‘Lekani Kopa Panji Kutentema’

‘Lekani kopa panji kutentema. . . . Yehova waŵenge namwe.’—2 MIDAUKO 20:17.

1. Kasi ucigeŵenga ukukhwaska wuli ŵantu, ndipo cifukwa wuli wofi wawo ngwakupulikikwa?

 UCIGEŴENGA! Lizgu ili likofya comene para lazunurika waka, ndipo likupangiska ŵantu kujiwona kuŵa ŵambura kuvikilirika. Likupereka wofi, citima, na ukari ku ŵantu. Ndipo likurongosora ico ŵanandi ŵakughanaghana kuti cizamucitikira ŵantu mu virimika ivyo vikwiza. Ico cikupangiska ŵantu kuŵa na wofi uwu ncakuti vyaru vinyake vyaŵa vikulimbana na ucigeŵenga kwa virimika vinandi kweni vyatondeka kuwumazga.

2. Nimwauli umo Ŵakaboni ŵa Yehova ŵakuwonera ucigeŵenga, ndipo ni mafumbo wuli agho ghakufumbika?

² Ndipouli, pali cifukwa cakupulikikwa cakuŵira na cilindizga ciweme. Ŵakaboni ŵa Yehova, awo ŵakulimbikira kupharazga mu vyaru na vigaŵa 234 pa caru cose, ŵakugomezga kuti vintu viŵenge makora kuntazi. M’malo mwa kopa kuti ucigeŵenga ulekenge kumara, iwo mbakusimikizga kuti umarenge sono-sono apa. Kasi ncamahara kuti nase ndimo tighanaghanirenge? Ninjani uyo wangaponoska ŵantu ku muliri uwu, ndipo ici cingacitika wuli? Pakuti tose tikukhwaskika na vivulupi vyakupambana-pambana, cingaŵa ciweme kusanda ico cikupangiska Ŵakaboni kuŵa na cilindizga ici.

3. Ni vici ivyo vikupereka wofi ku ŵantu, ndipo ni vici iyo vili kuyowoyekerathu pakukhwaskana na nyengo yithu?

 ³ Mazuŵa ghano, ŵantu ŵali na wofi pa vifukwa vyakupambana-pambana. Ghanaghanani waka za ŵantu ŵanandi awo ŵakutondeka kujipwererera cifukwa ca ucekuru, awo ŵakusuzgika na matenda ghambura kucizgika, na mbumba izo zikusuzgika na ukavu. Nakuti ghanaghanani waka za umo umoyo iwo weneko wuliri wakukayikiska! Tingafwa nyengo yiliyose cifukwa ca ngozi panji masoka, ndipo cose ico tikutemwa cingamalira papo. Wofi na kwenjerwa kwa mtundu uwu, kusazgapo masuzgo na kukhuŵara uko tikuŵa nako, vyapangiska mazuŵa ghithu kuŵa agho ghakarongosoreka na mpostole Paulos kuti: “Umanye ceneici, kuti mu mazuŵa gha ku umaliro nyengo zinonono ziti zizenge. Cifukwa ŵantu ŵati ŵaŵenge ŵakujitemwa, . . . ŵambura kutemwa ŵanyaŵo, ŵanonono, ŵakusesa, ŵambura kujikora, ŵakali, ŵambura kutemwa uweme.”—2 Timote 3:1-3.

4. Kasi ncilindizga wuli ciweme ico cili mu lemba la 2 Timote 3:1-3?

⁴ Nangauli lemba ili likuyowoya za vintu viheni, kweni likupereka cilindizga ciweme. Wonani kuti nyengo zinonono zikwenera kuŵako “mu mazuŵa gha ku umaliro” kwa caru ciheni ca Satana, ico cilipo sono. Ici cikung’anamura kuti kuwombokwa kwaneng’enera, ndipo Ufumu waurunji wa Ciuta uwo Yesu wakasambizga ŵarondezgi ŵake kuwupempha wuli pafupi kutora malo gha caru ici ciheni. (Mateyu 6:9, 10) Ufumu uwu ni boma la Ciuta ilo liri kucanya, ilo ‘kuti lizamuparanyika cara muyirayira,’ ndimo wakuyowoyera mprofeti Danieli, kweni “wamkuteketa mauthemba ghose agha [gha ŵantu] na kughamara kweni uwu tiwimirire muyirayira.”—Daniel 2:44.

