‘Rutilirani Kupasa Vipasi Vinandi’

‘[Rutilirani, NW] kupasa vipasi vinandi: ndipo muti muŵenge ŵasambiri ŵane.’—YOHANE 15:8.

1. (a) Kuti tiŵe ŵasambiri, ncintu wuli cakukhumbikwa ico Yesu wakayowoya kwa ŵapostole ŵake? (b) Ni fumbo wuli ilo tikwenera kujifumba?

 YIKAŴA nyengo ya usiku pambere Yesu wandafwe. Wakaŵa na nyengo yakukwana yakuti wakhozgere ŵapostole ŵake na mazgu ghaubwezi. Cifukwa cakuti wakaŵatemwa ŵabwezi ŵake, Yesu wakaleka cara kuyowoya nawo, nangauli pa zuŵa lira 12 koloko ya usiku yikwenera kuti yikajumpa. Yesu wali mukati kuyowoya nawo, wakaŵakumbuska cintu cimoza cakukhumbikwa ico ŵakenera kucita kuti ŵarutilire kuŵa ŵasambiri ŵake. Wakati: “Mu ceneici ndimo Ŵadada ŵakucindikikiramo, cakuti mupase vipasi vinandi: ndipo muti muŵenge ŵasambiri ŵane.” (Yohane 15:8) Kasi lero tikukwaniska cintu cakukhumbikwa ici kuti tiŵe ŵasambiri? Kasi ‘kupasa vipasi vinandi’ kukung’anamuraci? Kuti timanye makora, tiyeni tiwone ivyo Yesu wakayowoya pa usiku wura.

2. Nciyerezgero wuli ca vipasi ico Yesu wakayowoya pa usiku wura pambere wandafwe?

² Kuŵaphalira kuti ŵapase vipasi ncigaŵa ca ciyerezgero ico Yesu wakayowoyera ŵapostole ŵake. Wakati: “Ine ndine mpeska weneco, ndipo Ŵadada mbalimi. Munthavi wose wa mwa ine uwo ngwambura kupasa vipasi, ŵakuwuwuskako: ndipo munthavi wose uwo ukupasa, ŵakuwuphatirira, mwakuti upase vinandiko. Sono imwe muli ŵakuphatiririka cifukwa ca mazgu  agho ndayowoya namwe. Khalani mwa ine, na ine mwa imwe. Umo munthavi ulive kumanyira kupasa wekha, kwambura kuti ukhale mu mpeska: nteuraso ndimo mulive kumanyira imwe, kwambura kuti mukhale mwa ine. Ine ndine mpeska, imwe ndimwe minthavi . . . Mu ceneici ndimo Ŵadada ŵakucindikikiramo, cakuti mupase vipasi vinandi: ndipo muti muŵenge ŵasambiri ŵane. Nga ndi umo Ŵadada ŵanditemwera ine, ndimo nane ndamutemwerani imwe: khalirirani mu kutemwa kwane. Usange mukusungirira marango ghane, muti mukhalirirenge mu kutemwa kwane.”—Yohane 15:1-10.

3. Kasi ŵarondezgi ŵa Yesu ŵakwenera kucitaci kuti ŵapase vipasi?

³ Mu ciyerezgero ici, Yehova ni Mulimi, Yesu ni mpeska, minthavi mbapostole awo Yesu wakayowoyanga nawo. Ŵapostole ŵakatenge ŵapasenge vipasi pekha usange ‘ŵakhalirirenge’ mwa Yesu. Pamanyuma pake Yesu wakarongosora umo ŵapostole ŵakatenge ŵasungirenge umoza wawo, wakati: “Usange mukusungirira marango ghane, muti mukhalirirenge mu kutemwa kwane.” Nyengo yakuntazi, mpostole Yohane wakazakalembera Ŵakristu-ŵanyake mazgu ghakuyana waka, wakati: “Uyo wakusunga marango [gha Kristu] wakukhala mwa iyo.” a (1 Yohane 2:24; 3:24) Nteura, mwa kusunga marango gha Kristu, ŵarondezgi ŵake ŵakukhalirira mwa iyo, ndipo umoza wawo ukuŵapangiska kuti ŵapase vipambi. Ni vipasi wuli ivyo tikwenera kupasa?

