‘Muzga Wa Magomezgeko’ Watonda Ciyezgo!
‘Muzga Wa Magomezgeko’ Watonda Ciyezgo!
“Nyengo yakwambira ceruzgo mu nyumba ya Ciuta yiza.”—1 Petros 4:17.
1. Kasi Yesu wakasanga vici pakuskolera “muzga”?
PA Pentekoste mu 33 C.E., Yesu wakimika “muzga” kuti wapelekenge vyakurya ku “ŵa mu nyumba” yake mu nyengo yakwenelera. Mu 1914, Yesu wakapika Ufumu, ndipo yikaŵa nyengo yakuti waskolere “muzga” uyu. Wakasanga kuti ŵanandi mu gulu la “muzga” ŵakaŵa ‘ŵakugomezgeka na ŵa vinjeru.’ Ntheura, wakamwimika pa ‘vyose ivyo wali navyo.’ (Mateyu 24:45-47) Kweni pakaŵaso muzga muheni, wambura kugomezgeka nesi wa vinjeru.
“Muzga Muheni Yura”
2, 3. Kasi “muzga muheni yura” wakafumankhu, ndipo vikacitika wuli?
2 Yesu wakati wayowoya vya “muzga wa magomezgeko na wa vinjeru,” wakazunuraso muzga muheni. Wakati: ‘Usange muzga muheni yura wayowoyenge mu mtima wake [kuti] Fumu yane yacedwa; ndipo wambenge kutimba ŵazga ŵanyake, na kurya na kumwa pamoza na ŵakuloŵera; fumu ya muzga uyo yizenge mu zuŵa ilo walive kugomezga, na pa ora ilo walive kumanya, ndipo yizamumuthyapula comene, na kumugaŵira kumoza na ŵakupusikizga: kwenekuko kuzamuŵa kulira na kuska mino.’ (Mateyu 24:48-51) Mazgu ghakuti “muzga muheni yura” ghakutikumbuska ivyo Yesu wakayowoya pakwamba vya muzga wa magomezgeko na wa vinjeru. Inya, “muzga muheni” wakafuma mwa muzga wa magomezgeko. a Mwawuli?
3 Pambere cindafike cilimika ca 1914, ŵanandi ŵa muzga wa magomezgeko ŵakalindiliranga mwakunweka kukakumana na Mwene nthengwa kucanya mu cilimika ici, kweni ici cikacitika yayi. Pa cifukwa ici na vifukwa vinyake, ŵanandi ŵakakhuŵara ndipo ŵanyake ŵakakwiya. Ŵanyake ŵakayamba ‘kutimba’ awo kale ŵakaŵa ŵabali ŵawo na mazgu, ndipo ŵakayamba kwendezgana na “ŵakuloŵera,” panji titi magulu gha Cikhristu cautesi.—Yesaya 28:1-3; 32:6.
4. Kasi Yesu wakacita nayo wuli “muzga muheni” na wose awo ŵakumulondezga?
4 Ŵanthu aŵa, awo pakwamba ŵakaŵa Ŵakhristu, ŵakamba kumanyikwa kuti “muzga muheni,” ndipo Yesu “wakaŵathyapula comene.” Mwauli? Wakaŵapata, ndipo cilindizga cawo ca kucanya cikamalira penepapo. Kweni ŵakaparanyika nyengo yeneyiyo yayi. Cakwamba ŵakenera kulira na kuska mino mu “cisi ca kuwaro” kwa mpingo Wacikhristu. (Mateyu 8:12) Kwamba apo, ŵakuphakazgika ŵanyake ŵalongora mzimu uheni uwu, ndipo ŵazgoka “muzga muheni.” Ŵanyake ŵa “mberere zinyake” ŵaŵalondezga. (Yohane 10:16) Ŵalwani ŵa Khristu wose aŵa ŵakumalira mu cisi cauzimu “kuwaro.”
