Mugonero wa Fumu Wuli na Ng’anamuro Likuru kwa Imwe

KASI Mugonero wa Fumu wuli na ng’anamuro likuru na lakukhaliska kwa imwe? Kuti timanye, tiyeni tiwone danka ng’anamuro ilo Yesu Kristu wakayowoya pakukhwaskana na cakucitika capadera ici.

Pa usiku wa Nisan 14, 33 C.E., Yesu wakawungana na ŵapostole ŵake 12 mu cipinda ca pacanya ku Yerusalemu kuti ŵacite Paska. Ŵakati ŵarya Paska, Yuda, uyo wakenderanga mphiska Yesu wakafuma kukatora ŵarwani. (Yohane 13:21, 26-30) Ndipo Yesu wakambiska ‘Mugonero wa Fumu’ ku ŵapostole 11 awo ŵakakhalapo. (1 Ŵakorinte 11:20) Mugonero uwu ukucemekaso Cikumbusko cifukwa Yesu wakatuma ŵarondezgi ŵake kuti: “Citani ici kuti mundikumbuke.” Ici ncakucitika cekha ico Ŵakristu ŵali kutumika kuti ŵakumbukirenge.—1 Ŵakorinte 11:24

Kuyana na dikishonare ya Webster, cikumbusko ncintu ico cikovwira muntu kuti “warutilire kukumbuka” panji kuti “cintu cinyake cikhalirire mu maghanoghano.” Mu vyaru vinandi, ŵantu ŵakuzenga cimanyikwiro panji kuŵika zuŵa lakuti ŵakumbukirenge muntu panji cintu cinyake cakuzirwa. Mwanteura, Yesu wakambiska cakurya cakuti cikumbukikenge—cakurya cakuti covwire ŵantu kukumbukira, kovwira ŵasambiri ŵake kuti ŵakumbukenge cakucitika cakuzirwa ca zuŵa lira. Kuntazi, cakurya ici cikenera kuzakakumbuska ŵantu ng’anamuro lakuzirwa la ivyo Yesu wakacita pa usiku wura, comene-comene vimanyikwiro ivyo wakagwiriskira ncito. Kasi ni vimanyikwiro wuli ivyo Yesu wakagwiriskira ncito, ndipo vikung’anamuraci? Tiyeni tiwone mu Baibolo ivyo vikacitika pa usiku wura wa 33 C.E.

Vimanyikwiro Vyakupatulika

“Wakatora cingwa, ndipo wakati wawonga, wakacimenya, wakaŵapa, wakati, Ici [“cikung’anamura thupi lane ilo liperekekenge,” NW] cifukwa ca imwe: citani ici kuti mundikumbuke ine.”—Luka 22:19.

Apo Yesu wakatora cingwa na kuyowoya kuti, “ici cikung’anamura thupi lane,” wakang’anamuranga kuti cibama cambura cirungo cikayimiranga thupi lake lambura zakwananga, ilo wakapereka cifukwa ca ‘umoyo wa ŵantu mu caru.’ (Yohane 6:51) Nangauli Mabaibolo ghanyake ghakuti “ili ni [es·tinʹ mu Cigiriki] thupi lane,” kweni dikishonare ya Greek-English Lexicon of the New Testament yakulembeka na  Thayer yikuti verebu ili likung’anamura “kuyimira, panji kuŵa m’malo mwa cintu cinyake.” Likupereka ng’anamuro la kuyimira.—Mateyu 26:26.

Ndimoso vikaŵira na nkombo ya vinyo. Yesu wakati: “Nkombo iyi yikung’anamura pangano lipya mu ndopa zane, izo zithikirenge imwe.”—Luka 22:20, NW.

Mu buku la Mateyu, Yesu pakuyowoya za nkombo ya vinyo wakati: “Yeneiyi yikuyimira ndopa zane za pangano, izo zithikirenge ŵanandi mwakuti zakwananga zigowokereke.” (Mateyu 26:28, NW) Yesu wakagwiriskira ncito nkombo ya vinyo, kuyimira ndopa zake. Ndopa zake zikazakaŵa “pangano lipya” kwa ŵasambiri ŵakuphakazgika na mzimu, awo ŵazamuwusa nayo lumoza kucanya nga ni mafumu na ŵasofi.—Yeremiya 31:31-33; Yohane 14:2, 3; 2 Ŵakorinte 5:5; Civumbuzi 1:5, 6; 5:9, 10; 20:4, 6.

