Mwimilire Muti Waka Cete, Muwone Ciponosko ca Yehova!
Mwimilire Muti Waka Cete, Muwone Ciponosko ca Yehova!
“[Iŵani mu malo ghinu, NW], mwimilire muti waka cete, muwone ciponosko ca Yehova pa imwe.”—2 MIDAUKO 20:17.
1, 2. Cifukwa wuli kuwukira kwa “Gogi, wa caru ca Magogi” uko kuli pafupi, kuli na vyakufumapo vyakofya kuruska ucigeŵenga wa pa caru cose?
ŴANYAKE ŵakuti ucigeŵenga nkuwukira caru ndiposo mtende wa ŵantu. Ncakupulikikwa kuti mukhaliro uwu ukwenera kumara. Kweni, pali kuwukira kunyake uko vyakufumapo vyake ni vyakofya, kweni ŵantu ŵakuŵikako viŵi mahara yayi. Kasi nkuwukira wuli?
2 Ni kuwukira kwa “Gogi, wa caru ca Magogi” uko Baibolo likuyowoya mu Ezekiel cipaturo 38. Kasi tikutarulira waka para tikuti kuwukira uku kuli na vyakufumapo vyakofya kuruska ucigeŵenga wa pa caru cose? Napacoko-pose, cifukwa kuwukira kwa Gogi kukuruska kuwukira waka maboma gha ŵantu. Ni kuwukira boma la kucanya la Ciuta! Ndipouli, mwakupambana na ŵantu, awo ŵali na nkongono zicoko waka zakulimbanirana na uyo waŵawukira, Mlengi wali na nkongono zose zakumalirana na kuwukira kwakofya uko Gogi wangacita.
Kuwukira Boma la Ciuta
3. Kwamba mu 1914, kasi mafumu gha caru ghapempeka kuti ghaciteci, ndipo ghacita wuli?
3 Kulimbana pakati pa Themba ilo sono likuwusa Ufumu wa Ciuta na boma liheni la Satana kwaŵa kukucitika kufuma apo Ufumu wa Ciuta ukakhazikiskika kucanya mu 1914. Panyengo yira, mafumu gha caru capasi ghakaphalirika kuti ghajilambike ku Fumu yakusankika ya Ciuta. Kweni ŵakana kucita ici, nga ni umo kukayowoyekerathu kuti: ‘Mafumu gha caru [ghakususka], ndipo ŵakuru ŵakukhalira wupu kwimikana na Yehova na wakuphakazgika wake, kuti, Waphwatulenge [malamba] ghaŵo, na kuwuskapo pa ise vikondo vyaŵo.’ (Salmo 2:1-3) Kwimikana na Ufumu wa Ciuta na muwuso wake kufikenge pa cinyina para Gogi, wa caru ca Magogi wayamba nkondo yake.
4, 5. Kasi ŵantu ŵangarwa wuli nkondo na boma la Ciuta lambura kuwoneka la kucanya?
4 Tingazizwa kuti, “kasi ŵantu ŵangarwa wuli nkondo na boma lambura kuwoneka la kucanya? Baibolo likuvumbura kuti boma ili liri na ŵantu ‘vikwi makhumi pera khumi na makhumi ghanayi pacanya vinayi [144, 000], ŵeneaŵo ŵali kuwomboleka ku caru capasi,’ ndiposo “Mwana-mberere,” Yesu Kristu. (Civumbuzi 14:1, 3; Yohane 1:29) Pakuti boma lipya ili liri kucanya, ilo likucemeka “macanya ghapya,” ndipo ŵantu pa caru capasi, awo ŵali ku cigaŵa cake ŵakucemeka “caru capasi cipya.” (Yesaya 65:17; 2 Petros 3:13) Ŵanandi mwa ŵa 144,000, awo ŵazamuwusira lumoza na Kristu ŵali kumarizga kale uteŵeti wawo mwakugomezgeka pa caru capasi. Mwanteura, ŵali kurongora kuti mbakwenelera kutora uteŵeti wawo upya kucanya.
