Kasi Mugonero wa Fumu Ukung’anamuraci kwa Imwe?
Kasi Mugonero wa Fumu Ukung’anamuraci kwa Imwe?
‘Mweneuyo wakurya cingwa panji wakumwapo nkombo ya Fumu kwambura kwenerera, wakwanangira thupi na ndopa za Fumu.’—1 ŴAKORINTE 11:27.
1. Ncakucitika wuli cakuzirwa ico ciŵengeko mu 2003, ndipo cikambika wuli?
CAKUCITIKA cakuzirwa nkanira mu 2003 cizamuŵako pa April 16 para dazi lanjira. Ŵakaboni ŵa Yehova ŵazamuwungana kuti ŵakumbukire nyifwa ya Yesu Kristu. Nga ni umo tikawonera mu nkani iyo yajumpa, Yesu ndiyo wakambiska Cikumbusko ici, ceneico cikucemekaso Mugonero wa Fumu, pamanyuma pakuti iyo na ŵapostole ŵake ŵacita Paska pa Nisan 14, 33 C.E. Pa Cikumbusko, cingwa cambura cirungu na vinyo liswesi vikwimira thupi la Yesu lambura kwananga na ndopa zake. Iyi ni sembe yekha iyo yingawombora ŵantu ku kwananga na nyifwa ivyo ŵali kuhara.—Ŵaroma 5:12; 6:23.
2. Ni mazgu wuli ghakucenjezga agho ghali pa 1 Ŵakorinte 11:27?
2 Awo ŵakurya cingwa na kumwa vinyo pa Cikumbusko ŵakwenera kucita ici mwakwenerera. Mpostole Paulos wakayowoyapo za ici apo wakalembera Ŵakristu ku Korinte, kwenekuko Mugonero wa Fumu ukacitikanga mwambura kwenerera. (1 Ŵakorinte 11:20-22) Paulos wakati: ‘Mweneuyo wakurya cingwa panji kumwapo nkombo ya Fumu kwambura kwenerera, wakwanangira thupi na ndopa za Fumu.’ (1 Ŵakorinte 11:27) Kasi mazgu agha ghakung’anamuraci?
Ŵanyake Ŵakacitanga Mwambura Kwenelera
3. Kasi Ŵakristu ŵanandi ku Korinte ŵakacitanga wuli pa nyengo ya Mugonero wa Fumu?
3 Ŵakristu ŵanandi mu Korinte ŵakaryanga cingwa na kumwa vinyo pa Cikumbusko mwambura kwenerera. Ŵakapindananga ŵekhaŵekha, nyengo zinyake ŵanyake ŵakizanga na cakurya cawo na kuzakarya uku Cikumbusko cili mukati panji pambere cindayambe, ŵakaryanga, ŵakamwanga na kuloŵera. Ŵakaŵa maso yayi mwauzimu nesi mu maghanoghano. Ici cikaŵapangiska ‘kunangira thupi na ndopa za Fumu.’ Awo ŵakaleka kuryerathu ku nyumba zawo, ŵakapulikanga njara na kwamba kughanaghana za cakurya. Inya, ŵanandi ŵakaryanga cingwa na kumwa vinyo mwambura ncindi nesi kumanya kuzirwa kwa cakucitika ici. Lekani ŵakajicemera ceruzgo pa iwo ŵeneko!—1 Ŵakorinte 11:27-34.
4, 5. Cifukwa wuli awo kanandi ŵakurya cingwa na kumwa vinyo pa Cikumbusko ŵakwenera kujipenda?
4 Para nyengo ya Cikumbusko yikusenderera cirimika cilicose, nciweme kuti awo kanandi ŵakurya na kumwa vinyo ŵajipendenge. Kuti ŵarye mwakwenerera cakurya ici, ŵakwenera kuŵa mu mukhaliro uweme wauzimu. Yose uyo wakuyuyura sembe ya Yesu wangasuzgikirapo, ‘wangafumamo mukati mwa ŵantu ŵa Ciuta,’ nga ni umo vikaŵira kwa Muisrayeli uyo wakaryanga sembe ya cimango uku ngwakukazuzgika.—Leviticus 7:20; Ŵahebere 10:28-31.
