Pulikani Ico Mzimu Ukuyowoya!
Pulikani Ico Mzimu Ukuyowoya!
‘Mweneuyo wali na khutu wapulike ico mzimu ukuyowoyera maekleziya [mipingo].’—CIVUMBUZI 3:22.
1, 2. Pa mauthenga agho Yesu wakuyowoya ku mipingo 7 ya mu buku la Civumbuzi, kasi ni urongozgi wuli uwo ukuyowoyeka mwakuwerezga-werezga?
ŴATEŴETI ŵa Yehova ŵakwenera kupulika mazgu agho Yesu Kristu wakayowoya mwakurongozgeka na mzimu ku mipingo 7 yakuzunurika mu buku la Civumbuzi. Enya, uthenga wuliwose mu buku ili wuli na urongozgi wakuti: ‘Mweneuyo wali na khutu, wapulike ceneico mzimu ukuyowoyera maekleziya [mipingo].’—Civumbuzi 2:7, 11, 17, 29; 3:6, 13, 22.
2 Tawona kale mauthenga agho Yesu wakayowoya ku ŵangelo, panji titi ŵalaŵiriri ŵa mipingo ya Efeso, Smurna, na Pergamo. Kasi tingapindura wuli na ivyo wakayowoya mwakurongozgeka na mzimu utuŵa ku mipingo yinyakeso yinayi?
Ku Mungelo wa ku Thuatera
3. Kasi msumba wa Thuatera ukaŵa nku, ndipo ukamanyikwa na kupanga vici?
3 “Mwana wa Ciuta” wakurumba na kucenya mpingo wa Thuatera. (Ŵazgani Civumbuzi 2:18-29) Msumba wa Thuatera, (uwo sono ni Akhisar) ukazengeka mumphepete mwa dambo ilo likuthira maji mu nyanja ya Gediz (iyo kale yikacemekanga Hermus), kumanjiliro gha dazi kwa Asia Minor. Msumba uwu ukaŵa wakumanyikwa pa nkani ya vyakupanga-panga. Awo ŵakapanganga munkhwara wakusintira mtundu wa salu ŵakagwiriskiranga ncito misisi pakudaya salu yiswesi iyo ŵantu ŵakayitemwanga comene. Ludiya, uyo wakazgoka Mkristu panyengo iyo Paulos wakaruta ku Filipi mu caru ca Greece, wakaguliskanga mukhwara wakudayira salu mu msumba wa Thuatera.—Milimo 16:12-15.
4. Kasi mpingo wa Thuatera ukarumbika cifukwa ca vici?
4 Yesu wakarumba mpingo wa Thuatera cifukwa ca milimo yake yiweme nga ni citemwa, cipulikano, kuzizipizga, ndiposo uteŵeti wawo. Nakuti ‘milimo yawo yaumariro yikaŵa yinandi kuruska yakudanga.’ Nanga tingaŵa na mbiri yiweme, kweni mikhaliro yithu tingayitoleranga maseŵera yayi.
5-7. (a) Ninjani uyo wakaŵa “mwanakazi yura Yezebeli,” ndipo ncivici cikenera kucitikira nkaro yake? (b) Uthenga uwo Kristu wakayowoya ku mpingo wa Thuatera ukovwira ŵanakazi ŵakopa Ciuta kuti ŵacite vici?
5 Mpingo wa Thuatera ukalekereranga kusopa vikozgo, visambizgo vyautesi, na uzaghali. Pakati pawo pakaŵa “mwanakazi yura Yezebeli”—mtepanji kagulu ka ŵanakazi ako kakaŵa na nkaro yakuyana na Fumukazi yiheni Yezebeli, ya mu nyengo ya ufumu wa mafuko 10 gha Ŵaisrayeli. Ŵantu ŵanyake ŵakusambira comene ŵakusacizga kuti ‘ŵaprofeti ŵanakazi ŵa ku Thuatera ŵakayezgayezga kunyenga Ŵakristu kuti ŵasopenge ŵaciuta ŵa malonda, na kuŵapo pa viphikiro ivyo pakaŵanga vyakurya vyakuperekeka ku vikozgo. Tileke kuzomerezga ŵaprofeti ŵakujiŵika ŵekha kuti ŵapuruske ŵanji mu mpingo Ŵacikristu mazuŵa ghano!
