Kristu Wakuyowoya ku Mipingo
Kristu Wakuyowoya ku Mipingo
“Vyeneivi ndivyo wakuyowoya mweneuyo wakukolera nyenyezi zinkonde na ziŵiri mu woko lake la maryero.”—CIVUMBUZI 2:1.
1, 2. Cifukwa wuli tikwenera kunweka na ivyo Kristu wakayowoya ku mipingo 7 ya ku Asia Minor?
YESU Kristu, Mwana yekha wa Yehova, ni Mutu wa mpingo Wacikristu. Kuti wasunge mpingo wa ŵarondezgi ŵake ŵakuphakazgika kuŵa wambura kalema, Kristu wakugwiriskira ncito umutu wake mwa kuŵarumba na kuŵanyolorera. (Ŵaefeso 5:21-27) Mu vipaturo 2 na 3 vya buku la Civumbuzi, tikusangamo uthenga wa Yesu, wankongono na wacitemwa, wakuperekeka ku mipingo 7 ya ku Asia Minor.
2 Pambere wandapulike mazgu gha Yesu ku mipingo 7, mpostole Yohane wakapika mboniwoni ya “zuŵa la Fumu.” (Civumbuzi 1:10) Zuŵa ili likayamba apo Ufumu wakuwusika na Mesiya ukakhazikiskika mu 1914. Mwanteura, ivyo Kristu wakayowoya ku mipingo ni vyakukhumbikwa comene mu mazuŵa ghano ghaumaliro. Cikhuŵirizgo na urongozgi wake vikutovwira kumarana na nyengo izi zakusuzga.—2 Timote 3:1-5.
3. Kasi “nyenyezi,” “ŵangelo,” na “vyakukorera-nyali vya golide” ivyo mpostole Yohane wakawona vikuyimira vici?
3 Yohane wakawona Fumu Yesu Kristu uyo “wakukorera nyenyezi zinkonde na ziŵiri mu woko lake la maryero” ndiposo uyo “wakwendakwenda mukati mwa vyakukorera-nyali vya golide vinkonde na viŵiri,” panji titi mipingo. “Nyenyezi” ni ‘ŵangelo ŵa [mipingo] yinkonde na yiŵiri.’ (Civumbuzi 1:20; 2:1) Nyengo zinyake nyenyezi zikwimira vilengiwa vyauzimu, kweni Kristu wakatenge wagwiriskirenge ncito muntu yayi kuti walembe vintu vyakukhwaskana na vilengiwa vyauzimu. Mwanteura, ncakuwonekerathu kuti “nyenyezi” izi zikwimira ŵalaŵiriri ŵakuphakazgika na mzimu, panji mawupu gha ŵarara. Mazgu ghakuti “ŵangelo” ghakung’anamura ncito yawo nga ni mathenga. Cifukwa cakuti gulu la Ciuta lakura, “mulinda murara wa magomezgeko” wali kuŵikaso ŵanarumi ŵakwenelera, awo ni “mberere zinyake” za Yesu, kuti ŵaŵe ŵalaŵiliri.—Luka 12:42-44; Yohane 10:16.
4. Kasi ŵarara ŵakupindura wuli mwa kupulikizga ivyo Kristu wakuyowoya ku mipingo?
4 “Nyenyezi” zili mu woko lamaryero la Yesu—wali na mazaza pa izo, citemwa, na civikiliro. Mwanteura, maso gha Yesu ghali pa izo. Mwakurondezga mazgu agho iyo wakayowoya ku mpingo wuliwose mwa mipingo 7, ŵarara mazuŵa ghano ŵangamanya umo ŵangacitira na mikhaliro yakuyana na ya mu mipingo yira. Nakuŵanako, Ŵakristu wose ŵakwenera kupulikizga ivyo Mwana wa Ciuta wakuyowoya. (Marko 9:7) Sono kasi tingasambiraci para tikupulikizga ivyo Kristu wakuyowoya ku mipingo?
Ku Mungelo wa ku Efeso
5. Kasi Efeso ukaŵa msumba wuli?
5 Yesu wakarumba na kucenya mpingo wa Efeso. (Ŵazgani Civumbuzi 2:1-7.) Tempele la ciuta Artemis likaŵa ku Asia Minor, kumanjiliro gha dazi kwa msumba usambazi uwu, uwo ukaŵa cinyina ca malonda na visopo. Nangauli mu Efeso mukazura mikhaliro yiheni, kusopa kwautesi, na kucita maula, kweni Ciuta wakatumbika uteŵeti wa mpostole Paulos na ŵanji mu msumba uwu.—Milimo, cipaturo 19.