5 Ndipouli, ŵacoko mwa ŵa 144,000, ŵacali pano pasi. Pa ŵantu 15,000,000 awo ŵakiza pa Mugonero wa Fumu cirimika ca 2002, ŵantu 8,760 pera ndiwo ŵakarongora kuti mbakusankhika kukateŵetera kucanya. Waliyose uyo wakuwukira mamembara gha Ufumu uwu agho ghacali pano pasi, ndikuti wakuwukira Ufumu wa Ciuta.—Civumbuzi 12:17.
Fumu Yikutonda
6. Nimwauli umo Yehova na Yesu Kristu ŵakuwonera kunyozeka uko ŵantu ŵa Ciuta ŵakukumana nako?
6 Ico Yehova wacitirenge ŵarwani ŵa Ufumu wake cikayowoyekerathu kuti: ‘Yehova wakucanya tiwaseke; Fumu [Yehova] yiŵerurenge [yiŵakhozgenge soni, NW]. Yiyowoyenge naŵo mu ukari wake, na kuŵayuzga mu ukari wake; Kweni ine ndakhalika fumu yane pa Ziyoni, lupiri lwane lwakupatulika.’ (Salmo 2:4-6) Nyengo sono yakwana yakuti Kristu, mwakurongozgeka na Yehova, ‘watonde.’ (Civumbuzi 6:2) Kasi Yehova wakuwona wuli para ŵantu ŵake ŵakunyozeka mu nyengo ya kutonda kwake kwaumaliro? Wakuwona kuti ŵakulimbana na iyo ndiposo Fumu iyo wali kuyiŵika. ‘Uyo wakukhwaska imwe wakukhwaska mboni ya jiso lane,’ ndimo Yehova wakuyowoyera. (Zekariya 2:8) Ndipo Yesu wakayowoya mwakusimikizga kuti ivyo ŵantu ŵakucitira panji kuleka kucitira ŵabali ŵake ŵakuphakazgika, wakuviwona nga ŵakucitira iyo.—Mateyu 25:40, 45.
7. Cifukwa wuli ukari wa Gogi wuli pa “mzinda ukuru” uwo ukuyowoyeka pa Civumbuzi 7:9?
7 Enya, ukari wa Gogi uŵengeso pa wose awo ŵakovwira Ŵakristu ŵakuphakazgika. Ŵantu aŵa, awo ŵazamukhala mu “caru cipya” ca Ciuta ni “mzinda ukuru” wakufuma “ku mtundu wose, na ku mafuko na ku ŵantu na ku malulimi.” (Civumbuzi 7:9) Iwo ŵakuyowoyeka kuti “ŵakwimirira pantazi pa cizumbe na pamaso pa Mwana-mberere, ŵakuvwarikika minjirira yituŵa.” Mwanteura, mbakupokelereka pamaso pa Ciuta na Yesu Kristu. Uku ŵayeya “mani [mahamba] gha vincindo mu mawoko ghawo” ŵakuthuwuska Yehova nga ni Fumu iyo yikwenera kuwusa cilengiwa cose, iyo muwuso wake ukwendera mwa Fumu iyo wali kuyiŵika, Yesu Kristu, “Mwana-mberere wa Ciuta.”—Yohane 1:29, 36.
8. Kasi kuwukira kwa Gogi kuzamupangiska kuti Kristu waciteci, ndipo cakufumapo cake cizamuŵa vici?
8 Kuwukira kwa Gogi kuzamupangiska kuti Themba lakuŵikika na Ciuta licitepo kantu na kurwa nkondo ya Haramagedoni. (Civumbuzi 16:14, 16) Wose awo ŵakukana muwuso wa Yehova ŵazamuparanyika te-te-te! Awo ŵazizipizga masuzgo cifukwa ca kupulikira Ufumu wa Ciuta ŵazamuwomboreka kwamuyirayira. Kuyana na nkani iyi, mpostole Paulos wakalemba kuti: “Ceneico ncimanyikwiro ca njeruzgo yakunyoroka ya Ciuta; mwakuti mupimike ŵakwenerera Ufumu wa Ciuta, weneuwoso mukukomwera. Usange Ciuta wakupima kuti nkwakurunjika kuŵawezgera suzgo aŵo ŵakumusuzgani, na kumupumuzgani pamoza na ise imwe mukusuzgika, para Fumu Yesu wati wafume kucanya kwiza kavumbukwa pamoza na ŵangelo ŵa nkongono zake mu dimi la moto, kwiza kaŵatayira nduzga aŵo ŵalive kumanya Ciuta, na aŵo ŵakureka kupulikira ivangeli la Fumu yithu Yesu.”—2 Ŵatesalonika 1:5-8.
