Gomezgani Yehova na Mtima Wose mu Nyengo ya Masuzgo
Gomezgani Yehova na Mtima Wose mu Nyengo ya Masuzgo
“Ciuta ndi ciphokwero cithu na nkongono zithu, movwiri wamagomezgeka mu nyengo za suzgo.”—SALMO 46:1.
1, 2. (a) Nciyerezgero wuli ico cikurongora kuti kuyowoya waka kuti tikugomezga Ciuta nkhwambura kukwana? (b) Cifukwa wuli tikwenera kucita vinandi kuruska kuyowoya waka kuti tikugomezga Yehova?
KUYOWOYA waka kuti tikugomezga Ciuta nkhunyake. Kucita vintu vyakurongora kuti tikumugomezga nadi nako nkhunyakeso. Mwaciyerezgero, mazgu ghakuti “Tikugomezga Ciuta,” kwa nyengo yitali ghaŵa ghakusangika pa ndarama za ku United States of America, za pepala na za manjawara. a Mu 1956, ungano wa ku United States ukaŵika dango lakuti ŵantu ŵarondezgenge mazgu agha. Kweni ŵantu ŵanandi—mu caru ici pera yayi kweni pacaru cose—ŵakugomezga ndarama na vintu vyakuthupi kuruska kugomezga Ciuta.—Luka 12:16-21.
2 Nga Mbakristu ŵaunenesko, tikwenera kucita vinandi kuruska kuyowoya waka kuti tikugomezga Yehova. Nga ni umo ‘cipulikano cambura milimo ciliri cakufwa,’ kuyowoya waka kuti tikugomezga Ciuta nako nkhwambura ng’anamuro usange kulije milimo. (Yakobe 2:26) Mu mutu uwo wajumpa, tikasambira kuti tingarongora kuti tikugomezga Yehova usange tikuromba kwa iye, kupenja urongozgi mu Mazgu ghake na gulu lake. Sono tiyeni tiwone umo tingacitira vintu vitatu ivi munyengo ya masuzgo.
Para Ncito Yamara Panji Tikusanga Tundarama Tucoko
3. Ni masuzgo wuli gha ndarama agho ŵateŵeti ŵa Yehova ŵakukumana nagho mu “nyengo zinonono” izi, ndipo tikumanya wuli kuti Yehova wakukhumbisiska kutovwira?
3 Mu “nyengo zinonono” izi, Taŵakristu tikukumana na suzgo la ndarama ilo ŵantu ŵanandi ŵakukumana nalo. (2 Timote 3:1) Mwanteura, ncito yingamara mwamabuci. Panji tingacicizgika kugwira ncito maora ghanandi na kupokera tundarama tucoko waka. Pa mukhaliro wantena uwu, cingatiŵira cinonono ‘kupwererera ŵa mu nyumba yithu.’ (1 Timote 5:8) Kasi Ciuta Wapacanya Comene wakukhumba kutovwira pa mukhaliro wantena uwu? Comene nkanira! Mbunenesko kuti Yehova wakutivikilira ku masuzgo ghose gha mu umoyo withu mu caru ici yayi. Ndipouli, para tikumugomezga, mbwenu mazgu gha pa Salmo 46:1 ghazamuŵa ghaunenesko kwa ise: “Ciuta ndi ciphokwero cithu na nkongono zithu, movwiri wamagomezgeka mu nyengo za suzgo.” Kweni kasi tingarongora wuli kuti tikugomezga comene Yehova para takumana na suzgo la ndarama?
