Yehova Ngwakuzura na Cisungusungu

“Yehova [ngwacisungusungu, NW] cakuzara.”—SALMO 145:8.

1. Kasi citemwa ca Ciuta nchikuru wuli?

 “CIUTA nkhutemwa.” (1 Yohane 4:8) Mazgu ghakukondweska agha ghakulongora kuti muwuso wa Yehova ukujintha pa citemwa. Inya, nanga ni ŵanthu awo ŵakuleka kumupulikira nawo ŵakwandula na zuŵa ndiposo vura ivyo wakupeleka mwacitemwa! (Mateyu 5:44, 45) Cifukwa cakuti Ciuta wakutemwa ŵanthu, na ŵalwani ŵake wuwo ŵangalapa, kung’anamukira kwa iye na kusanga umoyo wamuyirayira. (Yohane 3:16) Kweni sonosono apa, Yehova wazamuphyera ŵaheni awo ŵakulutilira kwananga mwakuti awo ŵakumutemwa ŵazakakondwe na umoyo wamuyirayira mu caru ciphya ca urunji.—Salmo 37:9-11, 29; 2 Petros 3:13.

2. Kasi Yehova wakulongora citemwa ca mtundu wuli kwa awo ŵali kujipatulira kwa iyo?

² Yehova wakulongora citemwa mu nthowa yapadera kwa ŵanthu ŵake awo ŵakumusopa. Citemwa ca mtundu uwu cikuzunulika na lizgu la Cihebere ilo likung’anamura “cisungusungu.” Davide, Fumu ya Israyeli wakale yikaŵa yakuwonga cifukwa ca cisungusungu ca Ciuta. Cifukwa ca ivyo wakawona mu umoyo wake na kughanaghanira umo Ciuta wakacitira  na ŵanthu ŵanyake, Davide wakimba na cigomezgo kuti: “Yehova ngwacisungusungu cakuzara.”—Salmo 145:8.

Kumanya Ŵakugomezgeka ŵa Ciuta

3, 4. (a) Kasi Salmo 145 likutovwira wuli kumanya ŵakugomezgeka ŵa Yehova? (b) Kasi ŵakugomezgeka ŵa Ciuta ‘ŵakumutumbika’ wuli?

³ Pakuyowoya za Yehova Ciuta, Hana, nyina wa mprofeti Samuel, wakati: “Wavikilirenge malundi gha ŵakugomezgeka ŵake.” (1 Samuel 2:9, NW) Kasi “ŵakugomezgeka” aŵa mbanjani? Fumu Davide yikuzgora. Wati walumba mikhaliro yakuzizwiska ya Yehova, iye wakuti: “ŵakugomezgeka ŵinu wose ŵamutumbikeninge.” (Salmo 145:10, NW) Kweni mungazizwa kuti ŵanthu ŵangatumbika wuli Ciuta? Ŵanthu ŵakutumbika Ciuta mwa kumulumba panji kumutamika.

⁴ Ŵakugomezgeka ŵa Yehova ni awo ŵakumulumba na milomo yawo. Para ŵakucezga na para ŵali pa maungano gha Cikhristu, kasi mutu wa nkhani ukuŵa vici? Ufumu wa Yehova! Ŵateŵeti ŵakugomezgeka ŵa Ciuta ŵakukolerana na Davide uyo wakimba kuti: ‘Ŵayowoyenge vya ucindami na vya ufumu winu, ŵadumbiranenge vya mazaza ghinu.’—Salmo 145:11.

5. Kasi tikumanya wuli kuti Yehova wakuwona para ŵakugomezgeka ŵake ŵakumurumba?

⁵ Kasi Yehova wakupulika usange ŵakugomezgeka ŵake ŵakumulumba? Inya, wakupulikizga ivyo ŵakuyowoya. Mu ucimi wakuyowoya za kusopa kutuŵa lero, Malaki wakalemba kuti: ‘Penepapo awo ŵakumopa Ciuta ŵakayowoyanga, munthu uyu ku munyake; Yehova wakategherezga, wakapulika, ndipo buku la cikumbusko likalembekera awo ŵakumopa Yehova na kulanguruka na zina lake.’ (Malaki 3:16) Yehova wakukondwa comene usange ŵakugomezgeka ŵake ŵakuyowoya za iye, ndipo wakuŵakumbuka.