6. Kasi Ŵakristu ŵakugomezgeka mazuŵa ghano ŵakuyana wuli na Ŵakristu ŵa ku Efeso?
6 Kristu wakarumba mpingo wa Efeso kuti ‘Nkumanya milimo yako, kutokatoka kwako na ucivindwe wako, na kuti ulive kumanya kuzizipizga na ŵantu ŵaheni, ndipo ukuŵayezga awo ŵakujizunula kuti mbapostole, ndipo kuti ndiwo cara, ndipo ukaŵasanga kuti mbatesi.’ Mazuŵa ghano, mipingo ya ŵarondezgi ŵaunenesko ŵa Yesu nayo yikucita milimo yiweme, kutokatoka, na kuzizipizga. Ŵakulekerera yayi ŵabali ŵatesi awo ŵakukhumba kuwoneka nga mbapostole. (2 Ŵakorinte 11:13, 26) Nga ni umo ŵakacitira Ŵaefeso, Ŵakristu ŵakugomezgeka mazuŵa ghano ŵangalekerera yayi “ŵantu ŵaheni.” Mwanteura, kuti kusopa Yehova kurutilire kuŵa kutuŵa ndiposo kuti mpingo uvikilirike, iwo ŵakucezga yayi na ŵakugaruka ŵambura kurapa.—Ŵagalatiya 2:4, 5; 2 Yohane 8-11.
7, 8. Ni suzgo wuli likuru ilo likaŵa mu mpingo wa Efeso, ndipo ise tingacita wuli para paŵa suzgo lakuyana waka?
7 Ndipouli, Ŵakristu ŵa ku Efeso ŵakaŵa na suzgo likuru. Yesu wakati: “Nkukususka, kuti wasida kutemwa kwako kwakudanga.” Ŵantu mu mpingo wura ŵakenera kuthukizgaso citemwa cawo. (Marko 12:28-30; Ŵaefeso 2:4; 5:1, 2) Naseso tikwenera kuŵa maso mwakuti citemwa cithu pa Ciuta cileke kumara, ico tikaŵa naco pakwamba. (3 Yohane 3) Kweni wuli usange kudokera usambazi panji vyakusekereska ndiko kwayamba kuwusa umoyo withu? (1 Timote 4:8; 6:9, 10) Mbwenu tikwenera kupempa Ciuta kuti watipe mtima wakuti timutemwe comene na wakuwonga ivyo iye na Mwana wake ŵaticitira.—1 Yohane 4:10, 16.
8 Kristu wakaciska Ŵaefeso kuti: ‘Kumbuka [ivyo wabuda], ng’anamuka mu mtima, ndipo citanga milimo yakudanga.’ Wuli usange ŵalekenge kucita ici? Yesu wakati: ‘Nizenge, ndipo nizamusezgapo cakukorera-nyali cako pa malo ghake, usange ulive kung’anamuka.’ Mberere zose zitayenge citemwa cawo cakwamba, mphanyi “cakukorera-nyali,” panji titi mpingo, wukasezgekapo. Mwanteura, ise nga Mbakristu ŵamwampu, tiyeni tifwilirepo kusunga mpingo kuŵa wakungweruka mwauzimu.—Mateyu 5:14-16.
9. Kasi ucigaruka tikwenera kuwuwona wuli?
9 Ncakuwongeka comene kuti Ŵaefeso ŵakatinka “milimo ya Ŵanikolayiti.” Padera pa ivyo buku la Civumbuzi likuyowoya, tikumanya yayi uko kukafuma kagulu kakugaruka aka, visambizgo vyake, na ivyo kakacitanga. Kweni, pakuti Yesu wakacenya ŵanarumi aŵa, tikwenera kurutilira kutinka ucigaruka, nga ni umo Ŵakristu ŵa ku Efeso ŵakacitira.—Mateyu 23:10.
