Apo Malayizgo Ghakuŵa Ghakugomezgeka

MBIRI yazura na malayizgo ghambura kufiskika. Kanandi vyaru vikutondeka kusunga mapangano gha mtende agho vikusayina, na kurongozgera ŵantu ŵawo ku nkondo zakofya. Nyengo yinyake Napoleon wakati: “Maboma ghakusunga mapangano pekha usange ghacicizgika, panji usange pali phindu ilo ghasangenge.”

Wuli pakuyowoya za malayizgo gha muntu payekha? Cikuŵa cakugongoweska comene usange muntu wakureka kusunga ivyo walayizga! Comene usange uyo walayizga ni muntu uyo mukumumanya na kumugomezga. Inya, ŵantu ŵangatondeka, panji ŵangaŵavya khumbo la kufiska ivyo ŵakalayizga.

Pali mpambano yikuru comene pakati pa malayizgo gha muntu na gha Ciuta. Ivyo Ciuta wakulayizga ni vyakugomezgeka. Cilicose ico Yehova walayizga cizamutondeka yayi. Cizamucitika nadi. Pakuyowoya za mazgu ghambura kutondeka gha Ciuta, Lemba la Yesaya 55:11 likuti: ‘Ndimo ghaŵirenge mazgu ghane agho ghakufuma mu mlomo wane; ghawererenge waka kwa ine cara, kweni ghafiskenge ico nkuca naco, na kusakata mu ico ndaghatumira.’

Sono tikwenera kughawona wuli malayizgo gha Ciuta ghakulembeka mu Baibolo? Tingaghagomezga nadi. Mwaciyerezgero, mpostole Yohane wakalemba kuti: “Ehena, hema la Ciuta liri na ŵantu, ndipo wati wakhalenge nawo, ndipo iwo ŵati ŵaŵenge ŵantu ŵake. Ndipo Ciuta . . . wati waŵenge pamoza nawo, na kuŵa Ciuta wawo: ndipo wati wafyurenge sozi lose ku maso ghawo; ndipo nyifwa kuti yiti yiŵengekoso cara; panji nesi citengero kuti citi ciŵengekoso cara, nesi kulira, panji nesi kuŵinya: cifukwa vyakudanga viri kuruta.” (Civumbuzi 21:3, 4) Mungakondwa na vitumbiko ivi para mungacita mwakuyana na mazgu gha Yesu ghakuti: “Uwu mbumoyo wa muyirayira, kuti ŵamumanyani imwe, Ciuta mweneco yekha, na Yesu Kristu, mweneuyo mukamutuma.”—Yohane 17:3.