6. Ni nchito wuli iyo yikutovwira kumanya ŵakugomezgeka ŵa Ciuta?

⁶ Kweniso ŵateŵeti ŵakugomezgeka ŵa Yehova ŵangamanyikwa na cikanga cawo ndiposo kugwiliskira nchito mipata yawo pakuyowoyeskana na awo ŵakuleka kusopa Ciuta waunenesko. Inya nadi, ŵakugomezgeka ŵa Ciuta ‘ŵakuvumbulira ŵana ŵa ŵanthu minthondwe yake, na ucindami wa mazaza gha ufumu wake.’ (Salmo 145:12) Kasi mukupenja mipata na kuyigwiliskira nchito kuti mudumbirane na ŵanthu ŵambura cipulikano za ufumu wa Yehova? Mwakupambana na maboma gha ŵanthu agho ghamalenge sonosono apa, ufumu wake ngwa muyirayira. (1 Timote 1:17) Ŵanthu ŵakwenera kumanya mwaluŵiro za ufumu wamuyirayira wa Yehova na kuwukhozgera. Davide wakimba kuti: “Ufumu winu mbufumu wa muyirayira, ndipo muwuso winu ngwa migonezi na migonezi.”—Salmo 145:13.

7, 8. Kasi nchivici cikacitika mu 1914, ndipo pali ukaboni wuli wakuti Ciuta wakuwusa kwizira mu Ufumu wa Mwana wake?

⁷ Kwamba mu 1914, tili na cifukwa cinyake cakuti tiyowoyere za ufumu wa Yehova. Mu cilimika ici, Ciuta wakakhazikiska Ufumu wa Mesiya kucanya, ndipo Yesu Khristu, Mwana wa Davide ndiyo ni Fumu. Ntheura, Yehova wakafiska layizgo lake lakuti ufumu wa Davide uzamukhozgeka kwa muyirayira.—2 Samuel 7:12, 13; Luka 1:32, 33.

⁸ Ukaboni wakuti sono Yehova wakuwusa kwizira mu Ufumu wa Mwana wake Yesu Khristu tikuwuwona apo ucimi wakuyowoya za cimanyikwiro ca kuŵapo kwa Yesu ukufiskika.  Cigaŵa cikuru ca cimanyikwiro ici ni nchito iyo Yesu wakayowoya kuti yizamucitika na ŵakugomezgeka ŵa Ciuta apo wakati: “Makani ghawemi gheneagha gha ufumu ghamkupharazgika mu vyaru vyose ghaŵe cipanikizgo ku mitundu yose; penepapo ndipo umaliro uti wizenge.” (Mateyu 24:3-14) Cifukwa cakuti ŵakugomezgeka ŵa Ciuta mbamwamphu pa kufiska ucimi uwu, ŵanalume, ŵanakazi na ŵana ŵakujumpa 6 miliyoni ŵakucitako nchito yikuru iyi sono, iyo yizamucitikaso cara. Sonosono apa, wose awo ŵakususka Ufumu wa Yehova ŵamalenge.—Civumbuzi 11:15, 18.

Kwandula na Muwuso wa Yehova

9, 10. Kasi pali mphambano wuli pakati pa Yehova na ŵalongozgi ŵa wunthu?

