Kupereka uko Kukukondweska Ciuta

YESU na ŵasambiri ŵake ŵakaryanga cakurya cakunowa mu Betaniya pamoza na ŵabwezi ŵake ŵanyake ŵa pamtima, nga ni Mariya, Marita na Lazaro uyo wakawuskika ku ŵakufwa. Apo Mariya wakatora mafuta gha mtengo wapatali na kuphaka marundi gha Yesu, Yuda Iskariote wakakwiya ndipo wakayowoyapo maghanoghano ghake. Wakasuska kuti: ‘Cifukwa ncici mafuta agha ghaleka kuguliskika ndarama makhumi pera makhumi ghatatu, [pafupifupi malipiro gha cirimika cose] na kupika ku ŵakavu?’ Ŵanyake awo ŵakaŵapo nawo ndimo ŵakayowoyera.—Yohane 12:1-6; Marko 14:3-5.

Kweni Yesu wakazgora kuti: ‘Murekani; mukumusuzgiraci? . . . Cifukwa ŵakavu muli naŵo pamoza mazuŵa ghose, ndipo para mukukhumba mungaŵacitira uweme: kweni ine kuti muli nane mazuŵa ghose cara.’ (Marko 14:6-9) Ŵarongozgi ŵa cisopo ca Ciyuda ŵakasambizganga kuti kovwira ŵakusuzgika nkuweme ndiposo kungapangiska kuti zakwananga za muntu zigowokereke. Ndipouli, Yesu wakarongora pakweru kuti Ciuta wakukondwa na kupereka vyawanangwa ku ŵakavu pera yayi.

Apo tiwonenge mwakudumura umo kupereka kukacitikiranga mu mpingo wakale Wacikristu, tisangenge ntowa zinyake izo tingarongolera pwererero lithu pa nkani iyi, na umo tingakondweskera Ciuta na vyakupereka vithu. Kweniso tiwonenge kupereka kwapadera uko nkhwakovwira comene.

‘Perekani Twalusungu’

Nyengo zinandi Yesu wakakhuŵirizganga ŵasambiri ŵake ‘kupa twalusungu.’ (Luka 12:33) Kweni Yesu wakacenjezga za kujirongora, uko kukacitikanga kuti uyo wapereka calusungu warumbike, m’malo mwakuti Ciuta ndiyo warumbike. Iye wakati: “Para ukucita calusungu, ungajilizgiranga mbata, nga ndi umo ŵakucitira ŵapusikizgi mu masunagoge na mu zintowa, mwakuti ŵarumbike na ŵantu.” (Mateyu 6:1-4) Pakurondezga ncenyo iyi, Ŵakristu ŵakale ŵakajiwoneskanga yayi, ŵakapambana na umo ŵakacitiranga ŵarongozgi ŵa cisopo mu nyengo iyo. Iwo ŵakawovwiranga ŵakavu mwa kuŵacitira vintu panji kuŵapa vyawanangwa mwambura kuwonekera ku ŵantu.

Mwaciyerezgero, pa Luka 8:1-3 tikuphalirika kuti Mariya Magadala, Yohana, Susana na ŵanyake ŵanandi ŵakagwiriskira ncito “cuma cawo” kuteŵetera Yesu na ŵapostole ŵake mwambura  kujirongora. Nangauli ŵanarumi aŵa ŵakasoŵanga kantu yayi, iwo ŵakaleka ncito zawo izo ŵakasangirangapo vyakukhumba vyawo, mwakuti ŵaŵike pwererero lose pa uteŵeti. (Mateyu 4:18-22, Luka 5:27, 28) Mwakovwira Yesu na ŵapostole kuti ŵafiske ncito iyo Ciuta wakaŵapa, ŵanakazi ŵara ŵakaperekanga ucindami kwa Ciuta. Yehova wakarongora kuti wakakondwa na ivyo ŵakacita, mwa kusunga nkani ya lusungu lwawo mu Baibolo kuti ŵantu ŵanandi ŵayiŵazge.—Zintharika 19:17; Ŵahebere 6:10.

Dorika wakaŵa mwanakazi munyake uyo “wakazura na milimo yiweme na vyalusungu.” Wakasoneranga vyakuvwara ŵakavu mu msumba wakwawo wa Yopa uwo ukaŵa musi mwa nyanja. Tikumanya yayi usange wakagulanga na ndarama zake saru zakusonera, panji usange ŵantu ŵakagulanga ŵekha, ndipo iye wakaŵasoneranga waka. Ndipouli, milimo yake yiweme yikapangiska kuti awo wakaŵawovwiranga ŵamutemwe, nakuti Ciuta nayo wakatumbika mtima wake uweme.—Milimo 9:36-41.

