“Muŵe Ŵakuwonga”

“Mtende wa Kristu uwuse mu mitima yinu . . . ndipo muŵe ŵakuwonga.”—ŴAKOLOSE 3:15.

1. Kasi tikuwona mpambano wuli pakati pa mpingo Wacikristu na caru ico cikuwusika na Satana?

 MU MIPINGO 94,600 ya Ŵakaboni ŵa Yehova pa caru cose, tikusangamo mzimu wa kuwonga. Ungano wuliwose ukwamba ndiposo kumara na lurombo ulo lukusazgapo mazgu gha kuwonga Yehova. Kanandi tikupulika mazgu ghakuti “yewo,” “ndagha,” panji mazgu ghanyake agho ŵarara na ŵana, kweniso Ŵakaboni ŵapya na ŵakale wuwo ŵakuyowoya para ŵawungana pamoza pakusopa na para ŵakucezga. (Salmo 133:1) Iyi ni mpambano yikuru comene para tikuyerezgera na ŵantu ‘ŵambura kumanya Ciuta, na awo ŵakureka kupulikira makani ghaweme’! (2 Ŵatesalonika 1:8) Tikukhala mu caru cambura kuwonga. Ici ncakuzizwiska yayi para tikughanaghanira kuti ciuta wa caru cino—Satana Dyabulosi ni murara wa ukajilange, mweneuyo kujitemwa na ucigaruka wake wazura mu ŵantu.—Yohane 8:44; 2 Ŵakorinte 4:4; 1 Yohane 5:19.

2. Kasi ni cenjezgo wuli ilo tikwenera kupulikira, ndipo ni mafumbo wuli agho tizgorenge?

² Cifukwa cakuti tazingirizgika na caru ca Satana, tikwenera kucenjera mwakuti tireke kutorako nkaro yake. Kale mpostole Paulos wakakumbuska Ŵakristu ku Efeso kuti: “Mukendangamo kale kwakulingana na mendero gha caru cino, kwakulingana na fumu ya mazaza gha mudera, mzimu weneuwo ukucita sono mu ŵana ŵa mtafu; mukati mwa ŵeneawo ise nase tose kale tikendangamo mu makhumbiro gha mathupi ghithu, tikacitanga makhumbo gha thupi na gha maghanoghano, ndipo mu kawiro tikaŵa ŵana ŵa ukali, nga mbanyakeso.” (Ŵaefeso 2:2, 3) Ndimo ŵanandi ŵakaŵira na lero wuwo. Kweni tingacita wuli kuti tikoreske mzimu wa kuwonga? Kasi Yehova wapereka covwiro wuli? Ni ntowa wuli izo tingarongolera kuti tiri ŵakuwonga nadi?

Vifukwa Ivyo Tingaŵira Ŵakuwonga

3. Kasi tikuwonga Yehova cifukwa ca vici?

³ Tikuwonga Yehova Ciuta, Mlengi withu na Mupi wa umoyo, comene-comene cifukwa ca vyawanangwa vinandi ivyo watipa. (Yakobe 1:17) Zuŵa lirilose tikuwonga Yehova cifukwa cakuti tiri ŵamoyo. (Salmo 36:9) Kulikose uko tingalaŵiska tikuwona ukaboni wakukwana wa ncito za Yehova, nga ni zuŵa, mwezi, na nyenyezi. Caru cithu ici ni nthamba ya vintu vyakuzirwa pa umoyo withu. Mlengalenga wuli na mpepo zakuzirwa zakusazgika mwaluso, ndiposo kusinta kwa nyengo, vyose ivi mbukaboni wakuti tiri na ngongoli kwa Dada withu wacitemwa wa kucanya. Davide wakimba kuti: “A Yehova, Ciuta wane, milimo yinu njakuzizwiska iyo mwayandaniska; maghanoghano naghoso agho ghakutipwerera; palije yumoza wakukozgana na imwe! Ndighapharazgenge na kuyowoya nagho mphanyi ghawoneka ghambura mapendeko.”—Salmo 40:5.