4. Para takumana na suzgo la ndarama, kasi tingaromba vici, ndipo Yehova wakuzgora wuli malurombo ghantena?
4 Ntowa yimoza iyo tingarongolera kuti tikugomezga Yehova ni kuromba kwa iye. Kweni kasi tingaromba vici? Panyengo iyo tiri na suzgo la ndarama, tingakhumba vinjeru vinandi kuruska nyengo zose. Mwanteura, rombani! Mazgu gha Yehova ghakutisimikizgira kuti: “Usange yumoza wa imwe wakuperera vinjeru, warombe Ciuta, mweneuyo wakupa wose kwawanangwa, ndipo kuti wakutombozga cara; ndipo viti vipike kwa iyo.” (Yakobe 1:5) Enya, rombani vinjeru kwa Yehova—luso lwa kugwiriskira ncito makora umanyi na mahara, mwakuti mupange vyakusanka vyamahara na vyakwenelera. Dada withu wacitemwa uyo wakukhala kucanya wakutisimikizgira kuti wapulikenge malurombo ghantena. Nyengo zose ngwakunozgeka kurongozga awo ŵakumugomezga na mtima wose.—Salmo 65:2; Zintharika 3:5, 6.
5, 6. (a) Cifukwa wuli tingalaŵiska mu Mazgu gha Ciuta kuti ghatovwire pakulimbana na suzgo la ndarama? (b) Kasi tingacitaci kuti tireke kufipa mtima comene para ncito yamara?
5 Kupenja urongozgi mu Mazgu gha Ciuta ncirongolero cinyake cakuti tikugomezga Yehova. Vikumbusko vyake vyamahara ivyo vili mu Baibolo vyawoneka kuŵa “vyakugomezgeka.” (Salmo 93:5, NW) Nangauli pajumpa virimika 1,900 kufuma apo Baibolo likalembekera, kweni buku lakufunyilirika ili, liri na urongozgi wakugomezgeka na mahara ghapacanya agho ghangatovwira kulimbana na suzgo la ndarama. Wonani viyerezgero vinyake ivyo vikurongora mahara gha mu Baibolo.
6 Mu nyengo yakale, Themba Solomon likawona kuti: “Tulo twa muntu uyo wakulima ntuweme, nanga warye vicoko waka panji vinandi, kweni uzali musambazi kuti ukumugoneka tulo cara.” (Mupharazgi 5:12) Pakukhumbikwa ndarama na nyengo kuti tinozge, kupwererera, na kusunga makora katundu withu. Mwanteura, para ncito yamara, tikwenera kupendaso umoyo withu, kuwona vintu ivyo ni vyakukhumbikwa comene pa umoyo withu na ivyo ni vyambura kuzirwa comene. Kuti ticepeske kwenjerwa, cingaŵa camahara kusinta vintu vinyake. Mwaciyerezgero, kasi ncamacitiko kuti tireke kupenja vintu vinandi mu umoyo, mtepanji kusamukira mu nyumba yicokoko panji kuguriska katundu wambura kuzirwa comene?—Mateyu 6:22.
7, 8. (a) Kasi Yesu wakarongora wuli kuti wakumanya kuti ŵantu ŵambura urunji ŵakutemwa kufipa mtima comene na vintu vyakuthupi? (Wonaniso futunoti) (b) Ni urongozgi wuli wamahara uwo Yesu wakapereka pakuyowoya za umo tingatceŵera kwenjerwa mwakujumpizga?
7 Mu Upharazgi wake wa pa Phiri, Yesu wakapereka urongozgi wakuti: “Mungenjerwanga na umoyo winu, kuti muryengeci, panji mumwengeci; panji na thupi linu, muvwarengeci.” b (Mateyu 6:25) Yesu wakamanya kuti ŵantu ŵambura urunji mwakawiro ŵakufipa mtima na umo ŵasangirenge vintu vyakuthupi. Kweni kasi tingareka wuli ‘kwenjerwa’ na vintu ivi? Yesu wakati, “penjani nanga Ufumu wake.” Mwambura kupwererako kantu za masuzgo agho tingakumana nagho, nyengo zose kusopa Yehova ndiko kukwenera kuŵa pakwamba. Para ndimo tacitira, mbwenu vyose ivyo umoyo withu wa zuŵa na zuŵa ukukhumba “visazgikirengeko” kwa ise na Adada ŵithu ŵakucanya. Ŵazamuwoneseska kuti ŵatipa ivyo tikukhumba.—Mateyu 6:33.