9, 10. (a) Nimwauli umo Yehova wakaponoskera Yuda ku ŵarwani ŵake ŵakofya? (b) Ncivici ico Ŵakristu mazuŵa ghano ŵakwenera kurutilira kucita?
9 Pa nyengo ya suzgo yikuru iyo yikwiza, iyo yizamurondezgana na Haramagedoni, Kristu wazamuwuskapo viheni vyose. Kweni ŵarondezgi ŵake ŵazamukhumbikwira kurwa nkondo yayi, nga ni umo ŵantu ŵa mafuko ghaŵiri awo ŵakhalanga mu Yuda, virimika 2,900 ivyo vyajumpa, kuti ŵakakhumbikwira kurwa nkondo yayi. Nkondo yikaŵa ya Yehova, ndipo wakaŵawovwira kuti ŵatonde. Tikuŵazga kuti: ‘Yehova wakaŵakhazga Ŵaamoni na Ŵamoabu na ŵaku lupiri Seir pa kwiza kwawo kurwa nkondo na Yuda, ndipo ŵakatimbanizgika. Cifukwa Ŵaamoni na Ŵamoabu ŵakawukira ŵaku lupiri Seir na kuŵaparanya, ndipo ŵakati ŵamara ŵaku Seir, ŵakawukirana ŵeka kukomana. Ŵayuda pakufika ku cigongwe cakulindirako mu mapopa, ŵakalaŵiska ciwuru ndipo wonani, vitanda nguŵiri-nguŵiri pasi: pakaŵavye yumo wakuphokwapo.’—2 Midauko 20:22-24.
10 Vintu vikaŵa nde-nde-nde nga ni umo Yehova wakuyowoyera kuti: ‘Mwamukhumbikwira kurwa nkondo cara.’ (2 Midauko 20:17) Ici cikupereka ciyerezgero cakuti Ŵakristu ŵarondezge apo Yesu Kristu wakumalizga ‘nkondo yake.’ Panyengo yasono ŵakurutilira kurwa nkondo na vintu viheni, mwakugwiriskira ncito virwero vyeneko yayi, kweni virwero vyauzimu. Mwanteura, ŵakurutilira ‘kutonda uheni mwakucita uweme.’—Ŵaroma 6:13; 12:17-21; 13:12; 2 Ŵakorinte 10:3-5.
Mbanjani Ŵadangilirenge Nkondo ya Gogi?
11. (a) Kasi ni mawupu wuli agho Gogi wagwiriskirenge ncito pa kuwukira kwake? (b) Kasi kuŵa maso mwauzimu kukusazgapo vici?
11 Kwambira 1914, apo Gogi, wa caru ca Magogi wakaponyeka pasi, iye wakumanyikwa kuŵa Satana Dyabulosi. Pakuti ncilengiwa cauzimu, wangacita yayi ncito zake mwakudunjika, kweni wagwiriskirenge ncito mawupu gha ŵantu kuti ghacite milimo yake. Kasi agha ghaŵenge mawupu wuli? Baibolo likuyowoyerathu vyose yayi, ndipouli, likuzunura vintu vinyake ivyo vingatovwira kumanya mawupu agha. Peneapo vyakucitika vya mu caru vikukwaniska ucimi wa Baibolo, pacoko-na-pacoko tiŵenge na cithuzithuzi ciweme. Ŵantu ŵa Yehova ŵakutceŵa kughanaghanira waka vintu kweni ŵakuŵa maso mwauzimu, ŵakumanya makora vintu ivyo vikucitika mu ndyari na mu visopo, ivyo vikukwaniska ucimi wa Baibolo.
12, 13. Nimwauli umo mprofeti Daniel wakayowoyerathu za kuwukirika kwa ŵantu ŵa Ciuta?
12 Mprofeti Daniel wakuvumbura za kuwukirika kwaumaliro kwa ŵantu ŵa Ciuta, apo wakulemba kuti: ‘[Fumu ya ku mpoto] yifumenge na kutukutwa kukuru kukaparanya na kumara nkanira ŵanandi. Yamukhoma mahema ghake nga ndi nyumba-yikuru pakati pa nyanja yikuru na lupiri lwakutowa.’—Daniel 11:44, 45.