Nkombo ya vinyo yikutikumbuskaso kuti ndopa za Yesu zipangiskenge kuti “zakwananga zigowokereke,” na kujura ntowa yakuti awo ŵakuryako ŵaye kucanya kukawusa lumoza na Kristu. Mwakuwonekerathu, ŵantu ŵacoko waka awo ŵakuya kucanya ndiwo ŵekha ŵakurya cingwa na kumwa vinyo pa Cikumbusko.—Luka 12:32; Ŵaefeso 1:13, 14; Ŵahebere 9:22; 1 Petros 1:3, 4.

Wuli pakuyowoya za ŵarondezgi ŵa Yesu awo ŵali mu pangano lipya yayi? Aŵa ni “mberere zinyake” za Fumu, izo zikulindilira nyengo ya kuwusira lumoza na Kristu kucanya yayi, kweni kuzakakondwa na umoyo wamuyirayira mu caru ca Paradiso. (Yohane 10:16; Luka 23:43; Civumbuzi 21:3, 4) Pakuti ni “wumba ukuru” wa Ŵakristu ŵakugomezgeka, awo ‘ŵakuteŵetera Yehova muhanya na usiku,’ iwo ŵakukondwa kuwonelera mugonero wa Fumu. Mazgu ghawo na milimo yawo vikuyowoya kuti: ‘Ciponosko kwa Ciuta withu mweneuyo wakukhala pa cizumbe, na ku Mwana-mberere!’—Civumbuzi 7:9, 10, 14, 15.

Ukwenera Kucitika Kalinga?

“Citani ici kuti mundikumbuke ine.”—Luka 22:19.

Kasi Cikumbusko cikwenera kucitika kalinga kuti tirutilire kukumbuka nyifwa ya Kristu? Yesu wakayowoya mwakudunjika yayi. Ndipouli, pakuti wakambiska Mugonero wa Fumu pa Nisani 14, usiku uwo Ŵaisrayeli ŵakacitiranga Paska cirimika cilicose, ncakuwonekerathu kuti Yesu wakang’anamuranga kuti Cikumbusko naco ndimo cicitikirenge. Peneapo Ŵaisrayeli cirimika cilicose ŵakakumbukiranga kuwomboleka kwawo mu wuzga ku Egupto, Ŵakristu cirimika cilicose ŵakukumbukira kuwomboleka kwawo mu wuzga wa kwananga na nyifwa.—Exodus 12:11, 17; Ŵaroma 5:20, 21.

Kukumbukira cintu cakuzirwa cirimika cilicose kuti nkhwacilendo yayi. Ghanaghanani waka, mwaciyerezgero, para ŵakutorana ŵakukumbukira zuŵa ilo ŵakatolerana panji para caru cikukumbukira cakucitika cinyake cakuzirwa. Nyengo zose kukumbukira cintu kukucitika kamoza pa cirimika, pa zuŵa ilo cintu ico cikacitikira. Fundo yakukondweska njakuti kwa virimika vinandi kufuma apo Yesu wakawelera kucanya, Ŵakristu ŵanandi ŵakacemekanga “Ŵafotini” cifukwa cakuti ŵakakumbukiranga nyifwa ya Yesu, kamoza pa cirimika, pa Nisani 14.

 Cipusu Kweni Cakuzirwa

Mpostole Paulos wakarongosora kuti kukumbukira Mugonero wa Fumu kuzamovwira ŵasambiri ŵa Yesu kuti ‘ŵathuwuske nyifwa ya Fumu.’ (1 Ŵakorinte 11:26) Mwanteura, uku kuzamuŵa kukumbukira cintu cakuzirwa ico nyifwa ya Yesu yikacita pakukhwaskana na kukwaniriskika kwa khumbo la Ciuta.