8 Yesu wakaperekaso urongozgi uwu: “Rekani kwenjerwera macero: cifukwa macero ghati ghajenjerwerenge ghekha.” (Mateyu 6:34) Ncamahara yayi kufipa mtima comene na ivyo vingaŵako namacero. Muntu munyake wakusambira comene za Baibolo wakati: “Kanandi ivyo vikutifipiska mtima ndivyo vikuzakacitika nadi yayi.” Kurondezga urongozgi wa Baibolo wakuti tiŵikenge vintu vyakuzirwa pamalo ghakwamba na kughanaghanira zuŵa ilo tilimo kuruska la namacero, kungatovwira kuti tireke kwenjerwa comene.—1 Petros 5:6, 7.
9. Para tiri na suzgo la ndarama, kasi ni wovwiri wuli uwo tingasanga mu mabuku gha “muzga wa magomezgeko na wa vinjeru”?
9 Para tiri na suzgo la ndarama, tingarongoraso kuti tikugomezga Yehova mwa kupenja wovwiri mu mabuku gha “muzga wa magomezgeko na wa vinjeru.” (Mateyu 24:45) Nyengo na nyengo, mu magazini gha Galamukani! mukuŵa mitu iyo yikupereka urongozgi uweme na masacizgo gha umo tingacitira para tiri na suzgo la ndarama. Mutu wakuti “Mutachotsedwa Ntchito Kodi Mankhwala Ake Nchiyani?” wa mu Galamukani! ya August 8, 1991, ukayowoya fundo zinkondi na zitatu izo zawovwira ŵantu ŵanandi kuti ŵakhale makora usange ŵali pa ulova. c Kweni kuti urongozgi uwu ugwire ncito makora, tikwenera kuwona ndarama mwakwenelera. Ici cikayowoyeka mu mutu wakuti: “Chinachake Chofunika Koposa Ndalama,” uwo wuli mu magazini yeneyiyi.—Mupharazgi 7:12.
Para Tikusuzgika na Matenda
10. Kasi ciyerezgero ca Davide cikurongora wuli kuti ncamahara kugomezga Yehova usange tarwara comene?
10 Kasi ncamahara kugomezga Yehova para tiri na matenda ghakuru? Comene nkanira! Yehova wakucitira citima ŵantu ŵake awo mbarwari. Ndipo wakukhumbisiska kuŵawovwira. Mwaciyerezgero, ghanaghanirani za Themba Davide. Iye wakwenera kuti wakarwara comene apo wakalembanga mazgu ghakukhwaskana na umo Ciuta wakucitira na ŵarunji para ŵarwara. Wakati: “Yehova wakumufukatira pa citara ca urwali; mu ntenda zake mukumucizga.” (Salmo 41:1, 3, 7, 8) Davide wakarutilira kuŵika cigomezgo cikuru mwa Ciuta, ndipo paumaliro wake wakacira. Kweni kasi tingarongora wuli kuti tikugomezga Ciuta usange tikurwara matenda ghakuru?
11. Para tarwara, kasi tingaromba vici kwa Adada ŵithu ŵa kucanya?
11 Para tarwara, ntowa yimoza iyo tingarongolera kuti tikugomezga Yehova nkumuromba kuti watovwire kuzizipizga. Tingamupempa kuti watovwire kugwiriskira ncito makora ‘mahara’ mwakuti tipenje wovwiri uweme uwo tingakwaniska. (Zintharika 3:21) Tingamupempaso kuti watovwire kuti mtima withu uŵe mu malo, mwakuti tizizipizge matenda. Kuruska vyose, tipempe Yehova kuti watovwire, watipe nkongono kuti tiŵe ŵakugomezgeka kwa iye na kureka kuŵa ŵakusunkunika, mwambura kupwererako kantu za ico cingacitika. (Ŵafilipi 4:13) Kuŵa ŵakugomezgeka kwa Ciuta nkhwakukhumbikwa comene kuruska kuponoska umoyo withu nyengo yino. Para tarutilira kugomezgeka, Yehova, uyo wakutemwa kupereka njombe, wazamutipa umoyo wamuyirayira na thupi liweme.—Ŵahebere 11:6.