Kuleka Kunjizgika mu Ndyari kwa Ŵakristu na Ucigeŵenga

5. Kasi vyaru sono vyacitapo vici pa nkani ya ucigeŵenga?

⁵ Kwa virimika vinandi, ucigeŵenga wakomeska ŵantu ŵanandi. Kofya kwa ucigeŵenga kukathandazgika pa caru cose pamanyuma pa ucigeŵenga uwo ukacitika mu msumba wa New York na Washington, D.C., pa September 11, 2001. Pakuwona kuthandazgika kwa ucigeŵenga, vyaru vinandi pa caru cose vikakolerana kuti vilimbane na mukhaliro uwu. Mwaciyerezgero, kuyana na lipoti linyake, pa December 4, 2001, “nduna zakuwona nkani za kuwaro kwa vyaru 55 vya ku Europe, North America, na Central Asia, zikapangana” kuti zikolerane pakulimbana na ucigeŵenga. Mwanarumi murara wa boma la ku United States wakahaya pulani iyi wakati “ni khongono zipya” zakulimbanirana na ucigeŵenga. Mwamabuci, ŵantu mamiliyoni ghanandi ŵakamba kutoramo cigaŵa mu nkondo iyo magazini ya The New York Times yikuti ni “kwamba kwa nkondo yikuru.” Tijiwonerenge tekha vyakurondezgapo vya kuyezgayezga uku. Ndipouli, ŵantu ŵakufipa mtima na kwenjerwa na ivyo vicitikenge cifukwa ca nkondo yakulimbana na ucigeŵenga, kweni awo ŵakugomezga Yehova ŵakopa yayi.

6. (a) Cifukwa wuli nyengo zinyake ŵantu cingaŵaŵira cinonono kuzomera kuti Ŵakaboni ŵa Yehova ŵaleke kunjira mu ndyari? (b) Kasi nciyerezgero wuli cakukhwaskana na kunjira mu ndyari ico Yesu wakapereka ku ŵarondezgi ŵake?

⁶ Ŵakaboni ŵa Yehova ŵakumanyikwa  makora cifukwa ca kuleka kunjizgika mu ndyari. Nangauli pa nyengo ya mtende ŵantu ŵanandi ŵangati ici nciweme waka, kweni ŵakuzakasinta para vintu vyasuzga. Kanandi, wofi na vintu vyakofya ivyo vikuŵako panyengo ya nkondo, vikupangiska ŵantu kuti ŵambe kuvikilira caru cawo. Ici cingapangiska ŵantu ŵanyake kuti ŵatondeke kupulikiska cifukwa ico muntu munyake wangalekera kucitako vintu ivyo waliyose mu caru wakucita. Ndipouli, Ŵakristu ŵaunenesko ŵakumanya kuti ŵakwenera kupulikira dango la Yesu la kuleka kuŵa “ŵa caru.” (Yohane 15:19; 17:14-16; 18:36; Yakobe 4:4) Ici cikung’anamura kuti ŵaleke kunjira mu ndyari. Yesu iyo mweneko, wakarongora ciyerezgero ciweme comene. Para tikuwona mahara ghake na nkongono zake, tikumanya kuti wakatenge wacitenge vintu vinandi vya kukwezga umoyo wa ŵantu pa nyengo yira. Kweni wakakana kunjira mu ndyari. Kukwambilira kwa uteŵeti wake, wakakanirathu apo Satana wakate wamupe mazaza gha kuwusa maufumu ghose gha pa caru. Pamanyuma pake, wakakana apo ŵakakhumbanga kumukora ufumu.—Mateyu 4:8-10; Yohane 6:14, 15.

