Mafumbo Ghakufumira ku Ŵaŵazgi
Mafumbo Ghakufumira ku Ŵaŵazgi
Kasi kuŵa na “umoyo mwa mweneco” kukung’anamuraci?
Baibolo likuyowoya za Yesu Kristu kuti wali na “umoyo mwa mweneco” ndiposo kuti ŵarondezgi ŵake ŵali na ‘umoyo mwa iwo ŵene.’ (Yohane 5:26; 6:53) Ndipouli, malemba ghaŵiri agha ghali na ng’anamuro lakuyana cara.
Yesu wakati: “Umo Ŵawiske ŵaliri na umoyo mwa Ŵeneco, nteuraso ndimo ŵakamupira Mwana kuŵa na umoyo mwa mweneco.” Pambere wandayowoye fundo yambura kuruwika iyi, Yesu wakati: “Inya, inya nadi, nkumunenerani, Uyo wakupulika mazgu ghane na kupulikana na uyo wakandituma wali na umoyo wa muyirayira . . . Ora likwiza, na sono liripo, penepapo ŵakufwa ŵati ŵapulike mazgu gha Mwana wa Ciuta ndipo awo ŵakupulika ŵati ŵaŵenge ŵamoyo.” Apa Yesu wakayowoyanga za mazaza ghakuru agho ghali kupika kwa iye na Ŵawiske—nkongono ya kusambizga ŵantu kuti ŵaŵe ŵakupokelereka pamaso pa Ciuta. Mwakusazgirapo, Yesu wakumanya kuwuska awo ŵali mu tulo twa nyifwa na kuŵapa umoyo. Kwakuyana na Yesu, kuŵa na “umoyo mwa mweneco” cikung’anamura kuti iye wali kupika mazaza agha. Anteura nga ni Ŵawiske, Mwana nayo wali na “umoyo mwa mweneco.” (Yohane 5:24-26) Wuli pakuyowoya za ŵarondezgi ŵake?
Pafupifupi cirimika cimoza panyuma pake, Yesu wakaphalira ŵapulikizgi ŵake, wakati: “Inya, inya nadi nkumunenerani, Kwambura kuti murye thupi la Mwana wa muntu na kumwa ndopa zake, kuti muli na umoyo mwa ku mwaŵene cara. Uyo wakurya thupi lane na kumwa ndopa zane, ndiyo wali na umoyo wa muyirayira, ndipo ine nditi ndimuwuske pa zuŵa la kumalira.” (Yohane 6:53, 54) Pano Yesu wakuyaniska kuŵa na “umoyo mwa ku mwaŵene” na kusanga “umoyo wa muyirayira.” Mazgu ghakuyana waka mu kalembero ghakuti kuŵa na “umoyo mwa ku mwaŵene” ghakusangika mu malo ghanyake mu Malemba gha Cigiriki. Viyerezgero viŵiri ni ivi, “Ŵani na mcere mwa ku mwaŵene” ndiposo ‘ŵakajipokerera [“iwo ŵene,” NW] njombe yakwenerera.’ (Marko 9:50; Ŵaroma 1:27) Mu viyerezgero ivi, mazgu agha ghakurongora nkongono yakupereka mcere ku ŵanji yayi nesi kuwezgera nduzga kwa waliyose. M’malo mwake, ghakurongora kufikapo kwa mukati, panji kuzura. Anteura, lizgu lakuti “umoyo mwa ku mwaŵene” ilo lagwiriskirika ncito pa lemba la Yohane 6:53 likung’anamura waka kunjira mu umoyo weneco.
Pakuyowoya na ŵarondezgi ŵake kuti ŵali na umoyo mwa iwo ŵene, Yesu wakazunura thupi lake na ndopa zake. Panyuma pake, peneapo wakambiskanga Mugonero wa Fumu, Yesu wakayowoyaso za thupi na ndopa zake ndipo wakalangura ŵarondezgi ŵake ŵeneawo ŵakunjizgika mu pangano lipya kuti warye vimanyikwiro vya cingwa cambura ntukumusi na vinyo. Kasi ici cikung’anamura kuti Ŵakristu ŵakuphakazgika na mzimu, ŵeneawo ŵali mu pangano lipya na Yehova Ciuta, ndiwo ŵekha ŵakunjira mu umoyo weneco wanteura uwu? Yayi. Vyakucitika viŵiri ivi vikapambana cirimika cimoza apo vikacitikanga. Awo ŵakapulika mazgu gha Yesu ghakulembeka pa Yohane 6:53, 54, ŵakamanyanga cara za cakucitika ca cirimika cilicose ca vimanyikwiro vya thupi na ndopa za Kristu.
Kwakuyana na lemba la Yohane Cipaturo 6, Yesu pakwamba wakayaniska thupi lake na mana, wakati: “Ŵawiskemwe ŵakaryanga mana mu mapopa ndipo ŵakafwa. Ceneici ncingwa ico cikwikha kucanya, mwakuti muntu waryengepo ndipo wareke kufwa. Ine ndine cingwa camoyo ceneico cikikha kucanya; usange muntu wakuryapo cingwa ceneici wati waŵenge wamoyo muyirayira.” Thupi la Yesu, pamoza na ndopa zake, vikaŵa vyakuzirwa comene kuruska mana. Mwauli? Cifukwa cakuti thupi lake likaperekekera “umoyo wa caru,” kupangiska umoyo wamuyirayira kuti uŵe wamacitiko. a Anteura, fundo ya kuŵa na “umoyo mwa ku mwaŵene” ya pa lemba la Yohane 6:53 yikugwira ncito kwa wose awo ŵakupokera umoyo wamuyirayira kwali nkucanya panji pano pa caru capasi.—Yohane 6:48-51.
Kasi mpauli apo ŵarondezgi ŵa Kristu ŵakupokera umoyo mwa iwo ŵene, panji apo ŵakunjira mu umoyo weneco? Kwakuyana na ŵahariri ŵa Ufumu ŵakuphakazgika na mzimu, ici cikucitika para ŵawuskika kuya ku umoyo wakucanya nga ni vilengiwa vyauzimu vyambura kufwa. (1 Ŵakorinte 15:52, 53; 1 Yohane 3:2) “Mberere zinyake” za Yesu zikunjira mu umoyo weneco paumaliro wa Muwuso wa Virimika Cikwi (1000). Kuzakafika pa nyengo iyo, ŵazamuŵa kuti ŵapimika, ŵasangika ŵakugomezgeka, ndipo ŵazomerezgeka kuti mbarunji ŵakwenerera umoyo wamuyirayira mu Paradiso pa caru capasi.—Yohane 10:16; Civumbuzi 20:5, 7-10.
[Mazgu ghamusi]
a Mu mapopa, Ŵaisrayeli na “ŵantu ŵanandi ŵakusazgikana” ŵakakhumbikwiranga mana kuti ŵaŵe na umoyo. (Exodus 12:37, 38; 16:13-18) Mwakuyana waka, kuti ŵakhale kwamuyirayira, Ŵakristu wose, kwali mbakuphakazgika na mzimu panji yayi, ŵakwenera kurya mana gha kucanya mwakuŵa na cipulikano mu nkongono ya kuponoska ya thupi na ndopa za Yesu ivyo vikaperekeka nga ni sembe.—Wonani Gongwe la Mulinda la Cingelezi la February 1, 1988, mapeji 30-31.
[Vithuzithuzi pa peji 9]
Ŵakristu wose ŵaunenesko ŵangaŵa na ‘umoyo mwa iwo ŵene’