5 Paulos wakayaniska Cikumbusko na cakurya ico ŵantu ŵakaryeranga pamoza mu nyengo ya Ŵaisrayeli. Wakayowoya za awo ŵakaryanga na kumwera pamoza na Kristu, wakati: “Mulive kumanya kumwapo nkombo ya Fumu, na nkombo ya mizimu yiheni: mulive kumanya kusanganapo gome la Fumu na gome la mizimu yiheni.” (1 Ŵakorinte 10:16-21) Usange muntu uyo kanandi wakurya na kumwa vinyo pa Cikumbusko wacita kwananga kukuru, wakwenera kumuthulira Yehova na kupempa ŵanarumi ŵarara ŵa mpingo kuti ŵamovwire mwauzimu. (Zintharika 28:13; Yakobe 5:13-16) Usange muntu uyo warapa na kurongora vipambi vyakuti warapa nadi, mbwenu waryengeso mwambura kwenerera yayi.—Luka 3:8.
Kukhalapo Mwancindi
6. Kasi Ciuta wapereka kwa njani mwaŵi wa kurya Mugonero wa Fumu?
6 Kasi ŵantu awo lero ŵakucitira viweme ŵabali ŵa Kristu—ŵakukhalira ŵa 144,000—ŵakwenera kurya cingwa na kumwa vinyo pa Mugonero wa Fumu? (Mateyu 25:31-40; Civumbuzi 14:1) Yayi. Ciuta wapereka mwaŵi uwu kwa ŵantu awo mzimu utuŵa waŵasanka kuti ŵaŵe ‘ŵahariri ŵamoza na Kristu.’ (Ŵaroma 8:14-18; 1 Yohane 2:20) Sono kasi awo ŵazamuŵa na umoyo wamuyirayira mu paradiso pa caru capasi mu Ufumu ŵakwenera kucita wuli? (Luka 23:43; Civumbuzi 21:3, 4) Pakuti mbahariri ŵamoza na Yesu yayi kucanya, iwo ŵakukhalapo mwancindi pa Cikumbusko.—Ŵaroma 6:3-5.
7. Cifukwa wuli Ŵakristu ŵakwambilira ŵakamanyanga kuti ŵakwenera kurya cingwa na kumwa vinyo pa Cikumbusko?
7 Ŵakristu ŵaunenesko ŵakwambilira ŵakaŵa ŵakuphakazgika na mzimu utuŵa. Ŵanandi ŵa iwo mzimu ukaŵawovwiranga kuti ŵacite cintu cacilendo cimoza panji vinandi, nga ni kuyowoya viyowoyero vyakupambana-pambana. Pa cifukwa ici, kukatenge kuŵenge kunonono yayi kujimanya kuti mzimu waŵasanka ndipo ŵakwenera kurya cingwa na kumwa vinyo pa Cikumbusko. Kweni mu nyengo yithu, muntu wangamanyikwa na mazgu gha lemba ili: ‘Wose awo ŵakurongozgeka na mzimu wa Ciuta, ŵeneaŵo ndiŵo mbana ŵa Ciuta. Cifukwa kuti mukapokera mzimu wa wuzga wa kumofyani cara; kweni mukapokera mzimu kuŵa ŵana, mwa weneuwo tikucemerezga, “Abba, Ŵadada.” ’—Ŵaroma 8:14, 15.
8. Mbanjani ŵakwimira ‘tirigu’ na “duru” awo ŵakuzunurika mu Mateyu cipaturo 13?
8 Virimika vinandi vikati vyajumpapo, Ŵakristu ŵakuphakazgika ŵakakuranga nga ni ‘tirigu’ mu munda wa “duru,” panji Ŵakristu ŵautesi. (Mateyu 13:24-30, 36-43) Kwambira mu ma 1870, ‘tirigu’ wakayamba kuwoneka pakweru. Pafupifupi virimika 100 vikati vyajumpa, ŵalaŵiriri ŵakuphakazgika ŵakaphalirika kuti: “Ŵarara . . . ŵakwenera kuphalira awo ŵawungana [pa Cikumbusko] fundo izi kuti,—(1) ŵakwenera kuŵa na cipulikano mu ndopa [za Yesu]; na (2) kujipereka ku Fumu na ku uteŵeti wake mupaka pa nyifwa yawo. Ŵarara ŵakwenera kuphalira wose awo ŵakucita ivi kuti mbakwenerera kusanganapo pa kukumbukira nyifwa ya Fumu.”—Studies in the Scriptures, Series VI, The New Creation, peji 473. a
Kupenja “Mberere Zinyake”
9. Kasi mbanjani ŵakamanyikwa kuŵa “mzinda ukuru” uwo ukarongosoreka mu 1935, ndipo awo kumanyuma ŵakaryanga na kumwa pa Cikumbusko ŵakacita wuli?
