Gomezgani Yehova

“Ndimwe nkumugomezgani, A Yehova, ndimwe citamiro cane kwamba ku wanici wane.”—SALMO 71:5.

1. Kasi ncintu wuli cakofya ico mliska msepuka David wakakumana naco?

 MWANARUMI wakaŵa mutali kujumpa mamita ghatatu. Ncambura kuzizika kuti ŵasilikari wose ŵa Israyeli ŵakopanga kusenderera kufupi! Kwa masabata ghanandiko, mlenji na mise yiliyose, Goliyati, cinkara ca Ŵafilisiti cikanyozanga ŵasilikari ŵa Israyeli, kuŵabecera kuti ŵatume muntu uyo ŵakugomezga mwakuti watimbane naco. Paumaliro, muntu munyake wakazomera kutimbana naco, msilikari yayi, kweni musepuka waka. Mliska msepuka, Davide, wakacepa kutali pakuyerezgera na cinkara ici. Nakuti panji virwero vya Goliyati vikaŵaso vizito pakuyerezgera na uzito wa msepuka uyu. Ndipouli, muwukirano uyu wakakumana na cinkara ici ndipo wakamanyikwa comene cifukwa ca cikanga cake.—1 Samuel 17:1-51.

2, 3. (a) Cifukwa wuli Davide wakakumana na Goliyati mwambura wofi? (b) Ni vintu wuli viŵiri ivyo tidumbiskanenge ivyo vingatovwira kuŵika cigomezgo cithu mwa Yehova?

² Ncivici cikamupa Davide cikanga cantena ici? Wonani mazgu agho Davide wakalemba apo virimika vikati vyajumpapo: “Ndimwe nkumugomezgani, A Yehova, ndimwe citamiro cane kwamba ku wanici wane.” (Salmo 71:5) Enya, apo wakaŵa muwukirano, Davide wakaŵika cigomezgo cake cose mwa Yehova. Pakukumana na Goliyati, Davide wakayowoya kuti: ‘Iwe wiza kwa ine na lupanga, na mkondo, na nguru; kweni ine ndiza kwa iwe na zina la Yehova wa mipingo, Ciuta wa nkondo za Israyeli, mweneuyu wamwerura.’ (1 Samuel 17:45) Goliyati wakagomezganga nkongono zake na virwero vyake, kweni Davide wakagomezga Yehova. Pakuti Davide wakamanya kuti Themba Likuru la cilengiwa cose liri nayo, kasi wakatenge wawopereci muntu, nanga wangaŵa mukuru na wankongono?

³ Peneapo mukuŵazga za Davide, kasi namwe mukudokera kuti mphanyi mwaŵa na cigomezgo cikuru mwa Yehova? Ncakuwonekerathu kuti taŵanandi ndimo tikukhumbira. Sono tiyeni tipende vintu viŵiri ivyo tingacita kuti tiŵe na cigomezgo mwa Yehova. Cakwamba, tikwenera kukanizga cintu ico cingatitondeska kuŵa na cigomezgo ici. Caciŵiri, tikwenera kusambira ivyo kugomezga Yehova kukusazgapo.

Kumazga Cintu Ico Cingatitondeska Kugomezga Yehova

4, 5. Cifukwa wuli ŵantu ŵanandi cikuŵaŵira cinonono kugomezga Ciuta?

⁴ Ncivici cikupangiska ŵantu kuti ŵatondekenge kugomezga Ciuta? Kanandi, ŵantu ŵanyake ŵakuzizikika cifukwa ca kuleka kumanya ico viheni vikucitikira. Ŵanandi ŵakusambizgika kuti Ciuta ndiyo wakupangiska masuzgo. Para kwacitika nyifwa, ŵaliska ŵakuyowoya kuti Ciuta “wamutora” mwakuti wakaŵe nayo kucanya. Kusazgaso apa, ŵarongozgi ŵanandi ŵa visopo ŵakusambizga kuti Ciuta wali kulemberathu vyose—kusazgapo masoka na viheni vyose ivyo vikucitika mu caru ici. Cingaŵa cakusuzga kugomezga Ciuta wa mtima unonono nga ni uyu. Satana uyo wakuburumutizga mahara gha ŵambura cipulikano, wakukhumba kuthandazga “visambizgo [ivi] vya mademone.”—1 Timote 4:1; 2 Ŵakorinte 4:4.