7, 8. (a) Ncivici ico kuleka kunjira mu ndyari kwa Ŵakaboni ŵa Yehova kukuleka kung’anamura, ndipo cifukwa wuli? (b) Kasi lemba la Ŵaroma 13:1, 2 likukanizga wuli kucita vintu vya kuwukira boma?

⁷ Kuleka kunjira mu ndyari kwa Ŵakaboni ŵa Yehova kukung’anamura kuti ŵakukondwa na vivulupi yayi. Para ndimo ŵangacitira, mbwenu visuskanenge na ivyo ŵakuyowoya kuti mbateŵeti wa ‘Ciuta wa citemwa na mtende.’ (2 Ŵakorinte 13:11) Iwo ŵali kusambira umo Yehova wakuwonera nkaza. Wamasalmo wakalemba kuti: ‘Yehova wakusanda ŵarunji na ŵakwananga ndipo mzimu wake ukutinka uyo wakutemwa nkaza.’ (Salmo 11:5) Ŵakumanyaso ivyo Yesu wakaphalira mpostole Petros kuti: “Wezgera lupanga lwako mu malo ghake; cifukwa wose awo ŵakukora lupanga ŵati ŵamarenge na lupanga.”—Mateyu 26:52.

⁸ Nangauli mbiri yikurongora kuti Ŵakristu ŵatesi ŵakunyamura “lupanga,” kweni Ŵakaboni ŵa Yehova ŵakucita ntena yayi. Iwo ŵakutceŵa kacitiro aka. Ŵakaboni ŵakupulikira dango la pa Ŵaroma 13:1, 2, ilo likuti: “Ŵantu wose [ŵajilambike ku, NW] ŵa mazaza ŵarara; cifukwa palive wa mazaza kweni mweneuyo ngwa Ciuta; ndipo ŵa mazaza awo ŵaliko ŵali kwimikika na Ciuta. Nteura uyo wakupindikana na ŵa mazaza, wakwimikana na cakwimikika ca Ciuta: ndipo awo ŵakwimikana naco ŵati ŵajitorerenge kususkika.”

9. Kasi Ŵakaboni ŵa Yehova ŵakulimbana na ucigeŵenga kwizira mu ntowa ziŵiri zini?

⁹ Ndipouli, pakuti ucigeŵenga nguheni comene, kasi Ŵakaboni ŵa Yehova ŵakwenera kucitapo kantu yayi kuti ŵawovwirepo? Enya ŵakwenera kucitapo kantu, ndipo ndimo ŵakucitira. Cakwamba, ŵakutceŵa kucita ucigeŵenga wa mtundu wuliwose. Caciŵiri, ŵakusambizga ŵantu marango gha Cikristu agho usange ŵagharondezga mbwenu ucigeŵenga umalirengethu. a Cirimika camara, Ŵakaboni ŵakamalira maora 1,202,381,302, kovwira ŵantu kuti ŵamanye mikhaliro ya Cikristu. Nyengo yose iyi yikanangika pawaka yayi, cifukwa ŵantu ŵakukwana 265,469 ŵakabapatizika na kuŵa Ŵakaboni ŵa Yehova, kurongora pakweru kuti nawo ŵakutinka comene vivulupi.

