Cifukwa Wuli Ŵakaboni ŵa Yehova Ŵakwiza pa Nyumba Yinu?

PA CARU cose, ŵanthu ŵakumanya makora kuti Ŵakaboni ŵa Yehova mbacitatata pa uteŵeti wawo wa ku nyumba na nyumba. Ŵanthu ŵanyake ŵakumanya yayi ico Ŵakaboni ŵa Yehova ŵakwizira pa nyumba zawo, comene usange pakwamba ŵakakondwa viŵi yayi na uthenga wawo. Makalata ghaŵiri agho ghakalembeka ku Russia ghakulongosora ico ŵakucitira nthena.

Masha, msungwana wa vilimika 19 wa ku Khabarovsk wakuti: “Kuyowoya unenesko, kale nkhaŵagwenthanga Ŵakaboni ŵa Yehova.” Kweni wakati waŵazga magazini agho Ŵakaboni ŵakupharazga, wakasintha maghanoghano. Masha wakulemba kuti: “Vyose ivyo nkhaŵazga vikaŵa vyakukondweska, ndiposo nkhajulika kumaso. Kweni cakuzirwa comene nchakuti, vikanovwira kuwona caru mwakupambanako. Pacokopacoko nkhayamba kupulikiska ico ŵanthu ŵali kulengekera.”

Mu msumba wa Ussuriysk, pafupifupi makilomita 80 kumpoto kwa msumba wa Vladivostok, Svetlana wakalemba kuti: “Nili kwamba kuŵazga Gongwe la Mulinda na Galamukani! Magazini agha ngakukhumbikwa comene nyengo zino. Nkhutemwa nkhani zose. Ni nkhani zakukondweska comene, zikovwira kumanya tunthu, ndiposo zikujura maghanoghano. Yewo comene! Nawonga nkhanira cifukwa cakuti muli mu caru ici, na kucita mulimo walusungu ndiposo wakukhumbikwa.”

Ŵakaboni ŵa Yehova pa caru cose ŵakughanaghanira comene fumbo la mpostole Paulosi lakuti: “[Ŵanthu] ŵapulikenge uli kwambura mupharazgi?” (Ŵaroma10:14) Mwalekeraci kutegherezga pacoko waka usange Ŵakaboni ŵa Yehova ŵizaso pa nyumba yinu? Namwe mungakondwa na uthenga wakupembuzga uwo ukusangika mu Mazgu gha Ciuta, Baibolo.