⁵ Satana wakukhumba kuti ŵantu ŵareke kugomezga Yehova. Murwani uyu wa Ciuta wakukhumba yayi kuti timanye ico cikupangiska kuti ŵantu wasuzgikenge. Ndipo usange tiri kusambira Malemba agho ghakuyowoya cifukwa ico ŵantu ŵakusuzgikira, Satana wakukhumba kuti tigharuwe. Mwanteura, nciweme kuti nyengo zose tiwelerengemo vifukwa vikuru vitatu ivyo pa caru paliri masuzgo. Para ticitenge ntena, tiŵenge ŵakusimikizga kuti ni Yehova yayi uyo wakucitiska masuzgo mu umoyo withu.—Ŵafilipi 1:9, 10.

6. Nimwauli umo lemba la 1 Petros 5:8 likurongolera cifukwa cimoza ico ŵantu ŵakusuzgikira?

 ⁶ Cifukwa cimoza ico ŵantu ŵakusuzgikira ncakuti Satana wakukhumba kuti ŵaleke kugomezgeka kwa Yehova. Iye wakayezgayezga kuti wapoke cipulikano ca Yobu. Satana wakatondeka kwa Yobu, kweni wandareke kaluso kake. Nga ni fumu ya caru cino, wakukhumba ‘kumirimitizga’ ŵateŵeti ŵakugomezgeka ŵa Yehova. (1 Petros 5:8) Ici cikusazgapo waliyose wa ise! Satana wakukhumba kuti watirekeske kuteŵetera Yehova. Lekani kanandi wakwambiska ntambuzgo. Mwanteura, tikwenera kuzizipizga nangauli tingakumana na masuzgo ghakuŵinya wuli. Para tacita ntena, tikuvumbura Satana kuti ni mutesi ndipo tikukondweska mtima wa Yehova. (Job 2:4; Zintharika 27:11) Peneapo Yehova wakutikhozga kuti tizizipizge ntambuzgo, cigomezgo cithu mwa iye cikukura.—Salmo 9:9, 10.

7. Kasi lemba la Ŵagalatiya 6:7 likutovwira kuti timanye kuti masuzgo ghanyake ghakwiza na vici?

⁷ Cifukwa caciŵiri ico paliri masuzgo cikusangika mu mazgu ghakuti: “Ceneico muntu wakumija, ndico wati wavunenge.” (Ŵagalatiya 6:7) Nyengo zinyake ŵantu ŵakumija mwa kucita vintu mwambura mahara ndipo cakufumapo cake ncakuti ŵakuvuna masuzgo. Ŵangasanka kutcika galimoto mwambura kupwererera, na kucita ngozi. Ŵangasanka kukhweŵa hona, na kuŵa na nthenda ya mtima panji kansa ya mu maphapu. Kwa awo ŵakusanka kucita uzaghali, nthengwa zawo zikuŵa zambura kukhora, ŵakucindikika yayi, ŵakutora matenda pa kugonana, ndiposo nthumbo za pathengere. Ŵantu ŵangayamba kumupa mrandu Ciuta para ŵakumana na ivi, kweni ŵakuruwa kuti ŵakusuzgika cifukwa cakuti ndiwo ŵakacita vintu mwambura mahara.—Zintharika 19:3.

8. Kuyana na Mupharazgi 9:11, cifukwa wuli ŵantu ŵakusuzgika?

⁸ Cifukwa cacitatu ico paliri masuzgo cikuyowoyeka pa Mupharazgi 9:11: “Nkawonaso kuti panopasi cipharizgano kuti [nca] ŵapusu cara, nanga ndi nkondo kuti nja ŵankongono cara, nesi vyakurya kwa ŵavinjeru, nanga ndi usambazi kwa ŵantu ŵa umanyi, panji ulemu kwa ŵafundi; kweni nyengo [na vintu vyamabuci, NW] yikuwira wose.” Nyengo zinyake, ŵantu ŵakuŵa kuti ŵali waka pamalo ghaheni ndiposo panyengo yiheni. Mwambura kupwererako kantu kuti muntu wali na nkongono panji yayi, masuzgo na nyifwa vingawira waliyose wa ise mwamabuci panyengo yiliyose. Mwaciyerezgero, mu nyengo ya Yesu, cigongwe cikawa mu Yerusalemu na kukoma ŵantu 18. Yesu wakayowoya kuti ni Ciuta yayi uyo wakaŵaranganga cifukwa ca zakwananga zawo. (Luka 13:4) Yayi, tikwenera kumupa mrandu Yehova cara para paŵa masuzgo ghantena agha.