Mupata wa Kupasa Vipasi Vinandi

4. Kasi tingasambirapo vici pa fundo yakuti Yehova ‘wakuwuskako’ munthavi wuliwose uwo ukuleka kupasa?

⁴ Mu ciyerezgero ca mpeska, Yehova ‘wakuwuskako,’ panji kuphajurako munthavi uwo ukuleka kupasa. Kasi ici cikutiphaliraci? Cikutiphalira kuti ŵasambiri wose ŵakwenera kupasa vipasi pera yayi, kweniso kuti wose ŵangakwaniska kucita ici, nangauli ŵangaŵa na vyakutondeska ivi na ivi. Nakuti catenge ciŵenge cambura kupulikikwa kuti Yehova wacitemwa ‘wawuskeko’ panji wamupate musambiri wa Kristu cifukwa watondeka kukwaniska.—Salmo 103:14; Ŵakolose 3:23; 1 Yohane 5:3.

5. (a) Kasi ciyerezgero ca Yesu cikurongora wuli kuti tingarutilira kupasa vipasi? (b) Ni vipasi vya mtundu wuli ivyo tiwonenge?

⁵ Ciyerezgero ca Yesu ca mpeska cikurongoraso kuti pakuŵa musambiri, tikwenera kupenja mupata wakuti ticitire milimo yinandiko mwakuyana na nkongono zithu. Wonani umo Yesu wakayowoyera: “Munthavi wose wa mwa ine uwo ngwambura kupasa vipasi, ŵakuwuwuskako: ndipo munthavi wose uwo ukupasa, ŵakuwuphatirira, mwakuti upase vinandiko.” (Yohane 15:2) Kuumaliro wa ciyerezgero, Yesu wakaphalira ŵasambiri ŵake kuti ŵapase “vipasi vinandi.” (Yohane 15:8) Kasi fundo njakuti wuli apa? Pakuti tiri ŵasambiri, tikwenera kuŵa ŵakupora  cara. (Civumbuzi 3:14, 15, 19) Kweni tikwenera kupenja ntowa zakuti tirutilire kupasa vipasi. Ni mtundu wuli wa vipasi vinandi ivyo tikwenera kupasa? Pali mitundu yiŵiri, (1) ‘vipasi vya mzimu’ na (2) vipasi vya Ufumu.—Ŵagalatiya 5:22, 23; Mateyu 24:14.

Vipasi vya Mikhaliro ya Cikristu

6. Kasi Yesu Kristu wakayowoya wuli kukhumbikwa kwa kupasa cipasi cakwamba ca mzimu?

⁶ Cipasi cakwamba pa ‘vipasi vya mzimu’ ni citemwa. Mzimu utuŵa wa Ciuta ndiwo ukupasa cipasi ici pakati pa Ŵakristu cifukwa ŵakupulikira dango ilo Yesu wakapereka pambere wandayowoye ciyerezgero ca mpeska. Wakaphalira ŵapostole ŵake kuti: “Dango lipya nkumupani, kuti mutemwanenge.” (Yohane 13:34) Nakuti mu cidumbirano cose cira pa usiku waumaliro wa umoyo wake, Yesu mwakuwerezga-werezga wakakumbuska ŵapostole ŵake kukhumbikwa kwa kutemwana.—Yohane 14:15, 21, 23, 24; 15:12, 13, 17.

