Kusuzgika mu Zina la Cisopo Cifukwa Wuli?

KASI mukughanaghana kuti ŵantu ŵakwenera kukomwa cifukwa ca cisopo cawo? Viŵi yayi​—⁠ŵakwenera kusuzgika yayi usange vyakucita vyawo vikutimbanizga yayi wanangwa wa ŵanyawo. Ndipouli, kusuzgika mu zina la cisopo kwaŵa kukucitika kwambira kale ndipo kucalipo. Mwaciyerezgero, Ŵakaboni ŵa Yehova ŵanandi ku Europe na vigaŵa vinyake vya pa caru capasi kanandi ŵakapokekanga wanangwa wawo na kuŵasuzga mwankaza mu virimika 50 ivyo vyajumpa.

Mukati mwa nyengo yira, Ŵakaboni ŵa Yehova ŵakatimbika mwankaza na kusuzgika kwa nyengo yitali na maboma ghose ghaŵiri gha cipani cimoza mu Europe. Kasi ivyo vikaŵacitikira vikutisambizgaci pakuyowoya za kusuzgika mu zina la cisopo? Ndipo tingasambirapo vici pa ivyo ŵakacita apo ŵakasuzgikanga?

“Mba Caru Cara”

Ŵakaboni ŵa Yehova ŵakuyezgayezga kurondezga marango gha mu caru ico ŵakukhala, kuŵa ŵamtende, ndiposo ŵa mukhaliro uweme. Ŵakususka boma cara panji kupindana nalo, nesi kujicemera dara suzgo kuti ŵafwire cisopo cawo. Ŵakristu aŵa ŵakunjiramo yayi mu ndyari. Ici cikukolerana na mazgu gha Yesu ghakuti: “[Ŵarondezgi ŵane] mba caru cara, nga ndi umo ine kuti ndiriri wa caru cara.” (Yohane 17:16) Maboma ghanandi ghakumanya kuti Ŵakaboni ŵakunjiramo yayi mu ndyari. Kweni ŵarongozgi ŵankaza ŵakucindika yayi dango la mu Baibolo  lakuti Ŵakristu ŵaleke kuŵa cigaŵa ca caru.

Cifukwa ico ŵakucitira ntena cikarongosoreka pa ungano uwo ukacitikira pa Yunivesite ya Heidelberg, ku Germany, mu November 2000. Ungano uwu ukaŵa na mutu wakuti “Kucicizga na Kukoserezga: Ŵakaboni ŵa Yehova pasi pa cipani ca National Socialist na Boma la Cikomyunizimu.” Dr.Clemens Vollnhals wa pa Hannah-Arendt-Institute for Research Into Totalitarianism wakayowoya kuti: “Maboma gha cipani cimoza ghakucita waka ndyari yayi. Kweni ghakucicizga ŵantu kuti ŵajiperekenge na umoyo wawo wose kwa iwo.”

Ŵakristu ŵaunenesko ŵangapereka yayi “umoyo wawo wose” ku boma la ŵantu cifukwa ŵali kurapa kuti ŵajilambikenge kwa Yehova Ciuta pera. Ŵakaboni awo ŵakukhala mu vyaru umo muli muwuso wankaza ŵakuwona kuti vintu vinyake ivyo boma likukhumba nyengo zinyake vikususkana na cipulikano cawo. Kasi ŵakucitaci para vintu vyaŵa ntena? Kwambira kale, Ŵakaboni ŵa Yehova ŵakurondezga mazgu agho ghakayowoyeka na ŵasambiri ŵa Yesu kuti: “Tikwenera kupulikira Ciuta kwakuruska ŵantu.”​—⁠Milimo 5:⁠29.

Ŵakaboni ŵanandi ŵakademelera ku cipulikano cawo ndipo ŵakarutilira kuleka kunjizgika mu ndyari, mwambura kupwererako kantu za masuzgo na nkaza zikuru izo ŵakakumana nazo. Kasi ŵakazizipizga wuli? Kasi nkongono zakucitira ntena ŵakazitora nku? Lekani ŵajizgorere ŵekha. Ndipo tiyeni tiwone ico waliyose wa ise, Kaboni panji yayi, wangasambirapo pa ivyo ŵakakumana navyo.

[Mazgu Ghakukhozgera pa peji 4]

Ŵakaboni ŵa Yehova ku Germany ŵakatimbika mwankaza na kusuzgika kwa nyengo yitali na maboma ghose ghaŵiri gha cipani cimoza mu virimika 50 ivyo vyajumpa

[Mazgu Ghakukhozgera pa peji 4]

“Maboma gha cipani cimoza ghakucita waka ndyari yayi. Kweni ghakucicizga ŵantu kuti ŵajiperekenge na umoyo wawo wose kwa iwo.”—Dr. Clemens Vollnhals

[Cithuzithuzi pa peji 4]

Mbumba ya Kusserow yikaŵikika mu jere cifukwa ca kukana kutaya cipulikano cawo

[Cithuzithuzi pa peji 4]

Johannes Harms wakakomeka mu msasa wa Nazi cifukwa ca cipulikano cake