9 Nyengo yati yarutapo, gulu la Yehova likayamba kuŵika mtima pa ŵantu ŵanyake padera pa ŵarondezgi ŵa Kristu ŵakuphakazgika. Cintu cinyake cambura kuruwika cikacitika mu ma 1930. Pambere nyengo iyi yindafike, ŵantu ŵa Ciuta ŵakawonanga “mzinda ukuru” uwo ukuyowoyeka pa Civumbuzi 7:9 nga ni gulu laciŵiri lauzimu ilo liyenge kucanya kukakhala pamoza na ŵa 144,000—nga mbanyawo ŵa mwanakazi wa Kristu. (Salmo 45:14, 15; Civumbuzi 7:4; 21:2, 9) Kweni pa May 31, 1935, pa ungano wa cigaŵa wa Ŵakaboni ŵa Yehova ku Washington, D.C., U.S.A., nkani yikarongosora mwakupulikikwa makora kuti “mzinda ukuru” mbantu awo ni “mberere zinyake,” awo ŵakukhala mu nyengo yaumaliro iyi. (Yohane 10:16) Ungano ukati wamara, ŵanyake awo kumanyuma ŵakaryanga na kumwa pa Cikumbusko ŵakalekera penepapo cifukwa ŵakamanya kuti ŵakhalenge pano pa caru capasi, kucanya yayi.
10. Kasi mungarongosora wuli ico “mberere zinyake” zikulindirira ndiposo na milimo yawo?
10 Comene-comene kwambira mu 1935 paŵa kupenja awo ŵangaŵa “mberere zinyake.” Aŵa mbantu awo ŵali na cipulikano mu sembe yakuwombora, mbakujipereka kwa Ciuta, na kovwira “kamskambo kacoko” pa ncito ya kupharazga Ufumu. (Luka 12:32) Mberere zinyake izi zikulindirira kuzakakhala na umoyo wamuyirayira pa caru capasi, kweni mu vintu vinyake vyose, ŵakuyana na ŵakukhalira ŵalero awo mbahariri ŵa Ufumu. Nga ni umo ŵalendo mu Israyeli ŵakasoperanga Yehova na kurondezga Dango, mberere zalero zikuzomera na kucita milimo ya Cikristu, nga ni kupharazga makani ghaweme pamoza na Ŵaisrayeli ŵauzimu. (Ŵagalatiya 6:16) Nga ni umo vikaŵira kuti mulendo mu Israyeli wakaŵanga fumu yayi nesi musofi, mberere zinyake nazo zingaŵa mafumu yayi mu Ufumu wakucanya nesi kucita usofi.—Duteronome 17:15.
11. Kasi deti lakubapatizikira likukhwaskana wuli na fundo yakuti muntu wangaŵa wakuphakazgika panji yayi?
11 Mu ma 1930, kukayamba kuwoneka makora kuti awo ŵarutenge kucanya ŵasankika kale. Kujumpa pa virimika 70 sono, maso ghali pa mberere zinyake izo zikhalenge pano pasi. Usange muntu wakuphakazgika wananga, ncakuwonekerathu kuti munyake kufuma mu mberere zinyake uyo wateŵetera Ciuta mwakugomezgeka nyengo yitali, wangasankika kuti wajare dangazi ilo lapangika pa nambara ya 144,000.