7. Kasi mpostole Petros wakarongora wuli kuti kupasa vipasi kukukolerana na kuŵa na mikhaliro yakuyana na ya Kristu?

⁷ Petros, uyo wakaŵapo pa usiku wura, wakamanya kuti ŵasambiri ŵeneco ŵa Kristu ŵakwenera kuŵa na citemwa na mikhaliro yinyake yakuyana na ya Kristu. Virimika vikati vyajumpapo, Petros wakaŵaciska Ŵakristu kuti ŵaŵe na mikhaliro ya nga ni kujikora, kutemwa ŵabali na ŵantu wose. Wakasazgirapo kuti kucita ntena kutipangiskenge kuti tileke kuŵa “ŵakata . . . nesi ŵambura vipasi.” (2 Petros 1:5-8) Mulimose umo vingaŵira, kweni tingakwaniska kuŵa na vipasi vya mzimu. Mphanyi tafwilirapo kuti  tirongore comeneko citemwa, lusungu, kuzika, na mikhaliro yinyake yiweme yakuyana na ya Kristu, cifukwa palije “marango ghakususka vyeneivi.” (Ŵagalatiya 5:23) Inya nadi, tiyeni tipase “vipasi vinandiko.”

Kupasa Vipasi vya Ufumu

8. (a) Kasi pali kukolerana wuli pakati pa vipasi vya mzimu na vya Ufumu? (b) Ni fumbo wuli ilo tikwenera kuliwona makora?

⁸ Vipasi vyakuwoneka makora na vyakunowa vikutoweska khuni. Ndipouli, vipasi ivi vikucita vinandi kuruska kutoweska waka khuni. Vipasi vikukhumbikaso pa kwandaniska mbuto ya khuni kwizira mu njere. Vipasi vya mzimu navyo vikucita vinandi kuruska kutoweska waka mukhaliro Wacikristu. Citemwa na cipulikano ni mikhaliro iyo yikutituma kuti tandaniske njere za makani gha Ufumu agho ghali mu Mazgu gha Ciuta. Wonani umo mpostole Paulos wakuyowoyera kukolerana uko kulipo. Wakuti: ‘Ise nase tiri na cipulikano [cipasi cinyake ca mzimu], ndipo nteura tikuyowoya.’ (2 Ŵakorinte 4:13) Paulos wakurongosora mwakuyana waka kuti ‘tipereke sembe ya marumbo kwa Ciuta rutaruta, ico ncipasi ca milomo’—cipasi caciŵiri ico tikwenera kupasa. (Ŵahebere 13:15) Pakuti tiri ŵapharazgi ŵa Ufumu wa Ciuta, kasi tiri na mupata wakuti tipase vipasi “vinandiko” mu umoyo withu?

9. Kasi kupasa cipasi kukung’anamura kupanga ŵasambiri? Rongosorani.

⁹ Kuti tizgore makora, cakwamba timanye danka ivyo ni vipasi vya Ufumu. Kasi ncakwenelera kuyowoya kuti kupasa vipasi ni kupanga ŵasambiri? (Mateyu 28:19) Kasi cipasi ico tipambikenge ni ŵantu awo tikuŵawovwira kuti ŵafike pa kubapatizika na kwamba kusopa Yehova? Yayi. Usange kuŵenge ntena mphanyi ncakugongoweska comene kwa Ŵakaboni wose awo ŵapharazga nyengo yitali mu vigaŵa ivyo ŵantu ŵakusura uthenga wawo. Usange cipasi ca Ufumu ico tapambika ni musambiri mupya, ipo Ŵakaboni ŵakulimbikira aŵa mphanyi ni minthavi yambura kubaba ya mu ciyerezgero ca Yesu! Kuyowoya unenesko, umu ndimo viliri yayi. Ipo ni vici comene-comene ivyo ni vipasi vya Ufumu mu uteŵeti withu?

Kupasa Vipasi mwa Kwandaniska Mbuto ya Ufumu

10. Kasi ciyerezgero ca Yesu ca mumiji na dongo lakupambana-pambana cikurongora wuli ico ncipasi ca Ufumu na ico ndico yayi?