Cifukwa ca kuŵa wakugomezgeka mupaka pa nyifwa yake, Yesu Kristu wakatuŵiska zina la Yehova Ciuta nga ni Mlengi wamahara na wacitemwa ndiposo Fumu yirunji. Mwakupambana na ivyo Satana wakuyowoya ndiposo ivyo Adamu wakacita, Yesu wakarongora pakweru kuti muntu wangaŵa wakugomezgeka kwa Ciuta nanga wangaŵa kuti wakukumana na masuzgo ghakuru.—Job 2:4, 5.

Mugonero wa Fumu ukovwiraso kuti tikumbukire na kuwonga citemwa cakuzizwiska ca Yesu. Nangauli wakakumana na viyezgo vikuru, Yesu wakarutilira kuŵa wakugomezgeka kwa Awiske. Pa cifukwa ici, cikaŵa camacitiko kupereka thupi lake lambura kwananga kuti walipire ivyo kwananga kwa Adamu kuli kucita. Nga ni umo Yesu iye mweneko wakarongosolera, wakizira “kupereka umoyo wake thumba la kuwombola ŵanandi.” (Mateyu 20:28) Cakufumapo cake ncakuti wose awo ŵakugomezga Yesu, zakwananga zawo zingagowokereka ndipo ŵangazakasanga umoyo wamuyirayira mwakukolerana na khumbo lakwamba ilo Yehova wakaŵa nalo pa ŵantu.—Ŵaroma 5:6, 8, 12, 18, 19; 6:23; 1 Timote 2:5, 6. a

Vyose ivi vikurongora mtima uweme wa Yehova na lusungu lwake pakupanga manozgero ghakuti ŵantu ŵasange umoyo. Baibolo likuti: “Mu ceneici ndimo kutemwa kwa Ciuta kukavumbulika mwa ise, cakuti Ciuta watuma mu caru Mwana wake Kananda, mwakuti tiŵenge na umoyo mwa iyo. Mwenemumo ndimo muriri kutemwa, mwakuti ise tikamutemwa Ciuta cara, kweni kuti ndiyo wakatitemwa ise, ndipo wakatuma Mwana wake kuŵa mpepeska ya zakwananga zithu.”—1 Yohane 4:9, 10.

Enya, Cikumbusko ncintu cakukhumbikwa nadi kucikumbukira! Ncipusu na cambura kusuzga kucita pa caru cose, pa mikhaliro yakupambana-pambana, kweni ncakuzirwa ndiposo ncakuti cingakumbukika kwa nyengo yitali.

 Ng’anamuro Lake kwa Imwe

Nyifwa ya Fumu yithu Yesu Kristu yikaŵa yakuŵinya kwa iyo na kwa Awiske, Yehova. Pakuti Yesu ni murunji, iye wakaharako yayi nyifwa nga ndise. (Ŵaroma 5:12, Ŵahebere 7:26) Wakatenge wakhalenge kwamuyirayira. Wakanenge mphanyi pakaŵavya uyo wakatora umoyo wake mwakucicizga. Iye wakati: “Palive muntu wakuwuwuskako [umoyo] kwa ine, kweni nkuwuŵika pasi ine ndamwene.”—Yohane 10:18.

Ndipouli, Yesu wakakhumba yekha kupereka umoyo wake wambura kwananga kuŵa sembe mwakuti “mu nyifwa [yake] wamuzgore wa waka mweneuyo wakaŵa na nkongono za nyifwa, ndiyo Satana; Na kuti waŵawombole wose ŵeneawo mu wofi wa nyifwa ŵakaŵa mu wuzga umoyo wawo wose.” (Ŵahebere 2:14, 15) Citemwa cakuzizwiska ca Kristu cikuwonekaso kwizira mu nyifwa iyo wakakhumba yekha. Wakamanyanga makora umo wasuzgikirenge na kufwa.—Mateyu 17:22; 20:17-19.

