Yehova Wakumupwerererani
Yehova Wakumupwerererani
‘Muthulirani kwenjerwa kwinu kose [Ciuta], cifukwa wakumupwererani imwe.’ —1 PETROS 5:7.
1. Kasi pali mpambano wuli yakuzirwa pakati pa Yehova na Satana?
YEHOVA na Satana ni ŵantu ŵakupambana nkanira. Muntu waliyose uyo wali pa ubwezi na Yehova wangatemweka cara na Diabolosi. Buku linyake likuyowoya za mpambano iyi. Mwakuyana na milimo ya Satana iyo yiri kulembeka mu buku la Job, Encyclopædia Britannica (1970) yikuyowoya kuti: ‘Mulimo wa Satana Nkhwendendeka uku na uku pa caru capasi kupenja ŵantu awo ŵangacita milimo yiheni; iye wakuwona vintu mwakupambana comene na umo “Fumu yikuwonera,” yeneiyo yikwenda pa caru kukhozga ŵantu kuti ŵacitenge milimo yiweme (ll Chron. xvi 9). Satana wakuyuyura comene vintu viweme ivyo ŵantu ŵakucita ndipo Ciuta wamuzomerezga kuyezga ŵantu kweni wali kumupa mphaka. Mwee, nayo ni mpambano!”—Job 1:6-12; 2:1-7.
2, 3. (a) Ng’anamuro la lizgu lakuti Diabolosi likarongosoreka wuli mwakuyana na ivyo vikamucitikira Job? (b) Kasi Baibolo likurongora wuli kuti Satana wacali kusuzga ŵateŵeti ŵa Yehova pa caru capasi?
2 Lizgu lakuti “Diabolosi” ndakufumira ku lizgu la Cigiriki ilo likung’anamura “muntu uyo wakutetera ŵanyake utesi.” Buku la Job likuvumbura kuti Satana wakamucombora muteŵeti wakugomezgeka wa Yehova kuti wakumuteŵetera Yehova na cilato cakuti wasange candulo, iye wakati: “Kasi Job wakumopa Ciuta waka nteura?” (Job 1:9) Nkani iyi, iyo yiri kulembeka mu buku la Job yikurongora kuti mwambura kupwererako za masuzgo na viyezgo, Job wakasenderera kufupi na Yehova. (Job 10:9, 12; 12:9, 10; 19:25; 27:5; 28:28) Ghakati ghamara masuzgo, wakati nteura kwa Ciuta: “Ndamupulikani mu kutu pera, sono maso ghane ghakumuwonani.”—Job 42:5.
3 Kasi Satana wali kuleka kusuzga ŵateŵeti ŵa Yehova ŵakugomezgeka kufumira mu nyengo ya Job? Cara. Buku la Civumbuzi likurongora kuti mu nyengo ya umariro iyi, Satana wacali nipera kusuzga Ŵakristu ŵakuphakazgika na ŵanyawo ŵakugomezgeka awo ŵali na cilindizga ca kuzakakhala pa caru capasi. (2 Timote 3:12; Civumbuzi 12:10, 17) Mwanteura, ncakukhumbika kuti tose nga Ŵakristu waunenesko tijilambike kwa Yehova Ciuta mwakuti watipwererere, kumuteŵetera na mtima wose kurongora kuti Satana ni mutesi nadi. Para tikucita nteura tikondweskenge mtima wa Yehova.—Zintharika 27:11.
Yehova Wakuyezgayezga Kutovwira
4, 5. (a) Mwakupambanako na Satana, kasi Yehova wakulaŵiskaci pa caru capasi? (b) Usange tikukhumba kuti Yehova wativikilire, kasi tikwenera kucitaci?