5. Kasi muzga wa magomezgeko na wa vinjeru wakacita wuli mwakupambana na “muzga muheni”?
5 Kweni, muzga wa magomezgeko na wa vinjeru nayo wakayezgeka nga ni “muzga muheni yura.” M’malo mwa kukhwizuka, iyo wakazomera kovwirika. (2 Ŵakorinte 13:11) Iwo ŵakakhozgeka kuti ŵatemwe Yehova na ŵabali ŵawo. Lekani ŵazgoka “mzati na cikhozgero ca unenesko” mu “mazuŵa gha ku umaliro” ghakusuzga agha.—1 Timote 3:15; 2 Timote 3:1.
Ŵamwali Ŵakucenjera na Ŵakupusa
6. (a) Kasi Yesu wakayowoya ciyelezgero wuli kuti walongore kucenjera kwa muzga wake wa magomezgeko? (b) Kasi Ŵakhristu ŵakuphakazgika ŵakapharazganga uthenga wuli cicali cindafike cilimika ca 1914?
6 Wakati wayowoya za “muzga muheni yura,” Yesu wakayowoya ntharika ziŵiri kuti walongore cifukwa ico Ŵakhristu ŵanyake ŵakuphakazgika ŵakaŵira ŵakugomezgeka na ŵakucenjera, apo ŵanyake ŵakatondeka. b Wakalongosora kuti: ‘Ufumu wa kucanya ulinganizgikenge na ŵamwali khumi, ŵeneawo ŵakatora nyali zawo, ndipo ŵakafuma kuya katemelera mwene nthengwa. Kweni ŵankhondi ŵakaŵa ŵakupusa, ndipo ŵankhondi ŵakaŵa ŵakucenjera. Cifukwa ŵakupusa, pakuti ŵatore nyali zawo, ŵakaleka kuyegha mafuta: kweni ŵakucenjera ŵakayegha mafuta mu supa zawo, pamoza na nyali zawo.’ (Mateyu 25:1-4) Ŵamwali khumi ŵakutikumbuska Ŵakhristu ŵakuphakazgika pambere cindafike cilimika ca 1914. Iwo ŵakapendesera na kusanga kuti mwene nthengwa, Yesu Khristu, wakaŵa pafupi kubulika. Ntheura “ŵakafuma” kuti ŵakakumane nayo, ŵakapharazga mwacikanga kuti “nyengo za ŵamitundu” zimalenge mu 1914.—Luka 21:24.
7. Mphauli apo Ŵakhristu ŵakuphakazgika ‘ŵakagona tulo,’ ndipo cifukwa?
7 Ŵakaneneskanga. Nyengo za ŵamitundu zikamara nadi mu 1914, ndipo Ufumu wa Ciuta pasi pa Khristu Yesu ukamba kuwusa. Kweni ici cikacitikira kucanya kwambura kuwoneka. Pa caru capasi, ŵanthu ŵakayamba kuwona “soka.” (Civumbuzi 12:10, 12) Nyengo ya ciyezgo yikakwana. Cifukwa ca kuleka kupulikiska vinthu, Ŵakhristu ŵakuphakazgika ŵakaghanaghana kuti ‘mwene nthengwa wakucedwa.’ Cifukwa ca kutimbanizgika kweniso kutinkhika na caru, ŵakalopwa, ŵakakhala pacoko waka kulekerathu kupharazga. Nga mbamwali mu ntharika, iwo ‘ŵakagomphora na kugona tulo’ twauzimu, nga umo ŵakacitira awo ŵakajicemanga kuti Mbakhristu panyuma pakuti ŵapostole ŵa Yesu ŵafwa.—Mateyu 25:5; Civumbuzi 11:7, 8; 12:17.
8. Kasi nchivici ico cikayambiska nchemo yakuti: “Henani, mwene nthengwa!” ndipo Ŵakhristu ŵakuphakazgika ŵakenera kucitaci?