4. Cifukwa wuli tikwenera kuwonga Yehova apo tikukondwa na ncezgo yiweme mu mipingo yithu?

⁴ Nangauli ŵakukhala mu paradiso yayi, ŵateŵeti ŵa Yehova lero ŵakukondwa cifukwa ŵakukhala mu paradiso wauzimu. Mu Nyumba za Ufumu ndiposo pa maungano ghithu gha cigaŵa na ghapadera, tikuwona umo vipambi vya mzimu wa Ciuta vikugwilira ncito mu ŵabali ŵithu. Pakupharazga ku ŵantu ŵambura kumanya vinandi vya cisopo, panji awo ŵakureka kusopa, Ŵakaboni ŵanyake ŵakuzunura ivyo Paulos wakarongosora mu karata yake ku Ŵagalatiya. Cakwamba ŵakuzunura “milimo ya thupi” na kufumba ŵategherezgi ivyo ŵapulika. (Ŵagalatiya 5:19-23) Ŵanandi ŵakuzomera kuti iyi ndiyo mikhaliro ya ŵantu lero. Para ŵaŵarongora vipambi vya mzimu wa Ciuta na kuŵacema kuti ŵize ku Nyumba ya  Ufumu kuti ŵakajiwonere ŵekha ukaboni wa vipambi ivi, ŵanandi ŵakuzomera kuti: “Nadi Ciuta walimo mwa imwe.” (1 Ŵakorinte 14:25) Ivi vikuwoneka pa Nyumba ya Ufumu ya kukwinu pera yayi. Kulikose uko mungaruta, usange mwakumana na yumoza wa Ŵakaboni ŵa Yehova awo unandi wawo ŵakujumpa 6 miliyoni, mwamuwona kuti ngwakukondwa, ndiposo wacimwemwe. Inya, ncezgo yakukhozga iyi ncifukwa cakuti tiwongere Yehova, uyo wakupereka mzimu wake kuti ici cicitike.—Zefaniya 3:9; Ŵaefeso 3:20, 21.

5, 6. Kasi tingamuwonga wuli Ciuta cifukwa ca cawanangwa cikuru comene ca sembe?

⁵ Cawanangwa cikuru na ciweme comene ico Yehova wapereka ni Mwana wake Yesu, mwa uyo ciwombolero cikaperekeka. Mpostole Yohane wakalemba kuti: “Usange Ciuta wakamanca kutitemwa ise, ise nase tikwenera kutemwana.” (1 Yohane 4:11) Mbunenesko kuti tikuwonga cifukwa ca sembe para tikurongora citemwa kwa Yehova na kumurumba, kweniso tingamurumba kwizira mu mikhaliro iyo yikurongora kuti tikutemwa ŵanyithu.—Mateyu 22:37-39.

⁶ Tingasambira vinandi pa nkani ya kuwonga para tawona umo Yehova wakacitira na Ŵaisrayeli. Yehova ŵakaŵasambizga vinandi ŵantu ŵara mu Dango ilo wakapereka kwizira mwa Moses. Mu “marango na [cimanyisko kweniso unenesko uwo wuli mu Dango, NW]” tingasambiramo vinandi ivyo vingatovwira kurondezga urongozgi wa Paulos wakuti: “Muŵe ŵakuwonga.”—Ŵaroma 2:20; Ŵakolose 3:15.

Masambiro Ghatatu Ghakusangika mu Dango la Moses

7. Kasi dango la cakhumi likapereka wuli mupata wakuti Ŵaisrayeli ŵawonge Yehova?

⁷ Mu Dango la Moses, Yehova wakapereka ntowa zitatu zakuti Ŵaisrayeli ŵamuwongere kufumira pasi pa mtima cifukwa ca uweme wake. Cakwamba, pakaŵa cakhumi. Cakhumi cilicose ico ŵavuna, pamoza na ‘cakhumi cose ca ng’ombe, panji ca mberere,’ cikeneranga kuŵa “cakupatulika kwa Yehova.” (Leviticus 27:30-32) Para Ŵaisrayeli ŵapulikira, Yehova wakaŵatumbikanga comene. ‘Zaninge naco cigaŵa ca vyakhumi vyose mu nyumba yakusungiramo, mwakuti vyakurya viŵemo mu nyumba yane; apo ndipo mukundiyezga, wakuti  Yehova wa mipingo, usange ndireke kumujurirani vidangazi vyakucanya na kumupungulirani citumbiko cakufuruka.’—Malaki 3:10.