10. Kasi ncivici cizamucitikira awo ŵakupulikira ivyo mzimu ukuyowoya?
10 Kristu wakati: ‘Mweneuyo wali na khutu, wapulike ceneico mzimu ukuyowoyera maekleziya.’ Apo wakaŵa pa caru capasi, Yesu wakayowoya na nkongono za mzimu wa Ciuta. (Yesaya 61:1; Luka 4:16-21) Mwanteura, tikwenera kupulikizga ivyo Ciuta sono wakuyowoyera mwa iyo, kwizira mu mzimu utuŵa. Mwakufunyilirika na mzimu, Yesu wakalayizga kuti: ‘Mweneuyo wakutonda, nditi ndimupenge kuti waryeko khuni la umoyo ilo liri mu paradiso wa Ciuta.’ Ŵakristu ŵakuphakazgika awo ŵakupulikira ivyo mzimu ukuyowoya, ŵazamusanga umoyo wamuyirayira mu ‘paradiso wa Ciuta’ kucanya, uko Yehova wali. “Mzinda ukuru,” uwo ukupulikiraso ivyo mzimu ukuyowoya, uzamukondwa na umoyo mu paradiso pa caru capasi, umo ŵazamumwa maji mu “mronga wa maji gha umoyo” na kucizgika na “mahamba gha khuni” la mumpepete mwake.—Civumbuzi 7:9; 22:1, 2; Luka 23:43.
11. Kasi tingakuzga wuli citemwa pa Yehova?
11 Ŵaefeso ŵakataya citemwa cawo cakwamba, kweni wuli usange mukhaliro uwu ukwamba kuwoneka mu mpingo mazuŵa ghano? Tiyeni tose, waliyose payekha, tikuzge citemwa cithu pa Yehova mwa kuyowoya za ntowa zake za citemwa. Tingawonga citemwa ico Ciuta wakarongora pakupereka Mwana wake kuŵa sembe ya kutiwombora. (Yohane 3:16; Ŵaroma 5:8) Panyengo iyo nkhwakwenelera, tingayowoya za citemwa ca Ciuta para tikuzgora pa mpingo panji pakuyowoya nkani. Tingarongora citemwa cithu pa Yehova mwa kutumbika zina lake mu uteŵeti wa m’munda. (Salmo 145:10-13) Enya, mazgu ghithu na ivyo tikucita, vingapangiska kuti mpingo uŵeso na citemwa ico ukaŵa naco pakwamba.
Ku Mungelo wa ku Smurna
12. Kasi mbiri yikurongoraci pakuyowoya za msumba wa Smurna na cisopo ico cikaŵamo?
12 Mpingo wa Smurna ukarumbika na Kristu, uyo “ngwakudanga na Wakumarira, mweneuyo wakaŵa wakufwa, ndipo wakaŵaso wamoyo” mwa kuwuskika ku ŵakufwa. (Ŵazgani Civumbuzi 2:8-11.) Msumba wa Smurna (uwo sono ni Izmir, Turkey) ukaŵa kumanjiliro gha dazi kwa Asia Minor. Ŵagiriki ndiwo ŵakazenga msumba uwu, kweni Ŵalidiya ŵakawuparanya mu 580 B.C.E. Mafumu agho ghakiza pamanyuma pa Alexander the Great ghakawuzengaso pamalo ghapya. Ukazgoka cigaŵa ca Roma ku Asia ndipo ukaŵa cinyina ca malonda, msumba uwo ukamanyikwanga cifukwa ca kazengekero ka nyumba zake. Tempele la Kesare Tiberius ilo likaŵamo likapangiska msumba uwu kuŵa cinyina ca kusopa mafumu. Awo ŵakasopanga ŵakawotcanga tuntu twakununkira twakukwana ku njoŵe na kuyowoya kuti “Kesare ni Fumu.” Ŵakristu ŵakacitangako yayi ivi cifukwa kwa iwo ‘Yesu ndiyo ni Fumu.’ Mwanteura, ŵakatambuzgika comene.—Ŵaroma 10:9.
13. Nangauli ŵakaŵa ŵakavu kuthupi, kweni kasi Ŵakristu ŵa ku Smurna ŵakaŵa wuli ŵasambazi?
13 Padera pa kutambuzgika, Ŵakristu ku Smurna ŵakaŵaso mu ukavu pakuti ŵakakanizgikanga vintu vinyake cifukwa ca kukana kusopa mafumu. Ŵateŵeti ŵa Yehova mazuŵa ghano ŵangagwenta yayi vintu vyakuyana waka. (Civumbuzi 13:16, 17) Nangauli ŵangaŵa ŵakavu kuthupi, awo ŵali nga Mbakristu ŵa ku Smurna mbasambazi mwauzimu, ndipo ici ndico ncakuzirwa comene.—Zintharika 10:22; 3 Yohane 2.