6 Kristu wakaŵa pafupi ‘kuponya mwanakazi yura Yezebeli pa citara [ca urwali], na awo ŵakucita nayo ureŵi kuŵaponya mu suzgo yikuru, usange ŵakureka kung’anamuka ku milimo yawo.’ Ŵalaŵiriri wakwenera kurekelera yayi visambizgo na mikhaliro yiheni, ndipo Mkristu wakukhumbikwira kucita uzaghali wauzimu panji wakuthupi yayi, nesi kusopa vikozgo mwakuti wamanye kuti “vithu vikuru vya Satana” ni viheni nadi. Usange tikupulikira urongozgi wa Yesu, ‘tizamukoreska ico tili naco,’ ndipo kwananga kuzamucita ufumu yayi pa ise. Pakuti Ŵakristu ŵakuphakazgika ŵakutceŵa vintu ivyo Ciuta wakukana, makhumbiro gha thupi, na maghanoghano ghaheni, iwo ŵakupokera “mazaza pa mitundu” ndipo ŵazamuŵa lumoza na Kristu pa kuparanya mitundu. Mipingo sono yili na nyenyezi zakuyerezgera, ndipo para Ŵakristu ŵakuphakazgika ŵakuruta kucanya, ŵazamupika ‘nyenyezi yakuŵala mulenji,’ iyo ni Yesu Kristu.—Civumbuzi 22:16.
7 Mpingo wa ku Thuatera ukacenjezgeka kuti uleke kurekelera nkaro yiheni ya ŵanakazi ŵakugaruka. Mazuŵa ghano, uthenga wakufunyilirika na mzimu uwo Kristu wakapereka ku mpingo uwu, ukovwira ŵanakazi awo ŵakopa Ciuta kuti ŵasungenge malo agho Ciuta wali kuŵapa mu mpingo. Iwo ŵakucita mazaza yayi pa ŵanarumi, ndipo ŵakutceŵa kukopa ŵabali kuti ŵacite nawo uzaghali wauzimu panji wakuthupi. (1 Timote 2:12) M’malo mwake, ŵanakazi aŵa ŵakurongora ciyerezgero ciweme kwizira mu milimo yiweme na uteŵeti wawo kwa Ciuta. (Salmo 68:11; 1 Petros 3:1-6) Usange mpingo ukuvikilira ivyo wuli navyo—visambizgo na mikhaliro yituŵa, ndiposo kuzirwiska uteŵeti wa Ufumu, Kristu wizenge na vitumbiko—ceruzgo yayi.
Ku Mungelo wa ku Sardesi
8. (a) Kasi msumba wa Sardesi ukaŵa nkhu, ndipo ukaŵa msumba wuli? (b) Cifukwa wuli mpingo wa Sardesi ukakhumbikwiranga wovwiri?
8 Mpingo wa Sardesi ukakhumbikwiranga wovwiri mwaluŵiro cifukwa ukaŵa wakufwa kuuzimu. (Ŵazgani Civumbuzi 3:1-6.) Msumba wa Sardesi, uwo ukaŵa pa mtunda wa makilomita 50, kumwera kwa Thuatera, ukaŵa usambazi. Malonda, dongo la vundira, na kupanga vyakuvwara kufuma ku weya wa mberere, vikapangiska msumba uwu kuŵa usambazi mwakuti panyengo yinyake ukaŵa na ŵantu 50,000. Kuyana na ivyo wakalemba muntu wakumanya za mudauko, Josephus, msumba wa Sardesi ukaŵa na Ŵayuda ŵanandi pambere Yesu wandababike. Viliŵa ivyo vili apo pakaŵa msumba uwu vikurongora Sunagoge na tempele la ciuta mwanakazi, Artemis wa ku Efeso.