8. Kasi cawanangwa cikapambana wuli na cakhumi?

⁸ Ntowa yaciŵiri, kusazga pa cakhumi, Yehova wakapereka mwaŵi wakuti Ŵaisrayeli ŵaperekenge vyawanangwa. Wakatuma Moses kuti waphalire Ŵaisrayeli mazgu agha: “Para mwayakanjira mu caru ico nkumutoreraniko ndipo para mukurya cingwa ca mu caru ico, muperekenge [cawanangwa, NW] kwa Yehova.” Kufuma pa vyakukolora vyawo vyakwamba, ŵakenera kupereka “kacingwa ka nthimpwa” kuti ciŵe “cawanangwa” mu miwiro yawo yose. Wonani kuti pakaŵavya mweso pa cakupereka ici. (Maŵazgo 15:18-21) Kweni para Ŵaisrayeli ŵapereka cawanangwa cawo mwakuwonga, ŵakaŵa ŵakusimikizga kuti Yehova waŵatumbikenge. Tikuwonaso kuti ndimo vikaŵira mu mboniwoni ya tempele ya Ezekiel. Tikuŵazga kuti: ‘Vyakwamba-kupya vya mtundu wose, na vyakupereka vya mtundu wose mwa vyakupereka vyinu vyose, viŵenge vya ŵapristi; mupeso ku ŵapristi mgayiwa winu wakudanga mwakuti thumbiko likhalenge mu nyumba yinu.’—Ezekiel 44:30.

9. Kasi Yehova wakasambizga vici kwizira mu dango la kuvulura?

⁹ Ntowa yacitatu, Yehova wakayambiska kuvulura. Yehova wakati: ‘Pakuvuna vyakurya vya caru cinu ungavunanga vyose petu mu vingodya vya munda wako, ungavuluranga twamunyuma para wavunamo kale. Ndipo ungavuluranga munda wako wa mpeska, ungasolanga zose mpeska mu munda wako na izo zawa pasi; uzisidire mukavu na mulendo: Ine ndine Yehova Ciuta wako.’ (Leviticus 19:9, 10) Apa napo pakaŵavye mweso. Muisrayeli waliyose wakawonanga yekha unandi wa vyakurya vyakuti wasidireko ŵakavu. Pakaŵa pake kuti Fumu ya mahara Solomon yiyowoye kuti: “Mweneuyo wakufwira lusungu mukavu wakubwereka Yehova, ndipo iye tiwawezgere ceneico wacita.” (Zintharika 19:17) Nteura Yehova wakasambizga lusungu na kughanaghanira ŵakusuzgika.

10. Kasi ncivici ico cikacitikanga usange Ŵaisrayeli ŵatondeka kuwonga?

¹⁰ Yehova wakaŵatumbikanga Ŵaisrayeli para ŵapulikira na kupereka cakhumi, cawanangwa na kovwira ŵakavu. Kweni para ŵatondeka kuwonga, Yehova wakaŵarekanga. Masoka ghakaŵawiranga ndipo ŵakakorekanga wuzga. (2 Midauko 36:17-21) Kasi ise tikusambirapo vici?

Umo Tikurongolera Kuwonga

11. Kasi ni ntowa wuli yikuru iyo tingawongera Yehova?

¹¹ Ntowa yikuru iyo tingarongolera kuti tikurumba Yehova na kumuwonga yikusazgapo kupereka “sembe.” Mbunenesko kuti ise Ŵakristu tikurongozgeka na Dango la Moses yayi, ndipo tikupereka sembe za nyama yayi. (Ŵakolose 2:14) Ndipouli, mpostole Paulos wakaciska Ŵakristu Ŵacihebere kuti: “Tiperekenge sembe ya marumbo kwa Ciuta rutaruta, uko ndiko kuti cipambi ca milomo iyo yikuzomera zina lake.” (Ŵahebere 13:15) Para tikugwiriskira ncito maluso na cuma cithu kuti tipereke sembe ya marumbo kwa Yehova, kwali ni mu uteŵeti panji “mu wungano” wa Ŵakristu ŵanyithu, tingamuwonga Dada withu wakucanya na wacitemwa, Yehova Ciuta. (Salmo 26:12) Apo tikucita nteura, kasi tingasambirapo vici umo Ŵaisrayeli ŵakenera kuperekera viwongo kwa Yehova?