14, 15. Ncipembuzgo wuli ico Ŵakristu ŵakuphakazgika ŵakusanga mu lemba la Civumbuzi 2:10?
14 Ŵayuda ŵanandi ku Smurna ŵakaŵa “sunagoge la Satana” cifukwa ŵakademeleranga ku vintu ivyo ni vya mu malemba yayi, ŵakakana Mwana wa Ciuta, na kusuzga ŵarondezgi ŵa Yesu ŵakuphakazgika na mzimu. (Ŵaroma 2:28, 29) Kweni mazgu ghakurondezgapo gha Yesu ghakupereka cipembuzgo cikuru kwa Ŵakristu ŵakuphakazgika. Iye wakuti: “Ungopanga vyeneivyo waneng’enera kukomwa navyo: Ehena, Satana waneng’enera kuponya ŵanji ŵa imwe mu nyumba ya vikondo [jere] mwakuti muyezgeke; ndipo muti muŵenge na suzgo mazuŵa khumi. Uŵe wakugomezgeka kuya kafika na ku nyifwa, ndipo nditi ndikupenge mphumphu ya umoyo.”—Civumbuzi 2:10.
15 Yesu wakawopa yayi kufwa cifukwa ca kwimira muwuso wa Yehova. (Ŵafilipi 2:5-8) Nangauli panyengo yasono Satana wakurwa nkondo na Ŵakristu ŵakuphakazgika awo ŵacali pano pasi, iwo ŵakopa yayi ivyo ŵakumanenge navyo—kwali ni masuzgo, kuŵikika mu jere, panji kukomeka. (Civumbuzi 12:17) Ŵatondenge caru. Ndipo m’malo mwa kuvwara mphumphu ya maluŵa iyo yikuperekeka kwa awo ŵaruska pa maseŵero gha caru, Kristu wakulayizga Ŵakristu ŵakuphakazgika “mphumphu ya umoyo,” kuŵa vilengiwa vyambura kufwa kucanya. Ee! ici ncawanangwa cikuru nadi!
16. Usange tili mu mpingo nga wa Smurna, kasi mtima withu ukwenera kuŵa pa vici?
16 Wuli usange ise, kwali cilindizga cintu nca kucanya panji kuzakakhala pa caru capasi, tili mu mpingo nga ngwa Smurna? Ipo tiyeni tovwire Ŵakristu ŵanyithu kuti ŵamanye cifukwa ico Ciuta wakuzomerezgera masuzgo—nkani yakukhwaskana na muwuso wake. Kaboni waliyose wa Yehova uyo wakuŵa wakugomezgeka, wakuvumbura pakweru kuti Satana ni mutesi ndipo wakurongora kuti nangauli muntu wangasuzgika wangarutilira kuŵa ku cigaŵa ca Muwuso wa Yehova. (Zintharika 27:11) Tiyeni tikhozge Ŵakristu ŵanyithu kuti ŵazizipizge masuzgo ndipo ŵaŵe na mwaŵi wa ‘kuteŵetera [Yehova] mwambura wofi, mu utozi na mu kunyoroka pantazi pake mazuŵa ghose.’—Luka 1:68, 69, 74, 75.
Ku Mungelo wa Pergamo
17, 18. Kasi Pergamo wakaŵa cinyina ca kusopa kwa mtundu mbu, ndipo ncivici cikacitikanga para munyake wakana kusopako vikozgo?
17 Mpingo wa Pergamo ukarumbika na kunyolorereka. (Ŵazgani Civumbuzi 2:12-17.) Mpingo wa Pergamo, uwo ukaŵa pa mtunda wa makilomita 80 ku mpoto kwa Smurna, wukazura na kusopa kwautesi. Ŵakupenda nyenyezi ŵa ku Babuloni ŵakacimbilira mu msumba uwu. Ŵarwari ŵakathirimukiranga ku Pergamo, ku tempele la ciuta wautesi Asikilepiyasi, uyo ŵakatenge wakucizga matenda. Pakuti ku Pergamo kukaŵa matempele ghatatu agho ŵakasoperangamo Kesare Augustus, iko kukucemeka “cinyina ca kusoperako mafumu mu nyengo yakale.”—Encyclopædia Britannica, 1959, Volume 17, page 507.
