Cifukwa Wuli? ‘Ciuta, Cifukwa Wuli Mukazomerezga Ici?’
Cifukwa Wuli? ‘Ciuta, Cifukwa Wuli Mukazomerezga Ici?’
RICARDO wacali kukumbuka nyengo iyo wakaŵa na muwoli wake, Mariya, mu cipinda cakulindizgiramo dokotala. a Pakaŵavya uyo wakaŵa na cikanga kuti waŵazge cikarata cakufuma kwa dokotala cakuyowoya za ntenda ya Mariya. Pamanyuma pake, Ricardo wakajura nevulupu, ndipo mwaluŵiro ŵakalaŵiska pa ivyo vikalembeka. Ŵakasanga kuti palembeka “kansa” ndipo ŵakayamba kulira cifukwa ŵakamanya vyakurondezgapo vyake.
“Dokotala wakaŵa walusungu comene,” wakukumbuka mwanteura Ricardo, “kweni wakamanya kofya kwa ntenda iyi cifukwa wakatiphaliranga mwakuwerezga-werezga kuti tigomezge Ciuta”
Pambere wovwiri undayambe kuperekeka, dokotala wakasanga kuti lundi la ku maryero la Mariya lafwa zii. Wati walutilira kumupima, wakasanga kuti kansa yafika ku wongo. Pakati pajumpa waka sabata yimoza, dokotala wakalekezga danka wovwiri uwo wakaperekanga. Mariya wakaleka kuyowoya na kurya ndipo pakati pajumpa myezi yiŵiri, wakafwa. “Nkaŵa wakukondwa kuti wapumura ku vyakuŵinya,” wakurongosora mwanteura Ricardo, “kweni nkhamukumbukanga comene mwakuti nkakhumbanga nga kuti nane ningafwa waka. Nyengo zinandi nkaliranga kwa Ciuta kuti: ‘Cifukwa wuli mukazomerezga ici kucitika?’”
Para Kwacitika Soka, Pakuwuka Mafumbo Ghanandi
Nga ni Ricardo, ŵantu ŵanandi pa caru cose capasi ŵakukumana na masuzgo ghakuru comene. Kanandi ŵantu ŵambura cifukwa ndiwo ŵakusuzgika. Aghanaghanani waka za citima ico nkondo zikupereka ku ŵantu. Panji ghanaghanani vyakuŵinya ivyo vikuŵa na ŵantu awo ŵakugoneka mwakucita kucicizgika, ŵana awo ŵakunyozeka, awo ŵakusuzgika na munyawo wa mu nthengwa, na ŵanji. Kwambira kale, pali masuzgo na vyakuŵinya vinandi ivyo ŵantu ŵakucitirana yumoza na munyake. (Mupharazgi 4:1-3) Ndiposo pali ŵantu awo ŵakusuzgika na masoka panji na matenda gha mu thupi panji maghanoghano. Mwanteura, ncakuziziswa yayi kuti ŵanandi ŵakufumba kuti, “Cifukwa wuli Ciuta wakuzomerezga kusuzgika kwa ntena uku?”
Nanga ŵaŵe ŵantu awo ŵakusopa, masuzgo kuti ghakuŵaŵira ghapusu ca. Namweso mungazizwa cifukwa ico Ciuta wacitemwa na walusungu wakuzomerezgera kuti ŵantu ŵasuzgikenge. Kusanga zgoro lakukhorweska na launenesko pa mafumbo agha nkhwakukhumbika mwakuti tikhale makora na kuŵa paubwezi uweme na Ciuta. Baibolo likupereka zgoro. Conde, wonani ivyo Baibolo likuyowoya mu mutu wakurondezgapo.
[Mazgu ghamusi]
a Mazina ghasintika.
[Vithuzithuzi pa peji 3]
Dokotala wakatiphaliranga mwakuwerezga-werezga kuti tikwenera kugomezga Ciuta