Tose Tikukhumbikwira Kuwongeka

LIKAŴA zuŵa liweme comene kwa msungwana mucoko. Nangauli wakakhumbikwira urongozgi wa apo na apo, kweni pa zuŵa ili wakarongora nkaro yiweme comene. Ndipouli, wati wagona usiku wura, ŵanyina ŵakapulika kulira. Ŵakati ŵamufumba cifukwa ico wakaŵira na citima, wakazgora uku masozi ghali m’maso: “Kasi nanguŵa msungwana muweme yayi mwahuno?”

Fumbo ili likaŵaŵinya comene ŵanyina, nga nipara ŵagwazika na cimayi. Nyengo zose ŵakacimbiriranga pa kupereka urongozgi kwa mwana uyu. Kweni pa zuŵa ili, nangauli ŵakawona umo mwana wawo wakayezgera kucita makora, iwo ŵakawonga na pacoko yayi.

Kuti ni ŵana pera cara ŵakukhumbikwira kuwongeka na kukhozgeka. Tose tikukhumbikwira urongozgi na kunyolorereka.

Kasi tikupulika wuli usange tapokera viwongo vyakufumira pasi pa mtima? Kasi vikukondweska yayi mtima withu na kupangiska zuŵa lithu kuŵa lakunozga? Inya, tikujipulika kuti munyithu wakutighanaghanira. Ukuŵa ukaboni wakuti ivyo tikacita vikaŵa vya candulo ndiposo tikukhuŵirizgika kuzakacitaso nteura muntazi. Ncambura kuzizwiska kuti tikuŵa paubwezi na muntu uyo nyengo zinandi wakuyowoya nase mazgu ghakukhozga.—Zintharika 15:23.

Yesu wakawona kuzirwa kwa kuwonga. Mu ntharika ya matalente, fumu, (iyo yikayimiranga Yesu iyemwene) yikuwonga waliyose wa ŵateŵeti ŵake ŵakugomezgeka kuti: “Nkuweme, iwe wa muzga muweme na wa magomezgeko.” Mwee, nako nkukhozga! Nangauli iwo ŵali na maluso ghakupambana gha kacitiro ndiposo njombe, wose ŵakupokera viwongo vyakuyana.—Mateyu 25:19-23.

Sono tiyeni tikumbukire ŵanyina ŵa mwana msungwana yura. Tikwenera kulindizga danka mupaka tiwone ŵanji ŵakulira cara mwakuti tiŵawonge. M’malo mwake, tiwoneseske kuti tikugwiriskira ncito mupata wuliwose kuwongera ŵanji. Inya nadi, tili na cifukwa ciweme ca kuwongera ŵanji palipose apo tasangira mupata.