10. Kasi vivulupi vingamara mu caru ici?

¹⁰ Kusazgaso apa, Ŵakaboni ŵa Yehova ŵakumanya kuti pa iwo ŵekha ŵangamazga yayi vintu  viheni pa caru. Lekani ŵakuŵika cigomezgo cawo cose mwa uyo wangacita ici—Yehova Ciuta. (Salmo 83:18) Nanga ŵantu ŵangayezgayezga wuli, ŵangamazga yayi vivulupi. Mlembi wa Baibolo wakaticenjezgerathu za “mazuŵa gha ku umaliro” ndipo wakuti: ‘Ŵantu ŵaheni na ŵakupusika ŵarutirirenge kuhenipa, kupusika na kupusikika.’ (2 Timote 3:1, 13) Para tawona vintu mu ntowa iyi, tingamanya kuti ŵantu ŵangamazga yayi vintu viheni. Ndipo tingagomezga Yehova kuti wawuskepo vivulupi kuti vileke kuzakaŵakoso.—Salmo 37:1, 2, 9-11; Zintharika 24:19, 20; Yesaya 60:18.

Ŵalije Wofi Nangauli Ŵali Pafupi Kuwukirika

11. Ni vici ivyo Yehova wacita kale kuti wamazge vivulupi?

¹¹ Pakuti Ciuta wa mtende wakutinka vivulupi, tingapulikiska cifukwa ico wakunozgekera kuzakaparanya uyo wakwambiska vivulupi, Satana Dyabulosi. Nakuti wali kukhozga kale soni Satana mwakugwiriskira ncito Mikayeli, mungelo murara—uyo ni Themba ilo laŵikika sono-sono pa mpando, Yesu Kristu. Baibolo likurongosora kuti: “Ndipo kucanya kukaŵa nkondo: Mikayeli na ŵangelo ŵake ŵakarwanga na Cinjoka; ndipo Cinjoka cikarwanga pamoza na ŵangelo ŵake; ndipo kuti ŵakaruska cara, panji nesi malo ghaŵo kuti ghakawonekaso kucanya cara. Ndipo Cinjoka cikuru cikaponyeka pasi, njoka ya ciyamwaka, iyo yikucemeka Musesi na Satana, uyo wakupusika caru cose capasi; wakaponyeka pa caru capasi, na ŵangelo ŵake ŵakaponyeka pasi pamoza nayo.”—Civumbuzi 12:7-9.

12, 13. (a) Cifukwa wuli cirimika ca 1914 ncapadera? (b) Kasi ucimi wa Ezekiel ukuyowoyerathu vici mwakuyana na awo ŵali ku cigaŵa ca Ufumu wa Ciuta?

¹² Ucimi wa Baibolo na vyakucitika vya mu caru vikurongolerathu kuti nkondo iyi yikacitika mu 1914. Kwambira cirimika cira, mikhaliro ya caru yahenipa comene. Lemba la Civumbuzi 12:12 likurongosora cifukwa cake, likuti: “Nteura sekererani, mwa macanya mwe, na imwe mukukhala mwenemumo. Soka ku caru capasi na nyanja! cifukwa Satana wali kwikhira kwa imwe, wakuŵa na ukali ukuru, uku wakumanya kuti nyengo yake njicoko waka.”

¹³ Ncakupulikikwa kuti ukari wa Dyabulosi comene wuli pa ŵasopi ŵakuphakazgika ŵa Ciuta na ŵabwezi ŵawo ŵa “mberere zinyake.” (Yohane 10:16; Civumbuzi 12:17) Ukari uwu sono ufikenge pakofya comene apo Dyabulosi wawukirenge wose awo ŵali ku cigaŵa ca Ufumu wa Ciuta na awo ŵakuwugomezga. Kuwukira uku kwa kafwe-na-kafwe kukurongosoreka mu buku la Ezekiel 38 kuti nkuwukira kwa “Gogi, wa caru ca Magogi.”

14. Kasi ncivikiliro wuli ico Ŵakaboni ŵa Yehova ŵapokera kumanyuma uku, kweni kasi ndimo vintu viŵirenge nyengo zose?

¹⁴ Kufumira apo Satana wakacimbizgika kucanya, ŵantu ŵa Ciuta nyengo zinyake ŵaŵa ŵakuvikilirika ku ukari wake na ŵarara ŵanyake ŵa maboma, awo ŵakuyowoyeka mwakuyerezgera pa Civumbuzi 12:15, 16. Kweni mwakupambanako na ici, Baibolo likurongora kuti pa kuwukira kwaumaliro kwa Satana, pazamuŵavya boma panji muntu waliyose uyo wazamuvikilira awo ŵakugomezga Yehova. Kasi ici cikwenera kupangiska Ŵakristu kuŵa na wofi na kutenthema? Napacoko-pose!