Khumbo Liweme Ndakuzirwa

Ncivici ico cikapangiska ŵantu aŵa kupereka? Kuti ŵakakhumbanga waka kovwirapo cifukwa cakuti ŵantu wakuŵeyerera covwiro yayi. Ŵakawona kuti cikaŵa cakwenelera kucita ivyo ŵangakwaniska zuŵa lirilose kuti ŵawovwire ŵakavu, awo soka likaŵawira, ŵarwali panji awo ŵakaŵa na masuzgo ghanyake. (Zintharika 3:27, 28; Yakobe 2:15, 16) Uku ndiko kupereka uko kukukondweska Ciuta. Comene-comene kutemwa Ciuta na kukhumba kurondezga mikhaliro yake ya lusungu na mtima wa kupa ndivyo vikukhuŵirizga kupereka uku.—Mateyu 5:44, 45; Yakobe 1:17.

Mpostole Yohane wakarongosora mukhaliro wakuzirwa uwu wa kupereka apo wakafumba kuti: “Uyo wali na vyuma vya pano pasi, ndipo wakuwona mbali wake mu ukavu, ndipo wakumujarira lusungu lwake, kutemwa kwa Ciuta kukukhala uli mwa iyo?” (1 Yohane 3:17) Zgoro talimanya kale. Citemwa ca Ciuta cikupangiska ŵantu kuti ŵaperekenge vyalusungu. Ciuta wakuŵawonga comene na kuŵatumbika awo ŵali na mtima wa kupereka vyawanangwa nga ndiyo. (Zintharika 22:9; 2 Ŵakorinte 9:6-11) Kasi tikuwuwona mtima wantena lero? Wonani ico cikacitika sono-sono apa mu mpingo wa Ŵakaboni ŵa Yehova.

Nyumba ya Mkristu mucekuru yikakhumbikwiranga kunozgeka. Iye wakakhalanga yekha, ndipo wakaŵavya ŵana kuti ŵamovwire. Virimika vyose vya kumanyuma uku, maungano gha mpingo ghakacitikiranga mu nyumba yake, ndipo kanandi wakacemanga ŵalendo na kurya nawo cakurya. (Milimo 16:14, 15, 40) Pakuwona suzgo lake, mpingo ukakolerana kuti umovwire. Ŵanyake ŵakapereka ndarama ndipo ŵanyake ŵakajipereka kugwira ncito. Pakati pajumpa masabata ghacoko waka, ŵancito ŵakujipereka aŵa ŵakaŵikako mtenje ku nyumba, kuŵikamo bafa lipya, kuphaka pulasitara na penti mu viliŵa vyose vya  cipinda capasi na kuŵikamo makabati ghapya mu khicini. Kupereka uku kukamazga waka suzgo la mwanakazi yura yayi, kweniso kukakhozga mpingo na kukhorweska ŵantu ŵapafupi, nga nciyerezgero ca kupereka kweneco kwa Cikristu.

Pali ntowa zinandi izo tingawovwilira ŵanyithu pa ise tekha. Kasi tingacezga na musepuka panji msungwana muranda? Kasi tingamugulira vintu panji kumusonera vyakuvwara mwanakazi mucekuru uyo ni cokoro? Kasi tingamuphikira cakurya panji kumupa ndarama uyo ni mukavu? Tikwenera kuŵa danka ŵasambazi yayi kuti tiwovwire ŵantu. Mpostole Paulos wakalemba kuti: ‘Usange pampu liripo, ncakupokerereka kwakuyana na umo muntu wariri navyo, kuti ivyo walije cara.’ (2 Ŵakorinte 8:12) Kweni kasi kupereka vyawanangwa pa ise tekha ndiko kwekha uko Ciuta wakutumbika? Yayi.

Wuli Kovwira Pamoza na Ŵanyithu?

Nyengo zinyake kupereka pa ise tekha kukuŵa kwakukwana yayi. Yesu na ŵasambiri ŵake ŵakaŵa na thumba lakovwilira ŵakavu, ndipo ŵakapokeleranga vyakupereka kufuma ku ŵantu ŵaweme mtima awo ŵakakumananga nawo mu ncito yawo. (Yohane 12:6; 13:29) Mwakuyana waka, kale mipingo yikawunjikanga vyawanangwa para kunyake kwaŵa suzgo, ndipo covwiro cikuru cikaperekekanga.—Milimo 2:44, 45; 6:1-3; 1 Timote 5:9, 10.

Ici ndico cikacitika mu 55 C.E. Mu mipingo ya Yudeya ŵantu ukavu ukakoma, panji cifukwa ca njara yikuru iyo yikaŵako. (Milimo 11:27-30) Pakuti nyengo zose mpostole Paulos wakafipiranga mtima ŵakavu, wakapempa mipingo, kusazgapo mipingo yakutali ku Makedoniya kuti yiwovwirepo. Nayo wakawunjika vyawanangwa na kutuma ŵanarumi ŵakugomezgeka kuti ŵakapereke. (1 Ŵakorinte 16:1-4; Ŵagalatiya 2:10) Iye, panji ŵanyake awo ŵakawovwira pa ncito iyi kuti ŵakapokera malipiro ghalighose yayi.—2 Ŵakorinte 8:20, 21.