4 Diabolosi wakwendendeka uku na uku pa caru capasi kupenja uyo wangamumirimitizga. (Job 1:7, 9; 1 Petros 5:8) Kweni Yehova wakupenja na kovwira ŵantu awo ŵakuthemba pa iye. Ncimi Hananiya yikaphalira Themba Asa kuti: “Maso gha Yehova ghakulaŵiska uku na uku mu caru cose ca pasi, kujiwonya nkongono kovwira aŵo mitima yaŵo njakufikapo pamaso pake.” (2 Midauko 16:9) Mwee, iyi ni mphambano yikuru nadi pakati pa Satana wa thinko na Yehova uyo wakupwererera ŵantu mwacitemwa!
5 Yehova wakupenjerezga kafukwa mwa ise cara. Wamasalmo wakalemba kuti: “Usange Imwe, A Yehova, muŵanikenge maubendezi, kasi ndinjani wangima?” (Salmo 130:3) Zgoro ndakuti palije. (Zintharika 7:20) Usange tikusenderera kwa Yehova na mtima wose, maso ghake ghazamuŵa pa ise, kupenjerezga kafukwa cara, kweni kuwoneseska kuyezgayezga kwithu na kuzgora malurombo na kutigowokera vyakwananga vithu. Mpostole Petros wakalemba kuti: “Maso gha fumu [Yehova] ghali pa ŵarunji, Ndipo makutu ghake ghakutegherezga kuŵeya kwaŵo: Kweni cisko ca fumu [Yehova] cikwimikana na aŵo ŵakucita uheni.”—1 Petros 3:12.
6. Ni mwauli umo ivyo vikamucitikira Davide viliri cipembuzgo na cenjezgo kwa ise?
6 Davide wakaŵa murunji cara ndipo wakacita kwananga kukuru comene. (2 Samuel 12:7-9) Kweni iye wakamudandaulira Yehova na mtima wose na kusenderera kufupi na iye mu lurombo. (Salmo 51:1-12) Yehova wakapulika lurombo lwake ndipo wakamugowokera nangauli Davide wakasuzgika na vyakufumapo viheni vya kwananga kwake. (2 Samuel 12:10-14) Cakucitika ici cikutipembuzga kweniso ni cenjezgo. Ncakupembuzga kumanya kuti Yehova ngwakukhumbisiska kugowokera vyakwananga vintu usange tang’anamuka nadi na kulekerathu, kweni tikwenera kumanya kuti kwananga kukwiziska vyakufumapo viheni comene. (Ŵagalatiya 6:7-9) Usange tikukhumba kusenderera kwa Yehova, tikwenera kutceŵerathu macitiro ghalighose agho iye wakutinka.—Salmo 97:10.
Yehova Wakuguzira Ŵantu Ŵake kwa Iye Mwene
7. Kasi Yehova wakulaŵiska ŵantu ŵa mtundu mbu, ndipo ni mwauli umo wakuŵaguzira kwa iye mwene?
7 Davide wakalemba kuti: “Yehova wali mu macanya kweni wakupulika na kuŵapwererera ŵakuyuyuka; ndipo mweneuyo ngwakujiŵikamo Iye wakumumanyira patali.” (Salmo 138:6) Muntowa yakuyana waka, wamasalmo munyake wakayowoya kuti: “Ndinjani uyo wakukozgana na Yehova Ciuta withu, uyo wali pa citengo cake kucanya, uyo wakulaŵiska vyamtambo na vyamucaru nanga wali kutali mu macanya? Wakuwuska ŵakavu mu fuvu.” (Salmo 113:5-7) Enya, mlengi wa Cilengiwa cose wakulaŵiska pa caru ndipo wakuwona ‘ŵantu ŵakujicefya,’ “ŵakavu” awo “ŵakucincima na kulira cifukwa ca maunyankasi ghose agho ghakucitika.” (Ezekiel 9:4) Wakuŵaguzira ŵantu aŵa kwa iye mwene kwizira mwa Mwana wake. Apo wakaŵa pa caru capasi, Yesu wakayowoya kuti: “Palive muntu wakumanya kwiza kwa ine, kwambura kuti Ŵadada aŵo ŵakandituma ŵamuguze . . . Palive muntu wakumanya kwiza kwa ine, kwambura kuti kwapika kwa iyo na Ŵadada.”—Yohane 6:44, 65.