¹⁰ Ciyerezgero ca mumiji na dongo lakupambana-pambana cikupereka zgoro—zgoro lakukwezga nkongono kwa awo ŵakupharazga mu vigaŵa vyakusuzga. Yesu wakayowoya kuti mbuto ni makani gha Ufumu agho ghali mu Mazgu gha Ciuta, ndipo dongo likwimira mtima wakuyerezgera wa muntu. Mbuto yinyake ‘yikawa pa nyata yiweme, yikamera, yikapasa vipasi.’ (Luka 8:8) Vipasi wuli? Mthibiti wa tirigu para wakura na kukhoma, ukupasa mithibiti yayi, kweni ukupasa mphuzi zipya. Ndimo viliriso ntena, Mkristu wakupasa cipasi, ŵasambiri ŵapya viŵi yayi, kweni mbuto yipya ya Ufumu.

11. Kasi mungarongosora wuli vipasi vya Ufumu?

¹¹ Pa lemba la pacanya ili, cipasi mbasambiri ŵapya yayi nesi mikhaliro ya Cikristu. Pakuti mbuto iyo yikamijika ni mazgu gha ufumu, vipasi vya mbuto vikwenera kuti ni kuthandazga uthenga wa Ufumu. Kupasa vipasi mu ntowa iyi kukung’anamura kuyowoya za Ufumu. (Mateyu 24:14) Kasi tingakwaniska kupasa vipasi vya Ufumu—kupharazga makani ghaweme gha Ufumu kwambura kupwererako umo tiliri? Inya tingakwaniska! Mu ciyerezgero cenecici, Yesu wakarongosora cifukwa.

Ticindike Ciuta mwa Kuteŵeta na Mtima Wose

12. Kasi Ŵakristu wose ŵangakwaniska kupasa vipasi vya Ufumu? Rongosorani.

¹² Yesu wakati: ‘Iyo yamijika pa nyata yiweme . . . yikupambika vipambi, yinyake makhumi pera khumi, na yinyake makhumi ghankonde na limo, na yinyake makhumi ghatatu.’ (Mateyu 13:23) Njere izo zapandika mu munda zingapambana pakupasa malinga na umo vintu viliri. Mwakuyana waka, ivyo tingacita pakupharazga makani ghaweme vingapambana malinga na nkongono zithu, ndipo Yesu wakarongora kuti wakamanya za ici. Ŵanyake ŵangaŵa na mipata yinandi, ŵanji ŵangaŵa makora na ŵankongono comene. Nteura, ivyo tingacita vingaŵa vinandi panji vicoko mwakupambana na ŵanyithu,  kweni usange tikuŵikapo mtima wose, Yehova wakukondwa. (Ŵagalatiya 6:4) Nanga kungaŵa kuti tikutondeka kupharazga cifukwa ca ucekuru panji urwari, Dada withu walusungu, Yehova, wakutiwona kuti tiri ŵamoza ŵa awo ‘ŵakurutilira kupasa vipasi vinandi.’ Cifukwa? Cifukwa tikumupa ‘vyose ivyo tiri navyo’—kuteŵeta na mtima withu wose. b—Marko 12:43, 44; Luka 10:27.

13. (a) Kasi cifukwa cikuru ico tikwenera ‘kurutilira’ kupasa vipasi vya Ufumu ncakuti wuli? (b) Ncivici cingatovwira kuti tirutilire kupasa vipasi mu vigaŵa ivyo ŵantu ŵakusurako uthenga withu? (Wonani bokosi pa peji 29.)

