Cipembuzgo ku Ŵanthu Ŵakusuzgika

APO ŵanalume na ŵanakazi ŵakugomezgeka ŵakale ŵakasuzgikanga, ŵakarombanga na mtima wose kwa Ciuta kuti waŵalongozge. Mwakusazgirapo, ŵakayambanga ndiwo kucitapo kanthu kuti ŵacepeskeko masuzgo ghawo, antheura ŵakacitanga vinthu mwamahara kuti ŵacheŵe ŵanthu awo ŵakaŵacitilanga nkhaza. Mwaciyelezgero, Davide wakazizipizga masuzgo ghake cifukwa wakagomezga Yehova ndiposo wakayezgayezga ku cigaŵa cake. Wuli pakuyowoya za ise lero?

Para mukusuzgika, mwambura kukayika mukucitapo kanthu mwaluŵiro kuti mumazge suzgo ilo liripo. Mwaciyelezgero, para muli pa nchito yayi, kasi mukuyezgayezga yayi kuti musange nchito yiwemi yakuti yimovwirani pamoza na mbumba yinu? (1 Timote 5:8) Panyake usange mukurwara, kasi mukupenja munkhwara yayi? Nchakukondweska kumanya kuti Yesu, uyo Ciuta wakamupa nkhongono zakucizgira matenda ghose, wakazomerezga kuti ‘ŵalwari ndiwo ŵakupenja dokotala.’ (Mateyu 9:12) Kweni, nyengo zinyake masuzgo ghinu ghangamalirathu yayi; antheura mukhumbikwirenge kuzizipizga kwa nyengo yitaliko.

Mwalekeraci kumuphalira Yehova Ciuta masuzgo ghinu kwizira mu lurombo? Mwaciyelezgero, para tikupenja nchito, kugomezga Ciuta pamoza na lurombo kungatovwira kuti tikanizge ciyezgo ca kulembeka nchito iyo yikususkana na visambizgo vya Baibolo. Tingacheŵaso ‘kupuluskika ku cipulikano’ cifukwa ca uryezi panji kutemwa ndarama. (1 Timote 6:10) Para tisankhenge vinthu vyakuzirwa nga ni kulembeka nchito, mbumba panji nkhani ya umoyo withu, tingalondezga ivyo Davide wakayowoya: “Katundu wako umuyeghiske Yehova ndipo iye tiwakufighilire; kuti tiwazomerenge cara na kanthini kose kuti munthu murunji wasunkhunike.”—Salmo 55:22.

Lurombo lwakufumira pasi pa mtima lungatovwira kuti maghanoghano ghithu ghaŵe ghakukhazikika mwakuti masuzgo agho tili nagho ghaleke kutihangayiska. Mpostole Paulosi, uyo wakaŵa Mkhristu waunenesko, wakalemba kuti: ‘Mu vyose ivyo mukukhumba, mumanyiskani Ciuta mwa kuromba na kuŵeya pamoza na kuwonga.’ Ni mwauli umo lurombo lungatipira cipembuzgo? “Mtende wa Ciuta uwo ukuluska kapulikiskiro kose, uti usungilire mitima yinu na maghanoghano ghinu mwa Khristu.” (Ŵafilipi 4:6, 7, Phangano Liphya) Mtende wa Ciuta “ukuluska  kapulikiskiro kose.” Mtende uwu ungakhazikiska pasi mtima withu para tili na citima. ‘Usungilirenge mitima yithu na maghanoghano ghithu,’ antheura utovwirenge kuti tileke kucita vinthu mwakucimbilira na mwambura mahara, ico cingasazgirako waka masuzgo ghithu.

Lurombo lukovwira comene mu nyengo za masuzgo. Apo mpostole Paulosi wakakakika ku Roma, mwakujiyuyura wakapempha Ŵakhristu ŵanyake kuti ŵamulomberenge. Cifukwa wuli Paulosi wakapeleka pempho ili? “Nkhumuciskani comenecomene kutirombera,” wakaŵalembera ntheura, “mwakuti ndiwezgekereso kwa imwe maluŵiro.” (Ŵahebere 13:19) Mu kayowoyero kanyake, Paulosi wakamanya kuti Yehova wapulikenge malurombo gha Ŵakhristu ŵara, mutepanji ghakhwaskenge nyengo yakuti wafumiskikire.—Filemone 22.

Kasi lurombo lungapangiska kuti masuzgo ghithu ghacepeko? Vingacitika. Ndipouli, tikwenera kumanya kuti Yehova Ciuta nyengo zinyake wangazgora malurombo ghithu mwakuyana na umo tikukhumbira yayi. Paulosi wakaŵeyelera nyengo zinandi kuti ‘munga mu thupi’ lake ufumemo, panyake ici cikaŵa cakumara mahara cake. Ndipouli, m’malo mwakufumiskapo suzgo lake, Ciuta wakaphalira Paulosi kuti: “Ucizi wane ukukwanira iwe: cifukwa nkhongono zane zikufiskika mu kutomboroka.”—2 Ŵakorinte 12:7-9.

Nga ni umo tawonera, masuzgo ghithu ghangamalirathu nyengo yimoza yayi. Kweni, masuzgo ghakutipa mwaŵi wakuti tilongore usange tikuthemba nadi Adada ŵithu ŵakucanya. (Yakobe 1:2-4) Manyani kuti, nangauli Yehova Ciuta wangafumiskirapothu masuzgo yayi, kweni wangatipa ‘nthowa yakufumiramo, kuti tiŵe na nkhongono za kuzizipizgira.’ (1 Ŵakorinte 10:13) Nchakukhozga kumanya kuti Yehova wakucemeka “Ciuta wa cisangulusko cose; mweneuyo wakutisanguluska mu suzgo yithu yose.” (2 Ŵakorinte 1:3, 4) Yehova wangatipa ico tikukhumbikwira kuti tizizipizge, mwakusazgirapo, tili na cilindizga ca kuzakakhala na umoyo wamuyirayira.

Baibolo, ilo ni Mazgu gha Ciuta, likulayizga kuti Yehova “wati wafyurenge sozi lose ku maso ghawo; ndipo nyifwa kuti yiti yiŵengekoso cara; panji nesi citengero kuti citi ciŵengekoso cara, nesi kulira, panji nesi kuŵinya.” (Civumbuzi 21:3, 4) Kasi mukukayika kuti kunthazi uku caru cizamuŵavya masuzgo? Mungakayika usange mwakulira mu masuzgo. Ndipouli, Ciuta walayizga kuti wofi na masuzgo ghose vizamumara tetetete, ndipo cilato cake cizamufiskika mwambura kukayika.—Yesaya 55:10, 11.

[Vithuzithuzi pa peji 9]

Kufwatuka ku ukhaliro wakucitiska citima