15, 16. (a) Mazgu agho Yehova wakasimikizgira ŵantu ŵake mu nyengo ya Yehoshafati ghakupangiska kuti Ŵakristu mazuŵa ghano ŵaŵe na cilindizga wuli? (b) Kasi nciyerezgero wuli ico Yehoshafati na ŵantu ŵake ŵakupereka ku ŵateŵeti ŵa Ciuta mazuŵa ghano?

 ¹⁵ Ciuta wazamuvikilira ŵantu ŵake nga ni umo wakavikilirira ŵantu ŵake mu nyengo ya Themba Yehoshafati. Tikuŵazga kuti: ‘Pulikizgani imwe mwa ŵaJudah, na imwe mukukhala mu Jerusalem, na imwe themba Yehoshafati; nteura ndimo wakumunenerani Yehova, Lekani kopa panji kutenthema cifukwa ca ciwuru ici cikuru; pakuti nkondo njinu cara, nja Yehova. . . . Kuti mwamukhumbikwira kurwa nkondo cara; [iŵani mu malo ghinu, NW], mwimirire mute waka cete, muwone ciponosko ca Yehova pa imwe mwa ŵaJudah na ŵaJerusalem. Lekani kopa panji kutenthema; namacero muŵafumire, pakuti Yehova tiwaŵenge namwe.’—2 Midauko 20:15-17.

¹⁶ Ŵantu ŵa mu Yuda ŵakapokera cisimikizgo cakuti ŵakhumbikwirenge kurwa nkondo yayi. Mwakuyana waka, apo Gogi, wa caru ca Magogi wazamuwukira ŵantu ŵa Ciuta, iwo ŵazamutceŵa kutora virwero kuti ŵajivikilire. M’malo mwake, ‘ŵazamwimilira waka cete na kuwona ciponosko ca Yehova.’ Mbunenesko kuti kwimirira waka cete kukung’anamura kuleka kucitapo kantu yayi, nga ni umo ŵantu ŵa Ciuta mu nyengo ya Yehoshafati kuti ŵakakhalirathu waka cete ca. Tikuŵazga kuti: ‘Penepapo Yehoshafat wakasindama mutu wake na kurazga cisko cake pasi, ndipo ŵa Yuda wose na ŵantu ŵa mu Yerusalem ŵakawa pasi ŵakalambira Yehova. . . . [Yehoshafati] wakati wayowoyeskana na ŵantu wakimika ŵakumwimbira Yehova, na ŵakucindika, na kuvwara vyakutowa apo ŵadangirenge pantazi pa nkondo kuti, Perekani kwa Yehova kuwonga kwinu, pakuti kutemwa kwake kukurutirira swi-i.’ (2 Midauko 20:18-21) Enya, nanga mpanyengo iyo ŵakazingirizgika na ŵarwani, ŵantu ŵa Ciuta ŵakarutilira kurumba Yehova. Ici cikupereka ciyerezgero ciweme cakuti Ŵakaboni ŵa Yehova ŵarondezge apo Gogi wayambenge kuŵawukira.

17, 18. (a) Ni maghanoghano wuli ghaweme agho Ŵakaboni ŵa Yehova ŵali nagho pakuyowoya za kuwukira kwa Gogi? (b) Ncikumbusko wuli ico ŵawukirano Ŵacikristu ŵapokera sono-sono apa?

