Rutilirani Kuŵa Ŵakukhora, na Kutonda Cipharizgano ca Umoyo

USANGE cimpepo cikuputa pa nyanja, kasi mungatemwa kukwera boti la mtundu wuli? Kasi mungatemwa kukwera boti lakumara-mara panji sitima yiweme yakukhora? Ncakuwonekerathu kuti mungasanka sitima yakukhora cifukwa ndiyo yingenda makora para nyanja yawuka.

Apo tikujumpa mu caru cakofya ici, tikujiwona nga kuti tiri ŵambura kuvikilirika. Mwaciyerezgero, ŵawukirano nyengo zinyake ŵangajiwona kuti ŵahangayika na masitayelo gha mu caru ici, nakuti ŵalije civikiriro. Ŵantu awo ŵamba sono Cikristu ŵangajiwona kuti mbakukhora viŵi yayi. Nanga ni awo mbakukhora, awo ŵateŵetera Ciuta virimika vinandi, cingaŵa ciyezgo kwa iwo kuwona kuti ivyo ŵakalindiliranga vindakwaniriskike.

Ndimwe mwekha yayi mukujipulika ntena. Ŵateŵeti ŵakugomezgeka ŵa Yehova, nga ni Moses, Yobu, na Davide, pa nyengo zinyake ŵakaleghalegha. (Maŵazgo 11:14, 15; Job 3:1-4; Salmo 55:4) Ndipouli, ivyo ŵakacitanga mu umoyo wawo vikarongora kuti mbantu ŵakukhora pakuteŵetera Yehova. Ciyerezgero cawo ciweme cikutipa nkongono kuti nase tiŵe ŵakukhora, kweni Satana Dyabulosi wakukhumba kuti titondeke cipharizgano ca umoyo wamuyirayira. (Luka 22:31) Ipo tingaŵa wuli ŵakukhora na ‘kungangamika mu cipulikano’? (1 Petros 5:9) Ndiposo tingakhozga wuli Ŵakristu-ŵanyithu?

Yehova Wakukhumba Kuti Tiŵe Ŵakukhora

Nyengo zose Yehova watovwirenge kuti tikhore usange tiri ŵakugomezgeka kwa iyo. Davide wakasangana na masuzgo ghanandi, kweni wakagomezga Ciuta lekani wakimba kuti: “[Yehova] wakandizuwura mu mbuna yakofya na kundizgura mu mathakalimbwa [mathipa]; wakimika marundi ghane pa jarawe, wakakhozga mendero ghane.”—Salmo 40:2.

Yehova wakutikhozga kuti ‘tirwe nkondo yiweme ya Cipulikano’ mwakuti ‘tikoreske umoyo wa muyirayira.’ (1 Timote 6:12) Kweniso wakutovwira kuti tivware zikhore na kutonda nkondo yithu yauzimu. Mpostole Paulos wakaphalira Ŵakristu-ŵanyake kuti ‘ŵakhome mu Fumu, na mu nkongono zake,’ nakuti ‘ŵavware mahomwa ghose gha Ciuta, kuti ŵaŵenge na nkongono zakwimikana na mauryarya gha Satana.’ (Ŵaefeso 6:10-17) Kweni ni vici ivyo vingatipangiska kuŵa ŵakuwayawaya? Ndipo tingavikanizga wuli?

Cenjerani na Ivyo Vingatiwiska

Nciweme kukumbuka fundo yakuzirwa iyi: Vintu ivyo tikusanka kuti ticite paumaliro pake vingatikhozga panji kutiwiska. Ŵawukirano ŵakusanka ncito, panji kusazgirako masambiro  ghawo, kutora panji kutengwa. Ŵapapi nyengo zinyake ŵakusanka kusamira ku malo ghanyake panji kucita ncito yinyake padera pa iyo ŵali nayo kale. Zuŵa na zuŵa tikusanka ivyo tingacita pa nkani ya kugwiriskira ncito nyengo na vinyake vinandi. Nga mbateŵeti ŵa Ciuta, ncivici ico cingatovwira kuti tiŵe na mahara pa kusanka ivyo vingatikhozga? Mkristu uyo wakhala nyengo yitali mu unenesko wakati: “Nkupempa wovwiri wa Yehova para nkusanka ivyo nicitenge. Nkuwona kuti ncakuzirwa kupokera na kurondezga urongozgi wakufuma mu Baibolo, pa maungano gha Cikristu, mu mabuku ghakurongosora Baibolo, na ku ŵabali ŵarara.”

Para tikusanka ivyo ticitenge, cingaŵa ciweme kujifumba kuti: ‘Virimika 5 panji 10 vyakuntazi, kasi nizamuŵa wakukondwa na ivyo nasanka muhanya uno, panji nizamulira navyo? Kasi nkuwoneseska kuti ivyo nasanka vizakaleke kuniwezgera kumanyuma mwauzimu, kweni kuti nikure mwauzimu?’—Ŵafilipi 3:16.