Ŵakaboni ŵa Yehova nawo ŵakovwirapo mwaluŵiro usange kwacitika soka. Mwaciyerezgero, mu June 2001, vura yikuru yikacitiska kuti maji ghafulukire mu msumba wa Houston, ku Texas, U.S.A. Nyumba zakukwana 723 za Ŵakaboni zikanangika, ndipo zinyake zikanangika uheni comene. Mwaluŵiro ŵarara ŵakasoreka, kupanga komiti yakuwona vyakusoŵa vya muntu waliyose, na kugaŵa ndarama zakuti ziwovwire Ŵakaboni pa nyengo ya suzgo iyo na kunozgera nyumba zawo. Ŵateŵeti ŵakujipereka ŵakufuma mu mipingo yapafupi ndiwo ŵakacita ncito yose. Kaboni munyake wakawonga comene cifukwa ca covwiro ico, ndipo wakati wapokera ndarama zakunozgera nyumba yake kufuma ku kampani ya inshuransi, nyengo yeneyiyo wakazipereka ku thumba lakovwilira pangozi kuti ziwovwire ŵantu ŵanyake.

 Pakuyowoya za kupereka vyawanangwa kwizira mu mawupu, tikwenera kuŵa ŵakucenjera, na kughawona makora mapempo agho ghakuperekeka. Mawupu ghanyake ghakovwira ŵakusuzgika ghakulipira ndarama zinandi ku ŵancito ŵawo, panji kumalira pa ncito yakukhuŵirizga ŵantu kuti ŵaperekenge covwiro, ndipo ndarama zicoko waka ndizo zikugwira ncito yake yeneko iyo zikaperekekera. Pa Zintharika 14:15 pakuti: “Muzereza wakupulikana . . . vyose, kweni wamahara wakupwererera mendero ghake.” Ipo ncamahara kupenda fundo zose mwakupwererera.

Kupereka Uko Nkhwakovwira Comene

Pali kupereka kunyake uko nkhwakovwira comene kuruska kupereka vyalusungu. Yesu wakayowoya za kupereka uku apo mweruzgi musambazi wakamufumba ico wangacita kuti wasange umoyo wamuyirayira. Yesu wakamuphalira kuti: ‘[Rutanga] ukaguliske ivyo uli navyo, na kuŵapa ŵakavu, ndipo wize kuzakanirondezga.’ (Mateyu 19:16-22) Wonani kuti Yesu wakayowoyapo yayi kuti, ‘Kaŵape ŵakavu, ndipo uzamupokera umoyo.’ M’malo mwake, wakayowoyaso kuti, ‘wize kuzakanirondezga.’ Tiyowoye kuti, ncito zalusungu ni ziweme nadi na zakovwira, kweni kuŵa musambiri Wacikristu kukukhumba vinandi.

Pa vyose, Yesu wakaŵikapo mtima kuti wawovwire ŵantu mwauzimu. Nyengo yicoko pambere wandafwe, wakaphalira Pilato kuti: “Ceneici ndico nkababikira, ndipo ndico nkizira mu caru, mwakuti ndipanikizge na unenesko.” (Yohane 18:37) Nangauli wakaŵanga pantazi kovwira ŵakavu, kucizga ŵarwali na kuryeska ŵanjara, cakwamba wakasambizga ŵasambiri ŵake kupharazga. (Mateyu 10:7, 8) Nakuti mu mazgu ghake ghaumaliro, wakaŵatuma kuti: “Rutaninge mukasambizge mitundu yose.”—Mateyu 28:19, 20.

Mbunenesko kuti kupharazga kumazgenge masuzgo ghose yayi pa caru. Kweni kuphalirako ŵantu ŵamitundu yose makani ghaweme kukupereka ucindami kwa Ciuta, cifukwa ncito yakupharazga yikufiska khumbo la Ciuta na kujulira ntowa awo ŵakupulikira uthenga wake kuti wazakasange vitumbiko vyamuyaya. (Yohane 17:3; 1 Timote 2:3, 4) Mwalekeraci kuzakapulikizga ivyo Ŵakaboni ŵa Yehova ŵazamuyowoya para ŵiza pa nyumba yinu? Iwo ŵakusenya cawanangwa cauzimu. Ndipo ŵakumanya kuti palijeso ntowa yinyake iyo ŵangaperekera cawanangwa kwa imwe kuruska iyi.

[Vithuzithuzi pa peji 6]

Pali ntowa zinandi izo tikurongolera kuti tikupwererera ŵanji

[Cithuzithuzi pa peji 7]

Kupharazga makani ghaweme kukukondweska Ciuta ndiposo kukujulira ntowa vitumbiko vyamuyirayira