13 Mu nyengo yakale, “nyanja yikuru” yikaŵa ya Mediterranean, ndipo “lupiri lwakutowa” lukaŵa Ziyoni, lupiri ulo Yehova wakayowoya kuti: ‘Ine ndakhalika Fumu yane pa Ziyoni, lupiri lwane lwakupatulika.’ (Salmo 2:6; Joshua 1:4) Mwanteura, mukawonero kauzimu, caru ca “pakati pa nyanja yikuru na lupiri lwakutowa” cikuyimira mukhaliro wauzimu wa Ŵakristu ŵakuphakazgika. Kuti ŵali pamoza na nyanja ya ŵantu awo ŵali kutali na Ciuta cara, ndipo ŵakulindilira kukawusa lumoza na Yesu Kristu mu Ufumu wa kucanya. Mwakuwonekerathu, maso gha themba la ku mpoto comene ghaŵenge pa ŵateŵeti ŵakuphakazgika ŵa Ciuta, na ŵabwezi ŵawo ŵakugomezgeka ŵa mberere zinyake, para layamba kuwukira uko kukukwaniska ucimi wa Daniel.—Yesaya 57:20; Ŵahebere 12:22; Civumbuzi 14:1.
Kasi Ŵateŵeti ŵa Ciuta Ŵazamucita Wuli?
14. Ni vintu wuli vitatu ivyo ŵantu ŵa Ciuta ŵacitenge para ŵayamba kuwukirika?
14 Ncivici ico ŵateŵeti ŵa Ciuta ŵazamucita para ŵayamba kuwukirika? Apaso, ivyo ŵakacita Ŵaisrayeli mu mazuŵa gha Yehoshafati vikupereka ciyerezgero. Kumbukani kuti ŵantu ŵakaphalirika kucita vintu vitatu: (1) kuŵa mu malo ghawo (2) kwimilira waka cete na (3) kuwona ciponosko ca Yehova. Nimwauli umo ŵantu ŵa Ciuta mazuŵa ghano ŵacitirenge mwakukolerana na mazgu agha?—2 Midauko 20:17.
15. Kasi cikung’anamuraci kuti ŵantu ŵa Yehova ŵaŵe mu malo ghawo?
15 Kuŵa mu malo ghawo: Mwambura kusunkhunika, ŵantu ŵa Ciuta ŵarutilirenge kudemelera ku Ufumu wa Ciuta. Ŵarutilirenge kuleka kunjira mu ndyari. Ŵaŵenge “ŵakukhora, ŵambura kusunkunika” mu uteŵeti wawo kwa Yehova ndipo ŵarutilirenge kuthuwuska Yehova ku ŵantu cifukwa ca lusungu lwake. (1 Ŵakorinte 15:58; Salmo 118:28, 29) Palije suzgo iyo ŵakukumana nayo sono panji kuntazi yakuti yiŵatondeske kukondweska Ciuta.
16. Nimwauli umo ŵateŵeti ŵa Yehova ŵazamwimilira waka cete?
16 Kwimilira waka cete: Ŵateŵeti ŵa Yehova ŵazamuyezga kujithaska ŵekha yayi, kweni ŵazamuŵika cigomezgo cawo cose mwa Yehova. Ni Yehova yekha uyo wangaponoska ŵateŵeti ŵake mu masuzgo, ndipo wakulayizga kuti ndimo wacitirenge. (Yesaya 43:10, 11; 54:15; Citengero ca Yeremiya 3:26) Kugomezga Yehova kuzamusazgapo kugomezga gulu lakuwoneka na maso ilo waligwiriskira ncito kwa virimika vinandi, kucita ivyo wakukhumba. Kuruska kumanyuma kose, Ŵakristu ŵazamukhumbikwira kuŵika cigomezgo cawo mwa ŵasopi ŵanyawo awo Yehova na Fumu yakwimikika na iye waŵaŵika kuti ŵarongozgenge mpingo. Ŵanarumi ŵakugomezgeka aŵa, ŵazamurongozga ŵantu ŵa Ciuta. Kuleka kupulikira urongozgi wawo kuzamucema soka.—Mateyu 24:45-47; Ŵahebere 13:7, 17.