Cikumbusko cikutikumbuskaso za citemwa cikuru ico Adada ŵithu ŵa kucanya, Yehova, ŵakaŵa ŵandarongorepo nakale pa ŵantu. O! cikwenera kuti cikaŵa cintu cakuŵinya comene kwa Yehova uyo ‘ngwa ciwuravi na lusungu,’ kupulika na kuwona “ncemerezgo na masozi” gha Yesu mu munda wa Getsemani, kumuthyapula mwankaza, kumupayika mwakutombozga, na kufwa pacoko-pacoko nyifwa ya kuŵinya comene. (Yakobe 5:11; Ŵahebere 5:7; Yohane 3:16; 1 Yohane 4:7, 8) Nangauli pajumpa virimika vinandi kufuma apo Yesu wakafwira, kweni nanga ni sono para ŵantu ŵaghanaghana za nyifwa yake, thupi likwenda.

Ghanaghanani waka umo Yehova Ciuta na Yesu Kristu ŵakajikomolera kuti ŵagure ise taŵantu ŵakwananga. (Ŵaroma 3:23) Zuŵa lirilose tikukumana na vyakuŵinya cifukwa ca kwananga na kuŵavya urunji kwithu. Ndipouli, cifukwa ca kuŵika cigomezgo cithu mu sembe ya Yesu, tingapempa cigowokero kwa Ciuta. (1 Yohane 2:1, 2) Ici cikupangiska kuti tiŵe ŵakufwatuka na ŵa njuŵi yituŵa pakuyowoya na Ciuta. (Ŵahebere 4:14-16; 9:13, 14) Kweni cakuruska vyose ncakuti tingaŵa na mwaŵi wa kuzakakhala kwamuyirayira mu caru ca Paradiso. (Yohane 17:3; Civumbuzi 21:3, 4) Vitumbiko vyose ivi na vinyake vizenge cifukwa ca kujipereka kukuru uko Yesu wakacita.

Kurongora Kuwonga na Kuzirwiska Mugonero wa Fumu

Mwambura kukayika, Mugonero wa Fumu ncirongolero ca “ucizi ukuru wa Ciuta.” Ndipo sembe yakuwombora iyo Ciuta wakanozga—yeneiyo yikaperekeka na Yesu cifukwa ca citemwa cake cakuzizwiska ni “cawanangwa cake cambura mayowoyeko” nadi. (2 Ŵakorinte 9:14, 15) Kasi vintu vyose ivi, vyakukhwaskana na uweme wa Ciuta kwizira mwa Yesu Kristu, vikumupangiskani yayi kuti mumuwonge?

Tiri na cigomezgo kuti vikumupangiskani. Mwanteura, tikumupemphani kuti muzakawungane na Ŵakaboni ŵa Yehova pa kukumbukira nyifwa ya Yesu. Cirimika cino, Cikumbusko cizamucitika pa Citatu, April 16, para zuŵa lanjira. Ŵakaboni ŵa Yehova mu cigaŵa cinu ŵazamukondwa kumuphalirani nyengo na malo agho cakucitika ici cakuzirwa cizamucitikira.

[Mazgu ghamusi]

[Bokosi/Vithuzithuzi pa peji 6]

“ICI NDI THUPI LANE” PANJI ‘ICI CIKUNG’ANAMURA THUPI LANE’ NCI?

Apo Yesu wakati “Ine ndine muryango,” ndiposo “Ine ndine mpeska,” palije uyo wakaghanaghana kuti wakang’anamuranga kuti iye ni muryango weneko panji mpeska zeneko. (Yohane 10:7; 15:1) Mwakuyana waka, para Baibolo likuti “nkombo ndi pangano lipya” kuti tikughanaghana kuti nkombo yikaŵa nadi pangano yayi. Mwanteura, apo Yesu wakati cingwa ‘cikaŵa’ thupi lake, ncakuwonekerathu kuti cingwa cikayimiranga waka thupi lake. Pa cifukwa ici, Baibolo la Charles B. Williams likuti: “Ici cikuyimira thupi lane.”—Luka 22:19, 20.

[Cithuzithuzi pa peji 5]

Cibama cambura cirungo na vinyo ni vimanyikwiro vyakwenelera kuyimira thupi la Yesu lambura zakwananga na ndopa izo wakathiska

[Cithuzithuzi pa peji 7]

Cikumbusko cikutikumbuska za citemwa cikuru ico Yehova na Yesu Kristu ŵali kurongora