“Likafiska Khumbo la Mtima Wane”

“N KUMUWONGANI kufumira pasi pa mtima cifukwa ca cawanangwa ciweme, buku la ‘Yandikirani kwa Yehova’ (Sendererani kwa Yehova). Likafiska khumbo la mtima wane—kumanya kuti nkutemweka na Yehova. Sono nkujiwona kuti nili pafupi comene na Yehova na Mwana wake wakutemweka. Nkukhumba kuphalira waliyose za buku ili, kweniso kugaŵira ŵabwezi ŵane wose.” Ndimo wakayowoyera yumoza wa Ŵakaboni ŵa Yehova za buku lipya ili la mapeji 320 ilo likafumiskika pa Ungano wa Cigaŵa wa “Ŵapharazgi Ŵamwampu ŵa Ufumu,” uwo ukacitika mu 2002/03. Tiyeni tiwone ivyo vili mu buku lipya ili ndiposo cifukwa ico liri kulembekera.

Ivyo Vili mu Buku Lipya Ili

Kasi mu buku ili muli vici? Fundo zose izo zili mu mitu yiŵiri yakwamba yakusambira pa mpingo mu magazini iyi—na fundo zinyake zinandi! Buku ili liri na mitu 31, ndipo mutu wuliwose ukuyana na utali wa nkani yakusambirika pa mpingo mu Gongwe la Mulinda. Pamanyuma pa mazgu ghakwamba na mitu yakwamba yitatu, buku ili liri kugaŵika mu vigaŵa vinayi, cigaŵa cilicose cikuyowoya za mikhaliro yikuru ya Yehova. Cigaŵa cilicose cikwamba na mazgu ghakurongosora mwakudumura za mukhaliro umoza. Mitu yinyake yicoko waka yikurongosora umo Yehova wakurongolera mukhaliro wake. Cigaŵa cilicose cili na mutu uwo ukuyowoya za Yesu. Cifukwa? Cifukwa Yesu wakati: “Uyo wawona ine, wawona na Ŵadada wuwo.” (Yohane 14:9) Pakuti Yesu wakarongora ndendende ivyo Yehova wakukhumba, wali kutipa viyerezgero vyanadi vya mikhaliro ya Ciuta. Cigaŵa cilicose cikumarizga na mutu uwo ukutisambizga umo tingarondezgera Yehova pa nkani ya kurongora mukhaliro uwo ukurongosoreka. Pakurongosora za mikhaliro ya Yehova, buku lipya ili liriso na malemba ghakufuma mu buku lirilose la mu Baibolo.

Buku la Yandikirani kwa Yehova liriso na vintu vinyakeso. Kufuma pa mutu 2, mutu wuliwose wuli na bokosi lakuti “Mafunso Owasinkhasinkha.” Malemba na mafumbo ghali kuŵikika kuti muweleremo ivyo vili mu mutu yayi. Kweni kumovwirani kuti mugwiriskire ncito Baibolo, kuti mughanaghanirepo comene pa nkani iyo. Nciweme kuti muŵazge mwakupwererera nkani yose ya Lemba ilo. Pamanyuma pake ghanaghaniranipo pa fumbo ilo na kuwona umo mungaligwiriskilira ncito. Kucita ntena kumovwiraninge kuti musenderere pafupi na Yehova.—Salmo 19:14.

Vithuzithuzi vya mu buku la Yandikirani kwa Yehova vili kunozgeka makora comene kuti vitisambizge na kuticiska. Mitu 17 yili na vithuzithuzi vyakutowa vya mu Baibolo.

Cifukwa Wuli Liri Kulembeka?

Cifukwa wuli buku la Yandikirani kwa Yehova liri kufumiskika? Cifukwa cikuru ncakuti litovwire kumumanya makora Yehova mwakuti tikorane nayo ubwezi wakukhora.

Kasi mungaghanaghana za waliyose uyo wangapindura na buku la Yandikirani kwa Yehova, panyake uyo mukusambira nayo Baibolo panji mbali panji mdumbu Wacikristu uyo wawelera nyuma? Imwe ke—kasi mwambapo kusambira buku lipya ili? Usange mundambepo, mwalekeraci kupatura nyengo sono ntena kuti mwambepo kulisambira? Iŵani na nyengo ya kughanaghanira pa ivyo mukusambira. Buku lipya ili mphanyi lamovwirani kuti musenderere pafupi comene na Yehova Ciuta, mwakuti mupharazge uthenga wake wa Ufumu na nkongono na cimwemwe cose!