Cikhristu Caunenesko Cikuthaza

UTEŴETI wa Yesu Khristu ukasunkhunya caru mu nyengo yakale. Uthenga wake ukaŵa wakukwezga nkhongono, kujura kumaso, ndiposo wakukondweska mwakuti ŵanthu ŵakazizwa nawo comene. Ŵanandi awo ŵakamupulikizganga ŵakazukuma na ivyo wakayowoyanga.—Mateyu 7:28, 29.

Na cikanga cose, Yesu wakakana kunjira mu magulu ghankhaza gha visopo na vipani mu nyengo yira, lekani ŵanthu bweka ŵakafwatukanga nayo. (Mateyu 11:25-30) Yesu wakayivumbura mizimu yiheni iyo yikaŵa mu ŵanthu, ndipo wakalongora mazaza pa iyo pakuti Ciuta wali kumupa nkhongono. (Mateyu 4:2-11, 24; Yohane 14:30) Yesu wakalongosora makora cifukwa ico paliri masuzgo na zakwananga, ndipo wakasambizga kuti Ufumu wa Ciuta ndiwo ungawombora ŵanthu. (Marko 2:1-12; Luka 11:2, 17-23) Wakawuskapo mdima uwo ukajanda mukhaliro weneko wa Awiske, wakamanyiska zina la Ciuta kwa wose awo ŵakakhumbanga kuŵa paubwezi na Iyo.—Yohane 17:6, 26.

Nangauli ŵasambiri ŵa Yesu ŵakasuzgikanga na ŵavisopo kweniso ŵandyali, nchakuzizika cara kumanya kuti uthenga wake ukakaŵa yayi kuthandazgika. Mu vilimika 30 pera, mipingo yakukhora yikapangika kuno ku Africa, Asia, na Europe. (Ŵakolose 1:23) Unenesko uwo Yesu wakasambizga ukangweruska ŵanthu ŵakujiyuyura na ŵawemi mtima mu vyaru vyose ivyo vikawusikanga na Roma.—Ŵaefeso 1:17, 18.

Kasi ŵasambiri ŵaphya, ŵakufuma mu viyowoyero ivi na ivi, mafuko, na visopo, ŵakatenge ŵakhalenge wuli pamoza mwakukolerana, mu “cipulikano cimoza,” nga umo mpostole Paulosi wakayowoyera? (Ŵaefeso 4:5) Nchivici cikatenge ciŵawovwirenge ‘kuyowoya mwakuyana’ mwakuti ŵaleke kupambana? (1 Ŵakorinte 1:10) Pakuti awo ŵakujithya Ŵakhristu ŵakugaŵikana, ipo tikwenera kuwona ivyo Yesu iyo mweneko wakasambizga.

Ico Cikupangiska Ŵakhristu Kukolerana

Apo Yesu wakeruzgikanga panthazi pa Pontiyo Pilato, wakayowoya ico cikupangiska Ŵakhristu kukolerana. Wakati: “Ceneici ndico nkhababikira, ndipo ndico nkhizira mu caru, mwakuti ndipanikizge na unenesko. Yose uyo ngwa unenesko wakupulika mazgu ghane.” (Yohane 18:37) Mwantheura,  kupulikira ivyo Yesu wakasambizga, kweniso vyose ivyo vili kulembeka mu Mazgu gha Ciuta, Baibolo, vikupangiska ŵasambiri ŵaunenesko ŵa Khristu kuti ŵakoleranenge.—1 Ŵakorinte 4:6; 2 Timote 3:16, 17.

Mbunenesko kuti ŵasambiri ŵa Yesu nyengo zinyake ŵakapindananga ŵekhaŵekha. Nchivici pera cikaŵawovwiranga? Yesu wakati: ‘Para wiza iye, mzimu wa unenesko, uzamkumulongozgerani mu unenesko wose: cifukwa kuti uyowoyenge wekha cara: kweni umuphaliraninge vyose ivyo upulikenge: ndiposo umuvumbuliraninge ivyo vikwiza.’ (Yohane 16:12, 13) Pa cifukwa ici, mzimu utuŵa ukawovwira ŵasambiri ŵa Yesu kumanya unenesko apo Ciuta wakavumburanga pacokopacoko. Mzimu uwu ukapambika vipambi mwa iwo, nga ni citemwa, cimwemwe, na mtende, lekani ŵakakolerananga.—Milimo 15:28; Ŵagalatiya 5:22, 23.

Yesu wakaŵalekelera cara ŵasambiri ŵake kuti ŵapindanenge panji kusankhana, nesi kuŵazomerezga kuzgora unenesko wa mu Baibolo kuti uyane na maluso na mitheto ya visopo vya awo ŵakakumananga nawo. M’malo mwake, pa usiku waumaliro na ŵasambiri ŵake, Yesu wakafwilirapo kuromba kuti: ‘Nkhuŵarombera iwo pera cara, kweni na awo ŵamkupulikana na ine cifukwa ca mazgu ghawo: mwakuti wose ŵaŵenge ŵamoza; nga ndi umo imwe, Ŵadada, muliri mwa ine, na ine mwa imwe, kuti ndimo nawoso ŵaŵirenge mwa ise: mwakuti caru cipulikane kuti imwe mukandituma.’ (Yohane 17:20, 21) Kukolerana kweneco, mu mzimu na mu unenesko, nchimanyikwiro ca ŵasambiri ŵa Khristu kufuma pa nyengo yira mupaka na mwahuno pano. (Yohane 4:23, 24) Ndipo mbu, machalichi ghalero ngakukolerana yayi, kweni ngakugaŵikana. Cifukwa wuli vili nthena?