Cifukwa Ico Ŵanyake Ŵakuwonera nga Ŵasankika
12. Ni vici ivyo vingapangiska muntu kuleka kurya na kumwa vinyo pa Cikumbusko, ndipo cifukwa wuli?
12 Ŵakristu ŵakuphakazgika ŵali na cigomezgo cose kuti ŵacemeka kuruta kucanya. Kweni wuli usange ŵantu awo ŵandacemeke kuruta kucanya ŵakurya cingwa na kumwa vinyo pa Cikumbusko? Ŵati ŵamanya sono kuti ŵayenge kucanya cara, njuŵi yawo yikwenera kuti yiŵalekeskenge kurya cingwa na kumwa vinyo pa Cikumbusko. Ciuta wangakondwa yayi na muntu waliyose uyo wakujirongora kuti wacemeka kuya kucanya kukaŵa fumu na musofi apo wakujimanya kuti wandacemeke. (Ŵaroma 9:16; Civumbuzi 20:6) Yehova wakalanga mbumba ya Kora iyo yikakhumbanga usofi wamwene Aroni. (Exodus 28:1; Maŵazgo 16:4-11, 31-35) Usange Mkristu waliyose wamanya kuti waryerangamo bweka wakwenera kulekerathu ndipo warombe Yehova kuti wamugowokere.—Salmo 19:13.
13, 14. Cifukwa wuli ŵanyake ŵangaghanaghana kuti ŵacemeka kuya kucanya?
13 Cifukwa wuli ŵanyake ŵangawona nga kuti ŵacemeka kuya kucanya? Para mwanarumi panji mwanakazi wake wafwa, panji usange ngozi yacitika vingapangiska muntu kuvuka nawo umoyo wa pa caru capasi. Ŵanyake ŵangadokera kuruta kucanya uko munyawo uyo wakuti ni Mkristu wakuphakazgika warutenge. Kuyowoya unenesko, Ciuta wandatumepo muntu kuti wasore ŵantu ŵakuti ŵarute kucanya. Ndiposo Ciuta wakuphakazga yayi ŵahariri ŵa Ufumu mwa kuŵacitiska kuti ŵapulikenge mazgu kufuma ku malo ghanyake.
14 Cisambizgo cautesi ico visopo vikusambizga kuti ŵantu wose ŵaweme ŵakuruta kucanya cingapangiska ŵanyake kughanaghana kuti nawo ŵayenge kucanya. Pa cifukwa ici, ticenjere kuti tileke kunyengeka na vigomezgo ivyo tikaŵa navyo pakwamba. Mwaciyerezgero, ŵanyake ŵangajifumba kuti: ‘Kasi nkhumwa munkhwara uwo ukuninanga wongo? Kasi nkuyegheka na maghanoghano ghakuti mzimu waniphakazga?’
15, 16. Cifukwa wuli ŵantu ŵacoko waka ŵangaghanaghana kuti mbakuphakazgika?
15 Ŵanyakeso ŵangajifumba kuti: ‘Kasi nkurya na kumwa kuti nijiwoneske? Kasi nkubunukira mazaza kuti niŵe muhariri na Kristu mu nyengo yakuntazi?’ Mu nyengo ya Ŵakristu ŵakwambilira, apo ŵahariri ŵa Ufumu ŵakasankika, ni wose yayi ŵakaŵa na milimo mu mpingo. Ndipo ŵantu awo ŵacemeka kuya kucanya ŵakujiwoneska yayi, nesi kukhumba kumanyikwa ku ŵantu. Kweni ŵakujiyuyura pakuti mbamoza ŵa awo ŵali na ‘maghanoghano gha Kristu.’—1 Ŵakorinte 2:16.
16 Ŵanyake ŵangaghanaghana kuti ŵacemeka kuya kucanya cifukwa ŵamanya vintu vinandiko mu Baibolo. Kweni mzimu uwo ukuphakazga muntu ukumucitiska kuti waŵe na cimanyisko cacilendo yayi, cifukwa Paulos wakaperekapo urongozgi ku ŵakuphakazgika ŵanyake. (1 Ŵakorinte 3:1-3; Ŵahebere 5:11-14) Ciuta wali na ntowa iyo wakuperekera cakurya cauzimu ku ŵantu wose. (Mateyu 24:45-47) Pa cifukwa ici, paŵavye muntu waghanaghane kuti kuŵa Mkristu wakuphakazgika kukupangiska kuti waŵe na mahara ghanandi kuruska awo ŵazamukhala pa caru capasi. Kuphakazgika na mzimu kukuthemba pa luso la kuzgora mafumbo gha mu Malemba yayi, kupharazga, nesi kuyowoya makora nkani za Baibolo. Ŵakristu ŵanyake awo ŵakhalenge pano pasi, nawo ŵangaŵa kuti ŵakucita makora mu vigaŵa ivi.