¹³ Mulimose umo tingapasira vipasi vya Ufumu, para tikukumbuka cifukwa ico tikucitira ici, tikhuŵirizgikenge kuti ‘tikhalirire ndiposo tirutilire kupasa.’ (Yohane 15:16) Yesu wakayowoya cifukwa cikuru, wakati: “Mu ceneici ndimo Ŵadada ŵakucindikikiramo, cakuti mupase vipasi vinandi.” (Yohane 15:8) Inya nadi, ncito yithu yakupharazga yikutuŵiska zina la Yehova mu ŵantu wose. (Salmo 109:30) Honor, Kaboni wa virimika vya mu ma 70 wakuti: “Nanga kungaŵa kuti tikuteŵeta mu vigaŵa ivyo ŵantu ŵakusurako uthenga withu, kweni ni mwaŵi wapadera nkanira kuyimira Wapacanya pa vyose.” Claudio, Kaboni uyo ngwakulimbikira kwambira mu 1974, apo wakati wafumbika cifukwa ico wacali kurutilira kupharazga nangauli mu cigaŵa cake muli ŵantu ŵacoko awo ŵakumutegherezga, iyo wakazunura mazgu gha pa Yohane 4:34. Lemba ili liri na mazgu gha Yesu ghakuti: “Vyakurya vyane nvyakuti ndicitenge khumbo la uyo wakandituma, na kufiska mulimo wake.” Claudio wakasazgirapo kuti: “Pakuti ndine mupharazgi wa Ufumu, nkukhumba kwambapo waka cara, kweni kufiska ncito yane nga umo Yesu wakacitira.” (Yohane 17:4) Ŵakaboni ŵa Yehova pa caru cose nawo ŵali na maghanoghano ghantena agha.—Wonani bokosi lakuti “Umo ‘Tingapasira Vipasi na Cizizipizgo,’” pa peji 29.

Kupharazga na Kusambizga

14. (a) Ni ncito ziŵiri zini izo Yohane Mbapatizi na Yesu ŵakacitanga? (b) Kasi ncito ya Ŵakristu lero mungayirongosora wuli?

¹⁴ Mupharazgi wakwamba wa Ufumu uyo wakuzunurika mu Makani Ghaweme ni Yohane Mbapatizi. (Mateyu 3:1, 2; Luka 3:18 ) Ncito yake yikuru yikaŵa ya kupharazga, ndipo wakacita ici na cigomezgo cose cakuti ‘ŵantu wose ŵapulikanenge.’ (Yohane 1:6, 7) Ŵanyake awo Yohane wakaŵapharazgiranga ŵakazgoka nadi ŵasambiri ŵa Kristu. (Yohane 1:35-37) Nteura, Yohane wakapharazganga na kupanga ŵasambiri. Yesu nayo wakaŵa mupharazgi na musambizgi. (Mateyu 4:23; 11:1) Ndico cifukwa cake Yesu wakarangura ŵarondezgi ŵake kuti ŵapharazge uthenga wa Ufumu kweniso kuti ŵawovwire ŵantu ŵa mitima yiweme kuti ŵaŵe ŵasambiri ŵake. (Mateyu 28:19, 20) Lero, ncito yithu nayo yikusazgapo kupharazga na kusambizga.

15. Kasi pali kuyana wuli mu nyengo yakale na yasono umo ŵantu ŵakucitira na ncito yakupharazga?

 ¹⁵ Mu nyengo ya ŵapostole, mu ma C.E., awo ŵakapulikanga Paulos wakupharazga na kusambizga, “ŵanyake ŵakapulikana na vintu ivyo vikayowoyekanga, ndipo ŵanyake kuti ŵakapulikana cara.” (Milimo 28:24) Ndimo vintu viliriso na lero wuwo. Ncacitima kuti mbuto zinandi za Ufumu zikuwa pa dongo lambura vundira. Nanga viŵe ntena, kweni mbuto zinyake zikuwa pa dongo la vundira, zikujinta misisi na kumera, nga ni umo Yesu wakayowoyera. Nakuti pa caru cose, pa avereji, ŵantu ŵakujumpa 5,000 ŵakuzgoka ŵasambiri ŵeneco ŵa Kristu sabata yiliyose! Ŵasambiri ŵapya aŵa ‘ŵakupulikana na vintu ivyo vikuyowoyeka’ nangauli ŵantu ŵanandi ŵakukhumba yayi kutegherezga. Ncivici cikaŵawovwira kuti ŵapokere uthenga wa Ufumu? Mtima waubwezi uwo Ŵakaboni nyengo zinandi ŵakarongoranga ukapangiska vintu kusinta—mtima waubwezi ukaŵa nga ni kuthilira mbuto iyo yapandika waka. (1 Ŵakorinte 3:6) Tiyeni tiwone viyerezgero viŵiri waka.