Kuthera ku viyezgo panji kuswa marango gha Ciuta kwapangiska ŵantu ŵanyake ŵakubapatizika kuti ŵaŵe na umoyo wakuwayawaya. Ŵanyake awo ŵakasezgeka mu mpingo cifukwa ca kurondezga mikhaliro yiheni, ŵalimbikira kuti ŵaweleremo mu mpingo, kweni mbwenu ŵakusezgekaso—para pajumpa nyengo yifupi—cifukwa ca ubudi wenewuwo pera. Kasi kungaŵa kuti ŵakaromba yayi wovwiri wa Ciuta kuti ‘ŵanyanyare ico nciheni na kudemerera ku ico nciweme’? (Ŵaroma 12:9; Salmo 97:10) Ise tose tikwenera ‘kunyoroska ntowa ya marundi ghithu.’ (Ŵahebere 12:13) Sono tiyeni tiwone fundo zinyake izo zingatovwira kuti tiŵe ŵakukhora mwauzimu nyengo zose.

Khorani na Mlimo Wacikristu

Ntowa yimoza iyo tingaŵira ŵakukhora pa cipharizgano ca umoyo nkutangwanika na ncito ya kupharazga Ufumu. Enya, uteŵeti withu Wacikristu ngwakuzirwa pa kutovwira kuti mtima na maghanoghano ghithu viŵe pa kucita khumbo la Ciuta na kudodoliska njombe ya umoyo wamuyirayira. Mwakuyana na fundo iyi, Paulos wakaciska Ŵakorinte kuti: “Mwa ŵabali ŵane ŵakutemweka, muŵe ŵakukhora, ŵambura kusunkunika, ŵakufwirira mazuŵa ghose mu mulimo wa Fumu, pakumanya kuti kuteŵeta kwinu kuti nkhwa waka cara mu Fumu.” (1 Ŵakorinte 15:58) ‘Kukhora’ kukung’anamura ‘kukhazikika.’ Kuyana na mazgu gha Cigiriki cakale, ‘kuleka kusunkunika’ kungang’anamura ‘kukhalirira pa malo ghako.’ Pa cifukwa ici, kutangwanika na uteŵeti kungatikhozga mu umoyo withu Wacikristu. Kovwira ŵantu kuti ŵamanye Yehova kukutipa umoyo weneco kweniso cimwemwe.—Milimo 20:35.

Pauline, Mkristu uyo pasono wamalira virimika vyakujumpa 30 mu uteŵeti wa umishonale na uteŵeti unyake, wakuti: “Uteŵeti ncivikiliro cifukwa kupharazgira ŵantu kukunipa cigomezgo cakuti nili na unenesko.” Tikuŵa na cigomezgo cantena ici para kaŵiri-kaŵiri tikucita milimo ya Cikristu, nga ni kufika pa maungano na kucita sambiro lithu la Baibolo nyengo na nyengo.

Kukhozgeka na Ubali Wacitemwa

Kuŵa yumoza wa gulu la pa caru cose la Ŵakristu ŵaunenesko nakoso kungatikhozga. Ni mwaŵi wapadera nkanira kuwungana pamoza na ŵabali ŵacitemwa! (1 Petros 2:17) Nakutiso nase tingakhozga Ŵakristu-ŵanyithu.

Kumbukani vintu viweme ivyo mwanarumi Yobu wakacitira ŵantu. Nanga ni bwezi lake Elifazi, msanguluski mutesi, wakazomerezga kuti: “Mazgu ghako ghamufighirira uyo wakukhuŵara, ndipo wakhozga makongono ghakutempenta.” (Job 4:4) Kasi tikucita wuli pa nkani iyi? Waliyose payekha wali na ncito ya kovwira ŵabali na ŵadumbu ŵithu ŵauzimu kuti ŵakhalirire mu uteŵeti wa Ciuta. Para tiri pamoza na iwo, tingacita mwakuyana na mazgu agha: “Khomeskani mawoko ghakulopwa nkongono, khozgani makongono ghakuteratera.” (Yesaya 35:3) Mwalekeraci kuti kaŵe kaluso kinu kulimbikiska na kukhwimiska Mkristu yumoza panji ŵaŵiri nyengo yiliyose para mwakumana nawo? (Ŵahebere 10:24, 25) Kuŵarumba na kuŵawonga cifukwa ca ivyo ŵakucita kuti ŵakondweske Yehova kungaŵawovwira  kuti ŵarutilire kuŵa ŵakukhora na kukwaniska cipharizgano ca umoyo.