12. Pakuyowoya za udindo withu Wacikristu, kasi tikusambirapo vici pa dango la cakhumi?

¹² Cakwamba, nga ni umo tawonera kale, waliyose wakeneranga kupereka cakhumi; uwu ukaŵa udindo wa Muisrayeli waliyose. Ise Ŵakristu, tiri na udindo wa kuteŵetera m’munda na kufika pa maungano. Waliyose wakwenera kucita vintu ivi. Mu ucimi wake ukuru wakukhwaskana na nyengo za umaliro, Yesu wakati: “Makani ghaweme gheneagha gha Ufumu ghamkupharazgika mu vyaru vyose ghaŵe cipanikizgo ku mitundu yose; penepapo ndipo umariro uti wizenge.” (Mateyu 24:14; 28:19, 20) Mpostole Paulos wakakhuŵirizgika na mzimu kuti walembe mazgu agha pa nkani ya maungano: “Tighanaghanirane na kukhuŵirizgirana ku kutemwa na ku milimo yiweme;  kureka kongana cara, nga ndi umo kariri kaluso ka ŵanji, kweni kuciskana; ndipo comene comene apo mukuwona zuŵa likuneng’enera.” (Ŵahebere 10:24, 25) Tikurongora kuti tikuwonga kwa Yehova usange tikuzomera udindo wa kupharazga na kusambizga, ndiposo kucezga na ŵabali ŵithu nyengo zose pa maungano gha mpingo, na kuwona kuti uwu ni mwaŵi ukuru.

13. Kasi tikusambirapo vici pa kupereka cawanangwa na kuvulura?

¹³ Kusazga apa, tingasanga candulo para tingawona ntowa zinyake ziŵiri izo Ŵaisrayeli ŵakawongeranga—cawanangwa na kuvulura. Mwakupambana na cakhumi, ico cikaŵa na mweso uwo waliyose wakenera kufiska, kupereka cawanangwa na kuvulura vikaŵavya mweso. M’malo mwake, vikapereka mupata kuti muteŵeti wa Yehova warongore kuwonga mwakuyana na umo mtima wake wakhumbira. Mwakuyana waka, nangauli tikumanya kuti uteŵeti wa m’munda na kufika pa maungano ni udindo wakuzirwa wa muteŵeti wa Yehova waliyose, kasi tikucita vintu ivi na mtima wose kwambura kucicizgika? Kasi tikuwuwona kuŵa mwaŵi wakuti tiwongere Yehova kufumira pasi pa mtima cifukwa ca ivyo waticitira? Kasi tikucita vintu ivi mwakujipereka kwakuyana na mipata iyo tiri nayo? Panji kasi tikuwona ngati ni mphingo yakuti ticite mwadango waka? Waliyose wakwenera kuzgora yekha mafumbo agha. Mpostole Paulos wakati: “Muntu yose wapime mulimo wake na wake, apo ndipo wati waŵenge na kuthumbwa mwa yekha pera, ndipo mu munyake cara.”—Ŵagalatiya 6:4.

14. Kasi Yehova wakukhumba kuti timuteŵetere wuli?

¹⁴ Yehova Ciuta wakutimanya makora. Wakumanya ivyo tikutondeka. Wakuwonga pa ivyo tikumucitira mwakujipereka, vikuru panji vicoko. Wakuyaniska yayi ivyo tikumucitira na ivyo ŵanyithu ŵakucita, ndipo nase tikucita ntena yayi. Pa nkani ya kupereka vintu vyakuthupi, mpostole Paulos wakaphalira Ŵakristu ŵa ku Korinte kuti: “Usange khumbo liripo, ncakupokerereka kwakuyana na umo muntu wariri navyo, kwakuyana na ivyo walije cara.” (2 Ŵakorinte 8:12, NW) Fundo iyi yikugwiraso ncito pakuyowoya za uteŵeti withu kwa Ciuta. Ico cikupangiska kuti Yehova wapokelere uteŵeti withu ni unandi wa ivyo tikucita cara, kweni umo tikucitira—mwacimwemwe kweniso na mtima wose.—Salmo 100:1-5; Ŵakolose 3:23.

Muŵe na Mzimu wa Upayiniya Ndipo Ukoreskani

15, 16. (a) Kasi uteŵeti wa upayiniya na mtima wa kuwonga vikukolerana wuli? (b) Kasi awo ŵangafiska yayi kucita upayiniya ŵangarongora wuli mzimu wa upayiniya?

¹⁵ Ntowa yakukhorweska iyo tingawongera Yehova ndiyo kwamba uteŵeti wa nyengo zose. Cifukwa cakuti ŵakutemwa Yehova na kuwonga cifukwa ca lusungu lwake, ŵateŵeti ŵakubapatizika ŵanandi ŵasinta umoyo wawo kuti ŵaŵe na nyengo yakukwana kuti ŵateŵetere Yehova. Ŵanyake ŵakukwaniska kucita uteŵeti wa upayiniya, ŵakumalira maora 70 mwezi wuliwose mu ncito ya kuphalira ŵantu makani ghaweme na kuŵasambizga unenesko. Ŵanyake awo ŵalije mipata yakukwana, nyengo zinyake ŵakunozgekera kumalira maora 50 pa mwezi mu upayiniya wakovwira.