8 Ndipo mu 1919 cinthu cinyake cikacitika. Tikuŵazga kuti: ‘Usiku pakati, kukaŵa nchemerezgo, Henani, mwene nthengwa! fumani mukamutemelere. Ndipo ŵamwali wose ŵara ŵakawuka, ŵakanozga nyali zawo.’ (Mateyu 25:6, 7) Apo ŵakaŵavya cilindizga, nchemo yikapulikikwa kuti ŵayambe kutokatoka! Mu 1918, Yesu, nga ni “thenga la phangano,” wakiza mu tempele lauzimu la Yehova kuti waskolere na kutozga mpingo wa Ciuta. (Malaki 3:1) Nyengo iyi, Ŵakhristu ŵakuphakazgika ŵakenera kufuma na kukakumana nayo mu luŵaza lwa tempele pano pa caru capasi. Yikaŵa nyengo yakuti ‘ŵaŵaliske’ ungweru.—Yesaya 60:1; Ŵafilipi 2:14, 15.
9, 10. Mu 1919, cifukwa wuli Ŵakhristu ŵanyake ŵakaŵa “ŵakucenjera” ndipo ŵanyake “ŵakupusa”?
9 Kweni, mu ntharika iyi ŵamwali ŵanyake ŵakaŵa na suzgo. Yesu wakalutizga kuti: “Ŵakupusa ŵakanena na ŵakucenjera, Tipaniko . . . mafuta ghinu; cifukwa nyali zithu zikuzimwa.” (Mateyu 25:8) Kwambura mafuta, nyali zingaŵala yayi. Ntheura mafuta gha nyali ghakutikumbuska Mazgu gha unenesko gha Ciuta na mzimu wake utuŵa, ivyo vikovwira ŵasopi ŵaunenesko kuti ŵayeghenge ungweru. (Salmo 119:130; Daniel 5:14) Pambere cilimika ca 1919 cindafike, Ŵakhristu ŵakucenjera ŵakuphakazgika ŵakalimbikira kuti ŵamanye khumbo la Ciuta kwa iwo, nangauli ŵakaŵa ŵakulopwa. Ntheura apo ŵakacemeka kuti ŵaŵale, ŵakaŵa ŵakunozgeka.—2 Timote 4:2; Ŵahebere 10:24, 25.
10 Kweni ŵakuphakazgika ŵanyake ŵakaŵa ŵambura kunozgeka kuti ŵajipeleke panji kulimbikira, nangauli ŵakakhumbanga kuŵa na Mwene nthengwa. Ntheura apo nyengo yikakwana kuti ŵayambeso kupharazga makani ghawemi, ŵakaŵa ŵambura kunozgeka. (Mateyu 24:14) Kweniso ŵakayezga kugongoweska ŵanyawo awo ŵakalimbikiranga, ico cikaŵa nga nkhuromba mafuta ghawo. Mu ntharika ya Yesu, kasi ŵamwali ŵakucenjera ŵakazgora wuli? Iwo ŵakati: ‘Panji ghangakwanira imwe na ise cara; kweni mulute ku ŵakusaska, mukajigulire mwekha.’ (Mateyu 25:9) Mwakuyana waka, Ŵakhristu ŵakuphakazgika ŵakugomezgeka mu 1919 ŵakakana kucita cilicose ico mphanyi cikaŵatimbanizga kuyegha ungweru. Ntheura ŵakatonda ciyezgo.
11. Nchivici cikacitikira ŵamwali ŵakupusa?
11 Paumaliro, Yesu wakuti ŵamwali ŵakupusa ‘ŵacali kuluta kukagura, mwene nthengwa wakiza; ndipo [awo ŵakaŵa] ŵakunozgeka ŵakanjira nayo mu zowara, ndipo ku muryango kukajalika. Pamanyuma ŵamwali ŵanyakeso ŵara ŵakiza, ŵakati, Fumu, Fumu, tijuliraniko. Kweni iye wakazgora wakati, Inya nadi nkhumunenerani, nkhumumanyani yayi.’ (Mateyu 25:10-12) Ŵanyake ŵakanozgeka yayi apo Mwene nthengwa wakizanga. Ntheura, ŵakatondeka ciyezgo, ndipo ŵakatondeka kuŵapo pa ciphikiro ca nthengwa kucanya. Nchacitima comene!