17. Kasi kuphakazga kukuthemba pa vici, ndiposo pa njani?
17 Usange Mkristu munyithu watifumba pa nkani ya kuruta kucanya, mbali murara panji Mkristu wakukhwima wangadumba nayo nkani iyi muntu uyo. Ndipouli, muntu wangasankira munyake yayi cakucita pa nkani iyi. Uyo wasankika nadi wakufumba ŵanyake yayi usange warutenge kucanya. Ŵakristu ŵakuphakazgika ‘ŵalikubabikaso mu mbuto ya kwanangika cara, kweni yambura kwanangika, na mazgu gha Ciuta, uyo ngwamoyo na wakukhalirira.’ (1 Petros 1:23) Kwizira mu Mazgu na mzimu wake, Ciuta wakupanda “mbuto” iyo yikupangiska muntu ‘kubabikaso,’ na kumupa cilindizga ca kucanya. (2 Ŵakorinte 5:17) Yehova ndiyo wakusanka. Kuphakazga kuti kukuthemba pa ‘uyo wakukhumba . . . nesi uyo wakucimbira cara, kweni pa Ciuta.’ (Ŵaroma 9:16) Sono kasi muntu wangapanikizga wuli kuti wacemeka nadi kuya kucanya?
Ico Ŵakumanyira Kuti Ŵaphakazgika Nadi
18. Kasi mzimu wa Ciuta ukupanikizgira wuli na mzimu wa Ŵakristu ŵakuphakazgika?
18 Mzimu wa Ciuta ndiwo ukupanikizgira Ŵakristu ŵakuphakazgika kuti ŵapika mwaŵi wa kukakhala kucanya. Paulos wakalemba kuti: ‘Mukapokera mzimu kuŵa ŵana, mwa weneuwo tikucemerezga, “Abba, Ŵadada.” Mzimu ukupanikizga pamoza na mizimu yithu, kuti tiri ŵana ŵa Ciuta; ndipo usange tiri ŵana, tiriso ŵahariri; ŵahariri ŵa Ciuta, na ŵahariri pamoza na Kristu; usange nadi tikukomwera pamoza na iyo, mwakuti ticindikikeso pamoza na iyo.’ (Ŵaroma 8:15-17) Cifukwa ca nkongono yikuru ya mzimu utuŵa, mzimu wa ŵakuphakazgika ukuŵapanikizira kuti ŵamanye ivyo Malemba ghakuyowoya za ŵana ŵauzimu ŵa Yehova. (1 Yohane 3:2) Mzimu wa Ciuta ukuŵamanyiska kuti mbana ŵa Ciuta ndipo ukupanda cilindizga capadera mwa iwo. (Ŵagalatiya 4:6, 7) Inya, catenge ciŵenge ciweme nkanira kuti ŵakhale pano pa caru capasi kwamuyirayira pamoza na mbumba zawo na mabwezi ghawo, kweni ncilindzga ico Ciuta wali kuŵapa yayi. Kwizira mu mzimu wake, Ciuta wali kuŵika mwa iwo cilindizga cankongono kwakuti mbakunozgeka kuleka viweme vyose vya pa caru capasi.—2 Ŵakorinte 5:1-5, 8; 2 Petros 1:13, 14.
19. Kasi pangano lipya likugwira ncito wuli mu umoyo wa Ŵakristu ŵakuphakazgika?
19 Ŵakristu ŵakuphakazgika ŵakumanya nkanira kuti ŵarutenge kucanya, nakuti ŵali mu pangano lipya. Yesu wakayowoyapo za ici apo wakambiska Cikumbusko, wakati: ‘Nkombo iyi ndi pangano lipya mu ndopa zane, izo zithikirenge imwe.’ (Luka 22:20) Mu pangano lipya ili muli Ciuta na Ŵakristu ŵakuphakazgika. (Yeremiya 31:31-34; Ŵahebere 12:22-24) Yesu ni mwenda-pakati. Pakuti pangano liri kuŵako na ndopa za Kristu, kuti likukhwaska Ŵayuda pera yayi, kweniso na ŵantu ŵamitundu kuti ŵacemeke na zina la Yehova na kuŵapanga kuŵa “mpapu” ya Abrahamu. (Ŵagalatiya 3:26-29; Milimo 15:14) “Pangano la muyirayira” ili likupangiska Ŵaisrayeli wose ŵauzimu kuti ŵaukire ku umoyo wambura kufwa wa kucanya.—Ŵahebere 13:20.