9. Kasi tikwenera kucitaci usange uteŵeti withu ngwambura kufumira pasi pa mtima?
9 Kristu wakaphalira mungelo wa mpingo wa Sardesi kuti: “Nkumanya milimo yako, kuti uli na zina lakuti uli wamoyo, kweni uli wakufwa.” Wuli usange tili na mtima wa kukhumba kuwoneka nga tili maso mwauzimu, kweni tili mu tulo pa milimo ya Cikristu kweniso uteŵeti withu ngwambura kufumira pasi pa mtima, ndipo ‘tili pafupi kufwa’ kuuzimu? Mbwenu tikukhumbikwira ‘kukumbuka umo tikapokera na kupulikira’ uthenga wa Ufumu, ndipo tikwenera kwambaso kuŵika mtima pa uteŵeti wakupatulika. Tikwenera kwamba kuzgorapo na mtima wose pa maungano gha Cikristu. (Ŵahebere 10:24, 25) Kristu wakacenjezga mpingo wa Sardesi kuti: “Nteura usange ukuleka kuŵa maso, nditi ndizenge nga ndi munkhungu, ndipo kuti umanyenge cara ora ilo nkwizira kwa iwe.” Wuli pakuyowoya za mu nyengo yithu? Sono-sono apa, tose tizamujiyowoyera tekha ivyo tikacitanga.
10. Nanga pangaŵa mikhaliro yakuyana na ya ku Sardesi, kasi kungaŵa kuti Ŵakristu ŵanyake ŵakucita wuli?
10 Nanga pangaŵa mikhaliro yakuyana na ya ku Sardesi, pangaŵa ŵanyake awo ‘ŵakukazuzga cara minjirira yaŵo: na awo ŵakutembeya na Kristu mu utuŵa; pakuti mbakwenerera.’ Nyengo zose ŵakumanyikwa kuti Mbakristu, ŵakuŵa ŵambura kufipiskika, ŵambura mikhaliro yiheni panji vigomezgo vyakufuma ku visopo vya caru. (Yakobe 1:27) Mwanteura, Yesu ‘kuti wasisitenge zina lawo mu Buku la umoyo cara, kweni wazomerenge zina lawo pamaso pa Awiske, na pamaso pa ŵangelo ŵake.’ Pakuti mbakwenelera kwenda na Kristu, Ŵakristu ŵakuphakazgika ŵazamuvwarikika salu yiweme, yakugabuka na yakutowa, iyo yikuyimira milimo yawo yituŵa na yakunyoroka. (Civumbuzi 19:8) Mwaŵi ukuru wa kukateŵetera kucanya uwo ukuŵalindilira, ukuŵapa nkongono kuti ŵatonde caru. Vitumbiko vinyake vikulindilira awo ŵazamukhala na umoyo wamuyirayira pa caru capasi. Nawoso mazina ghawo ghalembeka mu buku la umoyo.
11. Kasi tikwenera kucitaci usange tayamba kugona kuuzimu?
11 Palije waliyose wa ise uyo wakukhumba kuŵa mu mukhaliro wakupereka citima nga ngwa mpingo wa Sardesi. Kweni wuli usange tikuwona kuti tayamba kugona kuuzimu? Tikwenera kucitapo kantu luŵiro kuti tijivikilire. Usange tayamba kucita vintu ivyo Ciuta wakutinka panji kukhala-khala ku maungano na mu uteŵeti wa m’munda, tiyeni tipempe Yehova kuti watovwire. (Ŵafilipi 4:6, 7, 13) Kuŵazga Baibolo zuŵa lirilose na mabuku gha “mulinda murara wa magomezgeko” kuzamutipangiska kuti tiŵe maso mwauzimu. (Luka 12:42-44) Para ndimo ticitirenge, tizamuŵa nga ni Ŵakristu ŵa ku Sardesi awo Kristu wakaŵatemwa, ndipo Ŵakristu ŵanyithu ŵazamutiwona kuŵa ŵaphindu.