18 Ku Pergamo kukaŵa jotchero la ciuta Zeus. Msumba uwu ukaŵaso cinyina ca kusoperako ŵantu, uko Dyabulosi wakacitiskanga. Mwanteura, ncambura kuzizika kuti mpingo wa Pergamo ukayowoyeka kuti ukaŵa kumalo uko kukaŵa “cizumbe ca Satana.” Awo ŵakaŵa ku cigaŵa ca muwuso wa Yehova ŵakakomekanga para ŵakana kusopa mafumu. Caru cicali mu nkongono za Dyabulosi, ndipo ŵantu ŵakusopa ndyari. (1 Yohane 5:19) Kwambira mu nyengo ya Ŵakristu ŵakwambilira mupaka sono, Ŵakristu ŵanandi ŵakugomezgeka ŵakomeka. Yumoza wake wakaŵa uyo Yesu wakamuzunura kuti “Antipasi kaboni wane, wakugomezgeka wane, mweneuyo wakakomeka mukati mwa imwe.” Yehova Ciuta na Yesu Kristu ŵakukumbukira nadi ŵateŵeti aŵa ŵakugomezgeka.—1 Yohane 5:21.
19. Kasi Balamu wakacitaci, ndipo Ŵakristu wose ŵakwenera kutceŵa vici?
19 Kristu wakayowoyaso za “cisambizgo ca Balamu.” Cifukwa ca kukhumba kusangirapo vintu vyakuthupi, mprofeti mutesi Balamu wakatemba Israyeli. Apo Ciuta wakasinta thembelero lake kuŵa vitumbiko, Balamu wakakolerana na Themba la ku Moabu na kunjizga Ŵaisrayeli ŵanandi mu kusopa vikozgo na uzaghali. Nga ni Finehasi, uyo wakacitapo kantu pa milimo ya Balamu, ŵarara Ŵacikristu ŵaleke kulekerera vintu vyawakawaka. (Maŵazgo 22:1–25:15; 2 Petros 2:15, 16; Yuda 11) Nakuŵanako, Ŵakristu wose ŵakwenera kutceŵa kusopa vikozgo ndiposo kuti mzimu wa uzaghali uleke kunjira mu mpingo.—Yuda 3, 4.
20. Usange Mkristu wayamba kupulikira maghanoghano gha ŵacigaruka, kasi wakwenera kucitaci?
20 Mpingo wa Pergamo ukaŵa pangozi yikuru cifukwa ukalekerera “awo ŵakukoreska . . . cisambizgo ca Ŵanikolayiti.” Kristu wakaphalira mpingo uwu kuti: ‘Ng’anamuka mu mtima; mzire nikwizire luŵiro, ndipo nirwenge nawe na lupanga lwa mulomo wane.’ Awo ŵagaruka ŵakukhumba kupweteka Ŵakristu mwauzimu, ndipo awo ŵakwambiska mphatukano na ucigaruka pakati pa ŵabali ŵazamuhara yayi Ufumu wa Ciuta. (Ŵaroma 16:17, 18; 1 Ŵakorinte 1:10; Ŵagalatiya 5:19-21) Usange Mkristu wayamba kupulikizga maghanoghano gha awo ŵagaruka na kukhumba kughathandazga, wakwenera kukumbuka cenjezgo la Kristu! Kuti wajiponoske ku ngozi, wakwenera kurapa na kupempha wovwiri kwa ŵarara ŵa mpingo. (Yakobe 5:13-18) Nkhwakukhumbikwa kucitapo kantu mwaluŵiro cifukwa Yesu wakwiza luŵiro kuzakapereka ceruzgo.
21, 22. Mbanjani ŵakurya ‘mana ghakubisika,’ ndipo ici cikuyimira vici?
21 Ŵakristu ŵakuphakazgika na ŵanyawo, ŵakwenera kopa yayi ceruzgo ico cikwiza. Vitumbiko vikulindilira wose awo ŵakurondezga urongozgi wa Yesu, wakuperekeka na mzimu utuŵa wa Ciuta. Mwaciyerezgero, ŵakuphakazgika awo ŵatonda caru ŵazamucemeka kukarya ‘mana ghakubisika’ ndipo ŵazamupika “sangalawe lituŵa” lakuŵa na “zina lipya.”
22 Ciuta wakapereka mana kwa Ŵaisrayeli mukati mwa virimika 40 ivyo ŵakendanga mu mapopa. Cinyake mwa “cingwa” ici cikasungika mu ciŵiya ca golide, mukati mwa likasa la pangano mwakuti cikabisika mu Malo Ghatuŵa comene, umo mukaŵa ungweru wakuzizwiska, wakuyimira kuti Yehova ndimo wali. (Exodus 16:14, 15, 23, 26, 33; 26:34; Ŵahebere 9:3, 4) Pakaŵavya uyo wakazomerezgekanga kurya mana ghakubisika. Kweni pa ciwuka cawo, ŵarondezgi ŵakuphakazgika ŵa Yesu ŵakuvwara thupi lambura kufwa, cintu ico cikwimira kurya ‘mana ghakubisika.’—1 Ŵakorinte 15:53-57.