12. Ni urongozgi wuli wa m’Malemba uwo ungatovwira kuti tipange vyakusanka vyamahara pa nkani ya mukhwara?
12 Kugomezga Yehova kukutipangiskaso kuti tipenje urongozgi mu Mazgu ghake, Baibolo. Urongozgi wa mu Malemba ungatovwira kuti tipange vyakusanka vyamahara pakuyowoya za munkhwara uwo tikwenera kumwa. Mwaciyerezgero, kumanya kuti Baibolo likukana kugomezga mizimu, kutipangiskenge kuti titceŵe kukawukwa ku ng’anga ndiposo kacizgiro kalikose ako kakukhwaskana na mizimu. (Ŵagalatiya 5:19-21; Duteronome 18:10-12) Pano paliso ciyerezgero cinyake ca mahara ghakugomezgeka gha mu Baibolo: “Muzereza wakupulikana bweka vyose, kweni wamahara wakupwererera mendero ghake.” (Zintharika 14:15) Mwanteura, para tikupenja munkhwara, ncamahara kupenja urongozgi wakugomezgeka kuruska ‘kupulikira bweka cilicose.’ Kuŵa ŵamahara kungatovwira kuti tipende mwakupwererera ivyo tikukhumba kucita na kupanga cakusanka camahara.—Tito 2:12.
13, 14. (a) Kasi ni mitu wuli yiweme yakukhwaskana na urwali iyo yili kulembeka mu magazini gha Gongwe la Mulinda na Galamukani!? (Wonani bokosi pa peji 17.) (b) Kasi ni urongozgi wuli wakukhwaskana na matenda ghambura kukonda munkhwara uwo ukaŵa mu Galamukani! ya February 8, 2001?
13 Tingarongoraso kuti tikugomezga Yehova mwa kupenja urongozgi mu mabuku gha muzga wa magomezgeko. Mu Gongwe la Mulinda na Galamukani! kanandi mukuŵa nkani zakukhwaskana na matenda ghakupambana-pambana. d Nyengo zinyake, mu magazini agha mukuŵa nkani za ŵantu awo ŵakukhala makora nangauli mbakupendera panji ŵakurwara matenda ghakupambana-pambana. Kusazgaso apa, mitu yinyake yikupereka masacizgo na urongozgi wa umo muntu wangakhalira para wali na ntenda yambura kukonda munkhwara.
14 Mwaciyerezgero, pawalo pa Galamukani! ya February 8, 2001, pakaŵa mutu wakuti “Kulimbikitsa Odwala.” Mitu ya mkati yikapereka urongozgi wa mu Baibolo ndiposo fundo zakovwira zakufuma kwa ŵantu ŵakumanyikwa makora awo ŵarwara kwa virimika vinandi. Mutu wakuti “Ndi Motani Mmene Mungakhalire Osangalala Ngakhale Mukudwala?” ukapereka urongozgi wakuti: Sambirani vinandi vyakukhwaskana na ntenda yinu. (Zintharika 24:5) Iŵani na vyakulata, kusazgapo cilato ca kovwira ŵanji, kweni kumbukani kuti mungakwaniska yayi kucita vyose ivyo ŵanyinu awo ŵali makora ŵakucita. (Milimo 20:35; Ŵagalatiya 6:4) Lekani kutemwa kukhala pamwekha. (Zintharika 18:1) Woneseskani kuti awo ŵakuzakamuwonani ŵakukondwa para ŵiza kwa imwe. (Zintharika 17:22) Kuruska vyose, rutilirani kuŵa paubwezi uweme na Yehova ndiposo mpingo. (Nahum 1:7; Ŵaroma 1:11, 12) Kasi tikuwonga yayi urongozgi wakugomezgeka uwo Yehova wakutipa kwizira mu gulu lake?