Ku Mungelo wa ku Filadelfiya
12. Kasi mungarongosora wuli kasopero ako kakaŵa ku Filadelfiya?
12 Yesu wakarumba mpingo wa Filadelfiya. (Ŵazgani Civumbuzi 3:7-13.) Msumba wa Filadelfiya (uwo sono ni Alasehir) ukaŵa cinyina ca kupanga vinyo kumanjiliro gha dazi kwa Asia Minor. Nakuti ciuta wawo mukuru wakaŵa Diyonesas, ciuta wa vinyo. Ncakuwonekerathu kuti ŵayuda ŵa ku Filadelfiya ŵakayezgayezga kupangiska Ŵakristu Ŵaciyuda kuti ŵayambe kucita panji kuweleraso ku marango ghanyake gha Moses, kweni ŵakatondeka.
13. Kasi Kristu wagwiriskira wuli ncito ‘kiyi wa Davide’?
13 Kristu wali na ‘kiyi wa Davide’ ndipo wali kupika mazaza ghose pa ncito ya Ufumu na kulaŵilira mbumba ya cipulikano. (Yesaya 22:22; Luka 1:32) Yesu wakagwiriskira ncito kiyi uyu pakujura mwaŵi wa ncito ya Ufumu ku Ŵakristu ŵa ku Filadelfiya na kumalo ghanyake. Kwambira mu 1919, iye wali kujulira “mulinda murara wa magomezgeko,” “muryango ukuru” wakurongozgera ku ncito ya kupharazga Ufumu, ndipo palije uyo wangawujara. (1 Ŵakorinte 16:9; Ŵakolose 4:2-4) Mbunenesko kuti muryango wa ncito ya Ufumu wajarika kwa awo ni “sunagoge la Satana” cifukwa Mbaisrayeli ŵauzimu yayi.
14. (a) Ni layizgo wuli ilo Yesu wakapereka ku mpingo wa Filadelfiya? (b) Kasi tingacita wuli kuti tizakaleke kuwa pa “ora lakuyezgera”?
14 Yesu wakapereka layizgo ili ku Ŵakristu ŵa ku Filadelfiya: ‘Pakuti ukasungirira mazgu gha kuzizipizga kwane, naneso ndikusungirirenge ku ora la kuyezgera, ilo laneng’enera kwiza pa caru cose capasi.’ Ncito ya kupharazga yikukhumba mtima wa kuzizipizga uwo Yesu wakarongora. Iye wakawopa ŵarwani yayi kweni wakarutilira kucita khumbo la Awiske. Pa cifukwa ici, Kristu wakawuskika na kuŵa na umoyo wambura kufwa kucanya. Usange tikudemelera ku ivyo tili kusanka kuti tisope Yehova na kwimira Ufumu wake mwa kupharazga makani ghaweme, tizamuwa yayi panyengo ya ciyezgo panji “ora la kuyezgera” ilo likwiza. Para tikuyezgayezga kusazgirako milimo ya Ufumu, ‘tizamukoreska ico tili naco’ kufuma kwa Kristu. Kucita ntena kuzamupangiska kuti Ŵakristu ŵakuphakazgika ŵavwarikike mphumphu ya kucanya ndipo ŵabwezi ŵawo ŵakupulikira ŵasange umoyo wamuyirayira pa caru capasi.