Ntharika ya Matalente
12. (a) Kasi Yesu wakayowoya ntharika wuli pa nkhani ya kugomezgeka? (b) Kasi munthu uyo ‘wakaya ku caru cinyake’ ni njani?
12 Wakati wayowoya ciyelezgero pa fundo ya kucenjera, Yesu wakayowoya ciyelezgero ca kugomezgeka. Wakati: “Kuli nga ndi munthu wakuya ku caru cinyake, uyo wakacema ŵazga ŵake, ndipo wakaŵapa cuma cake. Ndipo munyake wakamupa matalente ghankhondi, munyake ghaŵiri, munyake limoza; munthu na munthu kwakuyana na nkhongono zake: ndipo wakawuka wakaluta.” (Mateyu 25:14, 15) Munthu mu ntharika iyi ni Yesu, uyo ‘wakaya ku caru cinyake’ apo wakakwera kucanya mu 33 C.E. Kweni pambere wandakwere, Yesu ‘wakapeleka cuma cake’ kwa ŵasambiri ŵake ŵakugomezgeka. Mwauli?
13. Kasi Yesu wakayamba wuli kunozgekera mulimo ukuru ndiposo kulangura “ŵazga” ŵake kucita malonda?
13 Mu uteŵeti wake pa caru capasi, Yesu wakayamba kunozgekera mulimo ukuru mwa kupharazga makani ghawemi gha Ufumu mu caru cose ca Israyeli. (Mateyu 9:35-38) Pambere ‘wandalute ku caru cinyake,’ wakapeleka mulimo uwu kwa ŵasambiri ŵake ŵakugomezgeka, wakati: ‘Lutaninge mukasambizge mitundu yose, mukaŵabapatize mu zina la Ŵawiske na la Mwana na la mzimu utuŵa: muŵasambizge kukoreska vyose ivyo ndamulangulirani.’ (Mateyu 28:18-20) Na mazgu agha, Yesu wakaŵapa mazaza “ŵazga” ŵake kuti ŵacite malonda mupaka iyo wize, waliyose “kwakuyana na nkhongono zake.”
14. Cifukwa wuli ni waliyose yayi wakenera kucita malonda mwakuyana na ŵanyake?
14 Mazgu agha ghakulongora kuti Ŵakhristu ŵakale ŵakaŵa na mipata panji maluso ghakuyana yayi. Ŵanyake, nga ni Paulosi na Timote, ŵakaŵa na mwaŵi ukuru wa kupharazga na kusambizga. Ŵanyake ŵakwenera kuti ŵakaŵa na mwaŵi ucoko comene wa uteŵeti. Mwaciyelezgero, Ŵakhristu ŵanyake ŵakaŵa ŵazga, ndipo ŵanyake ŵakaŵa ŵalwari, ŵacekuru, panji ŵakapweleleranga mbumba zawo. Kweniso mauteŵeti ghanyake gha mpingo ghakapelekekanga kwa ŵasambiri wose yayi. Ŵanakazi na ŵanalume ŵanyake ŵakuphakazgika ŵakasambizganga yayi mu mpingo. (1 Ŵakorinte 14:34; 1 Timote 3:1; Yakobe 3:1) Ndipouli, ŵasambiri wose ŵakuphakazgika ŵa Khristu—ŵanakazi na ŵanalume—ŵakaphalirika kuti ŵacite malonda, kuti ŵagwiliskire nchito makora mipata na mwaŵi wawo mu uteŵeti Wacikhristu. Ndimo ŵanyawo ŵakucitira na lero wuwo.
Nyengo ya Kuskolera Yikwamba!
15, 16. (a) Kasi nyengo ya kupenderana cuma yikakwana pauli? (b) Kasi ŵakugomezgeka ŵakapika mwaŵi wuli unyake wa kucita malonda?