Para Makhumbiro Ghaheni Ghakurutirira
15. Kasi Paulos wakakwaniska wuli kulimbana na kwananga kwa thupi lambura urunji, ndipo tingaŵa na cisimikizgo wuli?
15 “Mwa ine . . . mukukhala kantu kaweme cara,” ndimo wakalembera mpostole Paulos. (Ŵaroma 7:18) Paulos wakamanya makora kuti ncinonono comene kulimbana na makhumbiro ghaheni gha thupi lithu lakwananga. Ndipouli, Paulos wakaŵaso wakusimikizga kuti wangatonda. (1 Ŵakorinte 9:26, 27) Mwauli? Mwa kuŵika cigomezgo cose mwa Yehova. Lekani Paulos wakayowoya kuti: “Ndamuntu wakusokwa ine! ndi njani wati wandithaskenge ku thupi la nyifwa yeneiyi? Nkuwonga Ciuta mwa Kristu Yesu Fumu yithu.” (Ŵaroma 7:24, 25) Wuli pakuyowoya za ise? Naseso tiri na nkondo ya kulimbana na makhumbiro gha thupi. Peneapo tikulimbana na makhumbiro agha, ncipusu kutaya mtima, kughanaghana kuti tingakwaniska yayi. Kweni Yehova watovwirenge usange tikugomezga iye nga ni umo Paulos wakacitira—kureka kugomezga nkongono zithu.
16. Usange tikurutirira kwananga, kasi tikwenera kuromba vici, ndipo tikwenera kucitaci usange tayambaso kucita kwananga uko tikareka?
16 Para makhumbiro ghaheni ghakurutirira, tingarongora kuti tikugomezga Yehova mwa kumuŵeya mu lurombo. Tikwenera kupempa, kucondelera Yehova kuti watovwire na mzimu wake utuŵa. (Luka 11:9-13) Tingapempa mwakudunjika kuti Yehova watipe mtima wa kujikora, uwo ncimoza mwa vipambi vya mzimu wa Ciuta. (Ŵagalatiya 5:22, 23) Kasi tikwenera kucitaci usange tayambaso kucita uheni unyake uwo tikareka? Visuzge viti wuli, tingarekanga yayi kulimbana nawo. Tingavukanga yayi kuromba mwakujicepeska kwa Ciuta walusungu, kumupempa kuti watigowokere na kutovwira. Yehova wazamujara makutu yayi panji kuzerezga muntu wa mtima “wakupyoka na kupera” uyo njuŵi yake yikumusuzga. (Salmo 51:17) Usange tikumupempa mwakufumira pasi pa mtima, Yehova wazamutovwira kulimbana na viyezgo.—Ŵafilipi 4:6, 7.
17. (a) Cifukwa wuli ncakovwira kuwona umo Yehova wakuwonera kwananga uko tikulimbana nako? (b) Ni malemba wuli agho tingasunga pa mtima usange tikulimbana na mtima wa kukwiya luŵiro? kutondeka kukora lulimi lwithu? na vyakusanguruska vyambura kwenelera?
17 Tingarongoraso kuti tikugomezga Yehova mwa kupenja wovwiri mu Mazgu ghake. Mwakugwiriskira ncito mitu iyo yikurongoreka mu magazini gha Gongwe la Mulinda na Galamukani!, kuumaliro wa cirimika, tingapenja zgoro la fumbo lakuti ‘Kasi Yehova wakuwona wuli kwananga uko nkulimbana nako?’ Kumanya umo Yehova wakuwonera kwananga uko kungatipangiska kuti tiŵe na khumbo lakuti timukondweske. Ndipo tingayamba kuwona vintu nga ni umo iyo wakuviwonera, kutinka ivyo wakutinka. (Salmo 97:10) Ŵanyake ŵawona kuti ncakovwira kusunga pa mtima Malemba agho ghakukana kwananga uko ŵakulimbana nako. Kasi tikulimbana na mtima wa kukwiya luŵiro? Mbwenu tinganjizga pa mtima malemba nga ni Zintharika 14:17 na Ŵaefeso 4:31. Kasi tikutondeka kukora lulimi lwithu? Mbwenu tingasungilira malemba nga ni Zintharika 12:18 na Ŵaefeso 4:29. Kasi tikutemwa vyakusanguruska vyambura kwenelera? Tingayezga kusunga malemba nga ni Ŵaefeso 5:3 na Ŵakolose 3:5.
