Mugonero wa Fumu Kasi ni Vici?

NCIVICI cikwiza mu maghanoghano ghinu para mwapulika mazgu ghakuti “Mugonero wa

Fumu”? Para ŵapulika mazgu agha, ŵantu ŵanandi ŵakughanaghana za cithuzithuzi cakutowa ca ku Milan, Italy, ico Leonardo da Vinci wakadinda (1452-1519). Fundo njakuti kwambira kale, Mugonero wa Fumu ni nkani iyo yikuyowoyeka comene na ŵantu ŵaluso, ŵalembi, na ŵakwimba.

Kweni kasi Mugonero wa Ufumu ni vici, ndipo wuli na ng’anamuro wuli kwa ŵantu lero? Mabuku ghakufufuzamo nkani na madikishonare ghamuphaliraninge kuti Mugonero wa Fumu, uwo ukucemekaso kuti Mugonero Waumaliro, ni cakurya ico Yesu wakarya lumoza na ŵapostole ŵake pa usiku wakuti namacero wafwenge. Pakuti cikaŵa cakurya caumaliro ca namise ico wakarya lumoza na ŵasambiri ŵake ŵakugomezgeka, lekani cikucemeka Mugonero Waumaliro. Ndipo pakuti cikambika na Fumu Yesu Kristu iye mweneko, ncakwenelera nadi kuti cicemeke Mugonero wa Fumu.

Kwambira kale, ŵantu ŵanandi ŵataya umoyo wawo cifukwa ca vintu ivyo ŵeneko ŵakughanaghana kuti ni vyakuzirwa. Cifukwa ca nyifwa za ŵantu ŵanyake, ŵanyake ŵakusanga candulo ca kanyengo kacoko waka. Nangauli nyifwa za ŵantu ŵakujipereka aŵa zingaŵa zakucindikika comene, kweni zingaforako yayi na pacoko wuwo ku nyifwa yakuzirwa ya Yesu Kristu. Kusazgaso apa, palije nyifwa ya muntu wa mu caru ici ca masuzgo iyo yingaŵa yakuzirwa kwa ŵantu wose. Cifukwa?

Kuti tizgore fumbo ili na kumovwirani kumanya ng’anamuro ilo Mugonero wa Fumu wuli nalo kwa imwe, tikumupempani kuti muŵazge mutu wakurondezgapo.