15 Ntharika yikulutilira kuti, yikati “yalutapo nyengo yitali, fumu ya ŵazga ŵeneawo yikiza, ndipo yikapenda nawo.” (Mateyu 25:19) Mu 1914—nyengo yitali kufuma mu 33 C.E.—Khristu Yesu wakayamba ufumu wake. Vilimika vitatu na hafu pamanyuma pake, mu 1918, wakiza mu tempele lauzimu la Ciuta na kufiska mazgu gha Petrosi, ghakuti: “Nyengo yakwambira ceruzgo mu nyumba ya Ciuta yiza.” (1 Petros 4:17; Malaki 3:1) Yikaŵa nyengo yakuti ŵapenderane cuma.
16 Kasi ŵazga, ŵabali ŵakuphakazgika ŵa Yesu, ŵakacita nagho vici “matalente” gha Fumu? Kwamba mu 33 C.E. kuya munthazi, kusazgapo vilimika vya kufupi na 1914, ŵanandi ŵakalimbikira kucita “malonda” agho Yesu wakaŵatuma. (Mateyu 25:16) Nanga ni apo nkhondo yakwamba yikaŵa mukati, ŵakalongora kuti ŵakakhumbanga nadi kuteŵetera Fumu. Cikaŵa cakwenelera kuti ŵakugomezgeka ŵapike mwaŵi unyake wa kucita ‘malonda.’ Nyengo ya umaliro wa mgonezi uwu yikafika. Makani ghawemi ghakenera kupharazgika pa caru cose. Yikaŵa nyengo ya kuvuna “masika gha caru.” (Civumbuzi 14:6, 7, 14-16) Ŵakukhalako ŵa mbuto ya tirigu ŵakenera kumanyikwa, ndipo “mzinda ukuru” wa mberere zinyake ukenera kuwunganiskika.—Civumbuzi 7:9; Mateyu 13:24-30.
17. Kasi Ŵakhristu ŵakugomezgeka ŵakuphakazgika ‘ŵakanjira [wuli] mu cimwemwe ca Fumu yawo’?
17 Nyengo ya vuna ni nyengo ya cimwemwe. (Salmo 126:6) Lekani apo Yesu wakapelekanga mulimo unyake kwa ŵabali ŵakuphakazgika mu 1919, wakati: “Waŵa wa magomezgeko pa vinthu vicoko, nditi ndikuŵike pa vinthu vinandi: njiranga mu cimwemwe ca fumu yako.” (Mateyu 25:21, 23) Ndipo cimwemwe ca Fumu nchikuru kuluska umo tingaghanaghanira, pakuti yapika Ufumu wa Ciuta. (Salmo 45:1, 2, 6, 7) Wupu wa muzga wa magomezgeko nawo ngwacimwemwe cifukwa wukwimira Fumu ndipo wukwandaniska cuma cake pa caru capasi. (2 Ŵakorinte 5:20) Cimwemwe cawo cikupulikikwa makora mu mazgu gha pa Yesaya 61:10, kuti: ‘Ndisekelerenge comene mwa Yehova, mzimu wane ukondwenge mwa Ciuta wane; cifukwa wandibenekelera na munjilira wa ciponosko.’
18. Cifukwa wuli ŵanyake ŵakatondeka ciyezgo, ndipo nchivici cikaŵacitikira?
18 Nchacitima kuti ŵanyake ŵakatondeka ciyezgo. Tikuŵazga kuti: ‘Uyo wakapokera talente limoza nayoso wakiza, wakati, Fumu, nkhamumanyani kuti muli ŵa nkhaza, mukuvuna apo mukawura kumija, mukuwunjika apo mukawura kuparanya: ndipo nkhopa, nkhaluta nkhakabisa talente linu pasi: wonani, muli nalo linu na linu.’ (Mateyu 25:24, 25) Mwakuyana waka, Ŵakhristu ŵanyake ŵakuphakazgika ŵakacita yayi “malonda.” Pambere cindafike cilimika ca 1914, ŵakalimbikira yayi kuphalirako ŵanthu cilindizga cawo, ndipo ŵakakhumba yayi kwambapo mu 1919. Kasi Yesu wakacita nawo wuli ŵakata aŵa? Wakaŵapoka maudindo ghose. ‘Ŵakaponyeka mu cisi ca kuwaro: kwenekuko kuŵenge kulira na kuska mino.’—Mateyu 25:28, 30.