Ŵarara Ŵacikristu ŵangacita vinandi kuti ŵakhozge awo ŵiza sono mu gulu. Ŵangaŵapa masacizgo ghaweme na urongozgi wa mu Malemba, kweniso kwenda nawo mu uteŵeti wa m’munda. Mpostole Paulos nyengo zose wakaŵanga na mupata wakulimbikiskira ŵanyake. Wakatemwa comene kuti wawonane na Ŵakristu ku Roma mwakuti waŵakhozge mwauzimu. (Ŵaroma 1:11) Wakawona ŵabali na ŵadumbu ku Filipi nga ni ‘cimwemwe na mpumpu’ yake, nakuti wakaŵaciska kuti ‘ŵangangamike mu Fumu.’ (Ŵafilipi 4:1) Wati wapulika za masuzgo gha ŵabali ŵake ku Tesalonika, Paulos wakatuma Timote kuti ‘wakaŵakhozge na kuŵasanguluska, mwakuti paŵavye muntu [“wawelere nyuma,” NW] cifukwa ca visuzgo.’—1 Ŵatesalonika 3:1-3.

Mpostole Paulos na Petros ŵakawonga ivyo Ŵakristu-ŵanyawo ŵakacitanga. (Ŵakolose 2:5; 1 Ŵatesalonika 3:7, 8; 2 Petros 1:12) Tiyeni nase tileke kuŵika maghanoghano pa maubudi gha ŵabali ŵithu, kweni pa mikhaliro yawo yiweme na ivyo ŵakucita kuti ŵakhalirire ŵakukhora na kupereka ncindi kwa Yehova.

Usange tikutemwa kuwona maubudi gha ŵanyithu, mbwenu kuŵenge kunonono comene kwa iwo kuti ŵakhore mu cipulikano. Ncakwenelera kukumbuka kuti ŵabali ŵithu ‘mbakukweŵeka na kuparanyika’ mu caru ici. (Mateyu 9:36) Mu mpingo Wacikristu, iwo ŵakwenera kusangamo cipembuzgo na cisangulusko. Mwakuyana na nkongono zithu, tiyeni tiŵalimbikiske na kuŵawovwira ŵabali ŵithu kuti ŵarutilire kuŵa ŵakukhora.

Nyengo zinyake ŵanyithu ŵangaticitira vintu ivyo vingatiwezgera kumanyuma. Kasi tizomerezgenge kuti kayowoyero kawo kaheni katigongoweske pa kuteŵetera Yehova? Tileke kuzomerezga waliyose kuti watigulure nkongono.—2 Petros 3:17.

Malayizgo gha Ciuta—Nkongono Yakukhozga

Malayizgo gha Yehova ghakuyowoya za muntazi mwakukondweska mu Ufumu wake ghakutovwira kuti tikhalirire ŵakukhora. (Ŵahebere 6:19) Ndiposo kugomezga kuti nyengo zose Ciuta wakukwaniriska malayizgo ghake kukutikhozga kuti ‘tiŵe maso na kucinta mu cipulikano.’ (1 Ŵakorinte 16:13; Ŵahebere 3:6) Nyengo zinyake cipulikano cithu cingayezgeka pakuwona kuti malayizgo ghanyake gha Ciuta ghakucedwa. Pa cifukwa ici, ncakuzirwa nadi kuti ticenjere na visambizgo vyautesi, kweni tiŵe maso mwakuti tileke kulekana naco cilindizga cithu.—Ŵakolose 1:23; Ŵahebere 13:9.

Ciyerezgero ciheni ca Ŵaisrayeli awo ŵakafwa cifukwa ca kuŵavya cipulikano mu malayizgo gha Yehova cikwenera kuticenjezga. (Salmo 78:37) Mwakupambana na iwo, tiyeni tiŵe ŵakukhora, titeŵetere Ciuta uku tikumanya kuti tiri mu mazuŵa ghaumaliro. Murara munyake wakati: “Zuŵa lirilose nkukhala nga ni para zuŵa likuru la Yehova lizenge namacero.”—Joel 1:15.

Enya, zuŵa likuru la Yehova laneng’enera. Ndipouli, tikopa yayi malinga tiri pafupi na Ciuta. Usange tikurondezga marango ghake ghaurunji na kuŵa ŵakukhora, mbwenu tikwaniskenge cipharizgano ca umoyo wamuyirayira.—Zintharika 11:19; 1 Timote 6:12, 17-19.

[Cithuzithuzi pa peji 21]

Kasi mukucita mwakuyana na nkongono zinu kuti movwire Ŵakristu-ŵanyinu kuti ŵakhore?

[Kulongosora Cithuzithuzi pa peji 19]

The Complete Encyclopedia of Illustration/J. G. Heck