15. Kasi ncivici cikukhumbikwa kwa awo ŵazamuŵa ‘mizati mu tempele la Ciuta’?
15 Kristu wakusazgirapo kuti: ‘Mweneuyo wakutonda, nditi ndimuzgore mzati mu tempele la Ciuta wane, . . . ndipo nditi ndilembenge pa iyo zina la Ciuta wane, na zina la msumba wa Ciuta wane, Yerusalemu mupya, uwo ukukhira kufuma kucanya kwa Ciuta wane, na zina lane lipya.’ Ŵalaŵiliri ŵakuphakazgika ŵakwenera kuyimira kusopa kwaunenesko. Ŵakwenera kurutilira kuŵa cigaŵa ca “Yerusalemu mupya” mwa kupharazga Ufumu wa Ciuta na kuŵa ŵakutowa mwauzimu nyengo zose. Ici ncakukhumbikwa comene usange ŵakukhumba kuŵa mizati mu tempele la kucanya, kuŵa na zina la msumba wa Ciuta nga mbantu ŵake ŵa kucanya, na kupokako zina la Kristu, uyo ni mufumu wawo. Kusazgaso apa, ŵakwenera kuŵa na khutu la ‘kupulika ico mzimu ukuyowoyera mipingo.’
Ku Mungelo wa ku Laodikeya
16. Kasi msumba wa Laodikeya mungawurongosora wuli?
16 Kristu wakacenya mpingo wambura kupwererako wa mu Laodikeya. (Ŵazgani Civumbuzi 3:14-22.) Msumba wa Laodikeya, ukaŵa pa mtunda wa makilomita 150 kumafumiro gha dazi kwa Efeso, ndipo ukaŵa pa nkhumano ya misewu yikuru ya malonda, pa dambo la Layikas. Ukaŵa wakumanyikwa pa kupanga vintu ndiposo pa nkani ya ndarama. Maraya ghakupangika kufuma ku wuzi ufipa wa mu msumba uwu ghakaŵa ghakumanyikwa comene. Msumba wa Laodikeya, uwo ukaŵa na sukulu yakumanyikwa comene yakusambizga za mukhwara, ukwenera kuti ndiwo ukapanga mukhwara wakusira wa maso wa ku Filigiya. Asikilepiyas, ciuta wa munkhwara, ndiyo wakaŵa ciuta mukuru mu msumba uwu. Mu msumba wa Laodikeya mukwenera kuti mukaŵa Ŵayuda ŵanandi, ndipo ŵanji mwa iwo ŵakwenera kuti ŵakaŵa ŵasambazi.
17. Cifukwa wuli Ŵakristu ŵa ku Laodikeya ŵakacenyeka?
17 Pakuyowoya na mpingo wa Laodikeya kwizira mwa “mungelo” wa mpingo uwu, Yesu wakuyowoya mwamazaza nga ni ‘kaboni wakugomezgeka na wakuneneska, Jando la vilengiwa vya Ciuta.’ (Ŵakolose 1:13-16) Ŵakristu ŵa ku Laodikeya ŵakacenyeka cifukwa cakuti ŵakaŵa “ŵakuzizima cara nesi ŵakuthukira” kuuzimu. Cifukwa cakuti ŵakaŵa ŵakupora, Kristu wakaŵa pafupi kuŵabokolera pasi. Cikatenge ciŵaŵirenge cinonono yayi kupulikiska ng’anamuro la mazgu agha. Msumba wa Yerapoli uwo ukaŵa pafupi nawo, ukaŵa na maji ghakotca, ndipo msumba wa Kolose ukaŵa na maji ghakuzizima. Pakuti maji agho msumba wa Laodikeya ukapatuska kufuma ku Yerapoli kwiza mu msumba uwu ghakendanga mtunda utali, ncakuwonekerathu kuti ghakafikanga ghakupora mu msumba uwu. Mu malo ghanyake agho ghakendanga, ŵakaŵikangamo malibwe ndipo maji ghakendanga kusi. Kufupi na msumba wa Laodikeya, ghakendanga mu malibwe ghakudolora agho ŵakagumatiska pamoza.
18, 19. Mwakuyana na Ŵakristu ŵa ku Laodikeya, Kasi Ŵakristu lero ŵangawovwirika wuli?