9. Ncivici ico ŵathu ŵakutondeka kupulikiska pakukhwaskana na masuzgo?

 ⁹ Kupulikiska vintu vinyake ivyo vikupangiska masuzgo nkhwakukhumbikwa comene. Ndipouli, pali cintu cinyake ico ŵantu ŵakutondeka kupulikiska. Ni fumbo lakuti: Cifukwa wuli Yehova wakuzomerezga masuzgo?

Cifukwa Wuli Yehova Wakuzomerezga Masuzgo?

10, 11. (a) Kuyana na Ŵaroma 8:19-22, ncivici ico cikacitikira “cakwatika cose”? (b) Kasi tingamanya wuli uyo wakanjizga cakwatika mu vyawaka?

¹⁰ Ndime yinyake mu karata iyo mpostole Paulos wakalembera Ŵaroma yikuyowoyapo nkani iyi. Paulos wakalemba kuti: “Cakwatika (cilengiwa) cose cikunweka na kulindirira kuvumbulika kwa ŵana ŵa Ciuta. Cifukwa cakwatika cikalambikika ku vya waka, na khumbo la ceneco cara, kweni ncifukwa ca uyo wakacilambika, mu cigomezgo cakuti cakwatika naco citi cisutukeko ku wuzga wa kuvunda, camkunjira mu wanangwa wa ucindami wa ŵana ŵa Ciuta. Cifukwa tikumanya kuti cakwatika cose cikutampira mu mihero (masuzgo) kufika kuno ku lero.”—Ŵaroma 8:19-22.

¹¹ Kuti tipulikiske mavesi agha, tikwenera kumanya danka mazgoro gha mafumbo ghakuru. Mwaciyerezgero, ni njani uyo wakalambika (kunjizga) cakwatika mu vyawaka? Ŵanyake ŵakuti ni Satana, ŵanyake ŵakuti Adamu. Kweni wose ŵaŵiri ŵangacita yayi ici. Cifukwa wuli? Cifukwa uyo wakunjizga cakwatika mu vyawaka wakucita ici “mu cigomezgo.” Enya, wakupereka cilindizga cakuti ŵantu ŵakugomezgeka ‘wazamusutuka ku wuzga wa kuvunda.’ Adamu panji Satana ŵangapereka yayi cilindizga ici. Ni Yehova pera uyo wangapereka. Mwanteura, ncakuwonekerathu kuti ndiyo wakanjizga cakwatika mu vyawaka.

12. Kasi ŵantu ŵakuti wuli pakuyowoya za ng’anamuro la “cakwatika cose,” ndipo fumbo ili lingazgoreka wuli?

¹² Kweni kasi “cakwatika cose” ico cikuyowoyeka apa ncivici? Ŵanyake ŵakuti “cakwatika cose” cikuyimira vintu vyose vya mu caru, kusazgapo nyama na vyakumera. Kweni kasi vinyama na vyakumera vikulindizga “wanangwa wa ucindami wa ŵana ŵa Ciuta”? Yayi. (2 Petros 2:12) Mwanteura, “cakwatika cose” cikuyimira ŵantu. Ŵantu ndiwo ncilengiwa ico cikusuzgika na kwananga na nyifwa cifukwa ca ucigaruka wa mu Edeni ndipo ndiwo ŵakukhumba comene kusutuka.—Ŵaroma 5:12.