⁹ Usange tili Ŵakhristu ŵakujipatulira, tikwandula vinandi ku ubwezi withu na Fumunkhuru Yehova. (Salmo 71:5; 116:12) Mwaciyelezgero, cifukwa cakuti tikopa Ciuta na kucita urunji, iyo wakutitemwa ndipo tikusendelera kufupi na iyo mwauzimu. (Milimo 10:34, 35; Yakobe 4:8) Mwakupambanako, ŵalongozgi ŵa caru kanandi ŵakutemwa kucezga na ŵanthu ŵakumanyikwa, nga ni ŵalara ŵa nkhondo, ŵamalonda ŵasambazi panji ŵanthu ŵakumanyikwa pa vyakusanguruska na masoŵero. Mwakuyana na nyuzipepala ya Sowetan ya kuno ku Africa, pulikani ivyo mulara wa boma wakumanyikwa wakayowoya pakukhwaskana na malo agho kuli ŵakavu mu caru cake: “Nkhumanya ico taŵanandi tikulekera kuluta ku malo agha. Nchifukwa cakuti tikukhumba kuluwa kuti malo agha ghaliko. Tikususkika na njuŵi yithu, ndipo soni zikutikora cifukwa tikwenda pa galimoto zapacanya.”

¹⁰ Mbunenesko kuti ŵalongozgi ŵanyake ŵakukhumba nadi kuti ŵawovwire ŵanthu ŵawo. Kweni nanga ŵangaŵa ŵalongozgi ŵawemi aŵa ŵakutondeka kumanya makora ŵanthu ŵawo. Ipo tingafumba kuti: ‘Kasi yilipo fumu iyo yikupwelelera ŵanthu ŵake wose, mwakuti yikovwira waliyose mwaluŵiro pa nyengo ya suzgo’? Inya, yilipo. Davide wakalemba kuti: “Yehova wakufighilira wose awo ŵakukhuŵara, na kuwuska awo ŵasindama, kuŵanyoroska.”—Salmo 145:14.

11. Ni viyezgo wuli ivyo vikuwira ŵakugomezgeka ŵa Ciuta, ndipo ŵakovwirika wuli?

¹¹ Viyezgo na masoka ghanandi vikuwira ŵakugomezgeka ŵa Yehova Ciuta cifukwa cakuti mbambura kufikapo, kweniso cifukwa cakuti ŵakukhala mu caru ico cili mu nkhongono za “muheni,” Satana. (1 Yohane 5:19; Salmo 34:19) Ŵakhristu ŵakutambuzgika. Ŵanyake ŵakulwara matenda ghambura kukonda munkhwara panji ŵabali ŵawo ŵali kupotera. Nyengo zinyake cifukwa ca mphuvya izo ŵakacita, ŵakugomezgeka ŵa Yehova ŵangathika lusoko ndipo ŵangagongowa. Ndipouli, para ŵakuyezgeka, Yehova ngwakunozgeka kupembuzga waliyose wa iwo, na kumupa nkhongono zauzimu.  Fumu Yesu Khristu nayo wakukhumba kuŵawovwira awo ŵakujilambika kwa iyo mwakugomezgeka.—Salmo 72:12-14.

Cakurya Cakukhorweska mu Nyengo Yakwenelera

12, 13. Kasi Yehova wakupeleka wuli ivyo “camoyo cose” cikukhumba?

¹² Cifukwa cakuti ngwakuzura na cisungusungu, Yehova wakupeleka vyose ivyo ŵateŵeti ŵake ŵakukhumba. Wakuŵapa cakurya cakukhorweska. Fumu Davide yikalemba kuti: “Maso gha wose ghakumulaŵilirani, ndipo mu nyengo yakwenelera mukuŵapa kurya kwawo. Mukujura woko linu na kukhorweska camoyo cose.” (Salmo 145:15, 16) Nanga pangaŵa pa nyengo ya soka, Yehova wanganozga nthowa yakuti ŵakugomezgeka ŵake ŵasangire ‘cakurya cawo ca zuŵa’ ilo.—Luka 11:3; 12:29, 30.

¹³ Davide wakayowoya kuti “camoyo cose” cikukhorwa. Na vinyama wuwo. Kuŵavyenge vyakumera pa caru na mu nyanja, mphanyi vinyama vya mu maji, viyuni na vinyama vya mu thengere vilije mphepo za Oxygen zakuti vithutenge, panji cakurya. (Salmo 104:14) Kweni Yehova wakuwoneseska kuti wakupeleka vyose ivyo vinyama vikukhumba.