18 Mazuŵa ghano, ŵantu awo ŵali nga Ŵakristu ŵa ku Laodikeya mbakuthukira mwakukondweska yayi kweniso mbakuzizima makora ha. Ŵazamuthunyika pasi nga ni maji kufuma mu mlomo! Yesu wakukhumba yayi kuti ŵaŵe cakuyowoyeramo cake, nga ‘mbimiliri’ ŵakuphakazgika ‘mu malo gha Kristu.’ (2 Ŵakorinte 5:20) Usange ŵakuleka kurapa, ŵaluzenge mwaŵi wawo wa kupharazga Ufumu. Ŵakristu ŵa ku Laodikeya wakapenjanga mausambazi gha caru ndipo ‘ŵakamanya yayi kuti mbasokwano na ŵa vitima na ŵakavu na ŵaciburumutira na ŵa nkhuli.’ Kuti waleke kuŵa mukavu, waciburumutira, na wa nkhuli kuuzimu, waliyose lero uyo wali nga Mbakristu ŵara wakwenera kugura kwa Kristu ‘golide lakwengeka’ la cipulikano, “minjilira yituŵa” ya urunji, na “munkwara wa maso” uwo ukovwira muntu kuti walaŵiskenge makora mwauzimu. Ŵalaŵiliri Ŵacikristu mbakunozgeka kovwira ŵantu ŵantena aŵa kuti ŵamanye ivyo ŵakusoŵa mwauzimu mwakuti ŵaŵe “ŵasambazi mu cipulikano.” (Yakobe 2:5; Mateyu 5:3) Kusazgaso apa, ŵalaŵiliri ŵakwenera kuŵawovwira kuti ŵagwiriskirenge ncito “munkwara wa maso” wauzimu—kuti ŵapokere na kucita mwakuyana na cisambizgo ca Yesu, urongozgi wake, ciyerezgero cake, na kaghanaghaniro kake. Uwu ni munkwara wakucizgira “makhumbiro gha thupi, na makhumbiro gha maso, na kuthumbwa kwa umoyo uno.”—1 Yohane 2:15-17.
19 Yesu wakucenya na kunyolorera wose awo wakuŵatemwa. Ŵalaŵiliri awo ŵali pasi pake nawo ŵakwenera kucita ici mwalusungu. (Milimo 20:28, 29) Ŵakristu ŵa ku Laodikeya ŵakakhumbikwiranga kuti ‘ŵaŵe na mwampu na kung’anamuka mtima,’ kusinta kaghanaghaniro kawo na umoyo wawo. Kasi taŵanyake tayamba kuŵa na vizgoŵi ivyo vikupangiska kuti uteŵeti withu wakupaturika kwa Ciuta uŵe wambura kuzirwa mu umoyo withu? Usange ndimo viliri, tiyeni ‘tigule munkwara wa maso kwa Yesu’ mwakuti tiwone kukhumbikwa kwa kupenja danka Ufumu.—Mateyu 6:33.
20, 21. Mbanjani lero awo ŵakujurako para Yesu ‘wakukhung’uska,’ ndipo ŵakulindilira vici?
20 Kristu wakuti: “Ehena, nkhwimirira pa muryango, na kukhung’uska: usange muntu wangapulika lizgu lane, ndipo wakujura ku muryango, nditi ndinjirenge kwa iyo, ndipo [niryenge, NW] pamoza nayo, ndipo iye pamoza na ine.” Nyengo zose Yesu wakasambizganga ŵantu para wakurya nawo cakurya. (Luka 5:29-39; 7:36-50; 14:1-24) Panyengo iyi wakukhung’uska pa muryango wa mpingo wakuyana na wa Laodikeya. Kasi Ŵakristu ŵa mpingo uwu ŵajurengeko, kwambaso kumutemwa, kumupokelera na mawoko ghaŵiri, na kuzomera kuti waŵasambizge? Para ndimo ŵacitirenge, mbwenu Kristu waryenge nawo lumoza ndipo ŵapindulenge mwauzimu.