13. Ncivici cikayamba kucitikira ŵantu cifukwa ca ucigaruka wa mu Edeni?

¹³ Kasi ucigaruka uwu ukaŵababira vici ŵantu? Paulos wakarongosora cakufumapo cake, mwa kuyowoya waka lizgu limoza: kuvunda. a Kuyana na umo buku linyake likuyowoyera, lizgu ili likurongosora za “kuvunda kwa cintu ico cikutondeka kugwira ncito nga ni umo cikapangikira.” Ŵantu ŵakapangika kuti ŵakhalenge kwamuyirayira, kugwira ncito lumoza nga ni mbumba yirunji na yakukolerana pa kupwererera caru ca paradiso. M’malo mwake, ŵantu ŵakuŵa na umoyo ufupi, kweniso wakuŵinya na wakuzura na masuzgo. Nga ni umo Yobu wakayowoyera, “muntu wakubabika na mwanakazi mazuŵa ghake ngacoko waka na kuzura visuzgo.” (Job 14:1) Uku nkuvunda nadi!

14, 15. (a) Kasi ivyo Yehova wali kucitira ŵantu vikurongora wuli kuti ni murunji? (b) Cifukwa wuli Paulos wakayowoya kuti likaŵa “khumbo” la cakwatika yayi kuti cinjire mu kuvunda?

¹⁴ Sono tikwiza ku fumbo likuru: Cifukwa wuli “Mweruzgi wa caru cose” wakanjizga ŵantu mu vyakuŵinya na masuzgo gha mtundu uwu? (Genesis 18:25) Kasi wakacita urunji pakucita ntena? Kumbukirani ivyo ŵapapi ŵithu ŵakwamba ŵakacita. Mwa kugarukira Ciuta, iwo ŵakakolerana na Satana, uyo wakayambiska kukayikira muwuso wa Yehova. Cifukwa ca ivyo ŵakacita, iwo ŵakakolerana na ghanoghano lakuti muntu wangakhala makora kwambura Yehova, para wakujiwusa yekha mwakurongozgeka na cilengiwa cakugaruka. Mwa kuzomerezga masuzgo agho ghakiza cifukwa ca ucigaruka, Yehova wakapa ŵantu ico ŵakakhumbanga. Iye wakazomerezga  kuti muntu wajiwuse yekha mwakurongozgeka na Satana. Pakuwona ivyo ŵantu ŵakacita, kasi Ciuta wakatenge wacitengeso vici kuruska kuzomerezga ŵantu kuti ŵanjire mu kuvunda na kuŵapa cilindizga?

¹⁵ Mbunenesko kuti ili ndilo likaŵa “khumbo” la cakwatika yayi. Tiri kubabika ŵazga ŵa kwananga na nyifwa ndipo palije ico tingacita. Kweni cifukwa ca lusungu lwake, Yehova wakazomerezga Adamu na Heva kuti ŵakhaleko virimika vicoko waka na kubaba ŵana. Nangauli ise, ta ŵa mpapu yawo tiri kunjira mu kuvunda kwa zakwananga na nyifwa, tiri na mwaŵi wa kucita ivyo Adamu na Heva wakatondeka kucita. Tingapulikira Yehova na kusambira kuti muwuso wake ngurunji, kweni muwuso wa ŵantu, padera pa Yehova, ukwiza na vyakuŵinya vyekha-vyekha, masuzgo, na kuvunda. (Yeremiya 10:23; Civumbuzi 4:11) Ndipo para Satana wanjilirapo, vintu vikuhenipirathu. Mbiri ya ŵantu yikucitira ukaboni fundo iyi.—Mupharazgi 8:9.

16. (a) Cifukwa wuli tingaŵa ŵakusimikizga kuti ni Yehova yayi uyo wakupangiska masuzgo agho tikughawona mu caru mazuŵa ghano? (b) Ncilindizga wuli ico Yehova mwacitemwa wapereka ku ŵantu ŵakugomezgeka?