14, 15. Kasi cakurya cauzimu cikupelekeka wuli lero?

¹⁴ Mwakupambana na vinyama, ŵanthu ŵali na njara ya vinthu vyauzimu. (Mateyu 5:3) Yehova wakupeleka mu nthowa yapadera vinthu vyauzimu ivyo ŵakugomezgeka ŵake ŵakukhumba! Pambere wandafwe, Yesu wakalayizga kuti “muzga wa magomezgeko na wa vinjeru” wazamupeleka ‘vyakurya vyauzimu mu nyengo yakwenelera’ kwa awo ŵakumulondezga. (Mateyu 24:45) Ŵanyake mwa ŵakuphakazgika 144,000 awo ŵakhalako ndiwo ŵakupanga wupu wa muzga lero. Yehova wapeleka cakurya cauzimu cinandi kwizira mwa iwo.

¹⁵ Mwaciyelezgero, ŵanthu ŵa Yehova ŵanandi sono ŵakwandula na Baibolo liphya lakung’anamurika makora mu viyowoyero vyawo. Baibolo la New World Translation of the Holy Scriptures ni thumbiko likuru comene! Kusazga apa, mabuku ghanandi comene ghakulongosora Baibolo ghakupharazgika mu viyowoyero vyakujumpha 300. Cakurya cose ici cauzimu ni thumbiko kwa awo ŵakusopa mwaunenesko pa caru cose capasi. Kasi ni  njani uyo wakwenera kuwongeka cifukwa ca vyose ivi? Yehova Ciuta. Cifukwa cakuti ngwakuzura na cisungusungu, wacitiska kuti wupu wa muzga upeleke “cakurya mu nyengo yakwenelera.” Kwizira mu vinthu ivi, “camoyo cose” cikukhorwa mu caru ca paradiso wauzimu ca mazuŵa ghano. Ndipo ŵateŵeti ŵa Yehova ŵakukondwa apo ŵakulindilira kuzakawona caru cikusinthika na kuzgoka paradiso sonosono apa!—Luka 23:42, 43.

16, 17. (a) Ni viyelezgero wuli vya cakurya cauzimu cakupelekeka mu nyengo yakwenelera ivyo tili navyo? (b) Kasi Salmo 145 likuti Ciuta wakuwona wuli ŵakugomezgeka ŵake pa nkhani iyo Satana wali kuwuska?

¹⁶ Pulikani ciyelezgero capadera ca cakurya ico cikupelekeka mu nyengo yakwenelera. Mu 1939, Nkhondo Yaciŵiri ya Caru Cose yikayamba ku Europe. Mu cilimika ico, Gongwe la Mulinda la Cingelezi la Novemba 1, likaŵa na nkhani ya mutu wakuti “Neutrality” (Kuleka Kuŵa ŵa Caru). Cifukwa ca fundo zakupulikikwa makora izo zikalongosoreka mu nkhani iyo, Ŵakaboni ŵa Yehova pa caru cose ŵakawona kuti cikaŵa cakwenelera kuleka kunjilirapo pa nkhani za nkhondo. Ici cikakwiyiska maboma ghose agho ghakaŵa pa nkhondo iyo yikatora vilimika vinkhondi na cimoza. Nangauli ŵakugomezgeka ŵa Ciuta ŵakakanizgika kupharazga makani ghawemi gha Ufumu na kutambuzgika, kweni ŵakalutilira. Kufuma mu 1939 mupaka 1946, ŵakatumbikika comene apo ŵakasazgikira na 157 peresenti. Kweniso mbiri ya kugomezgeka kwawo mu nyengo ya nkhondo yikulutilira kovwira ŵanthu kuti ŵamanye cisopo caunenesko.—Yesaya 2:2-4.