Kuskolera Kucali Waka
19. Kasi kuskolera kukulutilira mwa nthowa wuli, ndipo Ŵakhristu ŵakuphakazgika mbakusimikizga kucitaci?
19 Ŵanandi awo ŵakenera kuŵa ŵazga ŵakuphakazgika ŵa Khristu mu nyengo yaumaliro ŵakaŵa kuti ŵandayambe kuteŵetera Yehova apo Yesu wakayamba kuskolera mu 1918. Kasi kuskolera kuli kuŵajumpha? Yayi. Nchito ya kuskolera yikayamba mu 1918/19 apo muzga wa magomezgeko na wa vinjeru nga ni gulu wakatonda ciyezgo. Mkhristu wakuphakazgika waliyose wakulutilira kuyezgeka, mupaka wapokere cididimizgo, panji cidindo. (Civumbuzi 7:1-3) Pakumanya fundo iyi, ŵabali ŵakuphakazgika ŵa Khristu mbakusimikizga kulutilira ‘kucita malonda’ mwakugomezgeka. Mbakusimikizga kuŵa ŵakucenjera, na kusunga mafuta ghakukwana mwakuti ungweru ulutilire kuŵala. Ŵakumanya kuti para waliyose wamalizga umoyo wake mwakugomezgeka, Yesu wamumupokelera mu malo ghakukhalamo kucanya.—Mateyu 24:13; Yohane 14:2-4; 1 Ŵakorinte 15:50, 51.
20. (a) Kasi ŵa mberere zinyake mbakusimikizga kucitaci lero? (b) Kasi Ŵakhristu ŵakuphakazgika ŵakumanya fundo wuli?
20 Ŵa mzinda ukuru wa mberere zinyake ŵalondezga ŵabali ŵawo ŵakuphakazgika. Ŵakumanya kuti ŵali na udindo ukuru cifukwa ca kumanya ivyo Ciuta walayizga. (Ezekiel 3:17-21) Ntheura, mwakovwirika na Mazgu gha Yehova ndiposo mzimu utuŵa, nawo ŵakusungilira mafuta ghakukwana mwa kusambira ndiposo kuwungana. Ndipo ŵakuŵaliska ungweru wawo, ŵakucitako nchito ya kupharazga na kusambizga, ntheura ‘ŵakucita malonda’ pamoza na ŵabali ŵawo ŵakuphakazgika. Kweni Ŵakhristu ŵakuphakazgika ŵakumanya makora kuti matalente ghakapelekeka kwa iwo. Ŵakwenera kuzakazgora umo cuma ca Fumu cikusungikira pa caru capasi. Nangauli iwo mbacoko waka, udindo wawo ŵangalekera ŵa mzinda ukuru yayi. Lekani muzga wa magomezgeko na wa vinjeru wakulutilira kupwelelera malonda gha Fumu, ndipo wakuwonga ŵa mzinda ukuru cifukwa ca wovwiri wawo. Ŵa mzinda ukuru ŵakumanya udindo uwo ŵabali ŵawo ŵakuphakazgika ŵali nawo, ndipo mbakukondwa kuteŵetera mwakulongozgeka na iwo.
21. Ni mazgu wuli gha kuciska agho ghakukhwaska Ŵakhristu wose kwamba mu 1919 mupaka lero?
21 Ntheura, nangauli ntharika ziŵiri izi zikutingweluska pa ivyo vikacitika mu 1919 panji pa nyengo yinyake, kweni fundo iyo tikusangapo yikukhwaska Ŵakhristu wose ŵaunenesko mu mazuŵa gha umaliro. Ntheura, nangauli mu ntharika ya ŵamwali khumi Yesu wakaciskanga Ŵakhristu ŵakuphakazgika awo ŵakaŵako pambere cilimika ca 1919 cindafike, kweni Mkhristu waliyose wakukhwaskika. Mphanyi tose tapulikira mazgu gha Yesu ghakuti: “Muŵe maso, cifukwa mulive kumanya zuŵa panji nesi ora.”—Mateyu 25:13.
