Kupereka Mwakujikomora

“NKUPWERERAKO yayi nanga munithye wakupempha-pempha. Nkupemphera Yesu.” Mazgu agha gha muliska waciprotesitanti ghakuwuska mafumbo pakukhwaskana na ndarama za cisopo. Cisopo cikuwoneka nga cingenda usange ciri na ndarama zinandi. Malipiro ghakwenera kuperekeka, matcharitchi ghakwenera kuzengeka na kunozgeka, ndipo kuti mazgu ghapharazgike pakukhumbika ndarama. Kasi ndarama izi zingasangika wuli?

Matcharitchi ghanandi ghakuwona kuti zgoro ni kupereka cakhumi. a “Kupereka cakhumi ni ntowa iyo Ciuta wakovwilira Ufumu Wake pa caru capasi,” ndimo wakuyowoyera muliska Norman Robertson. “Ni ntowa iyo Ciuta wakusangira ndarama zakuti zovwire pa kupharazga makani ghaweme.” Mwambura na soni wuwo yayi pakukumbuska ŵarondezgi ŵake kuti ŵapereke, iye mwankongono wakuti: ‘Muntu wakupereka cakhumi cifukwa cakuti wangakwaniska waka yayi, kweni ncirongorero cakuti wakupulikira. Usange muntu wandapereke cakhumi, ndikuti wakuswa marango gha Ciuta. Vikuyana waka na kugwiriskira ncito ndarama izo ni zako yayi.’—Tithing—God’s Financial Plan.

Mwambura kukayika, mukuzomerezga kuti kupereka kukwenera kuŵa cigaŵa ca kusopa kwa Ŵakristu. Kweni kasi kupempha-pempha ndarama mukukuwona kuŵa kwakutimbanizga, panji kwambura kwenelera? Muntu wakumanya vya cisopo wa ku Brazil, Inácio Strieder, wakacombora matcharitchi cifukwa ca kugwiriskira ncito cakhumi kuti “ghamazge masuzgo ghake” ndipo wakayowoya kuti kucita ntena “nkhwananga, nkugwiriskira ncito ndarama izi mwambura kwenelera, kweniso ni upusikizgi.” Iye wakuti cakufumapo cake ncakuti “ŵantu awo ŵali pa ncito yayi, vyokoro, ŵakavu, na awo ŵakumanya makora yayi, ŵakughanaghana kuti Ciuta waŵataya, ndiposo kuti ŵakucicizgika kupereka vintu vinandi kwa ‘muliska,’ apo mbumba zawo zikugona na njara.”

Mwanteura mungafumba kuti: ‘Kasi matcharitchi agho ghakulimbikira za kupereka cakhumi ghakugwiriskira ncito makora malemba? Panji kasi visopo vinyake vikugwiriskira waka ncito zina la Ciuta mwakuti mberere ziŵe na wofi mwakuti ziperekenge ndarama? Kasi Ciuta wakukhumba nadi kuti tiperekenge mwakujikomora, nga ni umo ŵanyake ŵangayowoyera?’

[Mazgu ghamusi]