacitira milimo yithu kwa Ciuta mwamahara na ku ŵantu ŵamazaza? Mafumbo agha ghazamuzgoreka mu sambiro lakurondezgapo.
Kasi Mukukumbukira?
• Ni milimo wuli iyo Ŵakristu ŵali nayo mu mbumba?
• Kasi tingarongora wuli mzimu wakupereka mu mpingo?
• Kasi tiri na milimo wuli ku caru?
• Ni vyandulo wuli ivyo tikusanga cifukwa ca kusungirira kakhaliro kaweme?
[Mafumbo]
[Cithuzithuzi pa peji 19]
Ni mwauli umo mbumba ya Cikristu yingaŵira citopoko ca cimwemwe?
[Vithuzithuzi pa peji 20]
Ncifukwa wuli Ŵakaboni ŵa Yehova ŵakutemwana?
[Vithuzithuzi pa peji 20]
Kasi tingarongora wuli citemwa kwa ŵabali ŵithu nangauli tikuŵamanya yayi?