18. Cifukwa wuli tikwenera kucita soni yayi panji kopa kupempa ŵarara kuti ŵatovwire umo tingacitira na kwananga kwithu?
18 Kupenja wovwiri ku ŵarara ŵakuŵikika na mzimu pa mpingo ncirongolero cinyake cakuti tikugomezga Yehova. (Milimo 20:28) Nakuŵanako, “vyawanangwa [ivi] ku ŵantu” vili kuperekeka na Yehova kwizira mwa Kristu kuti vivikilire na kupwererera mberere zake. (Ŵaefeso 4:7, 8, 11-14) Mbunenesko kuti ncipusu yayi kupempa wovwiri wakukhwaskana na kwananga kwithu. Tingacita soni, kopa kuti ŵarara ŵalekenge kutiwona nga ni umo ŵakatiwoneranga kumanyuma. Kweni mwambura kukayikira, ŵanarumi aŵa ŵakukhwima ndiposo ŵauzimu ŵazamuticindika cifukwa taŵa na cikanga ca kupempa wovwiri. Kusazgaso apa, ŵarara ŵakuyezga comene kurondezga mikhaliro ya Yehova pakovwira mberere. Urongozgi wawo wakupembuzga na fundo zakovwira zakufuma mu Mazgu gha Ciuta, vingaŵa vyakwenelera comene kwa ise kuti tiŵe na nkongono zakutondera kwananga uko tikulimbana nako.—Yakobe 5:14-16.
19. (a) Nimwauli umo Satana wakukhumbira kugwiriskira ncito kuvunda kwa umoyo wa caru cino? (b) Kasi kugomezga Yehova kukusazgapo vici, ndipo ncivici ico tikwenera kuwoneseska kuti tikucita?
19 Lekani kuruwa kuti Satana wakumanya kuti nyengo yamukhalira yicoko. (Civumbuzi 12:12) Wakukhumba kugwiriskira ncito kuvunda kwa umoyo wa mu caru ici kuti watigongoweske na kutilekeska kulimbikira. Tiyeni tiŵike cigomezgo cose mu ivyo vikuyowoyeka pa Ŵaroma 8:35-39: “Ndi njani wati watipatulenge ku kutemwa kwa Kristu? Suzgo kasi, panji urwirwi, panji kuzikizgika, panji njara, panji unkhuli, panji urwani, panji lupanga? . . . Kweni mu vyose vyeneivi tikuruska comene . . . mwa uyo wakatitemwa. Cifukwa ndakhorwa ine kuti nanga ndi nyifwa, panji umoyo, nesi ŵangelo, nesi maufumu, nesi ivyo viriko, nesi ivyo vikwiza, nesi mazaza, nesi kuzontoka, nesi kunyang’amira, nesi cakwatika cinyake, citi cimanyenge cara kutipatula ku kutemwa kwa Ciuta, uko kuli mwa Kristu Yesu Fumu yithu.” O! mazgu agha ghakurongora kuti muntu wakugomezga nadi Yehova! Ndipouli, kugomezga kwa mtundu uwu kuti nkutoreka waka maghanoghano yayi. Kweni nkugomezga uko kukusazgapo kupanga vyakusanka vyamahara zuŵa lirilose. Mwanteura, tiyeni tiwoneseske kuti nyengo zose tikugomezga Yehova para takumana na masuzgo.
[Mazgu ghamusi]
a Mu karata ya November 20, 1861 yakuruta ku wupu wakupanga ndarama za manjawara ku United States, Nduna ya Vyacuma Salmon P. Chase wakalemba kuti: “Palije caru ico cingaŵa cankongono kwambura nkongono za Ciuta, panji cakuvikilirika kwambura civikiliro Cake. Kugomezga Ciuta uko ŵantu ŵithu ŵali nako kukwenera kulembeka pa ndarama zithu za manjawara.” Pa cifukwa ici, mazgu ghakuti “Tikugomezga Ciuta” ghakamba kulembeka pa ndarama za manjawara za ku United States mu 1864.