8, 9. (a) Ncifukwa wuli tose tikukhumbikwira kusenderera kwa Yesu? (b) Kasi sembe ya ciwombolero njakuzirwa wuli?
8 Ŵantu wose ŵakwenera kwiza kwa Yesu na kuŵa na cigomezgo mu sembe ya ciwombolero cifukwa ŵakababika ŵakwananga, ŵakujilekaniska na Ciuta. (Yohane 3:36) Ŵakukhumbikira kuti ŵaŵeso pa ubwezi na Ciuta. (2 Ŵakorinte 5:20) Yehova kuti wakalindirira ŵantu ŵakwananga kuti ŵamuŵeyerere danka cara kuti wapange manozgero ghakuti ŵaŵe pa ubwezi na iye. Mpostole Paulos wakalemba kuti: ‘Ciuta wakuphara kutemwa kwa iyo mwene uko wakatitemwa nako, kwakuti, tikaŵa ticali ŵakwananga, Kristu wakatifwira. Kweni usange, tikaŵa ticali kupindikana nayo, tikaphemaniskikira na Ciuta mu nyifwa ya Mwana wake, ipo kwakuruska, ta ŵakuphemaniskika, titi tiponoskekenge na umoyo wake.’—Ŵaroma 5:8, 10.
9 Mpostole Yohane wakasimikizgira mazgu gha unenesko agha kuti Ciuta wakuphemaniska ŵantu kwa iye mwene, apo wakalemba kuti: ‘Mu ceneici ndimo kutemwa kwa Ciuta kukavumbulika mwa ise, cakuti Ciuta watuma mu caru Mwana wake Kananda, mwakuti tiŵenge na umoyo mwa iyo. Mwenemumo ndimo muriri kutemwa, mwakuti ise tikamutemwa Ciuta cara, kweni kuti ndiyo wakatitemwa ise, ndipo wakatuma Mwana wake kuŵa mpepeska ya zakwananga zithu.’ (1 Yohane 4:9, 10) Ciuta ndiyo wakamba kucitapo kantu, ŵantu cara. Kasi mukusenderera cara kwa Ciuta uyo wakarongora citemwa cikuru kwa ŵantu “ŵakwananga,” kweniso “ŵarwani ŵake”?—Yohane 3:16.
Tikwenera Kupenja Yehova
10, 11. (a) Kasi tikwenera kucitaci kuti timupenje Yehova? (b) Ni mwauli umo tikwenera kuwonera vintu viheni vya Satana ivyo vili mu caru ici?
10 Nga ni umo tikumanyira, Yehova wakuticicizga cara kuti tisenderere kwa iye. Tikwenera kumupenja, ‘kumupapaska na kumusanga ndipouli kuti wali kutali na muntu waliyose wa ise cara.’ (Milimo 17:27) Tikwenera kumanya kukhumbika kwa kujilambika kwithu kwa Yehova. Musambiri Yakobe wakalemba kuti: ‘Jilambikani kwa Ciuta: kweni yimikanani na Satana, ndipo wati wamucimbirani. Sendererani kwa Ciuta, ndipo iyo wati wasenderere kwa imwe. Tozgani mawoko ghinu, mwa wakwananga; tozgani mitima yinu, imwe mwa wa mitima yiŵiri.’ (Yakobe 4:7, 8) Tikwenera cara kuziulika kwimikana mwankongono na Diabolosi na kuthemba Yehova.
11 Ici cikung’anamura kulekerathu kunjizgikamo mu vintu viheni vya Satana ivyo vili mu caru ici. Yakobe wakafumba kuti: “Kasi mulive kumanya kuti ubali wa caru mbulwani na Ciuta? Nteura uyo wakukhumba kuŵa mbali wa caru, wakujizgora mulwani wa Ciuta.” (Yakobe 4:4) Ndipouli, usange tikukhumba kuti tiŵe pa ubwezi na Yehova, tikwenera kumanya kuti Satana na ŵantu ŵake ŵatitinkenge comene.—Yohane 15:19; 1 Yohane 3:13.