¹⁶ Mwakuwonekerathu, Yehova wakaŵa na vifukwa vyakukwana vya kunjizgira ŵantu mu kuvunda. Kweni kasi ici cikung’anamura kuti ndiyo wakupangiska kuvunda na masuzgo agho tikukumana nagho mazuŵa ghano? Yezgelerani na mweruzgi uyo wazomerezga kuti cilango ciperekeke kwa muntu uyo waswa dango. Muntu uyo wananga wangasuzgika pakugwira jere, kweni kasi wangati wakusuzgika cifukwa ca mweruzgi? Napacoko-pose! Mwakuyana waka, Yehova kuti ndiyo wakupangiska viheni yayi. Lemba la Yakobe 1:13 likuti: “Ciuta kuti wangayezga na uheni cara, ndipo iye kuti wakuyezga muntu cara.” Tiyeni tikumbukeso kuti Yehova wakazomerezga cilango, kweni wakaperekaso ‘cilindizga.’ Wali kupanga manozgero gha citemwa ghakuti ŵana ŵakugomezgeka ŵa Adamu na Heva ŵazakawone umaliro wa kuvunda na kukondwa na “wanangwa wa ucindami wa ŵana ŵa Ciuta.” Ku muyirayira wose, ŵantu ŵakugomezgeka kuti ŵazamufipaso mtima kuti cakwatika ciŵengeso na vyakuŵinya yayi. Urunji wa Yehova pa kacitiro ka vintu uzamupangiska ŵantu kuwona kuti ndiyo ngwakwenerera nadi kuwusa kwamuyirayira.—Yesaya 25:8.

17. Kasi kuwona vifukwa ivyo tikusuzgikira mu caru ici kukwenera kutikhwaska wuli mazuŵa ghano?

¹⁷ Peneapo tikupenda vifukwa ivyo ŵantu ŵakusuzgikira, kasi tikuwona cifukwa cakuti timupirenge mrandu Yehova nga kuti ndiyo wakupangiska masuzgo, panji kureka kumugomezga? M’malo mwake, ivyo tasambira vikutipangiska kuti tikolerane na mazgu gha Moses ghakuti: “Ndiye Jarawe, mlimo wake ngwakufikapo; pakuti ntowa zake zose ndi urunji.” (Duteronome 32:4) Tiyeni nyengo na nyengo tighanaghanirenge pa fundo izi mwakuti tijikumbuskenge. Usange ndimo ticitirenge, para takumana na viyezgo tizamutceŵa mtima wa kukayika uwo Satana wakukhumba kupanda mwa ise. Wuli pera pakuyowoya za ntowa yaciŵiri iyo tanguyowoya pakwamba? Kugomezga Yehova kukusazgapo vici?

Ico Kugomezga Yehova Kukung’anamura

18, 19. Kasi Baibolo likugwiriskira ncito mazgu wuli pakuticiska kuti tigomezge Yehova, kweni kasi ŵantu ŵali na maghanoghano wuli ghakubudika?

¹⁸ Mazgu gha Ciuta ghakuticiska kuti: “Tamira mwa Yehova na mtima wako wose, ungeghamanga ku umanyi wako wekha. Mu mendero ghako ghose umuzomere iye, ndipo tiwanyoroskenge ntowa zako.” (Zintharika 3:5, 6) Mazgu agha ngaweme na ghakukhozga. Kuyowoya unenesko, palije waliyose uyo ngwakugomezgeka kuruska Dada withu wakutemweka wakucanya. Ndipouli, ncipusu kuŵazga waka mazgu agha gha mu  lemba la Zintharika kuruska kughagwiriskira ncito.

¹⁹ Ŵantu ŵanandi ŵali na maghanoghano ghakubudika pakuyowoya za kugomezga Yehova. Ŵanyake ŵakuwona nga kugomezga Yehova ni kuyeyeka waka maghanoghano, uko muntu wakuŵa nako mwakawiro. Ŵanyake ŵakughanaghana kuti kugomezga Ciuta kukung’anamura kuti tikwenera kulindizga kuti wativikilirenge ku cakumara-mahara cilicose, kutimazgira suzgo yiliyose, kuticitira vintu mu ntowa iyo taghanaghananga—panyengo yeneiyo. Kweni maghanoghano agha ngakubudika. Kuŵa na cigomezgo kukupambana na kutoreka waka maghanoghano, panji kughanaghana vintu ivyo vingacitika yayi. Ku ŵantu ŵarara, kuŵa na cigomezgo kukusazgapo kupanga vyakusanka vyamahara.

20, 21. Kasi kugomezga Yehova kukusazgapo vici? Perekani ciyerezgero.