Mtima Waubwezi Ukusinta Vintu

16, 17. Cifukwa wuli nciweme kuŵarongora mtima waubwezi awo tikukumana nawo mu uteŵeti?

¹⁶ Karolien, ni Kaboni muwukirano wa ku Belgium. Dazi linyake wakafika pa nyumba ya mama munyake uyo wakakanirathu kutegherezga uthenga wa Ufumu. Pakuti mama yura wakaŵa na bandeji pa woko, Karolien na munyake uyo wakaŵa nayo ŵakakhumba kumovwira, mama wakakanaso. Mazuŵa ghaŵiri ghati ghajumpapo, Karolien na munyake ŵakarutaso kwa mama yura na kumufumba kuti wakujipulikako wuli na urwari. Karolien wakuyowoya kuti: “Kufuma penepapo tikawona kusinta. Wakazizwa kuwona kuti tikamurongora mtima waubwezi nadi. Wakatinjizga mu nyumba, nyengo yeneyiyo sambiro la Baibolo likayambika.”

¹⁷ Sandi, Kaboni wa ku United States, nayo wakurongora mtima waubwezi kwa awo wakuŵapharazgira. Wakulaŵiska mu nyuzi pepala ya kwenekuko kuti wawone ŵabonda awo ŵababika mwasono-sono. Para waŵasanga, wakunyamura Bukhu Langa la Nkhani za Baibulo c na kuruta nalo kwa ŵapapi awo ŵali na bonda. Ncipusu kwamba kudumbirana na nyina-mwana, cifukwa kanandi wakuŵa panyumba kurongora bonda ku ŵalendo. “Nkuyowoya na ŵapapi uweme wa kumurongora bonda citemwa mwa kumuŵazgira,” ndimo wakuyowoyera Sandi. “Pamanyuma pake nkuyowoya masuzgo agho ghalipo pakulera mwana mu caru ici lero.” Cifukwa cakuti wakwendera ŵapapi awo ŵali na bonda, sono-sono apa, mama munyake na ŵana ŵankondi na yumoza ŵali kwamba kuteŵetera Yehova. Usange tikwamba kucitapo kantu na kurongora mtima waubwezi, nase tingaŵa na cimwemwe cantena ici mu uteŵeti withu.

18. (a) Cifukwa wuli tingakwaniska ‘kupasa vipasi vinandi’? (b) Ni vintu wuli vitatu ivyo vikukhumbika kuti tiŵe musambiri ivyo vyazunurika mu buku la Yohane vyeneivyo mwaŵikapo mtima kuti mufiskenge?

¹⁸ Ncakupereka kongono nadi kumanya kuti tingakwaniska ‘kupasa vipasi vinandi.’ Kwali ndise ŵana panji ŵarara, ŵankongono panji ŵarwari, kwali tikupharazga mu cigaŵa ca vundira panji cambura vundira, tose tingapasa vipasi vinandi. Mwauli? Mwa kuŵa na vipasi vya mzimu na kwandaniska uthenga wa Ufumu wa Ciuta mwakuyana na nkongono zithu. Pa nyengo yeneyiyo pera, tifwilirepo kuti ‘tikhalirire mu mazgu gha Yesu’ kweniso kuti ‘titemwanenge.’ Apo ndipo tirongorenge kuti ‘tiri nadi ŵasambiri [ŵa Kristu]’ para tikufiska vintu vyakukhumbikwa vitatu ivi ivyo vyazunurika mu buku la Yohane.—Yohane 8:31; 13:35.