20. Kasi Ŵakristu ŵakuphakazgika ŵali kunjira mu pangano wuli na Kristu?
20 Ŵakristu ŵakuphakazgika ŵakumanya nadi kuti ŵarutenge kucanya. Iwo ŵali na pangano linyake ilo ni pangano la Ufumu. Pa nkani ya kuŵa pamoza na Kristu, Yesu wakati: ‘Imwe ndimwe mwakhala pamoza na ine mu viyezgo vyane; ndipo ine nkumwimikirani Ufumu, umoso Ŵadada ŵali kundimikira Ine.’ (Luka 22:28-30) Pangano ili pakati pa Kristu na mafumu ghanyake likhalirirenge muyirayira.—Civumbuzi 22:5.
Mwezi wa Cikumbusko—Nyengo Yakukondweska
21. Kasi tingapindula wuli mwakukwana mu mwezi wa Cikumbusko?
21 Mwezi wa Cikumbusko ukuŵa na vyakukondweska vinandi. Tingapindula na kuŵazga Baibolo uko kukugaŵirika mu nyengo iyo. Yikuŵaso nyengo yiweme ya kuromba, ya kupharazgira na kughanaghanirapo pa umoyo na nyifwa ya Yesu apo wakaŵa pano pasi. (Salmo 77:12; Ŵafilipi 4:6, 7) Cakucitika cekha ici cikutikumbuska citemwa ico Ciuta na Kristu ŵarongora pakupereka sembe yakuwombora. (Mateyu 20:28; Yohane 3:16) Sembe iyi yikutipa cilindizga na cipembuzgo na kutikhozga kuti tifwilirepo kurondezga ivyo Kristu wakacita. (Exodus 34:6; Ŵahebere 12:3) Cikumbusko cikweneraso kutipa nkongono kuti tikwaniske kujipatulira uko tiri kucita pakuŵa ŵateŵeti ŵa Ciuta na ŵarondezgi ŵakugomezgeka ŵa Mwana wake wakutemweka.
22. Kasi cawanangwa cikuru comene ico Ciuta wali kupereka ku ŵantu ncivici, ndipo tingarongora wuli kuwonga?
22 Navyo ni vyawanangwa viweme ivyo Yehova wakutipa! (Yakobe 1:17) Tiri na urongozgi wa Mazgu ghake, covwiro ca mzimu wake na cilindizga ca umoyo wamuyirayira. Cawanangwa cikuru comene ca Ciuta ni sembe ya Yesu yakuphepiskira zakwananga za ŵakuphakazgika na ŵantu wose awo ŵali na cipulikano mwa iyo. (1 Yohane 2:1, 2) Sono kasi nyifwa ya Yesu njakuzirwa wuli kwa imwe? Kasi muzamuŵapo pakati pa awo ŵakurongora kuwonga mwa kuwungana pamoza para dazi lanjira pa April 16, 2003, kuti muzakawone umo Mugonero wa Fumu ukucitikira?
[Mazgu ghamusi]
a Lakupharazgika na Ŵakaboni ŵa Yehova kweni sono likusindikizgika yayi.
Mazgoro Ghinu Ngakuti Wuli?
• Mbanjani ŵakwenera kurya cingwa na kumwa vinyo pa Cikumbusko?
• Cifukwa wuli ŵa “mberere zinyake” ŵakukhalapo waka mwancindi pa Mugonero wa Fumu?
• Kasi Ŵakristu ŵakuphakazgika ŵakumanya wuli kuti ŵakwenera kurya cingwa na kumwa vinyo pa Cikumbusko ca nyifwa ya Kristu?
• Mwezi wa Cikumbusko ni nyengo yiweme yakucitira vici?
[Mafumbo]
[Vithuzithuzi pa peji 14]
(Mu magazini yakusindikizga ndimo vikuwoneka makora)
Unandi wa awo Ŵakiza pa Cikumbusko
MU MAMILIYONI
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Cithuzithuzi pa peji 14]
Kasi muzamuŵapo pa Mugonero wa Fumu cirimika cino?
[Vithuzithuzi pa peji 17]
Mwezi wa Cikumbusko ni nyengo yiweme yakuŵazgira comene Baibolo na kupharazga Ufumu