12. (a) Ni mazgu wuli gha cipembuzgo agho Davide wakalemba? (b) Ni cenjezgo wuli iyo Yehova wakacenjezga kwizira mwa ncimi Azaria?
12 Para ŵantu wakutisuska mu vigaŵa vinyake, tikwenera kumuphalira Yehova mu lurombo, kuromba covwiro cake. Davide uyo Yehova wakamuvikiliranga, wakalemba ivi kuti vitipembuzge, iye wakati: “Yehova wali pafupi na ŵose aŵo ŵakumucema, aŵo ŵakumucema mu unenesko. Tiwafiske khumbo la aŵo ŵakumopa, ndipo wakupulika nkuto yaŵo, wakuŵaponoska. Yehova wakusunga ŵose aŵo ŵakumutemwa; kweni ŵaheni ŵose tiwaŵaparanyenge.” (Salmo 145:18-20) Lemba ili likurongora kuti Yehova wativikilirenge para tikuyezgeka ndipo wazamuponoska ŵantu ŵake pa nyengo ya ‘suzgo yikuru.’ (Civumbuzi 7:14) Yehova wazamusenderera kufupi na ise usange nase tikusenderera kwa iye. Mwakurongozgeka na “mzimu wa Ciuta,” Ncimi Azaria yikayowoya kuti uwu mbunenesko nadi: “Yehova wali namwe papo imwe mucali na iye, usange mukumupenja timumusange, kweni usange mukumusida naye tiwamusideni.”—2 Midauko 15:1, 2.
Yehova Wakwenera Kuŵa Wanadi kwa Ise
13. Tingarongora wuli kuti Yehova ngwanadi kwa ise?
13 Mpostole Paulos wakalemba kuti Moses “wakazizipizga nga ngwakumulaŵiska Uyo ngwambura kuwoneka.” (Ŵahebere 11:27) Mbunenesko kuti Moses wakamuwonapo cara Yehova. (Exodus 33:20) Kweni Yehova wakaŵa nadi muntu mweneco kwa iye ndipo cikaŵa nga wakamuwona. Mwakuyana waka, panyuma pa viyezgo, na cipulikano Job wakamuwona Yehova, nga ni Ciuta uyo wakuzomerezga ŵateŵeti ŵake ŵakugomezgeka kukumana na viyezgo kweniso wakuŵavikilira. (Job 42:5) Kukayowoyekaso kuti Enoki na Nowa ‘ŵakenda na Ciuta.’ Ŵakacita ici mwa kukondweska Ciuta na kumupulikira. (Genesis 5:22-24; 6:9, 22; Ŵahebere 11:5, 7) Usange Yehova ngwanadi kwa ise nga ni umo wakaŵira kwa Enoki, Nowa, Job, na Moses, ‘timuzomerezgenge iye’ mu mendero ghithu ghose ndipo iye ‘tiwanyoroskenge ntowa zithu.’—Zintharika 3:5, 6.
14. “Kudemerera” kwa Yehova, kasi kukung’anamuraci?
14 Apo kukakhala pacoko waka kuti Ŵaisrayeli ŵanjire mu Caru ca Layizgano, Moses wakaŵaphalira kuti: “Murondezge Yehova Ciuta winu, na kumuopa iye, na kusunga marango ghake, na kupulikira lizgu lake, na kumuteŵetera, na kudemerera kwa iye.” (Duteronome 13:4) Ŵakenera kurondezga Yehova, kumopa, kumupulikira, na kudemerera kwa iye. Kuyowoya za lizgu ili ilo lang’anamurika kuti “kudemerera,” nkhwanta yinyake ya Baibolo yikayowoya kuti mu “ciyowoyero ca Cihebere likung’anamura ubwezi weneco wa kanda apa nane nikandepo, ubwezi wakukhora comene.” Wamasalmo wakati: “Yehova ndi bwezi la awo wakumopa; tiwaŵamanyiske vya pangano lake.” (Salmo 25:14) Tingaŵa pa ubwezi wakuzirwa uwu na Yehova withu usange iye ngwanadi kwa ise ndiposo usange tikumutemwa comene mwakuti tikuyezgayezga kumukondweska mu ntowa yiliyose.—Salmo 19:9-14.