²⁰ Wonaniso ivyo lemba la Zintharika 3:5 likuyowoya. Likuyowoya mphambano pakati pa kugomezga Yehova na kugomezga mahara ghithu, kurongora kuti tingacita yayi vyose viŵiri nyengo yimoza. Kasi ici cikung’anamura kuti tikuzomerezgeka yayi kugwiriskira ncito mahara ghithu? Yayi, pakuti Yehova uyo wali kutipa nkongono izi, wakulindizga kuti tizigwiriskirenge ncito pa kumuteŵetera. (Ŵaroma 12:1) Kweni kasi tikugomezga vici? Usange maghanoghano ghithu ghapambana na gha Yehova, kasi tikuzomera kuti mahara ghake ghakuruska ghithu? (Yesaya 55:8, 9) Kugomezga Yehova kukung’anamura kuzomerezga maghanoghano ghake kuti ndigho ghatirongozgenge.

²¹ Kuti tiyerezgere: Ghanaghanani za mwana mucoko uyo wakhala pa mpando wakumanyuma mu galimoto, ndipo ŵapapi ŵake ŵali kuntazi. Awiske ŵakutcika galimoto. Usange mukati mu ulendo mwawuka masuzgo ghakukhwaskana na msewu uwo ŵakwenera kwenda, vura iyo yikuwa, panji mathipa na mabuwu ivyo vili mu msewu, kasi mwana uyo wakupulikira ndiposo uyo wakugomezga awiske wakucita wuli? Kasi wakuphalira awiske cakucita, kuŵaphalira umo ŵakwenera kwendeskera galimoto? Kasi wakukayikira ivyo ŵapapi ŵake ŵakucita panji kukana para ŵakumuphalira kuti wakake lamba? Yayi, iye wakugomezga kuti ŵapapi ŵake ŵakumanya umo ŵacitirenge na suzgo yiliyose, nangauli mbambura urunji. Yehova ni Dada withu murunji. Kasi tikwenera kumugomezga comene yayi para takumana na masuzgo?—Yesaya 30:21.

22, 23. (a) Cifukwa wuli tikwenera kugomezga Yehova para takumana na vyakumara-mahara, ndipo tingacita wuli ici? (b) Kasi mutu wakurondezgapo uyowoyenge vici?

²² Ndipouli, lemba la Zintharika 3:6 likurongora kuti ‘mu mendero ghithu ghose tikwenera kumuzomera [Yehova],’ kuti para takumana na masuzgo pera yayi. Mwanteura, vyakusanka vithu vya zuŵa na zuŵa vikwenera kurongora kuti tikugomezga Yehova. Para masuzgo ghatiwira, tireke kutaya mtima, kutenthema, panji kukana urongozgi wa Yehova wakukhwaskana na umo tingacitira. Tikwenera kuwona viyezgo nga ni mwaŵi wakuti tirongolere kuti tiri ku cigaŵa ca muwuso wa Yehova, kuvumbura kuti Satana ni mutesi, na kusambira mukhaliro wa kupulikira na mikhaliro yinyake iyo Yehova wakukondwa nayo.—Ŵahebere 5:7, 8.

²³ Tingarongora kuti tikugomezga Yehova mwambura kupwererako kantu za masuzgo agho tingakumana nagho. Tikucita ici kwizira mu lurombo ndiposo mwa kupokera urongozgi kwa Yehova kwizira mu Mazgu ghake na gulu lake. Kweni kasi tingagomezga wuli Yehova para tikukumana na vyakumara-mahara mu caru ici? Mutu wakurondezgapo uzgorenge fumbo ili.

[Mazgu ghamusi]

Kasi Mungazgora Wuli?

• Kasi Davide wakarongora wuli kuti wakagomezganga Yehova?

• Ni vintu wuli vitatu ivyo vikupangiska kuti ŵantu ŵasuzgikenge mazuŵa ghano, ndipo cifukwa wuli tikwenera kuvikumbuka nyengo zose?

• Yehova wakapereka cilango wuli ku ŵantu, ndipo cifukwa wuli cilango ici cikaŵa caurunji?

• Kasi kugomezga Yehova kukusazgapo vici?

[Mafumbo]

[Vithuzithuzi pa peji 23]

Davide wakagomezga Yehova