Cifukwa Ico Machalichi Ngakugaŵikana

Pakuti ŵakulondezga yayi visambizgo vya Yesu, lekani lero awo ŵakujithya Ŵakhristu, vigomezgo na vyakucita vyawo ni vyakupambana. Mulembi wa nyuzipepara yinyake wakati: “Nga umo vikaŵira kale, Ŵakhristu ŵalero ŵakucita kusankhapo visambizgo vya mu Baibolo ivyo ŵakuwona kuti vikuyana na khumbo lawo—na kuleka ivyo vikususkana na mitheto ya chalichi lawo.” Ivi ndivyo Yesu na ŵasambiri ŵake ŵakayowoyerathu kuti vizamucitika.

Wati wakhuŵilizgika na mzimu, Paulosi wakalembera mulaŵiliri munyake Timote kuti: “Nyengo yiti yizenge para ŵamkuwura kupulikizga cisambizgo ceneco; kweni, pakuŵa na makutu ghakunyenyera, ŵati ŵajiwunjikirenge ŵasambizgi ŵakuyana na makhumbiro ghawo; ndipo ŵati ŵaleke kupulika unenesko, na kung’anamukira ku vidokoni.” Kasi Mbakhristu wose ŵapusikikenge? Yayi. Paulosi wakalutizga kuti: “Kweni iwe uzize mu vinthu vyose, ukunthirepo suzgo, ucite mulimo wa mupharazgi, ufiske uteŵeti wako.” (2 Timote 4:3-5; Luka 21:8; Milimo 20:29, 30; 2 Petros 2:1-3) Timote na Ŵakhristu ŵanyake ŵakugomezgeka ŵakapulikira mazgu agha.

Ŵakhristu Ŵaunenesko Ŵacali Kukolerana

Nga umo Timote wakacitira, Ŵakhristu ŵaunenesko ŵali maso lero, ŵakukana maluso gha ŵanthu, kweni ŵakujintha vigomezgo vyawo pa Malemba. (Ŵakolose 2:8; 1 Yohane 4:1) Nga umo ŵakacitira Ŵakhristu ŵakwambilira, Ŵakaboni ŵa Yehova ŵakucita uteŵeti wawo mu vyaru vyakujumpha 230, kulikose uko kuli ŵanthu, ŵakupharazga uthenga uwo Yesu wakapeleka wa makani ghawemi gha Ufumu. Wonani nthowa zinayi izo ŵalongolera kuti ŵakulondezga Yesu kulikose uko ŵakukhala.

Ivyo ŵakugomezga vikujintha pa Mazgu gha Ciuta. (Yohane 17:17) Mupristi munyake ku Belgium wakalemba kuti: “Cinthu cimoza ico tingasambirako kwa iwo [Ŵakaboni ŵa Yehova] ndico kupulikira Mazgu gha Ciuta kweniso cikanga cawo pakughapharazga.”

 Ŵakugomezga kuti Ufumu wa Ciuta ndiwo ungamazga masuzgo ghose. (Luka 8:1) Ku Barranquilla, ku Colombia, Kaboni wakayowoya na Antonio, munthu uyo wakahayanga comene cipani cinyake. Kaboni wakakhozgera yayi cipani cake, nesi kutemwa vipani vinyake. Kweni wakamufumba Antonio na ŵadumbu ŵake usange ŵangatemwa kusambira Baibolo kwambura malipiro. Nakalinga, Antonio wakamanya kuti ŵanthu ŵakavu mu Colombia, na pa caru cose, ŵakwenera kulindilira Ufumu wa Ciuta wekha kuti uzakamazge masuzgo.

Ŵakucindika zina la Ciuta. (Mateyu 6:9) Ŵakaboni ŵa Yehova ŵakakumana na Maria, wa chalichi la Katolika ku Australia, wakaŵazomerezga Ŵakaboni kuti ŵamulongore zina la Ciuta mu Baibolo. Kasi iyo wakati wuli? “Nkhalira nati nawona zina la Ciuta mu Baibolo. Nkhakondwa comene kuti namanya zina la Ciuta nakuti sono nilizunurenge.” Maria wakalutilira kusambira Baibolo, ndipo pa nyengo yakwamba mu umoyo wake, wakamanya umo Yehova waliri, nakuti wakayamba kukolana nayo ubwezi wakukhora.

Ŵakukolerana cifukwa ca citemwa. (Yohane 13:34, 35) Nkhani yinyake yakulembeka mu nyuzipepara ya The Ladysmith-Chemainus Chronicle, ku Canada, yikati: “Kwali chalichi linu liri na vigomezgo wuli, kwali lirije, mukwenera kuŵalumba Ŵakaboni ŵa Yehova 4,500 awo pa sabata yimoza na hafu, ŵazenga Nyumba ya Maungano Ghakuru ya mamita 2,300, mu Cassidy . . . Ŵazenga kwambura kugazgana, kupindana panji kulongora mazaza. Ici nchimanyikwiro ca Ŵakhristu ŵaunenesko.”

Mwajiwonera mwekha ukaboni. Penepapo ŵaliska na ŵamishonale ŵa machalichi gha Cikhristu ca zina waka ŵacali kulimbana, Cikhristu caunenesko cikuthaza pa caru cose. Ŵakhristu ŵaunenesko ŵakucita uteŵeti wawo wa kupharazga na kusambizga Mazgu gha Ciuta. (Mateyu 24:14; 28:19, 20) Usange ndimwe yumoza wa awo ‘ŵakutampha na kulira’ cifukwa ca viheni ivyo vikucitika lero, nakuti mukukweŵeka na mphatukano mu machalichi gha Cikhristu, tikumupemphani kuti mukumane na Ŵakaboni ŵa Yehova ŵeneawo mbakukolerana pakusopa Ciuta waunenesko yekha, Yehova.—Ezekiel 9:4; Yesaya 2:2-4.