b Kwenjerwa uko kukuyowoyeka pano ni “kufipa mtima uko kukupoka cimwemwe ca muntu.” Mabaibolo ghanyake ghakuti “lekani kwenjerwa” panji “lekani kufipa mtima.” Kweni mazgu ghantena agha ghakung’anamura kuti tireke kwamba kwenjerwa panji kufipa mtima. Buku linyake likuti: “Verebu la Cigiriki likurongora kuti mazgu agha ni languro, ndipo ghakung’anamura kuti muntu wareke ico wacitanga.”
c Fundo zake ni izi: (1) Khazikani mtima pasi; (2) iŵani na maghanoghano ghaweme; (3) ghanaghanani za mitundu yinyake ya ncito iyo mungagwira; (4) gwiriskirani ncito ndarama izo mukusanga—kugomezga ndarama za muntu munyake yayi; (5) cenjerani na ngongoli; (6) pangani mbumba yinu kuŵa yakukolerana; (7) jicindikani; ndipo (8) pangani bajeti.
d Magazini ghakuyowoya za Baibolo agha ghakuyowoya kuti mukhwara wakuti-wakuti ndiwo nguweme yayi, pakuti muntu wakwenera kupanga yekha cakusanka. M’malo mwake, mitu iyo yikuyowoya za matenda panji masuzgo ghanyake gha mu thupi njakuti waka yovwire muntu kumanya fundo zakovwira zakukhwaskana na ntenda iyo.
Kasi Mukukumbuka?
• Para takumana na suzgo la ndarama, kasi tingarongora wuli kuti tikugomezga Yehova?
• Kasi tingarongora wuli kuti tikugomezga Yehova usange tiri ŵarwari?
• Para tikurutirira kucita kwananga kunyake, kasi tingarongora wuli kuti tikugomezga nadi Yehova?
[Mafumbo]
[Bokosi pa peji 31]
Kasi Nkani Izi Mukuzikumbuka?
Para tikusuzgika na urwali, ncakupembuzga comene kuŵazga nkani za ŵantu ŵanyake awo ŵali kutonda maurwali, matenda ghambura kukonda munkhwara, panji kupendera. Musi umu, muli nkani izo zikaŵa mu magazini gha Gongwe la Mulinda na Galamukani!
Nkani yakuti “Kuchita ndi Zofooka Zanga” yikayowoya za umo tingacitira para tikusuzgika maghanoghano.—Gongwe la Mulinda la Ciceŵa la May 1, 1990.
“Ngakhale Ndili Wolumala Ndine Wosangalala.”—Galamukani!, December 8, 2000.
Nkani yakuti “Chipolopolo Chinasintha Moyo Wanga” yikayowoya za umo tingacitira para tili na viŵaro vyakufwa.—Galamukani!, November 8, 1995.
Nkani yakuti “Simudziŵa Chimene Chidzagwa Maŵa” yikayowoya za umo tingatondera ntenda ya kuhehemuka.—Gongwe la Mulinda la Ciceŵa la December 1, 2000.
Nkani yakuti “Loida Ayamba Kulankhula” yikayowoya za umo tingacitira na ntenda ya ku wongo.—Galamukani! ya May 8, 2000.
“Ngakhale Ndili Wakhungu Ndili Wofunika ndi Wachimwemwe.”—Galamukani!, February 8, 1999.
“Kutumikira Ena Kumachepetsa Mavuto.”—Gongwe la Mulinda la Ciceŵa la July 1, 2003.
“Ndinagonjetsa Vuto Langa Losokoneza Magazino.”—Galamukani!, August 8, 2002.
[Cithuzithuzi pa peji 29]
Para ncito yamara, tingacita makora kusandaso umoyo withu
[Cithuzithuzi pa peji 30]
Nkani ya Loida yikurongora umo kugomezga Yehova kukovwilira muntu kuti wazizipizge (Wonani bokosi la pa peji 17)
[Cithuzithuzi pa peji 32]
Tikwenera kucita soni yayi kupempa wovwiri wakuti titondere kwananga kunyake