[Mazgu ghamusi]

Mafumbo Ghakuti Tighanaghanirepo

• Ni vipasi wuli ivyo tikwenera kupasa comeneko?

• Cifukwa wuli tingakwaniska ‘kupasa vipasi vinandi’?

• Ni vintu wuli vitatu ivyo vikukhumbika kuti tiŵe musambiri ivyo vikuzunurika mu buku la Yohane?

[Mafumbo]

[Bokosi/Cithuzithuzi pa peji 29]

Umo ‘Tingapasira Vipasi na Cizizipizgo’

NCIVICI cikumovwirani kuti murutilire kupharazga uthenga wa Ufumu mu vigaŵa ivyo ŵantu ŵakutegherezga viŵi yayi? Pano pali mazgoro gha fumbo ili.

“Kumanya kuti Yesu wakutovwira kukutipa nkongono kuti tileke kugongowa kweni kuti tilimbikire nanga ŵantu ŵangaŵa ŵanonono wuli mu cigaŵa.”—Harry, wa virimika 72; wakabapatizika mu 1946.

“Nyengo zose Lemba la 2 Ŵakorinte 2:17 (NW) ndilo likunipa nkongono. Lemba ili likuyowoya kuti para tiri mu uteŵeti, ‘Ciuta pamoza na Kristu ŵakutiwona.’ Usange nili mu uteŵeti, nkutemwa kwenda pamoza na ŵabwezi ŵane ŵa pamtima.”—Claudio, wa virimika 43; wakabapatizika mu 1974.

“Kuyowoya unenesko, kupharazga ni ncito yizito kwa ine. Ndipouli, nawona kuti mazgu gha Salmo 18:29 ngaunenesko, ghakuti: ‘Pamo na [Ciuta wane] ndingaŵenuka linga.’”—Gerard, wa virimika 79; wakabapatizika mu 1955.

“Nkukondwa usange naŵazgira muntu lemba mu uteŵeti, cifukwa nkumanya kuti Baibolo lasanda mtima wake.”—Eleanor, wa virimika 26; wakabapatizika mu 1989.

“Nkuyezga ntowa izi na izi zakwambiskira kudumbirana. Pali ntowa zinandi comene izo nikwaniskenge yayi kuzigwiriskira ncito mu virimika ivyo vyakhalako vya umoyo wane.”—Paul, wa virimika 79; wakabapatizika mu 1940.

“Nkukwiya yayi usange muntu waniyowoyera uheni. Nkudumba nayo mwakufwasa. Nkuyowoya na ŵantu na kupulikizga maghanoghano ghawo.”—Daniel, wa virimika 75; wakabapatizika mu 1946.’

“Nakumana na awo ŵabapatizika mwasono-sono awo ŵakaniphalira kuti upharazgi wane wacita ncito yikuru kuti ŵaŵe Ŵakaboni. Kwambura kumanyako kantu, mbali munyakeso wakasambiranga nawo Baibolo na kuŵawovwira kuti ŵaye pantazi. Nkukondwa kumanya kuti uteŵeti withu ni ncito ya unandi.”—Joan, wa virimika 66; wakabapatizika mu 1954.

Ncivici camovwirani imwe kuti ‘murutilire kupasa vipasi na cizizipizgo’?—Luka 8:15.

[Vithuzithuzi pa peji 28]

Tikupasa vipasi vinandi para tikurongora vipasi vya mzimu na kupharazga uthenga wa Ufumu

[Vithuzithuzi pa peji 31]

Kasi Yesu wakang’anamurangaci apo wakaphalira ŵapostole ŵake kuti: ‘Rutilirani kupasa vipasi vinandi’?