17. Cifukwa wuli ŵateŵeti ŵakugomezgeka ŵa Ciuta ŵazamuwona ciponosko ca Yehova?
17 Kuwona ciponosko ca Yehova: Ciponosko cizamuŵa njombe ya wose awo ŵakurutilira kugomezgeka na awo ŵakugomezga Yehova kuti waŵawombore. Mupaka kuumaliro, ndiposo na nkongono zose, ŵazamupharazga kwiza kwa zuŵa la ceruzgo ca Yehova. Cilengiwa cose cikwenera kumanya kuti Yehova ni Ciuta waunenesko ndipo wali na ŵateŵeti ŵake ŵakugomezgeka pa caru capasi. Pazamuŵavya nanga njumoza wakususka kuti Yehova ndiyo wakwenera kuwusa cilengiwa cose.—Ezekiel 33:33; 36:23.
18, 19. (a) Mu Exodus cipaturo 15, kasi sumu iyo Ŵaisrayeli ŵakimba apo ŵakatonda yikurongora kuti awo ŵazamupona kuwukira kwa Gogi ŵazamujipulika wuli? (b) Ncivici ico ŵateŵeti ŵa Ciuta ŵakwenera kucita panyengo yasono?
18 Cifukwa ca nkongono zipya izo ŵazamuŵa nazo, ŵantu ŵa Ciuta ŵazamunjira mu caru cipya, ŵakunozgeka kwimba sumu yakuti ŵatonda, nga ni umo ŵakacitira Ŵaisrayeli apo ŵakaponoskeka pa Nyanja Yiswesi. Cifukwa ca kuwonga Yehova kuti waŵavikilira, waliyose payekha ndiposo nga ni gulu, ŵazamuyowoya mazgu ghakale kuti: ‘Niyimbirenge Yehova, pakuti waruska mu ucindami. . . . Yehova ndi cinkara ca nkondo; Yehova ndilo zina lake. . . . Woko linu la maryero, A Yehova, likupwanyura murwani. Mu ukuru wa kuzirwa kwinu mukuparanya aŵo ŵakamuwukirani imwe; mukutumizga ukali winu, uwo ukuŵanyekeska myangu. . . . Imwe mu lusungu lwinu mwalongozga ŵantu aŵa mwaŵawombola, mwaŵadangirira mu nkongono zinu kuya ku malo ghinu ghatuŵa. . . . Muti muŵanjizge na kuŵapanda mu lupiri lwa mweneco, mu malo gheneagho mukajinozgera kukhalamo, A Yehova, malo ghatuŵa, A Yehova, gheneagho woko linu likimika. Yehova wati wawuse muyirayira swi.’—Exodus 15:1-19.
19 Pakuti umoyo wamuyirayira waneng’enera comene sono kuruska kumanyuma kose uku, yino ni nyengo yiweme comene yakuti ŵateŵeti ŵa Ciuta ŵarongore kujipereka kwawo kwa iyo na kuŵa ŵakusimikizga kumuteŵetera nga ni Themba lawo lamuyirayira!—1 Midauko 29:11-13.
Kasi Mungarongosora
• Cifukwa wuli Gogi waukirenge Ŵakristu ŵakuphakazgika na mberere zinyake?
• Nimwauli umo ŵantu ŵa Ciuta ŵaŵirenge mu malo ghawo?
• Kasi kwimilira waka cete kukung’anamuraci?
• Nimwauli umo ŵantu ŵa Ciuta ŵazamuwonera ciponosko ca Yehova?
[Mafumbo]
[Cithuzithuzi pa peji 28]
Yehova wakapangiska kuti Yehoshafati na ŵantu ŵake ŵatonde nkondo, kwambura kurwa
[Cithuzithuzi pa peji 30]
Ŵakristu ŵakuphakazgika na mberere zinyake ŵakuthuwuskira lumoza muwuso wa Yehova
[Cithuzithuzi pa peji 31]
Nga ni umo ŵakacitira Ŵaisrayeli kale, ŵantu ŵa Ciuta sono-sono apa ŵimbenge sumu yakuti ŵatonda