Kasi Mukumanya Kuti Yehova Wakumupwerererani?
15, 16. (a) Lemba la Salmo 34 likurongora wuli kuti Yehova wakutipwererera? (b) Kasi tikwenera kucitaci usange tiri na suzgo la kukumbukira vintu viweme ivyo Yehova wakuticitira?
15 Ntowa yimoza iyo Satana wakugwiriskira ncito nkupangiska kuti tiruwenge kuti Yehova Ciuta withu wakupwererera ŵateŵeti ŵake ŵakugomezgeka nyengo zose. Davide, Themba la ku Israyeli likamanya makora kuti Yehova wakuvikilira nanga ni apo likaŵa mu suzgo likuru. Penepapo wakacicizgika kucita vintu nga ngwakufunta pa maso pa Akish Themba la Gath, iye wakimba sumu yiweme comene ndipo wakasazgamo mazgu ghacipulikano agha: “Kuzgani Yehova ‘mwe, pamoza na ine! tiyeni, titumpuske pamoza zina lake! Nkamupenja Yehova ndipo wakandipulika, na kunditaska mu wofi wane wose. Mungelo wa Yehova wakuzingirizga aŵo ŵakumopa Yehova, na kuŵaponoska. Cetani ‘mwe! Muwone kuti Yehova ndi muweme, ngwamwaŵi muntu uyo wakumutamira Iye! Yehova wali pafupi na aŵo mbakupyoka mu mtima, ndipo wakuponoska aŵo mbamzimu wakupeta. Vipyo vya murunji nvinandi, kweni Yehova wakumusutula ku vyose.”—Salmo 34:3, 4, 7, 8, 18, 19; 1 Samuel 21:10-15.
16 Kasi mukukhorwa na nkongono ya Yehova ya kuponoska? Kasi mukumanya za civikiliro ico ŵangelo wake wakupereka kwa ise? Kasi imwe mwaŵene muli kucetapo kuti mumanye kuti Yehova ni muweme? Mphauli apo mukamanya kuti Yehova ni muweme? Yezgani kukumbukira. Kasi ni nyengo iyo mukanjira mu uteŵeti, apo mukajipulikanga kuti mungacita vinandi yayi? Mutepanji apo mukaŵa na cidumbirano ciweme na muntu munyake. Kasi mukakumbuka kuwonga Yehova cifukwa cakuti wakamupani nkongono zakusazgikira na vitumbiko? (2 Midauko 4:7) Ku lwande linyake, mungakumbuka cara viweme vyose ivyo Yehova wamucitirani. Kweni mukwenera kughanaghanira ivyo Ciuta wamucitirani sabata iyo yajumpa, mwezi, cirimika panji kujumpa apa. Usange ndimo viliri, kasi mwalekeraci kuyezgayezga kuti muŵe pa ubwezi weneco na Yehova na kuwona umo iye wakumurongozgerani? Mpostole Paulos wakaciska Ŵakristu kuti: ‘Nteura mujiyuyure pasi pa woko la nkongono la Ciuta, . . . uku mukumuthulira kwenjerwa kwinu kose, cifukwa wakumupwererani imwe.’ (1 Petros 5:6, 7) Mwee, muzamuzizwa kumanya kuti Ciuta wakumupwerererani comene kuruska umo imwe mukumanyira!—Salmo 73:28.