23. Kasi “sangalawe lituŵa” na “zina lipya” vikuyimira vici?
23 Mu makhoti gha Ŵaroma, sangalawe lifipa likang’anamuranga kuti muntu wali na mrandu, kweni lituŵa likang’anamuranga kuti walije mrandu. Kupereka “sangalawe lituŵa” kwa Ŵakristu ŵakuphakazgika kukurongora kuti Yesu wakuŵawona kuŵa ŵambura mrandu, ŵatuŵa, ndiposo ŵakutowa. Pakuti Ŵaroma ŵakagwiriskirangaso ncito tumalibwe twa sangalawe, nga ni tikiti yakunjilira mu nyumba iyo muli vyakucitika vinyake, mwanteura “sangalawe lituŵa” lingayimira cizomerezgo cakuti Ŵakristu ŵakuphakazgika ŵarute kucanya, ceneico cikuŵako panyengo ya nthengwa ya Mwana-mberere. (Civumbuzi 19:7-9) Ncakuwonekerathu kuti “zina lipya” likuyimira mwaŵi wawo wa kuwusa lumoza na Yesu mu Ufumu wa kucanya. Ici cikukhozga comene Ŵakristu ŵakuphakazgika na ŵabwezi ŵawo awo ŵakulindilira kuzakakhala pa caru capasi kuti ŵalimbikire uteŵeti wawo!
24. Kasi tikwenera kucita vici na ucigaruka?
24 Ncamahara kukumbuka kuti mpingo wa Pergamo ukaŵa pangozi cifukwa ca Ŵakristu ŵakugaruka. Usange mukhaliro wakuyana na uwu, ukukhumba kutimbanizga umoyo wauzimu wa mpingo withu, tiyeni tikanirethu ucigaruka na kurutilira kwenda mu unenesko. (Yohane 8:32, 44; 3 Yohane 4) Pakuti ŵasambizgi ŵatesi panji ŵantu awo ŵamba kugaruka ŵangananga mpingo wose, tikwenera kuŵa maso comene na ucigaruka, na kuleka kuzomerezga mazgu ghawo ghakukopa kutijara kumaso na kutondeka kurondezga unenesko.—Ŵagalatiya 5:7-12; 2 Yohane 8-11.
25. Kasi mu mutu wakurondezgapo tizamudumbiskana za uthenga uwo Kristu wakapereka ku mipingo nji?
25 Ni mazgu ghakukondweska comene gha kurumba na kunyolorera agho Yesu Kristu wakayowoyera mipingo yitatu mwa mipingo 7 ya ku Asia Minor agho tawona mu nkani iyi! Ndipouli, mwakurongozgeka na mzimu utuŵa, Kristu wakaŵaso na vinandi vyakuti waphalire mipingo yinyake yinayi. Uthenga uwo wakapereka ku mipingo ya Thuatera, Sardesi, Filadelfiya, na Laodikeya, wuli mu mutu wakurondezgapo.
Kasi Mungazgora Wuli?
• Cifukwa wuli tikwenera kupulikizga ivyo Kristu wakuyowoya ku mipingo?
• Kasi tingawovwirapo wuli kuti mpingo uŵeso na citemwa ico ukaŵa naco pakwamba?
• Cifukwa wuli tingayowoya kuti Ŵakristu ŵakavu ku Smurna ŵakaŵa ŵasambazi nadi?
• Pakughanaghanira za mukhaliro uwo ukaŵa mu mpingo wa Pergamo, kasi maghanoghano gha ucigaruka tikwenera kughawona wuli?
[Mafumbo]
[Mapu pa peji 8]
(Mu magazini yakusindikizga ndimo vikuwoneka makora)
GREECE
ASIA MINOR
Efeso
Smurna
Pergamo
Thuatera
Sardesi
Filadelfiya
Laodikeya
[Cithuzithuzi pa peji 10]
“Mzinda ukuru” uzamukondwa na paradiso pa caru capasi
[Vithuzithuzi pa peji 11]
Ŵakristu awo ŵakusuzgika ŵakutonda caru