¹⁶ Kweni wuli pakuyowoya za ŵateŵeti ŵa Yehova ŵanandi awo ŵangakwaniska yayi kucita upayiniya wa nyengo zose panji wakovwira? Ŵangawonga Yehova mwa kuŵa na mzimu wa upayiniya, na kuwukoreska. Mwauli? Mwa kukhuŵirizga awo ŵangacita upayiniya, kukhuŵirizga ŵana ŵawo kuti ŵacite uteŵeti wa nyengo zose, na kulimbikira pa ncito ya kupharazga kuyana na mipata yawo. Ivyo tikupereka mu uteŵeti withu vikuthemba pa viwongo ivyo tiri navyo mu mitima yithu cifukwa ca ivyo Yehova wacita, ivyo wakucita na ivyo waticitirenge muntazi.

Kurongora Mtima wa Kuwonga na ‘Cuma Cithu’

17, 18. (a) Kasi tingarongora wuli mtima wa kuwonga na ‘cuma cithu’? (b) Kasi Yesu wakaciwona wuli cawanangwa ca cokoro, ndipo cifukwa wuli?

¹⁷ ‘Cindika Yehova na cuma cako,’ likuti nteura lemba la Zintharika 3:9, “na vipasi vyakwamba-kuca vya vipambi vyako.” Ŵateŵeti ŵa Yehova ŵakweneraso kupereka cakhumi yayi.  M’malo mwake, Paulos wakalembera mpingo wa Korinte kuti: “Muntu yose wapenge nga ndi umo waghanaghanira mu mtima wake; na kudonda cara, nesi na kukoserezgeka: cifukwa Ciuta wakutemwa uyo wakupa na kusangwa.” (2 Ŵakorinte 9:7) Tikurongora kuwonga para tikupereka vyawanangwa vyakuti viwovwire pa ncito ya kupharazga Ufumu. Mtima wa kuwonga ukutikhuŵirizga kuti ticitenge nteura nyengo zose, panji kupatula cakupereka sabata yiliyose, nga ni umo ŵakacitiranga Ŵakristu ŵakale.—1 Ŵakorinte 16:1, 2.

¹⁸ Kuti ni unandi wa ndarama cara uwo ukurongora kuti tikumuwonga Yehova, kweni umo tikuperekera. Ici ndico Yesu wakawona apo ŵantu ŵakaponyanga vyawanangwa vyawo mu mabokosi pa tempele. Apo Yesu wakawona mwanakazi mukavu uyo wakaŵa cokoro kuti wakutayamo “tumakopara tuŵiri,” wakati: “Nkumunenerani kwakuneneska, Cokoro ici cikavu catayamo kwakuruska wose: cifukwa iwo wose vya ku uzali wawo ŵatayamo mu vyawanangwa: kweni ici mu ukavu wake catayamo mpango zose [izo] cikaŵa nazo.”—Luka 21:1-4.

19. Cifukwa wuli nciweme kuwona ntowa izo tikurongolera kuwonga?

¹⁹ Mphanyi sambiro ili lakukhwaskana na umo tingarongolera mtima wa kuwonga latikhuŵirizga kuti tiwone ntowa izo ise tikuwongera. Kasi tingasazgirako sembe yithu ya marumbo kwa Yehova, ndiposo covwiro pa ncito ya pa caru cose na cuma cithu? Mulimose umo tikukwaniskira kucita ici, tiri na cigomezgo cakuti Dada withu walusungu Yehova, wazamukondwa kuti tiri ŵakuwonga.

Kasi Mukukumbukira?

• Kasi tikwenera kuwonga Yehova pa vifukwa wuli?

• Kasi tikusambirapo vici pa dango la cakhumi, cawanangwa, na kuvulura?

• Kasi tingaŵa nawo wuli mzimu wa upayiniya?

• Kasi tingagwiriskira wuli ncito ‘cuma cithu’ kuti tiwonge Yehova?

[Mafumbo]

[Vithuzithuzi pa peji 28]

‘Cawanangwa ciweme cose, na cawanangwa cakufikapo cikufuma kucanya’

[Vithuzithuzi pa peji 31]

Kasi tingajipereka mwauli?