Rutilizgani Kumupenja Yehova
17. Ncivici ico cikukhumbikwa usange tikukhumba kurutirira kumupenja Yehova?
17 Kusungirira ubwezi withu na Yehova kukwenera kumara yayi. Yesu wakaromba nteura kwa Ŵadada ŵake: “Uwu mbumoyo wa muyirayira, kuti ŵamumanyani Imwe, Ciuta mweneco Yeka, na Yesu Kristu, mweneuyo mukamutuma.” (Yohane 17:3) Kusambira za Yehova na Mwana wake kukukhumbikira kuyezgayezga kwambura kulekezga. Tikukhumbikira covwiro ca lurombo na mzimu utuŵa kuti tipulikiske makora ‘visambizgo vyeneco vya Ciuta.’ (1 Ŵakorinte 2:10; Luka 11:13) Tikukhumbikiraso kurongozgeka na “muzga wamagomezgeko na wa vinjeru’ kuti watipe cakurya cauzimu “mu nyengo yakwenerera.” (Mateyu 24:45) Kwizira mwa iyo, Yehova wakutirongozga kuti tiŵazgenge Mazgu ghake zuŵa lirilose, kusangikapo pa maungano gha mpingo nyengo zose, na kunjizgikamo mwakukwana mu ncito yakupharazga “makani ghaweme gha Ufumu.” (Mateyu 24:14) Usange ticitenge nteura, mbwenu tirutilirenge kupenja Ciuta withu uyo wakutipwererera, Yehova.
18, 19. (a) Kasi tikwenera kuyezgayezga kucitaci? (b) Usange tikurutirizga kwimikana na Diabolosi ndiposo kupenja Yehova, kasi tizamutumbikika wuli?
18 Satana wakucita vilivyose ivyo wangakwaniska kwiziska masuzgo ku ŵantu ŵa Yehova mu ntowa zakupambana-pambana. Wakuyezga kutimbanizga mtende withu na kuparanya ubwezi uweme na Ciuta withu. Wakukhumba cara kuti tirutirizge kupenjerezga ŵantu ŵaweme mtima na kuŵawovwira kuti ŵaŵe ku cigaŵa ca Yehova, uyo ni muwusi wa cilengiwa cose. Kweni tikwenera kuyezgayezga kuŵa ŵakugomezgeka kwa Yehova, kuthemba mwa iye kuti watithaske kwa muheni. Mwakuzomerezga kuti Mazgu gha Ciuta ghatirongozge na kurutirizga kudemerera ku gulu lakuwoneka, tingaŵa ŵakusimikizga kuti iye wativikilirenge nyengo zose.—Yesaya 41:8-13.
19 Mwanteura, tiyeni tose timikane nayo Diabolosi na mauryarya ghake ndipo nyengo zose tipenjenge Ciuta withu wakutemweka, Yehova, mweneuyo wangatondeka yayi ‘kutikhozga na kutikhwimiska.’ (1 Petros 5:8-11) Nteura, ‘tizamukhalirira pa ubwezi na Ciuta, penepapo tikulindirira lusungu lwa Fumu yithu Yesu Kristu na cilato cakuzakaŵa na umoyo wamuyirayira.’—Yuda 21.
Kasi Mungazgora Wuli?
• Kasi lizgu lakuti Diabolosi likung’anamuraci, ndipo ni mwauli umo wakucitira milimo yake?
• Kasi Yehova wakupambana wuli na Diabolosi mu ntowa iyo wakuwonera ŵantu pa caru capasi?
• Ncifukwa wuli muntu wakwenera kuzomera sembe ya ciwombolero pa kuromba kwa Yehova?
• Kasi cikung’anamuraci “kudemerera” kwa Yehova, ndipo ni mwauli umo tingalutirizgira kumupenja?
[Mafumbo]
[Cithuzithuzi pa peji 15]
Mwambura kupwererako za viyezgo vyake, Job wakamanya kuti Yehova wakumupwererera
[Cithuzithuzi pa peji 16, 17]
Kuŵazga Baibolo nyengo zose, kusangikapo pa maungano, na kunjizgikamo mu ncito yakupharazga na mtima wose vikutikumbuska kuti Yehova wakutipwererera