¹⁷ Cakurya cauzimu ico Yehova wakupeleka cikwiza mu nyengo yakwenelera pera yayi, kweniso nchakukhorweska comene. Apo vyaru vikatimbananga mu Nkhondo Yaciŵiri ya Caru Cose, ŵanthu ŵa Yehova ŵakawovwirika kuti ŵaghanaghanire cinthu cakuzirwa comene kuluska kuthaskika kwa iwo pera. Yehova wakaŵawovwira kuti ŵapulikiske nkhani yikuru comene iyo yikukhwaska cilengiwa cose—nkhani yakuti Yehova ndiyo wakwenera kuwusa. Nchakukhorweska kumanya kuti Kaboni wa Yehova waliyose uyo wakagomezgeka, nayo wakathuwuskako muwuso wa Yehova na kupanikizga kuti Dyabulosi ni mutesi. (Zintharika 27:11) Mwakupambana na Satana uyo wakuyowoyera utesi Yehova na kususka muwuso wake, ŵakugomezgeka ŵa Yehova ŵakulutilira kupharazga pakweru kuti: “Yehova ngwakurunjika mu nthowa zake zose.”—Salmo 145:17.

18. Kasi pali ciyelezgero wuli ca sonosono apa ca cakurya cakupelekeka mu nyengo yakwenelera kweniso cakukhorweska?

¹⁸ Ciyelezgero cinyake ca cakurya cakukhorweska mu nyengo yakwenelera ni buku la Yandikirani kwa Yehova, ilo likafuma pa maungano ghanandi gha cigaŵa gha “Ŵapharazgi Ŵamwampu ŵa Ufumu” pa caru cose mu 2002/03. Buku ili, lakupangika na “muzga wa magomezgeko na wa vinjeru” ndipo lapharazgika na Ŵakaboni ŵa Yehova, likukonkhoska mikhaliro yapadera ya Yehova Ciuta, kusazgapo iyo yikuzunulika mu Salmo 145. Buku liwemi ili liwovwirenge comene ŵakugomezgeka ŵa Ciuta kuti ŵasendelere kufupi na iyo.

 Nyengo ya Kusendelera kwa Yehova

19. Kasi ni nyengo wuli yakofya iyo yaneng’enera, ndipo tizamucita wuli pa nyengo iyo?

¹⁹ Nyengo yakumazgira nkhani yikuru ya muwuso wa Yehova yikuneng’enera. Mwakuyana na ucimi wa mu Ezekiel cipaturo 38, sonosono apa Satana wazamulongora kuti ni “Gogi, wa caru ca Magogi.” Wazamuwukira ŵanthu ŵa Yehova pa caru cose. Satana wazamuhaŵa comene mwakuti wawezgere nyuma ŵakugomezgeka ŵa Ciuta. Kuluska kale, awo ŵakusopa Yehova ŵakwenera kuzakacema pa iyo na mtima wose, na kulira wuwo kuti waŵawovwire. Kasi ŵazamuwoneka kuti ŵakopa Ciuta na kumutemwa pa waka? Cara nadi, cifukwa Salmo 145 likuti: ‘Yehova wali pafupi na wose awo ŵakumucema, awo ŵakumucema mu unenesko. Wafiskenge khumbo la awo ŵakumopa, ndipo wakupulika kulira kwawo, wakuŵaponoska. Yehova wakusunga wose awo ŵakumutemwa; kweni ŵaheni wose waŵaparanyenge.’—Salmo 145:18-20.

20. Kasi mazgu gha pa Salmo 145:18-20 ghakwaniskikenge wuli sonosono apa?

²⁰ Cizamuŵa cakukondweska comene kuwona kuti Yehova wali nase, kweniso kuwona nkhongono zake zakuthaska para wakumara ŵaheni! Kweni pa nyengo yakofya yeneiyo yili pafupi comene, Yehova wazamupulika ŵekha “awo ŵakumucema mu unenesko.” Ŵapusikizgi wazamuŵapulika cara. Mazgu gha Ciuta ghakulongora makora kuti nyengo zose para ŵaheni ŵakucema zina lake cifukwa cakuti vinthu vyasuzga, ŵakutambura waka.—Zintharika 1:28, 29; Mika 3:4; Luka 13:24, 25.