21 Mazuŵa ghano “mberere zinyake” zikuzomera kuti Yesu wanjire pa muryango wawo, ndipo ici cikurongozgera ku umoyo wamuyirayira. (Yohane 10:16; Mateyu 25:34-40, 46) Kwa Mkristu wakuphakazgika waliyose uyo watondenge, Yesu wazamupereka mwaŵi, wa ‘kukhala na iyo pa cizumbe cake, nga ni umo nayeso wakatondera, ndipo wali kukhala na Adada ŵake pa cizumbe Cawo.’ Enya, ku Ŵakristu ŵakuphakazgika awo ŵatondenge, Yesu wakuŵalayizga njombe ya kukakhala nawo ku woko lamaryero la Awiske kucanya. Ndipo mberere zinyake izo zitondenge, zikulindilira caru cakukondweska mu muwuso wa Ufumu wa Ciuta.
Ivyo Tose Tikusambirapo
22, 23. (a) Kasi Ŵakristu wose ŵangapindura wuli na mazgu agho Yesu wakayowoya ku mipingo 7? (b) Kasi tikwenera kuŵa ŵakusimikizga kucitaci?
22 Palije cikayikiro cilicose kuti Ŵakristu wose ŵangapindura na mazgu agho Yesu wakayowoya ku mipingo 7 ya ku Asia Minor. Mwaciyerezgero, pakuwona kuti Kristu wakarumba mipingo iyo yikacitanga makora, ŵalaŵiri ŵacitemwa nawo ŵakurumba ŵantu awo ŵakucita makora mu mpingo. Usange pali vintu ivyo ŵakukhumbikwira kunyolorera, ŵarara ŵakovwira ŵasopi ŵanyawo kuti ŵagwiriskire ncito urongozgi wa mu Malemba. Tose tingapindura na urongozgi wakupambana-pambana uwo Kristu wakapereka ku mipingo 7 usange ticitenge ici mwapempero ndiposo mwaluŵiro. a
23 Mazuŵa ghano ghaumaliro ngakuti tiŵenge ŵakudeka yayi, nesi kutangwanika na vintu vyathupi, panji kucita cilicose ico cingatitondeska kucita uteŵeti wakukwana kwa Ciuta. Mwanteura, mphanyi mipingo yose yarutilira kuŵala mwakugabuka nga ni vyakuŵikapo nyali ivyo Yesu wakuviŵika mu malo ghake. Nga Mbakristu ŵakugomezgeka, tiyeni nyengo zose tipulikirenge para Kristu wakuyowoya na kupulikizga ivyo mzimu ukuyowoya. Para ndimo ticitirenge, mbwenu tizamuŵa na cimwemwe camuyirayira nga mbakunyamura ungweru wa Yehova na kutumbika zina la Yehova.
[Mazgu ghamusi]
a Vipaturo 7 mupaka 13 vya buku la Revelation—Its Grand Climax At Hand!, vikurongosora Civumbuzi 2:1–3:22. Buku ili ndakupharazgika na Ŵakaboni ŵa Yehova.
Kasi Mungazgora Wuli?
• Kasi “mwanakazi yura Yezebeli,” wakaŵa njani, ndipo cifukwa wuli ŵanakazi ŵakopa Ciuta ŵakumurondezga yayi?
• Ni mukhaliro wuli uwo ukaŵa mu mpingo wa Sardesi, ndipo tingacitaci kuti tileke kuŵa nga Mbakristu ŵanandi awo ŵakakhalanga mu msumba uwu?
• Ni malayizgo wuli agho Yesu wakapereka ku mpingo wa Filadelfiya, ndipo ghakugwira wuli ncito panyengo yasono?
• Cifukwa wuli Ŵakristu ŵa ku Laodikeya ŵakacenyeka, kweni ncilindizga wuli ico cili muntazi mwa Ŵakristu awo ŵakulimbikira?
[Mafumbo]
[Cithuzithuzi pa peji 14]
Mukhaliro uheni wa “mwanakazi yura Yezebeli” ukwenera kutceŵeka
[Vithuzithuzi pa peji 16]
Yesu wajulira ŵarondezgi ŵake ‘muryango ukuru’ wa uteŵeti wa Ufumu
[Cithuzithuzi pa peji 18]
Kasi mukupokelera Yesu na kupulikizga kwa iyo?