[Mazgu ghamusi]
a Mwakuyana waka, ŵapostole ŵakati ŵafwa, “mphumphi zikali” zikafuma pakati pa ŵalara Ŵacikhristu ŵakuphakazgika.—Milimo 20:29, 30.
b Para mukukhumba nkhani yinyake ya ntharika ya Yesu, wonani buku la Chisungiko cha Padziko Lonse mu Ulamuliro wa “Kalonga wa Mtendere,” vipaturo 5 na 6. Lakupharazgika na Ŵakaboni ŵa Yehova.
Kasi Mungalongosora?
• Kasi Yesu wakaskolera pauli ŵasambiri ŵake, ndipo wakasanga vici?
• Cifukwa wuli Ŵakhristu ŵanyake ŵakuphakazgika ŵakalondezga “muzga muheni yura”?
• Kasi tingalongora wuli kuti tili ŵa vinjeru mwauzimu?
• Nga mbabali ŵakugomezgeka ŵa Yesu, kasi tingalutilira wuli ‘kucita malonda’?
[Mafumbo]
[Bokosi pa peji 29]
KASI YESU WIZENGE PAULI?
Mu buku la Mateyu cipaturo 24 na 25, tikupulika kuti Yesu “wizenge” mu nthowa zakupambanapambana. Wacitenge kusamuka yayi kuti “wize.” Kweni “wizenge” mwa kuzgokera ku ŵanthu panji ŵasambiri ŵake, mwakuti ŵeruzgike. Ntheura, mu 1919 “wakiza” nga ni Fumu yakwimikika. (Mateyu 16:28; 17:1; Milimo 1:11) Mu 1918 “wakiza” nga ni thenga la phangano na kwamba kweruzga awo ŵakatenge mbateŵeti ŵa Yehova. (Malaki 3:1-3; 1 Petros 4:17) Pa Haramagedoni, “wizenge” kuti wazakeruzge ŵalwani ŵa Yehova.—Civumbuzi 19:11-16.
Kanandi waka, pa Mateyu 24:29-44 na 25:31-46 pakuzunulika za kwiza uko kuzamucitika pa “cisuzgo cikuru.” (Civumbuzi 7:14) Kweni kwiza uko kwazunulika kanandi waka pa Mateyu 24:45 mupaka 25:30 kukucitika pa kweruzga awo ŵakuti mbasambiri kwamba mu 1918 kuya munthazi. Mwaciyelezgero, cingapulikikwa yayi kuyowoya kuti muzga wakugomezgeka wazamupokera njombe para Yesu wiza pa “cisuzgo cikuru,” panji kuti ŵamwali ŵakupusa na muzga mukata, yura wakabisa talente la Fumu ŵazamweruzgika pa nyengo iyo. Viŵenge nthena, mphanyi ŵakuphakazgika ŵanandi ŵanguzakasangika ŵambura kugomezgeka nyengo iyo, ndipo malo ghawo mphanyi ghanguzakapelekeka ku ŵanthu ŵanyake. Kweni Lemba la Civumbuzi 7:3 likulongora kuti panyengo iyo, ŵakuphakazgika wose ŵa Khristu ŵazamuŵa kuti ŵapokera ‘cididimizgo,’ panji cidindo.
[Cithuzithuzi pa peji 27]
Vitumbiko vikamupamba “muzga muheni” mu 1919
[Cithuzithuzi pa peji 28]
Ŵamwali ŵavinjeru ŵakaŵa ŵakunozgeka apo mwene nthengwa wakizanga
[Cithuzithuzi pa peji 30]
Ŵazga ŵa magomezgeko ŵakacitanga “malonda”
Muzga mukata wakacita yayi malonda
[Vithuzithuzi pa peji 31]
Ŵakuphakazgika na ŵa “mzinda ukuru” ŵakulutilira kuŵaliska ungweru wawo