21. Kasi ŵakugomezgeka ŵa Yehova ŵakulongora wuli kuti ŵakukondwa kuzunura zina lake?

²¹ Kuluska kumanyuma kose uku, sono ni nyengo yakuti wose awo ŵakopa Yehova ‘ŵamuceme mu unenesko.’ Ŵakugomezgeka ŵake ŵakukondwa kuzunura zina lake para ŵakuromba na para ŵakuzgora pa maungano. Ŵakugwiliskira nchito zina la Ciuta para ŵakucezga. Ndipo ŵakupharazga zina la Yehova mwacikanga mu uteŵeti wawo.—Ŵaroma 10:10, 13-15.

22. Cifukwa wuli nchakuzirwa kukanizga maghanoghano na makhumbiro gha caru nyengo zose?

²² Kuti tilutilire kwandula na ubwezi withu na Yehova Ciuta, nchakuzirwa kuti tilutilire kukanizga vinthu ivyo vingatimbanizga umoyo withu wauzimu, nga nkhutemwa cuma, vyakusanguluska vyambura kwenelera, na mtima wambura kugowokera, panji kusulako ŵakavu. (1 Yohane 2:15-17; 3:15-17) Usange talekelera maluso agha na nkharo ya nthena tingacita zakwananga zikuru ndipo Yehova wangatileka. (1 Yohane 2:1, 2; 3:6) Nchamahara kukumbuka kuti Yehova walutilirenge kulongora cisungusungu kwa ise, kwekha usange tikulutilira kugomezgeka kwa iye.—2 Samuel 22:26.

23. Kasi ŵakugomezgeka ŵa Ciuta ŵali na munthazi wuli mwakukondweska?

²³ Ntheura tiyeni tighanaghanirenge vinthu vyakukondweska vya munthazi ivyo ŵakugomezgeka ŵa Yehova ŵazamusanga. Para tikucita nthena, tizamuŵa pakati pa awo ŵazamukondwa, kutumbika na kulumba Yehova “zuŵa na zuŵa” ndiposo “muyirayira swi-i.” (Salmo 145:1, 2) Mphanyi tose ‘tajisungilira mu kutemwa kwa Ciuta kufikira ku umoyo wa muyirayira.’ (Yuda 20, 21) Apo tikulutilira kwandula na mikhaliro yapadera ya Dada withu wa kucanya, kusazgapo cisungusungu ico walongora awo ŵakumutemwa, mphanyi takolerana na ivyo Davide wakayowoya mu mazgu ghaumaliro gha Salmo 145. ‘Ine mlomo wane uyowoyenge malumbo gha Yehova, ŵanthu wose ŵatumbikenge zina lake muyirayira swi-i.’

Kasi Mungazgora Wuli?

• Kasi Salmo 145 likutovwira wuli kumanya ŵakugomezgeka ŵa Ciuta?

• Kasi Yehova wakukhorweska wuli “camoyo cose”?

• Cifukwa wuli tikwenera kusendelera kwa Yehova?

[Mafumbo]

[Cithuzithuzi pa peji 9]

Ŵakugomezgeka ŵa Ciuta ŵakukondwa kudumbiskana nchito zake zikuru

[Cithuzithuzi pa peji 10]

Ŵateŵeti ŵa Yehova ŵakovwira ŵanthu mwacikanga kusambira ucindami wa ufumu wake

[Cithuzithuzi pa peji 11]

Yehova wakupeleka cakurya ku “camoyo cose”

[Kulongosora Cithuzithuzi]

Vinyama: Parque de la Naturaleza de Cabárceno

[Cithuzithuzi pa peji 12]

Yehova wakupeleka nkhongono na ulongozgi ku ŵakugomezgeka ŵake awo ŵakuromba covwiro