¹⁷ Kufikira pa nyengo iyo—ndipo nanga paŵe pamanyuma pakuti Gogi wayamba kuŵawukira, Ŵakaboni ŵa Yehova ŵarutilirenge kuŵa ku cigaŵa ca Ufumu wa Ciuta. Ŵarutilirenge kupokera nkongono na civikiliro mwa kuwungana  na mipingo yakujumpa 94,600 pa caru cose. (Yesaya 26:20) Ee-e! yino ni nyengo yiweme nadi ya kutumbikira Yehova na cikanga cose! Kulindilira kuti Gogi waŵawukirenge kukuŵapangiska kuti ŵawelere nyuma yayi cifukwa ca wofi. M’malo mwake, kukuŵapangiska kuti ŵasazgireko sembe zawo za marumbo, mupaka apo nkongono zawo zigoterenge.—Salmo 146:2.

¹⁸ Mtima wacikanga uwu ukurongoreka makora na ŵawukirano ŵanandi pa caru cose, awo ŵayamba uteŵeti wa nyengo zose. Kuti tirongore kuzirwa kwa kusanka uteŵeti uwu, trakiti la mutu wakuti Ŵawukirano—Kasi Mucitengeci na Umoyo Winu? likafumiskika pa ungano wa cigaŵa wa 2002. Ŵakristu, ŵana na ŵarara wuwo, ŵakuwonga comene vikumbusko vya panyengo yake ivyo vili mu trakiti ili.—Salmo 119:14, 24, 99, 119, 129, 146.

19, 20. (a) Cifukwa wuli palije cifukwa cakuti Ŵakristu ŵaŵire na wofi panji kutenthema? (b) Kasi mutu wakurondezgapo uzamucita vici?

¹⁹ Mwambura kupwererako kantu za umo caru ciliri, Ŵakristu ŵakwenera kucita wofi yayi nesi kutenthema. Ŵakumanya kuti sono-sono apa, Ufumu wa Yehova uzamuwuskapo vivulupi vyose ndipo vizamuŵakoso yayi. Kweniso, ŵakupembuzgika kumanya kuti panyengo ya ciwuka, wose awo ŵali kukomeka cifukwa ca vivulupi ŵazamuwuka. Peneapo ŵanji ciwuka cizamuŵapa mwaŵi wakwamba wakuti ŵasambire za Yehova, ŵanji ŵazamurutilira uteŵeti wawo wakupatulika kwa iyo.—Milimo 24:15.

²⁰ Nga Mbakristu ŵaunenesko, tikumanya kukhumbikwa kwakuti Ŵakristu ŵaleke kunjira mu ndyari ndipo tili ŵakusimikizga kuti ndimo ticitirenge. Tikukhumba kuŵa na cilindizga ca ‘kuzakayimilira waka cete na kuwona ciponosko ca Yehova.’ Mutu wakurondezgapo uzamukhozga cipulikano cithu mwakutiphalira vintu ivyo vikucitika panyengo yasono, ivyo vikurongora kuti ucimi wa Baibolo ukukwaniriskika.

[Mazgu ghamusi]

Kasi Mungarongosora?

• Cifukwa wuli ŵantu ŵanandi mazuŵa ghano ŵakukhala mwawofi?

• Cifukwa wuli Ŵakaboni ŵa Yehova ŵakugomezga kuti vintu viŵenge makora kuntazi?

• Ncivici ico Yehova wacita kale kuti wamazge ico cikwambiska vivulupi?

• Cifukwa wuli palije cifukwa cakuti tiwopere kuwukira kwa Gogi?

[Mafumbo]

[Cithuzithuzi pa peji 23]

Yesu wakarongora ciyerezgero ciweme cakuti Ŵakristu ŵaleke kunjira mu ndyari

[Vithuzithuzi pa peji 26]

Ŵawukirano ŵanandi awo Mbakaboni ŵa Yehova ŵayamba uteŵeti wa nyengo zose mwacimwemwe

[Kulongosora Cithuzithuzi pa peji 22]

Cithuzithuzi ca UN 186226/M. Grafman